যিরমিয় 27 - Chakma Bibleনবূখদ্নিৎসরর অধীনে যিহূদা দেজ্চান 1 যোশিয়র পুয়ো যিহূদার রাজা সিদিকিয়র রাজাগিরির পৌইল্যাদি লগেপ্রভুর কধানি যিরমিয় ইধু ফগদাং ওইয়্যে। 2 লগেপ্রভু তারে কলঅ, তুই কদক্কানি চামড়্ ফিতে আর গাজ্সোই এক্কান জুঙোল্ বানেইনে তঅ ঘট্টনাবো উগুরে রাগেবে। 3 সে পরেদি যিদুক্কুন দূতে ইদোম, মোয়াব, অম্মোন, সোর আর সিদোনর রাজাগুনোত্তুন যিরূশালেমত্ যিহূদার রাজা সিদিকিয় ইধু এচ্চ্যন্ তারারে দিইনে সে রাজাগুনো ইধু হবর্ পাদেবে। 4 তারার গিরোজ্চুনোরে এক্কান হবর্ দিবাত্তে কবে, ইস্রায়েলর গোজেন বেগত্তুন্ খেমতাবলা লগেপ্রভু তারার গিরোজ্চুনোরে এ কধাগান কবাত্তে কোইয়্যে, 5 মর্ বল্লোই আর খেমতাবলা আঢ্তোই মুই এ পিত্থিমীগান আর তা উগুরে যিদুক্কুন মানুচ্ আর য়েমান বানেয়োং, আর মুই যিবেরে যগাজ্যে মনে গরং তা আঢত্ খেমতা দি থাং। 6 ইক্কিনে মুই তমার বেক দেজ্চানি মর্ চাগর বাবিলোর রাজা নবূখদ্নিৎসরর আঢত্ তুলি দিম; এন্ কি, ঝার্বো এ্যামানুনোরেয়ো মুই তা অধীনোত্ গুরিম। 7 যেদকদিন সং তা দেজর্ সময় ন-এজে সেদকদিন সং বেক্ জাদ্তুন তার, তা পুয়োগুনোর আর তা নাদিনুনোর চাগর্ অবাক্; সে পরেদি বোউত্ জাদে আর দাঙর্ দাঙর্ রাজাগুনে তারে তারা অধিনোত্ আনিবাক্। 8 “ ‘মাত্তর্ কনঅ জাদে বা রেজ্যই যুনি বাবিলোর রাজা নবূখদ্নিৎসরর চাগর ন-অয় বা তা জুঙোলান তলে কানাগান ন-দে সালে মুই সে জাদ্তোরে যুদ্ধো, ভাদরাত আর ভানা দিইনে সাজা দিম যেদক্কন সং মুই তা আঢ্তানিলোই সে জাদ্তোরে ভস্ত ন-গরং। 9 সেনত্তে তুমি তমার ভাববাদী, গোণেয়্যে, স্ববন দেগিনে আগাম্ কধা কোইয়্যে মানুচ্, মায়াবিদ্যেগুরিয়্যে বা তমা যাদুগুরিয়্যেগুনো কধা ন-শুন্ন্য; তারা তমারে কন্, তুমি বাবিলোর রাজার চাগর্ ন-অবা। 10 তারা মিজে আগাম্ কধা কন, আর ইয়েনর কারনে তুমি তমা দেজত্তুন দূর্ ওই যেবা; মুই তমারে ধাবেই দিম আর তুমি ভস্ত ওই যেবা। 11 মাত্তর্ যুনি কনঅ জাদে বাবিলোর রাজার জুঙোল তলে গত্তনাবো লঙান্ আর তার চাগর্ অন সালে মুই সে জাদ্তোরে তার নিজোর দেজত্ থেবাত্তে দিম্ যেনে তারা সিধু খেত্-খেত্তি আর বজত্তি গুরি পারন। মুই লগেপ্রভু এ কধাগান কঙর্।’ ” 12 যিহূদার রাজা সিদিকিয়রে মুই সে একই হবরান্ দিইনে কলুং, “বাবিল রাজার জুঙোল তলে তুমি তমার গত্তনাগুন্ লঙ; তার আর তা মানুচ্চুনোর চাগর অন, সেক্কে তুই বাঁজিবে। 13 যে জাদ্তো বাবিলো রাজার চাগর্ ন-অবঅ তা বিরুদ্ধে লগেপ্রভু যিয়েন কোইয়্যে সেবাবোত্যে কিত্তে তুই আর তঅ মানুচ্চুনে যুদ্ধো, ভাদরাত আর ভানালোই মুরি যেবাক্? 14 সেই ভাববাদীগুনোর কধা ন-শুনিবা যিগুনে তমারে কন, ‘তুমি কনদিন্অ বাবিলো রাজার চাগর ন-অবা’; তারা তমা ইধু মিজে আগাম্ কধা কন। 15 লগেপ্রভু কোইয়্যেদে, ‘মুই তারারে ন-পাদাং। তারা মঅ নাঙে মিজে আগাম্ কধা কন। সেনত্তে মুই তমারে আর তমা ইধু যিগুনে আগাম কধা কন সেই ভাববাদীগুনোরে দুর্ গুরি দিম আর তুমি বেক্কুনে ভস্ত ওই যেবা।’ ” 16 সেক্কে মুই ধর্মগুরুগুনোরে আর বেক মানুচ্চুনোরে কলুং, লগেপ্রভু কোইয়্যেদে, “যে ভাববাদীগুনে তমারে কন্, খুব যাদিমাদি লগেপ্রভুর ঘরর্ জিনিস্চানি বাবিলত্তুন ফিরেই আনা অবঅ; তারার কধানি তুমি ন-শুন্ন্য। তারা তমা ইধু মিজে আগাম্ কধা কদন্। 17 তারা কধানি ন-শুন্ন্য। তুমি বাবিলোর রাজারে সেবা গরঅ, সেক্কে বাঁজিবা। এ শঅরান ভস্ত অবঅ কিত্তে? 18 যুনি তারা ভাববাদী ওই থান্ আর লগেপ্রভুর কধানি তারা ইধু থায় সালে লগেপ্রভুর ঘরর্, যিহূদা রাজার ঘরর্ আর যিরূশালেমর যেদক্কানি পযাপিরা ইক্কিনেয়ো বাগি রোইয়্যে সিয়েনি যেনে বাবিলত্ নেযা ন-অয় সেনত্তে বেগত্তুন খেমতাবলা লগেপ্রভুর ইধু তারা কোজোলী গোরোদোক্। 19-20 ‘যেদক্কানি পযাপিরা মঅ ঘরত্ আর যিহূদা রাজার ঘরত্ আর যিরূশালেমত্ আঘে সিয়েনি বাবিলোত্ নেযা অবঅ আর যেদক্ ভিলোন সং মুই সিয়েনি ইন্দি মনযোগ ন-দুয়োং সেদক্ ভিলোন্ সং সিয়েনি সিয়েনত্ থেবঅ। সে পরেদি মুই সিয়েনি এ জাগানত্ ফিরেই আনিম। মুই ইস্রায়েলর গোজেন বেগত্তুন খেমতাবলা লগেপ্রভু এ কধাগান কঙর্।’ ” 21-22 যেদক্কানি জিনিস মঅ ঘরত্ আর যিহূদার রাজার ঘরত্ আর যিরূশালেমত্ আঘে সিয়েনি বাবিলোত্ নেযা অবঅ আর যেদক্ বিলোন সং মুই সিয়েনি মনযোগ ন-দুয়োং সেদক বিলোন্ সং সিয়েনি সিধু থেবঅ। সে পরেদি মুই সিয়েনি এ জাগান ইধু ফিরেই আনিম। মুই ইস্রায়েলর্ গোজেন বেগত্তুন্ খেমতাবলা অধিকারী লগেপ্রভু এই কধাগান কঙর্। |
Copyright © 2021 Bangladesh Bible Society
Bangladesh Bible Society