যিরমিয় 28 - Chakma Bible

মিজে কধা কোইয়্যে ভাববাদী হনানিয়

¹ সেই একই বজরত্, যিহূদার রাজা সিদিকিয়র রাজাগিরির পৌইল্যাদি, অত্তাৎ চের্ বজরত্ পাচ্ মাজত্ গিবিয়োন শঅরর্ অসূরর পুয়ো ভাববাদী হনানিয় লগেপ্রভুর ঘরত্ ধর্মগুরুগুনোর আর বেক মানুচ্চুনো মুজুঙোত্ যিরমিয়রে এ কধাগান কলঅ,

² ন “ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, ‘মুই বাবিলো রাজার খেমতাগান্ ভাঙি ফেলেবাত্তে যাঙর্।

³ বাবিল রাজা নবূখদ্‌নিৎসরে লগেপ্রভুর ঘরর্ যেদক্কানি পযাপিরা ইয়োত্তুন বাবিলোত্ সোরেই নেযা ওইয়্যে সিয়েনি মুই দ্বি বজর্ ভিদিরে ইধু ফিরেই আনিম।

⁴ ইয়েন বাদেয়ো মুই যিহোয়াকীমোর পুয়ো যিহূদার রাজা যিহোয়াখীনরে আর যিহূদার অন্য যিদুক্কুন বন্দী বাবিলোত্ যেইয়োন তারারেয়ো এ জাগানত্ ফিরেই আনিম, কিত্তে মুই বাবিলো রাজার জুঙোলান ভাঙি ফেলেম। মুই লগেপ্রভু এ কধাগান কঙর্।’ ”

⁵ সেক্কে ভাববাদী যিরমিয় ধর্মগুরুগুনোরে আর যিদুক্কুন মানুচ্ লগেপ্রভুর ঘরত্ থিয়্যেই এলাক্ তারা মুজুঙোত্ ভাববাদী হনানিয়র কধাগানর জোব্ দিলো।

⁶ তে কলদে, “আমেন, লগেপ্রভু যেন সিয়েন গরে। লগেপ্রভুর ঘরর্ পযাপিরানি আর বাবিলত্তুন বেক্ বন্দীগুনোরে ইধু ফিরেই আনিনে লগেপ্রভু তর্ কোইয়্যে আগাম্ কধানি পুরোন্ গর্।

⁷ মাত্তর্ মুই তর্ আর বেক মানুচ্চুনো ইধু যে কধাগান কবাত্তে চাং সিয়েন শুনো।

⁸ তর্ আর মঅ আগেদি পুরোণ দিনোর যে ভাববাদীগুনে এলাক্, তারা বোউত্ দেজ্ আর দাঙর্ দাঙর্ রেজ্যগানি বিরুদ্ধে যুদ্ধো, পারাদযা আর ভানা পৌইদ্যেনে আগামকধা কোইয়োন।

⁹ মাত্তর্ যে ভাববাদীবো শান্তির আগাম্‌‍কধা কোইয়্যে তা কধানি যেক্কে পুরোণ অবঅ বানা সেক্কে জানা যেবদে, তারে ঘেচ্চেকগুরি লগেপ্রভু পাদেয়্যে।”

¹⁰ ইয়েনর্ পরেদি ভাববাদী হনানিয় ভাববাদী যিরমিয়র গত্তনাবোত্তুন্ জুঙোলান নিইনে ভাঙি ফেলল।

¹¹ সে পরেদি তে বেক মানুচ্চুনো মুজুঙোত্ কলদে, “লগেপ্রভু কোইয়্যেদে, ‘এবাবোত্যেগুরি মুই দ্বি বজর ভিদিরে বেক জাত্তুনোর গত্তনাগুনোত্তুন্ বাবিলোর রাজা নবূখদ্‌নিৎসরর জুঙোলান ভাঙি ফেলেম।’ ” সেক্কে ভাববাদী যিরমিয় সিয়েনত্তুন গেলগোই।

¹² হনানিয় জুঙোলান্ ভাঙি ফেলেবার কয়েকদিন পরেদি লগেপ্রভুর এ কধাগান যিরমিয় ইধু ফগদাং অলঅ,

¹³ “তুই যেইনে হনানিয়রে কবে, লগেপ্রভু কোইয়্যেদে, ‘তুই গাজ জুঙোলান ভাঙি ফেলেয়োচ্ মাত্তর্ তা জাগানত্ দিয়া অবঅ লুয়োর্ জুঙোল্।

¹⁴ মুই ইস্রায়েলর গোজেন বেগত্তুন খেমতাবলা লগেপ্রভু কঙর্, এ জাদ্‌তুনে যেনে বাবিলোর রাজা নবূখদ্‌নিৎসরর চাগর্ অন্ সেনত্তে মুই তারার গত্তনাগুনোত্ লুয়োর্ জুঙোলান চাপি দিম্, আর তারা তার্ সেবা গুরিবাক্‌‍‍‍কে গুরিবাক। এন্ কি, মুই তারে ঝার্‌‍বো এ্যামানুনো উগুরেয়ো সদ্দার্ বানেম‍।’ ”

¹⁵ সেক্কে ভাববাদী যিরমিয় ভাববাদী হনানিয়রে কলঅ, “হনানিয়, শুন। লগেপ্রভু তরে ন-পাদায়, মাত্তর্ তুই এ জাদ্‌তোরে মিজে কধালোই বিশ্বেজ্ গরত্তে। ‍‍‍

¹⁶ সেনত্তে লগেপ্রভু কোইয়্যেদে, ‘মুই তরে পিত্‌থিমীর উগুরেত্তুন সোরেই দিবাত্তে যাঙর্। এ বজরত্ তুই মুরি যেবে, কিত্তে তুই লগেপ্রভুর বিরুদ্ধে উল্লোমির কধা ফগদাং গোজ্যস্।’ ”

¹⁷ সে বজরর্ সাত্ মাজত্ ভাববাদী হনানিয় মুরি গেলঅ।