যিরমিয় 25 - Chakma Bibleসত্তুর বজরর্ বন্দীদজা 1 যোশিয়র পুয়ো যিহূদার রাজা যিহোয়াকীমোর রাজাগিরির চের্ বজরত্, অত্তাৎ বাবিলোর রাজা নবূখদ্নিৎসরর রাজাগিরির পত্তম বজরত্ যিহূদার বেক্ মানুচ্চুনো পৌইদ্যেনে গোজেনর কধা যিরমিয় ইধু ফগদাং অলঅ। 2 সেনত্তে ভাববাদী যিরমিয় বেক্ যিহূদার মানুচ্ আর যিরূশালেমর বেক্ আদাম্মেগুনোরে কলঅ, 3 যোশিয়র পুয়ো যিহূদার রাজা আমোনর রাজাগিরির তের বজরত্তুন্ ধুরি এদক্ বিলোন সং, অত্তাৎ এই তেইশ বজর ধুরি লগেপ্রভুর কধানি মইধু ফগদাং ওইয়্যে আর মুই বার্ বার্ তমারে সিয়েন কোইয়োং, মাত্তর্ তুমি সিয়েনত্ কান ন-পাদঅ। 4 লগেপ্রভু যুনিয়ো তার বেক চাগরুনোরে, অত্তাৎ ভাববাদীগুনোরে বার্ বার্ তমা ইধু পাদেয়্যে তো তুমি ন-শুনো বা মনযোগ্অ ন-দুয়ো। 5 তারা লগেপ্রভুর এ কধাগান কোইয়োন, তুমি পত্তিজনে ইক্কিনে তমা ভান্ন্যেই পধত্তুন আর ভান্ন্যেই কামানিত্তুন্ ফিরো, সেক্কে যে দেজ্চান মুই তমার্ আর তমা পুরোণিমানুচ্চোরে দুয়োং সেই দেজত্ তুমি জিংকানিবর্ থেই পারিবে। 6 দেব-দেবেদাগুনোরে সেবা আর পূজো গুরিবাত্তে তারা পিজেদি ন-যেয়ো; তমা আঢে বানেয়্যে জিনিস্চোই মরে অহুজি ন-গোজ্য। সালে মুই তমারে অমংগল ন-গুরিম। 7 ইক্কিনে লগেপ্রভু কোইয়্যেদে, মাত্তর্ তুমি মঅ কধাগান ন-শুনো। সিয়েনর বদলে তমা আঢর্ বানেয়্যে জিনিস্চোই মরে বেজার্ গুরিনে নিজো উগুরে অমংগল ডাগি আন্য। 8 “সেনত্তে বেগত্তুন্ খেমতাবলা লগেপ্রভু কোইয়্যেদে, ‘তুমি মঅ কধা ন-শুনো। 9 সেনত্তে মুই উত্তোরর্ বেক জাদ্তুনোরে আর মর্ চাগর বাবিলোর রাজা নবূখদ্নিৎসররে ডাগি আনিম। এ দেজ্চান আর তা আদাম্মেগুনোর বিরুদ্ধে আর চেরোকিত্যে বেক জাদ্তুনোর বিরুদ্ধে মুই তারারে আনিম। মুই সেই মানুচ্চুনোরে পুরোপুরিভাবে ভস্ত গুরি দিম আর অমকদ দরর্ আর ঈচ্ গরেপারা গুরিম; তারা দেজ্চান মুই জিংকানিবরর্ ভস্তর্ জাগা গুরিম। 10 মুই তারা ভিদিরেত্তুন্ ফুত্তি আর হুজির্ রঅ, নেগ আর মোগোর রঅ, মিশিনোর্ রঅ আর চেরাগ পহর্ দূর্ গুরি দিম। 11 এ দেজ্চান ভস্তর্ জাগা আর ফেলা যেইয়্যে ভূই ওই যেবঅ আর এ জাদ্তুনে সত্তুর বজর ধুরি বাবিলো রাজার চাগর্ ওই থেবাক্। 12 মাত্তর্ সত্তুর বজর্ অলে পরেদি মুই বাবিলোর রাজা আর তা জাদ্তুনোরে তারার অন্যেয়ত্তে সাজা দিম আর বাবিলীয়গুনোর দেজ্চান উমরত্তে ভস্তর্ জাগা বানেম। 13 মুই সে দেজ্চানি বিরুদ্ধে যেদক্কানি কধা কোইয়োং যিয়েনি এ বোইবোত্ লেগা আঘে, অত্তাৎ বেক্ জাদ্তুনো বিরুদ্ধে যিরমিয় ভাববাদী ইজেবে যে কধানি কোইয়্যে সিয়েনি মুই সেই দেজ উগুরে আনিম। 14 বাবিলীয়গুনে বোউত্ জাদর্ আর দাঙর্ দাঙর্ রাজার চাগর্ অবাক্; তারার বেক কামানি অনুসারে মুই তারারে ফল দিম।’ ” জাদ্তুনো উগুরে গোজেনর বিচের্ 15 ইস্রায়েলর গোজেন লগেপ্রভু মরে কোইয়্যেদে, “তুই মঅ আঢত্তুন আংগুর রস, অত্তাৎ মর্ রাগে ভরা এ গলস্চো নেযা আর যিদুক্কুন জাদ ইধু মুই তরে পাদেম্ তারারে সিয়েন হেবাত্তে দে। 16 তারা সিয়েন হেইনে দুলোং দালং অবাক্ আর মুই যে যুদ্ধোগান তারা ইধু পাধেই দিম সিয়েনত্তে পাগল ওই যেবাক্।” 17 সেক্কে মুই লগেপ্রভুর আঢত্তুন গলস্চো নিলুং আর তে যিদুক্কুন জাদ ইধু মরে পাদেয়্যে তারারে হাবেলুং। 18 মুই যিরূশালেম আর যিহূদার শঅরানিত্ আর তার রাজাগুনোরে আর রাজকর্মচারীগুনোরে হাবেলুং, যেন তারা এচ্চ্যে যেবাবোত্যে আগন সেবাবোত্যে ভস্তর্, অমকদ দর্গরেপারা, ঠাট্টার আর অভিশাবর্ জাগাত্ থান। 19 এ বাদেয়ো মুই সিয়েন হাবেলুং মিসরর্ রাজা ফরৌণ আর তার রাজকর্মচারীগুনোরে, তা দেজর্ নেতাগুনোরে আর তার্ বেক মানুচ্চুনোরে; 20 সিদুগোর্ বেক বিদেশীগুনোরে; ঊষ দেজর্ বেক রাজাগুনোরে; পলেষ্টীয়গুনোর বেক রাজাগুনোরে, অত্তাৎ অস্কিলোন, গাজা, ইক্রোণ আর অস্দোদর বাদবাগি ভাগ্কানর রাজাগুনোরে; 21 ইদোম, মোয়াব আর অম্মোনর মানুচ্চুনোরে; 22 সোর আর সীদোনর বেক্ রাজাগুনোরে; সাগরর্ ওপারত্ দেজর্ রাজাগুনোরে; 23 দদান, টেমা, বূষ দেজর্ মানুচ্চুনোরে; মাঢাবোর দ্বিকিত্তেদি চুল কাবা মানুচ্চুনোরে; 24 আরবর বেক্ রাজাগুনোরে; ধূল্যেচর-বামর্ বজত্তি গুরিয়্যে বিদেশী বেক রাজাগুনোরে; 25 সিম্রী, এলম আর মাদীয়গুনোর বেক রাজাগুনোরে; 26 কায়-কুরে আর দূরোর এক্কোর পর এক্কো উত্তোরেদি বেক রাজাগুনোরে। আজল্ কধা, মুই পিত্থিমীর বেক জাদ্তুনোরে সিয়েন হাবেলুং। ইগুনোর বেক্কুনোর পরেদি শেশকর, অত্তাৎ বাবিলোর রাজায়ো সিয়েন হেবঅ। 27 সে পরেদি লগেপ্রভু মরে কোইয়্যেদে, তারারে কঅ, ইস্রায়েলর্ গোজেন বেগত্তুন খেমতাবলা লগেপ্রভু কোইয়্যেদে, মুই তমা ভিদিরে যুদ্ধো পাদাঙর্; তুমি মর্ রাগর গলস্চত্তুন হঅ, মাত্তল্ অ, অগল, গোজ্যে পড় আর ন-উঠ্য। 28 মাত্তর্ তারা যুনি তঅ আঢত্তুন গলস্চোলোই হেবাত্তে অস্বিগের্ গরন সালে তারারে কবে, বেগত্তুন খেমতাবলা লগেপ্রভু কোইয়্যেদে, তমাত্তুন হা পুরিবো। 29 চঅ, মর্ নিজো শঅরানরে মুই পত্থমে ভস্ত গুরিবাত্তে যাঙর্, সালে তুমি কি সাজা ন-পেইনে থেবা? তুমি সাজা পেবাদে পেবা, কিত্তে পিত্থিমীর বেক্ মানুচ্চুনো বিরুদ্ধে মুই যুদ্ধো ডাগি আনঙর্। মুই বেগত্তুন খেমতাবলা লগেপ্রভু এ কধাগান কঙর্। 30 “ইক্কিনে তুই তারা বিরুদ্ধে ভাববাদী ইজেবে এ কধানি কঅ, ‘লগেপ্রভু উগুরেত্তুন গুজুরি উদিবো; তার সুদ্ধো-সাংগ থেবার জাগানত্তুন্ তে তার রবো শুনেব আর তা দেজর্ বিরুদ্ধে খুব দাঙর্ গুরি গুজুরি উদিবো। যিগুনে আংগুর মাড়ন তারা ধোক্ক্যেন তে পিত্থিমীত বজত্তি গুরিয়্যে বেক্কুনো বিরুদ্ধে যোগার্ পারিবো। 31 পিত্থিমীর শেজ্ ধুজি সং সেই রবো শুনো যেবঅ, কিত্তে লগেপ্রভু জাদ্তুনো বিরুদ্ধে আবিত্তি গুরিবো। তে বেক্ মানুচ্চুনোর বিচের্ গুরিবো আর তলোয়ার ইদু পাজিগুনোরে তুলি দিবো।’ ” 32 বেগত্তুন্ খেমতাবলা লগেপ্রভু কোইয়্যেদে, “চঅ, এক জাদত্তুন্ আর এক জাদত্ দজা ছিদি পোজ্যে; পিত্থিমীর শেজ্ ধুজিত্তুন এক্কান দর্গরেপারা ঝড় উদের্।” 33 সেক্কে লগেপ্রভু যিগুনোরে মারে ফেলেব তারা পিত্থিমীর এক ধুজিত্তুন অন্য ধুজি সং বেক্ জাগানিত্ পড়ি থেবাক্। তারাত্তে কনজনে আবিলেচ্ ন-গুরিবাক্ বা তারারে কনজনে এগত্তর্ অ ন-গুরিবাক্ বা গোর্অ ন-দিবাক্, মাত্তর্ তারা অবাক্ মাদিত্ পোজ্যে গবর ধোক্ক্যেন। 34 ও পালক্কুন, তুমি কানঅ, আবিলেচ্ গরঅ; ও পালর্ নেতাগুন, তুমি ধূল্যেত্ এগুড়্-উগুর্ কঅ, কিত্তে তমারে কাবি ফেলেবার সময় এচ্চ্যে; তুমি দোল্ এক্কো মাদি পিলে ধোক্ক্যেন কট্টা কট্টা ওই যেবা। 35 পালক্কুনোর ধেই যেবার পথ ন-থেবঅ; পালর নেতাগুনে কনজাগাত্ যেই ন-পারিবাক্। 36 পালক্কুনোর কানানি আর পালর্ নেতাগুনোর আবিলেচ্ শুনো, কিত্তে লগেপ্রভু তারার চরেদে জাগায়ান বর্বাত গুরি ফেলেয়্যে। 37 লগেপ্রভুর দর্গরেপারা রাগর্ কারনে গম্ গম্ মাদ্তুন ফেলা যেইয়্যে ভূই ওই থেবঅ। 38 তে সিংহ ধোক্ক্যেন গুরি তা জাগায়ান ফেলেই এবঅ; সেক্কে অত্যেচারীগুনোর রাগত্তে আর লগেপ্রভুর দর্গরেপারা রাগত্তে তারা দেজ্চান ভস্ত ওইয়্যে জাগা অবঅ। |
Copyright © 2021 Bangladesh Bible Society
Bangladesh Bible Society