যিরমিয় 31 - Chakma Bible1 লগেপ্রভু কোইয়্যেদে, “সে অক্তত্ মুই ইস্রায়েলর বেক গুট্টিগুনোর গোজেন ওম্, আর তারা মর্ মানুচ্ অবাক্।” 2 লগেপ্রভু আরঅ কোইয়্যেদে, “ইস্রায়েলীয়গুনে যেক্কে জিরেন্ পেবাত্তে যাদন সেক্কে যিগুনে যুদ্ধোর আঢত্তুন বাচ্চ্যন্ তারা ধূল্যেচর-বামত্ মর্ দোয়্যে পেইয়োন।” 3 সে অক্তত্ ইস্রায়েলীয়গুনে কোইয়োন, লগেপ্রভু দূরোত্তুন্ তারারে দেগা দিয়্যে। সেক্কে লগেপ্রভু তারারে কোইয়্যেদে, “অমকদ কোচ্পানালোই মুই তমারে কোচ্পেইয়োং; অমকদ কোচ্পানালোই মুই তমারে কায়কুরে টান্যং।” 4 ইক্কিনে তে কোইয়্যেদে, “ও গাবুরী ইস্রায়েল, মুই তরে আরঅ শিগেইনে তুলিম, সেক্কে তুই আরঅ কাবিল্ ওই উদিবে। তুই আরঅ তর্ ঝোন্ঝোনি নিবে আর ফুত্তিগুরিয়্যেনোর লগে নাজিবাত্তে যেবে। 5 শমরিয়ার মুড়োবোত্ আরঅ তুই আংগুর খেত্ গুরিবে; যিগুনে খেত্ গুরিবাক তারা সিয়েনর ফলুন হেবাক্। 6 এমন এক্কো দিন এবঅ যেক্কে ইফ্রয়িমর মুড়োবো উগুরে চুগিদারুনে রঅ ছাড়িনে কবাক্, ‘আঢ, আমি সিয়োনত্ আমা গোজেন লগেপ্রভু ইধু যেই।’ ” 7 লগেপ্রভু কোইয়্যেদে, তুমি যাকোবত্তে হুজি মনে গিদ্ গঅ; বেগত্তুন সেরা জাদত্তে হুজির্ রঅ গরঅ। তুমি নাঙ্ গিনিনে কঅ, ও লগেপ্রভু, তঅ মানুচ্চুনোরে, ইস্রায়েলর বাঁজি থেইয়্যে মানুচ্চুনোরে উদ্ধোর্ গর্। 8 চঅ, মুই উত্তরর্ দেজত্তুন ইস্রায়েলীয়গুনোরে আনিম আর পিত্থিমীর শেজ্ দুযিত্তুন তারারে তুবেম্। তারা ভিদিরে থেবাক কান্, আদুড়্, পিদিলী মা আর পুয়ো পুদোবার্ পিড়ে উঠ্যে মিলে; দাঙর্ এক্কো দল ফিরি এবঅ। 9 তারা কানি কানি এবাক্; মুই যেক্কে তারারে ফিরেই আনিম সেক্কে তারা তবনা গুরি গুরি এবাক্। সং পধেদি মুই পানি গঙার ইন্দি তারারে আনিম; সিয়েনত্ তারা উজোত্ ন-হেবাক্, কিত্তে মুই ইস্রায়েলর, অত্তাৎ ইফ্রয়িমর বাপ্ আর তে মর্ পোইল্যা পুয়োবো। 10 “ও জাদ্তুন, মঅ কধানি শুনো; তুমি দূরোর দেজ্ছানিত এ কধাগান ফগদাং গরঅ, ‘যিবে ইস্রায়েলরে ছিদি দিয়্যে তে তারারে তুবেব আর গরগ ধোক্ক্যেন গুরি তা পাল্লো রোক্ষ্যে গুরিবো।’ 11 মুই লগেপ্রভু যাকোবরে ছাড়ি আনিম আর তারাত্তুন্ বেশ্ খেমতাবলাগুনো আঢত্তুন্ তারারে উদ্ধোর্ গুরিম। 12 তারা এইনে সিয়োনর অজল্ জাগানত্ হুজির্ রঅ গুরিবাক্; মর্ দিয়্যে বোউত্ শোজ্য, নুয়ো আংগুর-রস, তেল, ভেড়া আর গোরু পালর্ ছঅ পেইনে তারা ফুত্তি গুরিবাক্। তারা গমেডালে পানি দিয়্যে বাগান ধোক্ক্যেন অবাক্; তারা আর্ বল্পোজ্যে ন-অবাক্। 13 গাবুজ্যে মিলেগুনে নাজিবাক্ আর ফুত্তি গুরিবাক্, গাবুজ্যে আর বুড়ো মানুচ্চুনেয়ো বাদ ন-যেবাক্। মুই তারার মনত্ দুঘ্কান হুজি ইজেবে বুদুলি দিম; দুঘোর্ বদলে মুই তারারে দিম মনসুখ্ আর হুজি। 14 বেক্কানি বেশ্ গুরি দিইনে মুই ধর্মগুরুগুনোরে পুরেই দিম, আর মঅ মানুচ্চুনে মর্ আশীদ্বাদে হুজি অবাক্। মুই লগেপ্রভু এ কধাগান কঙর্।” 15 লগেপ্রভু কোইয়্যেদে, রামায় আবিলেচ্ আর অমকদ কানাকুদির্ রঅ শুনো যার্; রাহেলে তা পুয়োগুনোত্তে কানের্, কনমতে শান্ত ন-অর্, কিত্তে তারা আর নেই। 16 তর্ কানাকুদিগান থামা আর চোগো পানিগান পুয্, কিত্তে তঅ কামর্ বক্শিজ্চান তুই পেবে। তারা শত্রুগুনো দেজত্তুন ফিরি এবাক্। 17 সেনত্তে তর্ ভবিচ্চদত্তে আজা আঘে। তর্ ঝি-পুয়োগুনে নিজো দেজত্ ফিরি এবাক্। মুই লগেপ্রভু এ কধাগান কঙর্। 18 মুই ঘেচ্চেকগুরি ইফ্রয়িমর এই নরম রবো শুন্যং, তুই মরে অবাধ্য গোরু ছঅ ধোক্ক্যেন গুরি শাজন্ গোজ্যস্, আর সিয়েনর ফলে মুই সাজা পেইয়োং। মরে ফিরে, সেক্কে মুই ফিরিম, কিত্তে তুয়ই মর্ গোজেন লগেপ্রভু। 19 মুই ভান্ন্যেই পধেদি যানার্ পরেদি মনত্ দুঘ্ গুরি ফিরিলুং, বুঝি পারিনে বুগ্কো চাবেরেলুং। মুই লাজত্ আর অগমান পেলুং, কিত্তে মর্ গাবুজ্যে বয়জর্ পাপত্তে মত্তুন অসর্মান উয়ো পোজ্যে। 20 ইফ্রয়িম কি মর্ কোচ্পানার পুয়ো নয়? তে কি সেই পুয়োবো নয় যিবেরে দেগিনে মুই হুজি অং? যুনিয়ো মুই প্রায়ই তা বিরুদ্ধে কধা কোইয়োং মাত্তর্ তো মুই তারে নিত্য ইদোত্ রাগাং। সেনত্তে মঅ পরাণান তাত্তে কানের্; তাত্তে মর্ অমকদ মেয়্যে অয়। 21 “তুমি পধে পধে পথ্তান চিনিবার চিহ্নো দুয়ো আর খুদো গারঅ। যে পধেদি তুই যেইয়োচ্ সেই রাজপধর্ কধা ইদোত্ রাগা। ও গাবুরী ইস্রায়েল, ফিরি আয়, তর্ বেক শঅরানিত্ তুই ফিরি আয়। 22 ও ভান্ন্যেই পধেদি যেইয়্যে মিলেবো, আর কয়দিন তুই ঘুরি বেড়েবে? মুই লগেপ্রভু পিত্থিমীত এক্কান নূয়ো বেপার ঘোদেয়োং, সিয়েন অলঅ, মিলেগুনে মরদরে ঘিরিবাক্।” 23 ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, “মুই যেক্কে বন্দীদজাত্তুন্ মানুচ্চুনোরে ফিরেই আনিম সেক্কে যিহূদা দেজ্চান আর তা শঅরর্ মানুচ্চুনে আরঅ কবাক্, ‘ও ধার্মিক্কুনো থেবার্ ঘরান, ও সুদ্ধো-সাংগ মুড়োবো, লগেপ্রভু তরে বর্ দুয়োক্।’ 24 সে মানুচ্চুনে যিহূদা আর তার বেক্ শঅরানিত্ বজত্তি গুরিবাক্ আর চাষীগুন আহ্ যিগুনে তারার য়েমান পালুন নিইনে ঘুড়োন্ তারায়ো সিদু থেবাক্। 25 মুই বল্পোজ্যেগুনোরে তাজা গুরিম আর বল্পোজ্যেগুনোর মনানি দরমর গুরিম।” 26 সেক্কে মুই জাগিনে চেরোকিত্তে রিনি চেলুং। মঅ ঘুমান মইধু আরামর্ এলঅ। 27 লগেপ্রভু কোইয়্যেদে, “সময় এচ্চ্যে যেক্কে মুই ইস্রায়েল আর যিহূদা দেজর্ মানুচ্চুনোরে আর এ্যামানুনোরে চারা ধোক্ক্যেন লাগেই দিম। 28 মুই যেবাবোত্যেগুরি তারারে উগুড়ে ফেলানা, ভাঙি ফেলানা আর মেলা মারিবাত্যে আর তারা উগুরে ভস্ত আর দজা আনানা ইন্দি খিয়েল্ রাগেয়োং সেবাবোত্যেগুরি তারারে শিগেইনে তুলিবার আর চারা ধোক্ক্যেন লাগেই দেনার্ ইন্দিয়ো খিয়েল্ রাগেম। 29 সে সময়োত্ মানুচ্চুনে আর ন-কবাক্, ‘বাবাদাগি কড় আংগুর হেইয়ো, মাত্তর্ পুয়ো-ছাগুনোর দাত্তুন কড় ওই যেইয়োন্।’ 30 সিয়েনর বদলে পত্তিজনে নিজোর পাপত্তে মুরিবাক্; যে কড় আংগুর হেবঅ তা নিজো দাত্তুন কড় ওই যেবাক্।” 31 লগেপ্রভু কোইয়্যেদে, “সময় এচ্চ্যে যেক্কে মুই ইস্রায়েল আর যিহূদার মানুচ্চুনোত্তে এক্কান নূয়ো সুদোম্ থিদেবর্ গুরিম। 32 মিসর দেজত্তুন্ তারার পুরোণি মানুচ্চুনোরে মুই আঢ্তানি ধুরিনে নিগিলেই আনিবার অক্তত্ তারাত্তে যে সুদোমান থিদেবর্ গোজ্যং এ নূয়ো সুদোমান সেই সুদোমান ধোক্ক্যেন ন-অবঅ। মুই যুনিয়ো তারার নেগ ধোক্ক্যেন এলুং তো তারা মঅ সুদোমান ভাঙ্যন্। 33 পরেদি মুই ইস্রায়েলীয়গুনোত্তে যে সুদোমান থিদেবর্ গুরিম সিয়েন অলঅ, মর্ রীদি-সুদোমান্ মুই তারার মন ভিদিরে রাগেম আর তারার মনত্অ সিয়েন লিগি রাগেম। মুই তারার গোজেন ওম্ আর তারা মঅ মানুচ্ অবাক্। 34 নিজোর পাড়াল্যেবোরে আর নিজোর ভেইবোরে কনজনে ইয়েন কোইনে আর শিক্ষ্যে ন-দিবাক্, ‘লগেপ্রভুরে চিনিবাত্তে চিগো,’ কিত্তে বেক্কুনে মরে চিনোন্। সেনত্তে মুই তারার অন্যেয়ানি খেমা গুরিম, তারার পাপ্পানি আর কনদিন্অ ইদোত্ ন-রাগেম। মুই লগেপ্রভু এ কধাগান ।” কঙর্ 35 যিবে দিনোত্ বেলানরে আর রেদোত্ চান্নোরে আর তারাগুনোরে পহ্র দিবাত্তে উগুম দে, যিবে সাগরানরে উলোত্ পালত্ গরে যেনে তার তুবোলুন গুজুরি উদে, যিবের্ নাঙান বেগত্তুন্ খেমতাবলা লগেপ্রভু, 36 তে কোইয়্যেদে, “যুনি এই সুদোমান মঅ চোগো মুজুঙোত্তুন্ লুগি ওই যায় সালে ইস্রায়েলীয়গুনেয়ো জাদ্ ইজেবে মঅ মুজুঙোত্তুন্ শেজ্ ওই যেবাক্। 37 যুনি উগুরে আগাজ্চানরে মাবা যায় আর তলেদি পিত্থিমীর খুদোবো তোগেইনে পাহ্ যায় সালেন্ ইস্রায়েলীয়গুনে যিয়েনি গোজ্যন সিয়েনিত্তে মুই তারারে এলাফেলা গুরি পারং। মুই লগেপ্রভু এ কধাগান কঙর্।” 38 লগেপ্রভু কোইয়্যেদে, “সে অক্তবো এজের্ যেক্কে মত্তে হননেল-ঘরানত্তুন্ কোণাবোর গেট্টো সং এ শঅরান আরঅ বানা অবঅ। 39 মাবেদে দুড়িগান সিয়েনত্তুন্ সোজা গারেব মুড়োবো সং টানা অবঅ আর সে পরেদি ঘুরিনে গোয়াত যেবঅ। 40 গোদা কলগ্কানত্ যিয়েনত্ মরা কিয়্যেনি আর ছেই ফেলা অয় আর পূগেদি ঘোড়া-গেদোর্ কোণাবো সং কিদ্রোণ কলগর্ বেক মাঠ্তুন লগেপ্রভুর নাঙে যুদো গুরি রাগা অবঅ। শঅরানরে আর কনদিন্অ উগুড়ে ফেলানা বা ভস্ত গরা ন-অবঅ।” |
Copyright © 2021 Bangladesh Bible Society
Bangladesh Bible Society