যিরমিয় 37 - Chakma Bible

যিরমিয় জেলখানাত্

¹ বাবিলর রাজা নবূখদ্‌নিৎসরে যোশিয়র পুয়ো সিদিকিয়রে যিহূদার রাজা বানেল, সেনত্তে সিদিকিয় যিহোয়াকীমর পুয়ো কনিয়র, অত্তাৎ যিহোয়াখিনো জাগানত্ রাজাগিরি গরা ধুরিলো।

² লগেপ্রভু ভাববাদী যিরমিয়রে দিইনে যেদক্কানি কধা কোইয়্যে সেক্কে সিদিকিয় বা তার চাগরুনে বা দেজ মানুচ্চুনে কনজনে ন-শুনিদাক্।

³ তো একদিন্যে রাজা সিদিকিয় শেলিমিয়র পুয়ো যিহূখল আর মাসেয়র পুয়ো ধর্মগুরু সফনিয়রে এ হবরান দিইনে যিরমিয় ইধু পাধেই দিলো, “তুই দোয়্যে গুরিনে আমাত্তে আমা গোজেন লগেপ্রভু ইধু তবনা গর্।”

⁴ যিরমিয় সে সময়োত্ মানুচ্চুনো ইধু গমেডালে যানা-এযানা গুরিদো, কিত্তে সেক্কেয়ো তারে জেলোত্ দিয়্যে ন-অয়।

⁵ সেক্কে বাবিলীয়গুনে যিরূশালেমান ঘিরি রাগেয়োন, মাত্তর্ তারা যেক্কে শুনিলাক্ ফরৌণর সৈন্যদলুন মিসরত্তুন্ নিগিল্ল্যন সেক্কে তারা যিরূশালেমান ফেলেই গেলাক্।

^6-7 সে পরেদি ইস্রায়েলর গোজেন লগেপ্রভু ভাববাদী যিরমিয়রে কলঅ, যিহূদার রাজা, যে তরে মইধু পুযোর্ গুরিবাত্তে পাদেয়্যে, তারে কঅ, ফরৌণর যে সৈন্যদলুন তমারে সাহায্য গুরিবাত্তে নিগিলি এচ্চ্যন্ তারা মিসরত্ নিজো দেজত্ ফিরি যেবাক্।

⁸ সে পরেদি বাবিলীয়গুনে ফিরি এইনে এ শঅরান আক্রমণ গুরিবাক্; তারা ইয়েন গজক্ গুরিনে পুড়ি ফেলেই দিবাক্।

⁹ “ ‘তুমি এ কধাগান ভাবিনে নিজোরে ন-ঠোগেয়ো যে, বাবিলীয়গুনে ঘেচ্চেকগুরি তমারে ছাড়িনে ন-যেবাক্। না, তারা ন-যেবাক্।

¹⁰ যে বাবিলীয় সৈন্যগুনে তমারে আক্রমণ গোজ্যন্ তুমি যুনি তারারে বেক্কুনোরে ওদেই দুয়ো আর বানা তারার আহত মানুচ্চুনে তাম্বুলোত্ পড়ি থান, সালে তারা নিগিলি এইনে এ শঅরান পুড়ি ফেলেই দিবাক্।’ ”

^11-12 ফরৌণর সৈন্যদলুনোর কারনে বাবিলীয় সৈন্যদলুনে যিরূশালেমান্ ফেলেই যানার পরেদি যিরমিয় বিন্যামীন চাগালা ভিদিরে তা সোম্বোত্তিগানি গজক্ গুরিবাত্তে যিরূশালেমান্ ছাড়িনে রওনা অলাক্।

¹³ মাত্তর্ যেক্কে তে বিন্যামীন-গেদোত্ লুমিলো সেক্কে যিরিয় নাঙে চুগিদারুনোর্ সেনাপতিবো তারে ধুরিনে কলঅ, “তুই বাবিলীয়গুনোর্ তপ্পে যর্।” এ যিরিয় অলদে শেলিমিয়র পুয়ো, শেলিমিয় হনানিয়র পুয়ো।

¹⁴ যিরমিয় কলঅ, “ইয়েন মিজে কধা, মুই বাবিলীয়গুনোর তপ্পে ন-যাঙর্।” মাত্তর্ যিরিয় তা কধা ন-শুনিনে তারে ধুরিনে রাজা চাগরুনো মুজুঙোত্ নেযেল।

¹⁵ সে রাজার চাগরুনে যিরমিয় উগুরে রাগ গুরিনে তারে পিদে ধুরিলাক্ আর লিগিয়্যে যোনাথন ঘরত্ তারে বানি রাগেলাক্; সিয়েনরে তারা জেলখানা বানেয়োন।

¹⁶ সেই জেলখানাগানর্ মাদির্ তলে এক্কো ঘুদিত্ যিরমিয়রে রাগা অলঅ। সিয়েনত্ তে ভালোক্ দিন রলঅ।

¹⁷ সে পরেদি রাজা সিদিকিয় মানুচ্ পাধেইনে তারে রাজঘরত্ ডাগি আনিনে ভিদিরে ভিদিরে পুযোর্ গুরিলো, “লগেপ্রভুর কনঅ কধা আঘে নাকি?” জোবত্ যিরমিয় কলঅ, “অয়, আঘে। তরে বাবিল রাজার আঢত্ তুলি দিয়্যে অবঅ।”

¹⁸ সে পরেদি যিরমিয় রাজা সিদিকিয়রে কলঅ, “মুই তর্ বা তঅ চাগরুনোরে বা এ মানুচ্চুনো বিরুদ্ধে কি দুষ্ গোজ্যং যে, তুমি মরে জেলোত্ রাগেয়ো?

¹⁹ যিগুনে তমা ইধু এ আগাম্ কধাগান গোজ্যেন্, বাবিল রাজা তরে বা এ দেজ্‌চানরে আক্রমণ ন-গুরিবো, তমা সেই ভাববাদীগুন কুদু?

²⁰ মাত্তর্ ইক্কিনি ও মর্ প্রভু মহারাজ, দোয়্যে গুরি শুন। তইধু মুই মর্ এ কোজোলীগান রাগাঙর্, তুই মরে লিগিয়্যে যোনাথন ঘরত্ আর্ ন-পাদেবে, পাদেলে মুই সিদু মুরি যেম্।”

²¹ সেক্কে রাজা সিদিকিয় যিরমিয়রে চুগিদারুনো উদোনত্ থবাত্তে উগুম দিলো আর শঅরর্ বেক রুটিগানি থুম্ ন-অনা সং পত্তিদিন রুটিবলাগুনোরে পধত্তুন্ তারে এক্কান গুরি রুটি দিবাত্তে উগুম দিলো। সেনত্তে যিরমিয় চুগিদারুনো উদোনত্ রলঅ।