যিরমিয় 33 - Chakma Bible

ক্ষতিপূরোণর এগেম্

¹ যিরমিয় সেক্কেয়ো চুগিদারুনো উদোনত্ বন্দী এলঅ, এমন্ সময়ত্ দ্বিবার্ লগেপ্রভুর কধা তাইধু ফগদাং অলঅ।

² লগেপ্রভু কলঅ, মঅ নাঙান্ লগেপ্রভু, মুই কাম্ গরং; যে কামানি মুই গরং সিয়েনির পরিকল্পনা গরং আর সিয়েন থুম্ গরং। মুই কঙর্,

³ মরে ডাগ্, মুই তরে জোব্ দিম আর এমন মহৎ আর এমন গুমুরো কধা কোম্ যিয়েনি তুই হবর্ ন-পাজ্।

^4-5 বাবিলীয়গুনো লগে যুদ্ধোর্ সময়োত্ দেবাল সমারে বাস্যে গুরি কুড়্ আর তলোয়ার আঢত্তুন্ রোক্ষ্যে পেবাত্তে এ শঅরর্ যেদক্কানি ঘর্ আর যিহূদার রাজঘরানি ভাঙি ফেলা ওইয়্যে সিয়েনি সেই বেক মানুচ্চুনোর মরাকিয়্যেলোই ভর্‌পুনং অবঅ যিগুনোরে মুই মর্ বেজার্ ওইনে আর রাগে মারে ফেলেম। তারার বেক্ পাজিগানিত্তে এ শঅর ইন্দিত্তুন্ মুই মঅ মুয়োন ফিরেই রাগেম। মুই ইস্রায়েলর গোজেন লগেপ্রভু এ কধাগান কঙর্।

⁶ তো মুই ইয়েন্দোই স্বাস্থ্য আর সুস্থতা আনিম; মঅ মানুচ্চুনোরে মুই গম্ গুরিম আর সত্যর্ সুগ্-শান্দি অমকদগুরি পেবাত্তে দিম।

⁷ মুই যিহূদা আর ইস্রায়েলর মানুচ্চুনোরে বন্দীদজাত্তুন্ ফিরেই আনিম আর তারা দেজ্‌‌চান আগ ধোক্ক্যেন তুলি দিম।

⁸ মঅ বিরুদ্ধে তারা যেদক্কানি পাপ গোজ্যন্ সিয়েনিত্তুন্ তারারে শুদ্ধো গুরিম আর মঅ বিরুদ্ধে গোজ্যে তারার বেক অন্যেয়ানি আর উল্লোমীগানি খেমা গুরিম।

⁹ সেক্কে এ শঅরানে পিত্‌‌থিমীর বেক জাদ্‌তুনো মুজুঙোত্ মরে হুজি আর সর্মান গুরিবো আর বাঈনী দান গুরিবো। মুই তার যেদক্কানি ভালেদি গুরিম সে জাদ্‌তুনে সিয়েন শুনিবাক্, আর তারে দিয়্যে অমকদ ভালেদি আর সুগ্ শান্দি দেগিনে দরে গির্‌‌গিরেবাক্।

^10-11 “তুমি এ জাগান পৌইদ্যেনে কোই থাগঅ, ‘ইয়েন এক্কান ফেলা যেইয়্যে ভূই; ইয়েনত্ মানুচ্ বা য়েমান কিচ্চু নেই।’ মাত্তর্ যিহূদার যে শঅরানি আর যিরূশালেমর যে পথ্‌তানি খালি পড়ি আঘে, সিয়েনত্ মানুচ্ বা য়েমান বজত্তি ন-গরন সিয়েনত্ আরঅ ফুত্তি আর হুজির্ রঅ বা নেগ-মোগোর্ রঅ শুনো যেবঅ; যিগুনে লগেপ্রভুর ঘরত্ ভালেদি উৎসর্বত্তে জিনিস আনিবাক্ তারার্ রঅগুনো শুনো যেবঅ। তারা কবাক্, ‘বেগত্তুন্ খেমতাবলা লগেপ্রভুরে সাধুবাদ্ দুয়ো, কিত্তে লগেপ্রভু মংগলময়, তার অমকদ কোচ্‌‍‍‍পানা জিংকানিবরত্তে থিদেবর্।’ আগ ধোক্ক্যেন মুই এ দেজর্ অবস্থাগান ফিরেম্।

¹² এই ফেলাযেইয়্যে ভূইয়ানি, যিয়েনত্ মানুচ্ আর য়েমান কিচ্চু নেই, সিয়েনত্ আর সিদুগোর্ বেক শঅরানিত্ আর আদামানিত্ আরঅ গরগ্‌‍‍‍কুনোর ভেড়াগুনোত্তে চোরেয়্যে ভূই অবঅ।‍‍

¹³ অজল্ আর নিজো মুড়োমুড়ি চাগালার বেক্ আদাম আর শঅরত্, বিন্যামীন চাগালাত, যিরূশালেমর চেরোকিত্তে চাগালাত্ আর যিহূদার আর নেগেভর বেক্ আদামানি আর শঅরত্ যিগুনে ভেড়াগুনোর সংখ্যেগুন গুণোন তারার আঢ তলেদি আরঅ ভেড়া পালুন যানা-এযানা গুরিবাক্। মুই লগেপ্রভু এ কধাগান কঙর্।”

¹⁴ লগেপ্রভু কোইয়্যেদে, “ইস্রায়েল আর যিহূদার মানুচ্চুনোরে মুই যে ভালেদির্ এগেম্ গোজ্যং সময় এজের্ যেক্কে মুই সিয়েনি পূরোণ গুরিম।

¹⁵ সে দিনুনোত্ আর সে সময়োত্ মুই দায়ূদোর বংশত্তুন্ এক্কো ভালেদির্ চারা উদিবাত্তে দিম্; যিবে ন্যায় আর গম্ তে দেজ ভিদিরে সিয়েনই গুরিবো।

¹⁶ সে অক্তত্ যিহূদার মানুচ্চুনে উদ্ধোর্ পেবাক্ আর যিরূশালেমর মানুচ্চুনে গমেডালে বজত্তি গুরিবাক্। তারে এ নাঙে ডাগা অবঅ-লগেপ্রভু আমার্ নিদ্দুষিতা।

¹⁷ ইস্রায়েলর সিংহাসন বোজেবাত্তে দায়ূদোর বংশত্ কনঅ মান্‌জ্যর অভাব ন-অবঅ।‍‍‍‍

¹⁸ মঅ মুজুঙোত্ থিয়্যেইনে নিত্য পুজ্যে-উৎসর্বর, শোস্য-উৎসর্বর আর এ্যামান-উৎসর্বর অনুষ্ঠান গুরিবাত্তে লেবীয় ধর্মগুরুগুনো ভিদিরেয়ো মান্‌জ্যর অভাব ন-অবঅ‍।”‍‍‍

¹⁹ ইয়েনর্ পরেদি লগেপ্রভুর এ কধাগান যিরমিয় ইধু ফগদাং অলঅ,

²⁰ “মুই লগেপ্রভু কঙর্, দিন আর রেদ্ পৌইদ্যেনে মর্ যে সুদোমান আঘে সিয়েন যুনি ভাঙা যায় যেনে ঠিগ্ সময়োত্ রেদ্ বা দিন ন-অয়,

²¹ সালে মর্ চাগর দায়ূদোত্তে আর মঅ মুজুঙোত্ থিয়্যেইনে যিগুনে সেবা-কাম গরন সেই লেবীয় ধর্মগুরুগুনোত্তে মুই যে সুদোমান থিদেবর্ গোজ্যং সিয়েন্‌অ ভাঙা যেবঅ আর দায়ূদোর সিংহাসনত্ বুজিনে রাজাগিরি গুরিবাত্তে তার কনঅ বংশধর ন-থেবাক্।

²² মর্ চাগর দায়ূদোর বংশধরুনোত্তে আর যে লেবীয়গুনে মঅ মুজুঙোত্ থিয়্যেইনে সেবা-কাম্ গরন তারারে মুই আগাজ তারা ধোক্ক্যেন বাড়েই দিম্ আর সাগর-পার কোরোলী ধোক্ক্যেন গুরিম, যিগুন গণা ন-যায়।”

²³ সে পরেদি লগেপ্রভু যিরমিয়রে আরঅ কলঅ,

²⁴ “মানুচ্চুনে যিয়েন কদন, ‘লগেপ্রভু ইস্রায়েল আর যিহূদার মানুচ্চুনোরে বেঈ নেযেয়্যে, মাত্তর্ ইক্কিনে তারারে এলাফেলা গোজ্যে,’ সিয়েন কি তুই খিয়েল্ ন-গরচ্? তারা মঅ মানুচ্চুনোরে ঈচ্ গরন আর জাদ্ ইজেবে তারারে আর ন-দেগন্।

²⁵ মাত্তর্ মুই লগেপ্রভু কঙর্, দিন আর রেদ পৌইদ্যেনে মর্ সুদোমান যেবাবোত্যে ভাঙা ন-যায়, আগাজ্ আর পিত্‌থিমীগান পৌইদ্যেনে মর্ সুদোমান যেন নিত্য ঠিগ্ থায়,

²⁶ সেবাবোত্যে যাকোব আর মর্ চাগর দায়ূদোর বংশধরুনোত্তে মর্ সুদোমান ঠিগ্ থেবঅ আর অব্রাহাম, ইস্‌হাক আর যাকোবর বংশধরুনো উগুরে রাজাগিরি গুরিবাত্তে মুই দায়ূদোর বংশধরুনোরে এলাফেলা ন-গুরিম। মুই হামাক্কায় তারার অবস্থাগান ফিরেম আর তারা উগুরে মেয়্যে গুরিম।”