যিরমিয় 18 - Chakma Bible

কুমোরর্ ঘরত্

¹ লগেপ্রভু যিরমিয় ইধু এ কধাগান ফগদাং গুরিলো,

² “তুই কুমরর্ ঘরত্ যাহ্, সিয়েনত্ মুই তঅ লগে কধা কোম্।”

³ সেনত্তে মুই কুমরর্ ঘরত্ গেলুং আর দেগিলুং তে তার চাক্কাবোত্ কাম্ গরের্।

⁴ মুই আরঅ দেগিলুং সে মাদিগান্দোই যে পিলেবো বানেয়্যে সিবে তা আঢত্ বর্‌‌‌বাত ওই গেলঅ; সেক্কে তে সিবে নিইনে আওজ্ মজিম আর এক্কো পিলে বানেল।‌

⁵ সেক্কে লগেপ্রভু মরে কলঅ,

⁶ মুই কঙর্, ও ইস্রায়েলর মানুচ্চুন, মুই কি এ কুমোর ধোক্ক্যেন তমা লগে বেবহার গুরিবাত্তে ন-পারং? ও ইস্রায়েলর মানুচ্চুন, কুমর আঢর্ মাদি ধোক্ক্যেন তুমি মঅ আঢত্ আগঅ।

^7-8 কন্ সময় মুই কন্ জাতি বা রেজ্যর্ শিঙোর্ সুমুত্তো উগুরে ফেলেবার, ভাঙি ফেলেবার আর ভস্ত গুরিবার কধা ফগদাং গুরিলে যুনি সেই জাদ্‌তো মর্ উজিয়ার কধা শুনিনে তার ভান্ন্যেয়ত্তুন ফিরে, মাত্তর্ মুই যে দজাগান আনিবাত্তে ঠিগ্ গোজ্যং সিয়েন তা উগুরে ন-আনিম। ‌‌

^9-10 আর অন্য কন্ সময় মুই কন্ জাদ্ বা রেজ্যরে গাদেই তুলিম আর থিদেবর্ গুরিবার কধা ফগদাং গুরিলে যুনি তে মঅ চোগেদি ভান্ন্যেই কাম্ গরে আর মঅ কধা ন-শুনে, সালে তাত্তে যে ভালেদি গুরিবার আওজ্ মুই গোজ্যং সিয়েন ন-গুরিম।

¹¹ “সেনত্তে ইক্কিনে তুই যিহূদার মানুচ্চুনোরে আর যিরূশালেমর আদাম্মেগুনোরে কঅ, লগেপ্রভু কোইয়্যেদে, ‘চঅ, মুই তমাত্তে দজা আনিবার বেবস্থা গোজ্যং আর তমা বিরুদ্ধে এক্কান পরিকল্পনা গোজ্যং। সেনত্তে তুমি বেক্কুনে তমা ভান্ন্যেই পধত্তুন ফিরো আর তমার আদাউদো আর কামানি গম্ গর।’

¹² মাত্তর্ তারা জোব্ দিবাক, ‘কনঅ লাভ নেই। আমা পরিকল্পনা মজিম আমি চলিবোং; আমি বেক্কুনে নিজোর নিজোর ভান্ন্যেই মনর্ একঘেয়েমিলোই চলিবোং।’ ”

¹³ সেনত্তে লগেপ্রভু কোইয়্যেদে, “জাদ্‌তুনো ভিদিরে তোগেই চাহ্, ইয়েনর আগেদি এবাবোত্যে কধা কনা শুন্যে? আবিদি গাবুর্ মিলে ধোক্ক্যেন ইস্রায়েলে এক্কান জঘন্য কাম্ গোজ্যে।‌‌‍

¹⁴ লেবাননর্ ঈন্ কি কনদিন্‌‌অ তার মুড়োমুড়ির কামা জাগাত্তুন বেক্কান গলি যায়? দূরোত্তুন এচ্চ্যে তার জুরো পানি বেঈ যানাগান কি কনদিন্‌‌অ বন্ধ ওই যায়?

¹⁵ মাত্তর্ মঅ মানুচ্চুনে মরে ভুলি যেইনে বাজে মূত্তি ইধু আগর্‌বাট্টি জালাদন। তারা ঠিগ্ পধত্তুন উজোত্ হেইনে সেই পুরোনা পধেদি আর্ আঢাউদো ন-গত্তন। তারা গম্ পধ্‌‌থান ছাড়িনে ভান্ন্যেই পধেদি চলদন।

¹⁶ সেনত্তে তারা দেজ্‌চান পুরি থেইয়্যে ভূই আর এক্কান জনমর্ ঈচ্ গরেদে জিনিস ওইনে থেবঅ; যিগুনে সে কুরেদি যেবাক্ তারা আমক্ ওইনে মাঢাবো লারেবাক্।‌‌‍‍

¹⁷ তারা শত্রুগুনো মুজুঙোত্ মুই পূগো বোইয়্যের ধোক্ক্যেন তারারে ছিদি দিম্; দজার্ দিনোত্ মুই তারারে মর্ মুয়োদি নয় মাত্তর্ পিঠ দেগেম।”

যিরমিয়র বিরুদ্ধে কুজুরোমি

¹⁸ মানুচ্চুনে কলাক্, “আঢ, আমি যিরমিয়র বিরুদ্ধে ফন্দি গুরিই; কিত্তে ধর্মগুরুগুন ইধু রীদি-সুদোমর্ শিক্ষ্যে, জ্ঞানীগুনো ইধু সল্লা আর ভাববাদীগুনো ইধু গোজেনর কধা দঅ আঘে। সেনত্তে এজঅ, আমি আমা মুয়ো কধালোই তারে দুষি গুরিই আর তা কধায় মনযোগ ন-দিই।”

¹⁹ ও লগেপ্রভু, মঅ কধাগান শুন; মর্ বিপক্ষগুনে মঅ বিরুদ্ধে যিয়েনি কোইয়োন সিয়েনিত্ মনযোগ দে।

²⁰ ভালেদির হেনা সুজোনা কি ভান্ন্যেইলোই অবঅ? মাত্তর্ তারা দঅ মত্তে গাদ্ খুজ্যন্। ইদোত্ তুলি চাহ্, তঅ রাগ্‌কান যেনে তারা উগুরেত্তুন ফিরি যায় সেনত্তে মুই তঅ মুজুঙোত্ থিয়্যেইনে তারার তপ্পে ওইনে কধা কঙর্। ‌‌‍‍‍

²¹ সেনত্তে তুই তারার পুয়ো-ছাগুনোরে ভাদরাদর্ আঢত্ ছাড়ি দে; তলোয়ার আঢত্ তারারে তুলি দে। তারার মোগ্‌কুনে পুয়ো-ছা নেইয়্যে আর রানিমিলে ওক্; তারার মরদ পুয়োগুনে ভানালোই মুরি যাদোক্, আর যুদ্ধোত্ তলোয়ারর কুবোত্ তারার গাবুজ্যে পুয়োগুনে কাবা কাদোক্।‌‌‍‍‍‍

²² তুই তারা বিরুদ্ধে অদাদত্ আক্রমন আনিলে তারার ঘরত্তুন কানানার্ রঅ শুনো যোক্, কিত্তে মরে ধুরিবাত্তে তারা গাদ্ খুজ্যন আর মঅ টেঙানিত্তে ফাল্ পাদি রাগেয়োন।

²³ মাত্তর্ ও লগেপ্রভু, মরে মারেই ফেলেবাত্তে এই বেক্ কুজুরোমির কধানি দঅ তুই হবর্ পাজ। তারার এই অন্যেয়ানি তুই খেমা ন-গুরিচ্ বা তঅ চোগো মুজুঙোত্তুন তারার পাব্‌‌‌‍‍‍‍পানি পুজি ন-ফেলেচ্। তঅ মুজুঙোত্ তারা পড়ি যাদোক্; তর্ রাগর সময়োত্ তুই তারারে সাজা দিচ্।‍