যিরমিয় 26 - Chakma Bible

যিরমিয়রে মরণর দর্ দেগানা

¹ যোশিয়র পুয়ো যিহূদার রাজা যিহোয়াকীমর রাজাগিরির পৌইল্যাদি লগেপ্রভু যিরমিয়রে কোইয়্যেদে,

² “মুই লগেপ্রভু কঙর্, তুই মর্ ঘর উদোনত্ যেইনে থিয়্যে আর যিহূদার শঅরানিত্তুন যিদুক্কুন মানুচ্ উবোসনাত্তে মঅ ঘরত্ এজন্ তারারে বেক্কুনোরে মুই তরে যেদক্কানি কধা কবাত্তে উগুম দুয়োং সিয়েনি বেক কধানি কঅ, এক্কান কধায়ো বাদ ন-দিচ্।

³ অয়ত তারা শুনিবাক্ আর পত্তিজনে তারার ভান্ন্যেই পধত্তুন ফিরি এবাক্। সালেন্ তারার ভান্ন্যেই কামানিত্তে মুই তারা উগুরে যে দজাগান্ আনিবার পরিকল্পনা গোজ্যং সিয়েন আর ন-আনিম।

⁴ তুই তারারে এ কধাগান কবে, লগেপ্রভু কোইয়্যেদে, ‘তুমি এদকদিন মঅ কধা ন-শুনো আর তমা মুজুঙোত্ মুই যে সুদোমানি রাগেয়োং সিয়েনি ন-পালঅ;

⁵ ইয়েনি বাদেয়ো মুই বার্ বার্ মর্ যে চাগরুনোরে, অত্তাৎ ভাববাদীগুনোরে তমা ইধু পাদেয়োং তারা কধায়ো ন-শুনো।

⁶ তুমি যুনি এবাবোত্যেগুরি থাগঅ সালেন্ মুই এ ঘরানরে শীলো ধোক্ক্যেন গুরিম আর এমন গুরিম যেনে পিত্‌থিমীর বেক জাদ্‌‌‌‌‌‌‌‌তুনে এ শঅর নাঙান্দোই অভিশাব্ দুয়োন‌‌‌‌‌।’ ”

⁷ লগেপ্রভুর ঘরত্ যিরমিয় যেক্কে এ কধানি কলঅ সেক্কে ধর্মগুরু, ভাববাদী আর বেক মানুচ্চুনে সিয়েন শুনিলাক্।

⁸ মাত্তর্ লগেপ্রভুর উগুম মজিম যিরমিয় বেক কধানি কনা যেক্কে থুম্ গুরিলো সেক্কে ধর্মগুরু, ভাবাবদী আর বেক মানুচ্চুনে তারে ধুরিনে কলাক্, “তত্তুন মরা পুরিবো।

⁹ কিত্তে তুই লগেপ্রভুর নাঙান্দোই এ আগাম্ কধাগান গরর্, এ ঘরান শীলো ধোক্ক্যেন অবঅ আর এ শঅরান ভস্ত আর মানুচ্ নেইয়্যে অবঅ?” ইয়েন কোইনে বেক মানুচ্চুনে লগেপ্রভুর ঘরত্ যিরমিয়রে ঘিরি ধুরিলাক্।

¹⁰ যিহূদার রাজকর্মচারীগুনে এ কধানি শুনিনে রাজঘরত্তুন্ লগেপ্রভুর ঘরত্ এলাক্ আর লগেপ্রভুর ঘরর নূয়ো গেদোত্ সুমিবার পথ্‌তানত্ বুজিলাক্।

¹¹ সেক্কে ধর্মগুরু আর ভাববাদীগুনে সেই রাজকর্মচারীগুনোরে আর বেক মানুচ্চুনোরে কলাক্, “এ মানুচ্চো মরণর সাজা পেবার যোগ্য, কিত্তে তে এ শঅরান বিরুদ্ধে আগাম কধা কোইয়্যে; আর তুমি নিজো কানে সিয়েন শুন্ন্য।”

¹² সেক্কে যিরমিয় বেক রাজকর্মচারীগুনোরে আর বেক মানুচ্চুনোরে কলঅ, “তুমি এ ঘরানি আর শঅরানি বিরুদ্ধে যিয়েন শুন্ন্য সে কধানি কবাত্তে লগেপ্রভু মরে পাদেয়্যে।

¹³ ইক্কিনে তুমি তমার আদাউদো আর কামানি বদল আর তমা গোজেন লগেপ্রভুর কধানি শুনো। সালে লগেপ্রভু তমা বিরুদ্ধে যে দযাগান পাদেবার কধা কোইয়্যে সিয়েন আর ন-পাদেব।

¹⁴ চঅ, মুই দঅ তমা আঢত্ আগং; তুমি যিয়েন গম্ আর ন্যায্য মনে গরঅ সিয়েনই মঅ উগুরে গরঅ।

¹⁵ মাত্তর্ ইয়েন ঘেচ্চেকগুরি হবর্ পেবাদে যে, তুমি যুনি মরে মারে ফেল সালে নিদ্দুজিবোর্ লো ঝরানার অন্যেয়ান তুমি নিজো উগুরে আর এ শঅরান উগুরে আর যিগুনে ইধু বজত্তি গরন তারা উগুরে আনিবো; কিত্তে এই বেক কধানি তমারে শুনেবাত্তে ঘেচ্চেকগুরি লগেপ্রভু মরে পাদেয়্যে।”

¹⁶ সেক্কে রাজকর্মচারীগুনে আর বেক মানুচ্চুনে ধর্মগুরু আর ভাববাদীগুনোরে কলাক্, “এ মানুচ্চো মরণর সাজা পেবার যগাজ্যে নয়। তে আমার গোজেন লগেপ্রভুর নাঙে আমা ইধু কধা কোইয়্যে।”

¹⁷ ইয়েনর্ পরেদি দেজর্ বুড়ো নেতাগুনো ভিদিরে কয়েক্কো উজেই এইনে এগত্তর্ ওইয়্যে বেক মানুচ্চুনোরে কলদে,

¹⁸ “যিহূদার রাজা হিষ্কিয়র সময়োত্ মোরেষ্টীয় মীখা ভাববাদী ইজেবে কধা কদঅ। তে যিহূদার মানুচ্চুনোরে কোইয়্যেদে, ‘বেগত্তুন খেমতাবলা লগেপ্রভু কোইয়্যেদে, সিয়োনানরে ক্ষেদ ধোক্ক্যেন গুরি চাষ গরা অবঅ, যিরূশালেমান অবঅ ভস্তর্ কুড়্ আর উবোসনা-ঘরর মুড়োবো ঘন ঝুব্-ঝাড়ে নাঢা পড়িবো।’

¹⁹ যিহূদার রাজা হিষ্কিয় বা যিহূদার অন্য কনজনে কি মীখারে মারে ফেলেয়োন? হিষ্কিয় কি লগেপ্রভুরে ভোক্তিগুরিনে ন-দরায় আর তার দোয়্যে ভিক্ষে ন-গরে? ইয়েনত্ লগেপ্রভু মানুচ্চুনো উগুরে যে দযাগান্ পাদেবার কধা কোইয়্যে সিয়েন আর ন-পাদায়। মাত্তর্ আমি দঅ নিজো উগুরে এক্কান দর্‌‌‌গরেপারা দযা ডাগি আন্ন্যেই‌।”

²⁰ কিরিয়ৎ-যিয়ারীমর শময়িয়র পুয়ো ঊরিয় অলদে আর একজন যিবে লগেপ্রভুর নাঙে ভাববাদী ইজেবে কধা কদঅ। তেয়ো যিরমিয় ধোক্ক্যেন এ শঅরান আর এ দেজ বিরুদ্ধে এধোক্ক্যেন কধা কদঅ।

²¹ রাজা যিহোয়াকীম আর তার বেক সেনাপতিগুন আর রাজকর্মচারীগুন যেক্কে ঊরিয়র কধা শুনিলাক্ সেক্কে রাজা তারে মারে ফেলেবার চেরেস্‌‌তা গুরিলো। মাত্তর্ ঊরিয় সে কধাগান শুনিনে দরে মিসর দেজত্ ধেই গেলঅ।‍

²² রাজা যিহোয়াকীমে সেক্কে অক্‌বোরের পুয়ো ইল্‌নাথনরে আর তা লগে আরঅ কয়েকজনরে মিসরত্ পাধেই দিলো।

²³ তারা মিসরত্তুন্ ঊরিয়রে আনিনে রাজা যিহোয়াকীমো ইধু নেযেলাক্; রাজা তারে তলোয়ারলোই মারে ফেলেইনে তা কিয়্যেগান সাধারন মান্‌‌‍‌জ্যর্ গোরত্ ফেলেই দিলো।

²⁴ মাত্তর্ শাফনর পুয়ো অহীকামে যিরমিয়র তপ্পে এলঅ, সেনত্তে যিরমিয়রে মারে ফেলেবাত্তে মানুচ্চুনো আঢত্ দিয়্যে ন-অয়।