যিরমিয় 22 - Chakma Bible

পাজি রাজাগুনোর বিচের্

¹ লগেপ্রভু মরে যিহূদার রাজঘরত্ যেইনে এ হবরান ফগদাং গুরিবাত্তে কলঅ,

² “দায়ূদর সিংহাসনত্ বোস্যে ও যিহূদার রাজা, তুই, তঅ কামগুরিয়্যেগুনে আর তর্ যিদুক্কুন মানুচ্ এ গেদো ভিদিরেদি এজন, তুমি বেক্কুনে লগেপ্রভুর কধানি শুনো।

³ লগেপ্রভু কোইয়্যেদে, ‘যিয়েন ন্যায্য আর ঠিগ্ তুমি সিয়েনই গরঅ। যিবেরে লুদো ওইয়্যে তারে তা অত্যেচারিগুনোর আঢত্তুন উদ্ধোর গরঅ। বিদেশী, মা-বাপ নেইয়্যে আর রানিমিলেগুনো উগুরে কনঅ অন্যেয় বা অত্যেচার ন-গোজ্য আর এ জাগাত্ নিদ্দুযির্ লো ন-ঝোরেয়ো।

⁴ তুমি যুনি এ উগুমান পালঅ সালে তমা রাজাগুনে দায়ূদোর সিংহাসনত্ বুজিনে রাজাগিরি গুরিবাক্ আর তারার রাজকর্মচারীগুনে আর মানুচ্চুন নিইনে রথত্ আর ঘোড়াত্ চড়িনে এ রাজঘর গেদো ইন্দি ভিদিরে এবাক্।

⁵ মাত্তর্ যুনি তুমি এ উগুমানি ন-পালঅ সালে মুই লগেপ্রভু মর্ নিজো নাঙে শমক্ হেইনে কঙর্, এ রাজঘরান ভস্ত ওই যেবঅ।’ ”

⁶ যিহূদার রাজঘরর বেক জাগানি পৌইদ্যেনে লগেপ্রভু কোইয়্যেদে, যুনিয়ো তুই মইধু গিলিয়দ ধোক্ক্যেন আর লেবানন মোন তোগোন ধোক্ক্যেন তো মুই তরে হামাক্কায় ধূল্যেচর-চাগালা ধোক্ক্যেন বা মানুচ্ নেইয়্যে শঅর ধোক্ক্যেন গুরিম।

⁷ মুই তঅ বিরুদ্ধে ভস্তগুরিয়্যেগুনোরে পাদেম; তারার পত্তিজন আঢত্ আত্যের্ থেবঅ। তারা তর্ গম্ গম্ এরস গাজ্‌চুন কাবিনে আগুনোত্ ফেলেবাক।

⁸ “নানান জাদর্ মানুচ্ এ শঅরর্ কায়-কুরেদি যেবার অক্তত্ একজন আরেক জনরে পুযোর্ গুরিবাক, ‘এ দাঙর্ শঅর উগুরে কিত্তে লগেপ্রভু এধোক্ক্যেন গুরিলো?’

⁹ সিয়েনর জোব্ অবঅ, ‘কিত্তে তারা তারার গোজেন লগেপ্রভুর থিদেবর্ গোজ্যে সুদোমান বাদ দিইনে দেব-দেবেদার পূজো আর সেবা গোজ্যন।’ ”

শল্লুম পৌইদ্যেনে যিরমিয়র কধা

¹⁰ তুমি মুরি যেইয়্যেদে রাজাবোত্তে ন-কান্য বা আবিলেচ্ ন-গোজ্য; তাত্তুন্ বরং যিবে বন্দী ওইনে দূরোত্ যেইয়্যে তাত্তে জদবদে কানঅ, কিত্তে তে আর কনদিন্‌অ ফিরি ন-এবঅ বা তার জর্ম ওইয়্যে দেজ্‌‍চান আর ন-দেগিবা।‍

¹¹ তে অলঅ যোশিয়র পুয়ো শল্লুম, যিবে তা বাবঅ পরেদি যিহূদার রাজা ওইয়্যে মাত্তর্ এ জাগায়ান ছাড়িনে যেইয়্যেগোই। তা পৌইদ্যেনে লগেপ্রভু কোইয়্যেদে, “তে কনদিন্‌অ ফিরি ন-এবঅ।

¹² যিয়েনত্ তে বন্দী ওই আঘে সেই জাগায়ানত্ তে মুরি যেবঅ; তে এ দেজ্‌চান আর ন-দেগিবো।” ‍‍‍

যিহোয়াকীম পৌইদ্যেনে যিরমিয়র কধা

¹³ লগেপ্রভু কোইয়্যেদে, “অভিশাব্ পোড়োক্ তার, যে মানুচ্চো তা ঘরান ভান্ন্যেই টেঙালোই বানায় আর অবিচের দিইনে তা উগুরে তলার ঘুদিগুন বানায়। অভিশাব্ পোড়োক্ তার, যে মানুচ্চো মাগানা তা দেজ মানুচ্চুনোরে খাদায় আর তারার কামর্ বেতন ন-দে।

¹⁴ অভিশাব্ পোড়োক তার, যে মানুচ্চো কয়, ‘মুই নিজোত্তে এক্কান দাঙর্ ঘর্ বানেম যিয়েনর উগুরে তলাত্ থেবঅ দাঙর্ দাঙর্ ঘুদি। মুই সিয়েন ভিদিরে দাঙর্ দাঙর্ জানালা বোজেম আর সিয়েনর তক্তানি এরস গাজ্‌চোই বানেম আর রাঙা রঙোই সাজেম‍।’‍‍‌

¹⁵ ভালোক্কুন এরস গাজ্ থেলে কি সিগুনে তরে রাজা বানেবাক্? তঅ বাবে যুনিয়ো গমেডালে হানা-দানা গুরিদো তো যিয়েন ঠিগ্ আরে ন্যায্য তে সিয়েন গুরিদো বিলি তা অক্তত্ বেক্কানি গমে চলিদো।

¹⁶ তে দুঘী আর অভাবীগুনোর তপ্পে নেযেদ বিলি বেক্কানি গমে চলিদো। লগেপ্রভুরে হবর্ পানা মানে এ কামানি গরানা।

¹⁷ মাত্তর্ তর্ চোগ আর মনান্ আগেদে বানা ভান্ন্যোয়ানি পানা, নিদ্দুযি মানুচ্চুনোর লো ঝরানা আর অত্যেচার আর জুলুম গরানা উগুরে।”

¹⁸ সেনত্তে যিহূদার রাজা যোশিয়র পুয়ো যিহোয়াকীমোর পৌইদ্যেনে লগেপ্রভু কোইয়্যেদে, “মান্‌জ্যে তাত্তে একজন আর একজন ইধু ‘হায় হায়’ কোইনে আবিলেচ্ ন-গুরিবাক্। তারা তাত্তে ‘হায় মর্ প্রভু! হায় তার সয়সাগজ্যে!’ কোইন্যেয়ো আবিলেচ্ ন-গুরিবাক্।

¹⁹ গাধারে যেবাবোত্যেগুরি গোর্ দিয়্যে অয় সেবাবোত্যেগুরি তারে গোর্ দিয়্যে অবঅ; তারে টানিনে যিরূশালেমর গেদো বারেদি ফেলেই দিয়্যে অবঅ।”

যিরূশালেমর সাজা

²⁰ লগেপ্রভু কোইয়্যেদে, “ও যিরূশালেম, তুই লেবাননত্ যেইনে রঅ ছাড়্, তর্ মুয়োর্ রবো বাশনত্ শুনো যোক্। তুই অবারীমত্তুন কিজেক্ কাড়্, কিত্তে তর্ বেক লাঙুনে ভস্ত ওই যেইয়োন।

²¹ তুই যেক্কে গম্ অবস্থায় এলে সেক্কে মুই তরে উজিয়ার গোজ্যং, মাত্তর্ তুই কোইয়োচ্চে, ‘মুই ন-শুনিম।’ পৌইল্যাত্তুন্ ধুরি তঅ বেবহারান এবাবোত্যে; তুই মর্ বাধ্য ন-অচ্।

²² বোইয়্যেরানে তর্ বেক গরগ্‌‌কুনোরে লোড়েই নেযেব আর তঅ লাঙুনে বন্দি ওইনে দূরোত্ যেবাক। সেক্কে তুই তর্ বেক পাজিগানিত্তে লাজত্ আর অগমান্ পেবে।

²³ ও লেবাননর এরস গাজর্ বানেয়্যে ঘরত্ বজত্তি গুরিয়্যে মিলেবো, মিলে পুয়ো পুদোইদ্যে পিড়ে ধোক্ক্যেন যেক্কে তঅ উগুরে এবঅ সেক্কে তুই অমকদ ছোট্‌পোধেবে!”

কনিয়ের, অত্তাৎ যিহোয়াখীনর সাজা

²⁴ লগেপ্রভু কোইয়্যেদে, “ও যিহূদার রাজা যিহোয়াকীমর পুয়ো যিহোয়াখীন, মঅ জিংকানিগানর নাঙে কঙর্, তুই যুনি মঅ ডেন্ আঢর্ সীলমঅরর আংটি অদে তো মুই তরে খুলি ফেলেই দিদুং।

²⁵ যিগুনে তঅ পরাণান নিবাত্তে চান, যিগুনোরে তুই দরাচ্ সেই বাবিলোর রাজা নবূখদ্‌নিৎসর আর বাবিলীয়গুনো আঢত্ মুই তরে তুলি দিম।

²⁶ মুই তরে আর তরে যে জর্ম দিয়্যে তর্ সেই মাবোরে অন্য দেজত্, যিয়েনত্ তমার কারর্ জর্ম ন-অয় সে দেজত্ ছিদি ফেলেই দিম, আর তুমি দ্বিজনে সিয়েনত্ মুরি যেবা।

²⁷ তুমি যে দেজত্ ফিরি এবাত্তে চেবা সিয়েনত্ কনদিন্‌অ ফিরি এই ন-পারিবা।”

²⁸ এ যিহোয়াখীনে কি এন্ এক্কো ঈচ্ গরেপারা ভাঙা পিলে যিবেরে কনজনে ন-চায়? কিত্তে তারে আর তা পুয়ো-ছাগুনোরে তারার হবর্ ন-পেইয়্যে এক্কান দেজত্ ছিদি ফেলা অবঅ?

²⁹ ও দেজ্, দেজ্, দেজ্, লগেপ্রভুর কধানি শুন।

³⁰ লগেপ্রভু কোইয়্যেদে, “তুই লেগ্, এ মানুচ্চোর যেন কনঅ পুয়ো-ছা নেই। তে তার জিংকানিকালত্ ফোলেই ন-পারিবো আর তার কনঅ পুয়ো-ছায়ো গম্ ন-অবাক। তারাত্তুন কনজনে দায়ূদোর সিংহাসনত্ ন-বজিবাক্ বা যিহূদা দেজঅ উগুরে রাজাগিরি ন-গুরিবাক্।”