যিরমিয় 29 - Chakma Bible

বাবিলর বন্দিগুনো ইধু চিদি

¹ বন্দীগুনো ভিদিরে বাঁজি থেইয়্যে বুড়ো নেতাগুনোরে, ধর্মগুরুগুনোরে আর ভাববাদীগুনোরে আর অন্য যিদুক্কুন মান্‌‍জ্যরে নবূখদ্‌নিৎসরে যিরূশালেমত্তুন্ বন্দী গুরিনে বাবিলোত্ নেযেয়্যে তারা ইধু ভাববাদী যিরমিয় যিরূশালেমত্তুন এক্কান চিদি পাদেয়্যে।

² রাজা যিহোয়াখীন, তার মা, রাজকর্মচারীগুন, যিহূদা আর যিরূশালেমর নেতাগুনে, কালিগর আর কামারুনে বন্দী ওইনে যিরূশালেমত্তুন যানার পরেদি এ চিদিগান লেগা ওইয়্যে।

³ শাফনর পুয়ো ইলিয়াসা আর হিল্কিয়র পুয়ো গমরিয়রে যিহূদার রাজা সিদিকিয় রাজা নবূখদ্‌নিৎসর ইধু পাদেয়্যে, আর তারা ইধু যিরমিয় চিদিগান দিয়্যে। সিয়েনত্ লেগা এলদে:

⁴ ইস্রায়েলর গোজেন বেগত্তুন্ খেমতাবলা লগেপ্রভু যিগুনোরে বন্দী ইজেবে যিরূশালেমত্তুন বাবিলোত্ পাদেয়্যে তারা বেক্কুনো ইধু কলঅ,

⁵ তুমি ঘর বানেইনে বজত্তি গরঅ; বাগান গুরিনে সে গুলোগুলিগুন হঅ।

⁶ বৌ লোইনে পুয়ো-ছার্ জর্ম দুয়ো; তমা পুয়ো-ঝিগুনোরে মেলা গুরি দুয়ো যেনে তারার্‌‍অ পুয়ো-ছা অয়। সিয়েনত্ তমা মানুচ্চুন বাড়েবা, ন-কোমেবা।

⁷ ইয়েনি বাদেয়ো যে শঅরত্ মুই তমারে বন্দী ইজেবে নেযেয়োং সিদুগোর্ ভালেদির্ চেরেস্‌‌টা গরঅ। ইয়েনত্তে মইধু তবনা গরঅ, কিত্তে যুনি সে শঅরর্ ভালেদি অয় সালে তমারঅ ভালেদি অবঅ।

⁸ তমা ভিদিরে ভাববাদী আর গোণোক্ক্যেগুনে যেন তমারে ন-ঠকায়। তারা যেদক্কানি স্ববন্ দেগন সিয়েনিত্ তুমি মনযোগ ন-দুয়ো।

⁹ তারা মঅ নাঙে মিজে কধা কন্। মুই লগেপ্রভু তারারে ন-পাদাং।

¹⁰ “বাবিল পৌইদ্যেনে যে সত্তুর বজর কধা কুয়ো ওইয়্যে সিয়েন পূরোণ অলে পরেদি মুই তমা ইন্দি মনান্ দিম; মুই যে ভালেদি গুরিবার এগেম্ গোজ্যং সিয়েন পূরোণ গুরিম, অত্তাৎ তমারে এ জাগানত্ ফিরেই আনিম।

¹¹ তমাত্তে মর্ পরিকল্পনাগানর্ কধাগান মুয়ই হবর্ পাং; সিয়েন তমা ভালেদিত্তে, ক্ষোতিত্বে নয়। সে পরিকল্পনাগানর ভিদিরেদি তমা ভবিচ্চদর্ আজাগান পূরোণ অবঅ।

¹² সেক্কে তুমি মরে ডাগিবা আর মইধু এইনে তবনা গুরিবা, আর মুই তমা কধানি শুনিম।

¹³ যেক্কে তুমি মরে গভীন গুরিনে হবর্ পেবাত্তে আওজি অবা সেক্কে মরে হবর্ পেবা।

¹⁴ তুমি মরে হবর্ পেবা, আর মুই তমারে বন্দী দজাত্তুন্ ফিরেই আনিম। যিদুক্কুন জাদে আর যেদক্কানি জাগা ভিদিরে মুই তমারে ধাবেই দুয়োং সিয়েনত্তুন মুই তমারে এগত্তর্ গুরিম। যে জাগানত্তুন্ মুই তমারে বন্দী গুরি নেযেয়োং মুই সিয়োদোই তরে ফিরেই আনিম। মুই লগেপ্রভু এ কধাগান কঙর্।”

¹⁵ তুমি অয়ত হবা, “লগেপ্রভু বাবিলোত্ আমাত্তে আমা ভিদিরেত্তুন্ ভাববাদীগুনোরে তুল্যে,”

¹⁶ মাত্তর্ দায়ূদোর সিংহাসনত্ বোস্যে রাজার পৌইদ্যেনে আর এ শঅরর্ বাদবাগি বেক্ মানুচ্চুনো পৌইদ্যেনে, অত্তাৎ তমা দেজর্ মানুচ্ যিগুনে তমা লগে বন্দী ওইনে ন-যান তারার বেক্কুনো পৌইদ্যেনে লগেপ্রভু কোইয়্যেদে,

¹⁷ মুই বেগত্তুন খেমতাবলা লগেপ্রভু তারা বিরুদ্ধে যুদ্ধো, ভাদরাত্ আর ভানা পাধেই দিম্ আর মুই তারারে এমন বজং ডোমোর ধোক্ক্যেন গুরিম যিগুন পজা বিলিনে হা ন-যায়।

¹⁸ মুই যুদ্ধো, ভাদরাত্ আর ভানালোই তারা পিজেদি লোড়েম্ আর পিত্‌থিমীর বেক্ রেজ্যগানি ইধু তারারে দর্‌‍‌‍‍গরেপারা মান্‌‍জ্য ধোক্ক্যেন গুরিম। যিদুক্কুন জাদ ভিদিরে মুই তারারে ধাবেই দিম্ তারা ইধু তারারে গুরিম ঠাট্টা-মশকারি আর ঈচ্ গরেদে মান্‌‍জ্য ধোক্ক্যেন। তারার অবস্থা দেগিনে মানুচ্চুনে আমক্ অবাক্ আর তারার নাঙানি অভিশাব ইজেবে বেবহার গুরিবাক্।

¹⁹ ইয়েনর কারনান্ অলঅ, যে কধাগান মুই বার্ বার্ মঅ চাগরুনোরে, অত্তাৎ ভাববাদীগুনোরে দিইনে তারা ইধু কোই পাদেয়োং সিয়েন তারা ন-শুনোন্।

²⁰ “সেনত্তে তুমি বন্দীগুন, যিগুনোরে মুই যিরূশালেমত্তুন্ বাবিলোত্ পাধেই দুয়োং, তুমি বেক্কুনে মঅ কধানি শুনো।

²¹ কোলায়র পুয়ো আহাব আর মাসেয়র পুয়ো সিদিকিয়, যিগুনে মঅ নাঙে তমা ইধু মিজে কধা কদন্ তারা পৌইদ্যেনে মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, মুই বাবিলোর রাজা নবূখদ্‌নিৎসর আঢত্ তারারে তুলি দিম্, আর তে তমা চোগো মুজুঙোত্ তারারে মারে ফেলেব।

²² বাবিলোত্ থেইয়্যে যিহূদার বেক বন্দীগুন তারা কধানি ইদোত্ গুরিনে এ অভিশাব্‌পান বেবহার গুরিবাক্, ‘লগেপ্রভু তরে সিদিকিয় আর আহাব ধোক্ক্যেন গোরোক্, যিগুনোরে বাবিল রাজা আগুনোত্ পুজ্যে,’

²³ কিত্তে তারা ইস্রায়েলীয়গুনো ভিদিরে জঘন্য কাম গোজ্যন্; তারা পাড়াল্যেগুনো মোগ্‌কুনো লগে বেভিচের্ গোজ্যন্ আর মুই তারারে যিয়েন কবাত্তে ন-কং তারা মঅ নাঙে সে মিজে কধানি কোইয়োন। মুই সিয়েনি হবর্ পাং আর মুই সিয়েনর সাক্ষী। মুই লগেপ্রভু এ কধাগান কঙর্‌।”

শময়িয় ইধু হবর্

²⁴ লগেপ্রভু যিরমিয়রে নিহিলামীয় শময়িয়রে কবাত্তে কলঅ,

²⁵ ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, “তুই নিজো নাঙে যিরূশালেমর বেক মানুচ্চুনো ইধু, মাসেয়র পুয়ো ধর্মগুরু সফনিয় ইধু আর অন্য বেক ধর্মগুরুগুনো ইধু চিদি পাদেয়োচ্।

²⁶ তুই সফনিয়রে লেখ্যচ্, ‘লগেপ্রভু তরে যিহোয়াদার জাগানত্ ধর্মগুরু বানেয়্যে যেনে লগেপ্রভুর ঘরর্ ভারান তঅ উগুরে থায়। কনঅ পাগল যুনি ভাববাদী ধোক্ক্যেন কাম গরে সালে গাজকট্টা আর গত্তনাত্ লুয়ো চিগোল্লোই তারে তত্তুন্ থামানা উজিত্।

²⁷ সেনত্তে অনাথোদর্ যিরমিয় যেক্কে তমা ইধু ভাববাদী ধোক্ক্যেন কধা কোইয়্যে সেক্কে তারে তুই সাজা ন-দুয়োচ্ কিত্তে?

²⁸ তে দঅ বাবিলোত্ আমা ইধু এ হবরান পাদেয়্যে, ভালোক্ দিন আমাত্তুন ইধু থা পুরিবো। সেনত্তে আমি যেন ঘর বানেইনে ইধু বজত্তি গুরিই আর বাগান গুরিনে সে ফলুন ভোগ্ গুরিই।’ ”

²⁹ ধর্মগুরু সফনিয় মাত্তর্ সে চিদিগান ভাববাদী যিরমিয় ইধু পড়িলো।

³⁰ সেক্কে লগেপ্রভুর এ কধাগান যিরমিয় ইধু ফগদাং অলঅ,

³¹ “তুই বেক বন্দীগুনো ইধু এ হবরান পাধেই দে, নিহিলামীয় শমরিয় পৌইদ্যেনে লগেপ্রভু কোইয়্যেদে, ‘মুই শময়িয়রে ন-পাদাং, তো তে তমা ইধু নিজোরে ভাববাদী ইজেবে দেগেইনে মিজে কধালোই তমারে বিশ্বেজ্ গোরেয়্যে।

³² মুই হামাক্কায় নিহিলামীয় শময়িয় আর তা বংশধরুনোরে সাজা দিম। এ জাদ্‌‌‌তো ভিদিরে তার কনজন ন-থেবাক্ আর মুই মঅ মানুচ্চুনোত্তে যেদক্কানি ভালেদি গুরিম সিয়েনঅ তে ন-দেগিবো, কিত্তে তে মঅ বিরুদ্ধে উল্লোমী ফগদাং গোজ্যে। মুই লগেপ্রভু এ কধাগান কঙর্।’ ”