যিরমিয় 36 - Chakma Bible

যিরমিয়র লেখ্যে বোইবো পুড়ি ফেলেই দেনা

¹ যোশিয়র পুয়ো যিহূদার রাজা যিহোয়াকীমোর রাজাগিরির চের্ বজরত্ লগেপ্রভুর এ কধাগান যিরমিয় ইধু ফগদাং অলঅ,

² “তুই ভাজ্ গুরি থোইয়্যে এক্কো বোই লঅ আর যোশিয়র রাজাগিরির সময়ত্তুন্ ধুরি এচ্চ্যে সং ইস্রায়েল, যিহূদা আর অন্য জাদ পৌইদ্যেনে মুই তরে যে কধানি কোইয়োং সিয়েনি লেগ্।

³ যিহূদা মানুচ্চুনো উগুরে যেদক্কানি দজা ঘুদিবার বিষয় ঠিগ্ গোজ্যং অয়ত তারা সে কধানি শুনিনে পত্তিজনে তারার ভান্ন্যেই পধত্তুন ফিরিবাক্; সেক্কে মুই তারার ভান্ন্যেই আর পাপ্‌‌‌পানি খেমা গুরিম।”

⁴ সেক্কে যিরমিয় নেরিয়র পুয়ো বারূকরে ডাগিলো আর লগেপ্রভু যিরমিয়রে যেদক্কানি কধা কোইয়্যে সিয়েনি তা মুয়োত্তুন্ শুনিনে বারূকে ভাজ্ গুরি রাগেয়্যে সেই বোইবোত্ লিগিলো।

⁵ সে পরেদি যিরমিয় বারূকরে কলঅ, “মরে লগেপ্রভুর ঘরত্ যাদে মানা গরা ওইয়্যে বিলিনে মুই সিদু যেই ন-পারং।

⁶ সেনত্তে তুই এক্কো উবোবাসর্ দিনোত্ লগেপ্রভুর ঘরত্ যেইনে এ বোইবোত্ লেখ্যে লগেপ্রভুর কধানি মানুচ্চুনোরে পড়ি শুনা যিয়েনি তুই মঅ মুয়োত্তুন্ শুনিনে লেখ্যচ্। যিহূদার যে মানুচ্চুনে তারার শঅরানিত্তুন্ এবাক্ তারা বেক্কুনো মুজুঙোত্ সিয়েনি পড়িবো।

⁷ অয়ত তারা লগেপ্রভু ইধু তবনা গুরিবাক্ আর পত্তিজনে তারার ভান্ন্যেই পধত্তুন ফিরিবাক্, কিত্তে এ মানুচ্চুনো বিরুদ্ধে লগেপ্রভু অমকদ অহুজি আর রাগর্ কধা কোইয়্যে।”

⁸ ভাববাদী যিরমিয় নেরিয়র পুয়ো বারূকরে যিয়েনি গুরিবাত্তে কোইয়্যে সিয়েনি তে বেক্কানি গুরিলো; তে লগেপ্রভুর ঘরত্ সে বোইবোত্তুন্ লগেপ্রভুর কধানি পড়িলো।

⁹ যোশিয়র পুয়ো যিহূদার রাজা যিহোয়াকীমোর রাজাগিরির পাচ্ বজরর নয় মাসত্ যিরূশালেমর বেক্ মানুচ্চুনোত্তে আর যিহূদার শঅরানিত্তুন্ এচ্চ্যে মানুচ্চুনোত্তে লগেপ্রভুর মুজুঙোত্ উবোস্ থেবার কধা ফগদাং গরা অলঅ।

¹⁰ সেক্কে লগেপ্রভুর ঘর নূয়ো গেট্টো ইধু উগুরে উদোনত্ শাফনর পুয়ো গমরিয় লিগিয়্যেবোর ঘুদিবোত্ থিয়্যেইনে বারূকে সে বোইবোত্তুন্ যিরমিয়র কধানি বেক মানুচ্চুনো মুজুঙোত্ পড়িলো।

¹¹ শাফনর নাদিন, অত্তাৎ গমরিয়র পুয়ো মীখায়ে যেক্কে সে বোইবোত্তুন্ লগেপ্রভুর বেক্ কধানি শুনিলো,

¹² সেক্কে তে রাজঘর ভিদিরে লিগিয়্যেবোর ঘুদিবোত্ গেলঅ; সিদু বেক রাজার কামগুরিয়্যেগুন, অত্তাৎ লিগিয়্যে ইলীশামা, শময়িয়র পুয়ো দলায়, অক্‌বোরর পুয়ো ইল্‌নাথন, শাফনর পুয়ো গমরিয়, হনানিয়র পুয়ো সিদিকিয় আর অন্য বেক্ রাজার কামগুরিয়্যেগুন বুয়োই এলাক্।

¹³ বারূকে সে বোইবোত্তুন্ মানুচ্চুনো ইধু যিয়েনি যিয়েনি পড়িলো সিয়েনি মীখায় সে রাজার কামগুরিয়্যেগুনো ইধু বেক্কানি কলঅ;

¹⁴ সেক্কে রাজার চাগরুনে বেক্কুনে নথনিয়র পুয়ো যিহূদীরে দিইনে বারূকরে কোই পাধেলাক্, “তুই যে বোইবোত্তুন্ মানুচ্চুনোরে পড়ে শুনেয়োচ্ সিবে আন।” নথনিয় এলদে শেলিমিয়র পুয়ো, শেলিমিয় এলদে কূশির পুয়ো। সেক্কে নেরিয়র পুয়ো বারূকে সে বোইবো আঢত্ গুরিনে তারা ইধু এলঅ।

¹⁵ তারা বারূকরে কলাক্, “তুই দোয়্যে গুরি বুয়োইনে আমা ইধু সিবে পড়ি শুনো।” সেক্কে বারূকে তারা ইধু সিবে পড়ি শুনেল।

¹⁶ তারা বেক কধানি শুনিনে দরে একজন আর একজন ইন্দি রিনি চেলাক্ আর বারূকরে কলাক্, “এই বেক্ কধানি রাজারে যেইনে আমাত্তুন্ জানা পুরিবো।”

¹⁷ সে পরেদি তারা বারূকরে পুজোর্ গুরিলাক্, “আমারে কঅ তুই কিবাবোত্যেগুরি এই বেক কধানি লিগিলে? যিরমিয় মুয়োত্তুন্ শুনিনে কি তুই লেখ্যচ্?”

¹⁸ জোবত্ বারূকে কলঅ, “অয়, তে মরে এই বেক কধানি কোইয়্যে আর মুই সিয়েনি এ বোইবোত্ কালিলোই লেখ্যং।”

¹⁹ সেক্কে রাজার চাগরুনে বারূকরে কলাক্, “তুই আর যিরমিয় যেইনে পোল্ল্যেই থাগঅ। তুমি কুদু আগঅ সিয়েন যেন কনজনে হবর্ ন-পান।”

²⁰ যেরেদি রাজার চাগরুনে সে বোইবো লিগিয়্যে ইলীশামার ঘুদিবোত্ থৈইনে রাজদরবারত্ রাজার ইধু গেলাক্ আর তারে বেক কধানি জানেলাক্।

²¹ সেক্কে রাজা সে বোইবো আনিবাত্তে যিহূদীরে পাধেল। লিগিয়্যে ইলীশামার ঘুদিবোত্তুন্ যিহূদী বোইবো আনিনে রাজা আর তা কায়-কুরে থিয়্যেইয়্যে বেক্ রাজার চাগরুনো মুজুঙোত্ পোড়েই শুনেল।

²² সেক্কে এলদে বজরর্ নয় মাস। রাজা তা যার্‌‌কাল কাদেবার ঘরত্ বুয়োই এলঅ আর তা মুজুঙোত্ আগুনো পিলেবোত্ আগুন জ্বলের্।

²³ যিহূদী সে বোইবো কিজু পড়ানার পরেদি রাজা লিগিয়্যেবোর ছুরিগান্দোই সে ভাগ্‌কান কাবিনে আগুনো পিলেবোত্ ফেলেই দিলো; এবাবোত্যেগুরি গোদা বোইবো আগুনোত্ পুড়ি দিয়্যে অলঅ।

²⁴ রাজা আর তার যিদুক্কুন মান্‌জ্যে সে কধানি শুনিলাক্ তারা নয়ো দোরেলাক্ বা তারার কাবড়ানিয়ো ন-ফাদিলাক্।

²⁵ ইল্‌নাথন, দলায় আর গমরিয় রাজারে সে বোইবো ন-পড়িবাত্তে কোজোলী গুরিলেয়ো রাজা তারা কধানি ন-শুনিলো।

²⁶ সিয়েনর বদলে তে লিগিয়্যে বারূক আর ভাববাদী যিরমিয়রে ধুরি আনিবাত্তে রাজার পুয়ো যিরহমেল, অস্রীয়েলর পুয়ো সরায় আর অব্দিয়্যেলর পুয়ো শেলিমিয়রে উগুম দিলো। মাত্তর্ লগেপ্রভু তারারে লুগেই রাগেল।

²⁷ যিরমিয়র কোইয়্যে কধানি বারূকে যে বোইবোত্ লেখ্যে সিবে পুড়ি দেনার পরেদি লগেপ্রভুর এ কধানি যিরমিয় ইধু ফগদাং অলঅ,

²⁸ “যিহূদার রাজা যিহোয়াকীমে যে বোইবো পুড়ি দিয়্যে সে পত্তম বোইবোত যিয়েনি লেগা এলঅ সিয়েনি বেক্কানি তুই আর এক্কো ভাজ্ গুরি থোইয়্যে বোই নিইনে সিয়েনত্ লেগ্।

²⁹ ইয়েনি বাদেয়ো তুই যিহূদার রাজা যিহোয়াকীমরে কঅ, লগেপ্রভু কোইয়্যেদে, ‘তুই বোইবো পুড়ি দিইনে কিত্তে পুজোর্ গরর্ যিরমিয় এ বোইবো ভিদিরে লেখ্যেদে, বাবিলোর রাজা হামাক্কায় এইনে এ দেজ্‌‌চান ভস্ত গুরিবো আর মানুচ্ আর য়েমান দুনোগুন শেজ্ গুরি দিবো?

³⁰ সেনত্তে তঅ পৌইদ্যেনে মুই লগেপ্রভু কঙর্, দায়ূদোর সিংহাসনত্ বজিবাত্তে তত্তুন্ কনজন বাঁজি ন-থেবাক্; তঅ কিয়্যেগান বারেদি ফেলেই দিয়্যে অবঅ আর সিয়েন দিনো অক্তত্ গরমত্ আর রেদো অক্তত্ ঠান্ডায় পড়ি থেবঅ।

³¹ মুই তর্ আর তঅ ঝি-পুয়োগুনোর আর তঅ চাগরুনোর ভান্ন্যেই কামানিত্তে তমারে সাজা দিম; মুই তমা বিরুদ্ধে যেদক্কানি দজার্ কধা কোইয়োং সিয়েনি বেক্কানি তমা উগুরে আর যিরূশালেম আর যিহূদা মানুচ্চুনো উগুরে আনিম, কিত্তে তুমি কধা ন-শুনো।’ ”

³² সেক্কে যিরমিয় আর এক্কো ভাজ্ গুরি থোইয়্যে বোই নিইনে নেরিয়র পুয়ো লিগিয়্যে বারূকরে দিলো; যিহূদার রাজা যিহোয়াকীমে যে বোইবো আগুনোত্ পুড়ি দিয়্যে সিয়েনত্ যেদক্কানি লেগা এলঅ সেই বেক কধানি যিরমিয় মুয়োত্তুন্ শুনিনে বারূকে আরঅ লিগিলো। সেবাবোত্যে আরঅ বোউত্ কধায়ো সিবে সমারে মিজে অলঅ।