যিরমিয় 21 - Chakma Bible

সিদিকিয়র কোজোলীগান এলাফেলা গরানা

¹ যেরেদি লগেপ্রভুর কধাগান যিরমিয় ইধু ফগদাং অলঅ। সে অক্তত্ রাজা সিদিকিয় মল্কিয়র পুয়ো পশ্‌হূররে আর মাসেয়র পুয়ো ধর্মগুরু সফনিয়রে যিরমিয় ইধু এ কধাগান কবাত্তে পাদেল,

² “বাবিলর রাজা নবূখদ্‌নিৎসরে আমা লগে যুদ্ধো গরের্; সেনত্তে তুই আমাত্তে লগেপ্রভু ইধু কোজোলী গর্ যেনে তে আমা ইত্তুন্ ফিরি যায়। অয়ত লগেপ্রভু আমাত্তে আগঅ ধোক্ক্যেন আমক্ অইদ্যে কাম্ গুরিবো।”

³ যিরমিয় তারারে কলঅ, “তুমি রাজা সিদিকিয়রে কঅ,

⁴ ইস্রায়েলর গোজেন লগেপ্রভু এ কধাগান কোইয়্যেদে, ‘বাবিল রাজা আর যে বাবিলীয়গুনে দেবাল বারেত্তুন্ তরে আক্রমন গত্তন্ সিগুনো বিরুদ্ধে যুদ্ধোত্তে তঅ আঢত্ যে আত্যেরানি আঘে সিগুনোর মুয়োনি মুই ঘুরেই দিম আর শঅর ভিদিরে সিগুনোরে এগত্তর্ গুরিম।

⁵ মর্ খেমতাবলা আঢ্‌তান বাবেই দিইনে মুই অহুজি ওইনে, রাগে অমকদ উবোল্‌পাল্ ওইনে নিজেই তঅ বিরুদ্ধে যুদ্ধো গুরিম।‌

⁶ এ শঅরত্ যিগুনে বজত্তি গরন, সিবে তে মানুচ্ ওক্ বা য়েমান ওক্, মুই তারারে ভানালোই আঘাত্ গুরিম, সেক্কে তারা মুরি যেবাক্।

⁷ সে পরেদি মুই ভানা, যুদ্ধো আর ভাদরাদর্ আঢত্তুন বাঁজি থেইয়্যে যিহূদার রাজা সিদিকিয়রে, তার রাজকর্মচারিগুনোরে আর এ শঅরর্ বেক মানুচ্চুনোরে বাবিলোর রাজা নবূখদ্‌নিৎসরর‌‌‌‌ আঢত্ আর যিগুনে তারারে মারে ফেলেবাত্তে চান সেই শত্রুগুনো আঢত্ তুলি দিম। নবূখদ্‌নিৎসরে তারারে মারে ফেলেব; তে তারার কনঅ মেয়্যে, দোয়্যে ন-দেগেব। মুই লগেপ্রভু এ কধাগান কঙর্।’ ”

⁸ লগেপ্রভু যিরমিয়রে কলঅ, তুই মানুচ্চুনোরে কঅ, লগেপ্রভু এ কধাগান কোইয়্যেদে, চঅ, মুই তমা মুজুঙোত্ জিংকানির পথ আর মরণর পথ্‌তান রাগেয়োং।‌‍

⁹ যে কনজনে এ শঅরত্ থেবঅ তে যুদ্ধোত্ বা ভাদরাদে বা ভানালোই মুরি যেবঅ, মাত্তর্ যে কনজনে বারেদি নিগিলিনে তমা আক্রমণ গুরিয়্যে বাবিলীয়গুনো আঢত্ নিজোরে তুলি দে তে বাঁজিবো; তে তা পরাণান বাঁজেই পারিবো।

¹⁰ মুই এ শঅরর্ ভালেদি নয় মাত্তর্ খেতি গুরিবাত্তে মনান্ থির্ গোজ্যং। বাবিলো রাজা আঢত্ ইয়েন দিয়্যে অবঅ, আর তে আগুন্দোই ইয়েন পুড়ি দিবো।

¹¹ “ইয়েনবাদেয়ো যিহূদার রাজবংশবোরে মর্ এ কধাগান শুনিবাত্তে কঅ,

¹² ‘ও দায়ূদর বংশ, মুই লগেপ্রভু কঙর্, তুমি পত্তিদিন বেন্যেমাদান্ ন্যায়বিচের গুরিবে। যিবেরে লুদো ওইয়্যে তারে তা অত্যেচারির আঢত্তুন্ উদ্ধোর গুরিবে; সিয়েন ন-গুরিলে তমা ভান্ন্যেই কামানিত্তে মঅ রাগ্‌‌কান নিগিলেনেই আগুনো ধোক্ক্যেন জুলিবো, কনজনে সিয়েন মারেই ন-পারিবো।

¹³ ও যিরূশালেম, যুনিয়ো তুই কলগ উগুরে পাত্তর সংজাগাত্ আগচ্ তো মুই তঅ বিরুদ্ধে। তুই কোই থাচ্, তমা বিরুদ্ধে কনজনে এই ন-পারিবাক্, কনজনে তমা আশ্রয়ে সোমেই ন-পারিবাক্;

¹⁴ মাত্তর্ মুই তর্ কামর পাওনা মজিম তরে সাজা দিম। মুই তর্ ঝারানিত্ আগুন জ্বালেম; সেই আগুনানে তঅ চেরোকিত্তেদি বেক্কানি পুড়ি ফেলেব। মুই লগেপ্রভু এ কধাগান কঙর্।’ ”