যিরমিয় 19 - Chakma Bible

¹ লগেপ্রভু কোইয়্যেদে, তুই যেইনে কুমর ইত্তুন এক্কো মাদির্ পিলে কিনি আন। তঅ লগে মানুচ্চুনোত্তুন্ কয়েক্কো বুড়ো নেতা আর বয়স ওইয়্যে ধর্মগুরুনোরে নেযা।

² সে পরেদি খাপ্‌রা-গেদোত্ সোমেবার পধ ইধু বিন্‌-হিন্নোম কলগত্ যাহ্। মুই তরে যে কধাগান কোম্ সিয়েন সিদু ফগদাং গর্।

³ সে কধাগান অলঅ, ও যিহূদার রাজাগুন আর যিরূশালেমর মানুচ্চুন, মুই ইস্রায়েলর গোজেন বেগত্তুন্ খেমতাবলা লগেপ্রভু যে কধাগান কঙর্ সিয়েন শুনো। মুই এ জাগায়ান উগুরে এমন দজা আনিম, যিগুনে সিয়েনি শুনিবাক্ তারার পত্তিজনর কান আমক্ ওই উদিবো।

⁴ ইয়েনর ভেদ্‌তান্ অলঅ, তারা মরে ছাড়ি যেইয়োন আর এ জাগায়ান দেব-দেবেদাগুনোর জাগা বানেয়োন; তারা এমন দেবেদাগুনো ইধু আগর্‌বাট্টি জ্বালেয়োন যিগুনোর কধা তারার পুরোণি মানুচ্চুনে বা যিহূদার রাজাগুনে কনদিন্‌অ হবর্ ন-পেদাক্। ইয়েন বাদেয়ো এ জাগায়ান তারা নিদ্দুযিগুনোর লো-লোই ভোরেই দুয়োন।

⁵ তারা বাল দেবেদা ইধু উৎসর্ব ইজেবে তারার পুয়ো-ছাগুনোরে আগুনোত্ পুড়িবাত্তে বাল দেবেদার পূজোর্ অজল্ জাগা বানেয়োন, মাত্তর্ মুই সিয়েন গুরিবাত্তে উগুম ন-দুয়োং বা ন-কং আর সিয়েন মর্ মনত্‌অ ন-এজে।‌

⁶ সেনত্তে এমন দিন এজের্ যেক্কে মান্‌‌জ্যে এ জাগায়ানরে আর তোফৎ বা বিন্‌-হিন্নোম কলগত্ ন-কবাক্, কবাক্ জবাই গুরিবার কলগ্।

⁷ এ জাগায়ানত্ মুই যিহূদা আর যিরূশালেমর মানুচ্চুনোর পরিকল্পনাগান বর্‌বাত গুরিম। যিগুনে তারার পরাণান নিবাত্তে চান তারার সেই শত্রুগুনোরে দিইনে যুদ্ধোর ভিদিরে মুই তারারে মারে ফেলেম আর তারার মরাকিয়্যেগানি আগাজর্ পেগ্‌‌‌‌কুনে আর ঝার য়েমানুনোর হানা ইজেবে দিম।‌

⁸ মুই এ শঅরানরে ভস্ত গুরিম আর ঈচ্ গরেদে ধোক্ক্যেন গুরিম; যিগুনে সিয়েন ইন্দি যেবাক্ তারা বেক্কুনে তার বেক আঘাত্‌তানি দোরেবাক্ আর ঈচ্ গুরিবাক্।‌‌

⁹ তারার শত্রুগুন, অত্তাৎ যিগুনে তারারে মারে ফেলেবাত্তে চান তারা যেক্কে তারারে ঘিরিবাক্ সেক্কে সে দুঘোর্ সময়োত্ মুই তারার ঝি-পুয়োগুনোর য়েরাগান তারারে হেবাত্তে বাধ্য গুরিম আর তারা একজনে আর একজনর য়েরা হেবাক্।

^10-11 “সে পরেদি যিগুনে তঅ লগে যেবাক্ তারার চোগো মুজুঙোত্ তুই সেই মাদির্ পিলেবো ভাঙিবে আর তারারে কবে, বেগত্তুন খেমতাবলা লগেপ্রভু কোইয়্যে, ‘কুমরর্ এই পিলেবো যেধোক্ক্যেন কট্টা গরা অলে সিবে আর জোড়া দিয়্যে ন-যায় ঠিগ্ সেধোক্ক্যেন মুই এ জাদ্ বা শঅরানরে কট্টা কট্টা গুরিম। যেদক দিন সং তোফদত্ জাগা থেবঅ সেদকদিন সং তারা সিয়েনত্ তারার মরা মানুচ্চুনোরে গোর্ দিবাক্।

¹² মুই এ জাগায়ান আর ইধুগো আদাম্মেগুনো উগুরে যিয়েন গুরিম সিয়েন এই: মুই এ শঅরানরে তোফত ধোক্ক্যেন গুরিম;

¹³ যিরূশালেমর বেক্ ঘরানি আর যিহূদার রাজাগুনোর ঘরানি, অত্তাৎ যেদক্কানি ঘরর্ ছাল উগুরে বেলান, চানান আর তারাগুনো নাঙে তারা আগর্‌বাট্টি জ্বালেদাক আরে দেব-দেবেদাগুনো নাঙে ঢালন-উৎসর্বর জিনিস ঢালি দিদাক্ সেই বেক ঘরানি তোফত ধোক্ক্যেন অসিজি অবঅ।’ ”

¹⁴ যিরমিয় সে পরেদি তোফৎ ইত্তুন ফিরি এলঅ। লগেপ্রভু তারে তা কধানি কবাত্তে সিদু পাদেয়্যে। তে লগেপ্রভুর ঘর উদোনত্ থিয়্যেইনে বেক মানুচ্চুনোরে কলঅ,

¹⁵ “ইস্রায়েলর বেগত্তুন খেমতাবলা লগেপ্রভু কলঅ, ‘শুন, মুই এ শঅরানর আর তা কায়-কুরে আদামানি উগুরে যেদক্কানি দজা ঘোদেবার কধা কোইয়োং মুই সেই বেক্কানি তারা উগুরে ঘোদেম্, কিত্তে তারা গত্তনা দরমর গোজ্যন আর মঅ কধাগান ন-শুনোন।’ ”