যিরমিয় 35 - Chakma Bible

রেখবীয়গুনোর বাধ্য থানা

¹ যোশিয়র পুয়ো যিহূদার রাজা যিহোয়াকীমর রাজাগিরির সময়োত্ লগেপ্রভু যিরমিয়রে কলঅ,

² “তুই রেখবীয় বংশর মানুচ্চনো ইধু যেইনে তারারে মঅ ঘরর্ এক্কো গুদিত্ এবাত্তে কঅ আর তারারে আংগুর-রস হেবাত্তে দে।”

³ সেক্কে মুই হবৎসিনিয়র নাদিন, অত্তাৎ যিরমিয়র পুয়ো যাসিনিয় আর তার বেক্ ভেইয়ুন আর পুয়োগুনোরে অত্তাৎ রেখবীয়গুনোর পুরো বংশবোরে আনিলুং।

⁴ মুই তারার লগেপ্রভুর ঘরত্ গোজেনর মানুচ্ যিগ্‌দলিয়র পুয়ো হানন পুয়োগুনোর গুদিত্ নেযেলুং। সিবে অলদে শল্লুমর পুয়ো চুগিদার্ মাসেয়র গুদি উগুরে চাগরুনোর গুদিবো কায়-কুরে।

⁵ মুই সে পরেদি সেই রেখবীয়গনোর মুজুঙোত্ আংগুর-রসে ভরা কয়েক্কো কদরা আর কয়েক্কো গলস্ থোইনে তারারে কলুং, “তুমি আংগুর-রস হঅ।”

⁶ মাত্তর্ তারা কলাক্, “আমি আংগুর-রস ন-হেই, কিত্তে আমা পুরোণি মানুচ্ রেখবর পুয়ো যিহোনাদবে আমারে এ উগুমান দিয়্যে, ‘তুমি বা তমা বংশধরুনে কনদিন্‌অ আংগুর-রস ন-হেবা।

⁷ ইয়েনবাদেয়ো তুমি কনদিন্‌অ ঘর্ ন-বানেবা, বিজি ন-ফেলেবা বা আংগুর-খেত্ ন-কিনিবা বা চাষ ন-গুরিবা; মাত্তর্ নিত্য তাম্বুলোত্ বজত্তি গুরিবা। সালে তুমি যে দেজত্ বিদেশীগুনো ধোক্ক্যেন থেবা সিদু ভালোক্ দিন থেই পারিবা।’

⁸ আমা পুরোণি মানুচ্ রেখবর পুয়ো যিহোনাদবে আমারে যিয়েনি উগুম গোজ্যে আমি সিয়েনি বেক্কানি পালেই এজির্। আমি, আমা মোগ্ বা ঝি-পুয়োগুন কনজনে কনদিন্‌অ আংগুর-রস ন-হান,

⁹ বজত্তি গুরিবাত্তে ঘর্ ন-বানং বা আংগুর খেত, শোজ্য বা ফসলর খেত্অ ন-গরং।

¹⁰ আমি তাম্বুলোত্ তাম্বুলোত্ বজত্তি গুরি এজির্ আর আমা পুরোণি মানুচ্ যিহোনাদবে আমারে যিয়েনি উগুম গোজ্যে সিয়েনি বেক্কানি আমি গমেডালে পালেই এজির্।

¹¹ মাত্তর্ যেক্কে বাবিলর রাজা নবূখদ্‌নিৎসরে এ দেজ্‌চান আক্রমন গুরিলো সেক্কে আমি কলং, ‘বাবিলীয় আর অরামীয় সৈন্যগুনোত্তুন ধেই যঅ, আমি যিরূশালেমত্ যেই।’ সেনত্তে আমি যিরূশালেমত্ রোইয়্যেই।”‌

^12-13 সে পরেদি ইস্রায়েলর গোজেন বেগত্তুন্ খেমতাবলা লগেপ্রভু মরে যিহূদা আর যিরূশালেম মানুচ্চুনো ইধু যেইনে এ কধাগান কবাত্তে কলঅ, মুই লগেপ্রভু কঙর্, কিত্তে তুমি মঅ শিক্ষ্যেগান মানি ন-লর্ আর মঅ কধানি ন-পালর্?

¹⁴ রেখবর পুয়ো যিহোনাদবে তা পুয়োগুনোরে আংগুর-রস হেবাত্তে মানা গোজ্যে আর সেই উগুমান তারা পালাদন্। এজঅ সং তারা আংগুর-রস ন-হান, কিত্তে তারা তারার পুরোণি মানুচ্চুনোর উগুমান মানন্। মাত্তর্ মুই তমারে বারে বারে কোইয়োং, তো তুমি মঅ কধাগান ন-শুনো।

¹⁵ মুই মর্ বেক চাগরুনোরে, অত্তাৎ ভাববাদীগুনোরে বারে বারে তমা ইধু পাদেয়োং। তারা কোইয়োন্দে, তুমি পত্তিজনে ভান্ন্যেই পধিত্তুন ফিরো আর তমা চালচলনানি গম্ গরঅ; দেব-দেবেদাগুনোরে সেবা গুরিবাত্তে তারা পিজেদি ন-যেয়ো। সালে যে দেজ্‌চান মুই তমারে আর তমা পুরোণি মানুচ্চুনোরে দুয়োং সিয়েনত্ তুমি বজত্তি গুরি পারিবা। মাত্তর্ তুমি মঅ কধালোই মনযোগ ন-দুয়ো আর ন-শুনো। ‌‍

¹⁶ রেখবর পুয়ো যিহোনাদবর বংশধরুনে তারার পুরোণি মানুচ্চুনোর দিয়্যে উগুমানি পালেই এত্তন, মাত্তর্ তুমি মঅ কধালোই বাধ্য ন-অ।

¹⁷ “সেনত্তে মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, ‘শুন, মুই যিহূদা আর যিরূশালেমত্ বজত্তি গুরিয়্যে পত্তিজনর বিরুদ্ধে যেদক্কানি দজার্ কধা কোইয়োং সিয়েনির এক এক্কান মুই তারা উগুরে ঘোদেম্। মুই তারারে কোইয়োং, মাত্তর্ তারা ন-শুনোন্; মুই তারারে ডাক্যং, মাত্তর্ তারা জোব্ ন-দুয়োন।’ ”

¹⁸ ইয়েনর্ পরেদি যিরমিয় রেখবীয়গুনোরে কলঅ, ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, “তুমি তমার পুরোণি মানুচ্ যিহোনাদবর উগুম পালর্ আর তার বেক্ উগুম মজিম্ চলর্ আর তার উগুম মজিম্ বেক কামানি গোজ্য।

¹⁹ সেনত্তে মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, মর্ সেবা গুরিবাত্তে রেখবর পুয়ো যিহোনাদবর বংশত্ কনদিন্‌অ মান্‌জ্যর অভাব ন-অবঅ।” ‌‍‍