যিরমিয় 17 - Chakma Bible1 লগেপ্রভু কোইয়্যেদে, যিহূদার পাপ্পান লুয়োর্ কলম্বোই লেগা ওইয়্যে, হীরা কাবনিলোই তারার চিদোত্, তারার পুজোবো শিঙো উগুরে কাবিনে লেগা ওইয়্যে। 2 ডেলা-পাদা ছোড়েয়্যে য়েল্ গাজর্ তলে অজল্ অজল্ মুড়ো উগুরে তারার পুজো আশেরা-মূত্তিগুন তারার পুয়ো-ছাগুনো ইধুয়ো গম্। 3 ও যিহূদা, তঅ পাপত্তে দেজ ভিদিরে মর্ মুড়োমুড়ি আর তর্ ধন আর তর্ ভান্ডালর পযাপিরানি আর সারা দেজত্ তর্ পুজোর্ অজল জাগায়ানি মুই লুদেয়্যে ইজেবে দি দিম। 4 যে অধিকারান্ মুই তরে দুয়োং, তর্ নিজো দুষে তুই সিয়েন আরেবে। যে দেজ্চান কধা তুই হবর্ ন-পাজ্ সে দেজত্ মুই তরে তঅ শত্রুগুনোর চাগর্ বানেম, কিত্তে তুই মর্ রাগর্ আগুনান জ্বালেয়োচ্ আর সিয়েন জিংকানিবর্ জুলিবো। 5 লগেপ্রভু কোইয়্যেদে, যে মানুচ্চো মান্জ্য উগুরে বিশ্বেজ্ গুরিনে আর বলত্তে নিজো কিয়্যে উগুরে বিশ্বেজ্ গরে আর যিবের্ মনান মত্তুন্ সুরি যেইয়্যে তে অভিশাব্ পেইয়্যে। 6 তে অবদে পুরি থেইয়্যে ভূইয়োত্ এক্কো ঝুবো ধোক্ক্যেন; গম্ সময় এলে তে সিয়েন ন-দেগিবো। ধূল্যেচর-চাগালাত্ গরম শুগুনো জাগাত্, অত্তাৎ যিয়েনত্ কনজন বজত্তি ন-গরন এবাবোত্যে নুন্জো জাগাত্ তে বজত্তি গুরিবো। 7 মাত্তর্ সে মানুচ্চো বর্পেইয়্যে, যে লগেপ্রভু উগুরে বিশ্বেজ্ গরে আর লগেপ্রভু যিবের্ বিশ্বেজর্ গড়াগান। 8 তে পানি পারত্ লাগেয়্যে গাজ ধোক্ক্যেন অবঅ যিবে গঙার্ পারত্ তা শিঙোরান মিলি দে। গরম এলে তে ন-দরায়; তার্ পাদানি নিত্য য়েল্ থায়। খরান্যেত্ তার কনঅ চিদে চজ্জা ন-অয় আর তে কনদিন্অ গুলোগুলি নেইয়্যে ন-অয়। 9 মনান্ বেগত্তুন্ বেশ ঠগ্, তারে কনঅ বাবদে গম্ গরা ন-যায়। কনজনে মান্জ্যর্ মনানি বুঝি ন-পারে। 10 মুই লগেপ্রভু মনান তোগেইনে চাং আর মনরে জগা চাং; মুই মান্জ্যর আদাউদো আর তার্ কামর্ পাওনা মজিম ফল্ দুয়োং। 11 “অন্য বদাত্ উম্ দিইনে চঅ পেইয়্যে তিতি পেগো ধোক্ক্যেন সেই মানুচ্চো, যে ভান্ন্যেই গুরিনে ধন লাভ গরে। তা বয়জর্ সংমোধ্যে সময়ানত্ সেই ধনানিয়ে তারে ছাড়িনে যেবগোই, আর যেরেদি তে বেদমা বিলিনে ফগদাং অবঅ।” 12 সেই পৌইল্যাত্তুন্ ধুরি থিদেবর্ গোজ্যে বাঈনী গুরিবার সিংহাসনান্ অলঅ আমা পবিত্র উবোসনা-ঘরর জাগা। 13 ও লগেপ্রভু, ইস্রায়েলর আজা, যিগুনে তরে ছাড়ি যেইয়োন তারার বেক্কুনোরে লাজত্ ফেলা অবঅ। তত্তুন্ যিগুনে ফিরি যেইয়োন তারার নাঙানি ধুল্যেলোই লেগা অবঅ, কিত্তে তারা জেদা পানির পয়নালা লগেপ্রভুরে ছাড়ি যেইয়োন। 14 ও লগেপ্রভু, মরে গম্ গর, সেক্কে মুই গম্ ওম; মরে উদ্ধোর্ গর্, সেক্কে মুই উদ্ধোর্ পেম, কিত্তে তুয়ই মর্ বাঈনী গুরিবার মানুচ্। 15 চঅ, তারা মরে কন্, “লগেপ্রভুর কধানি কুদু? ইক্কিনে সিয়েন পুরোন ওক্।” 16 তঅ মানুচ্চুনোর পালক অনাত্তুন মুই দঅ ধেই ন-যাং; তুই হবর্ পাজ্ মুই দজার্ দিন ন-চাং। মঅ মুয়োত্তুন যিয়েনি নিগিলি এজে সিয়েনি তত্তুন লুগেয়্যে নয়। 17 তুই মর্ ভাঙি পড়িবার কারন ন-ওচ্; দযার্ দিনোত্ তুয়ই মর্ আশ্রয়। 18 মর্ অত্যেচারিগুনোরে লাজত্ ফেলা ওক্, মাত্তর্ তুই মরে লাজত্তুন্ রোক্ষ্যে গর্। তারা ভাঙি পোড়োক, মাত্তর্ তুই মরে ভাঙি পড়ানাত্তুন্ রোক্ষ্যে গর্। তুই তারা উগুরে দজার্ দিন আনি দে; দ্বিগুন ভস্ত দিইনে তারারে ভস্ত গর্। জিরেবার দিন্নো পালানা 19 মানেইয়ুনোর্ যে গেট্তোদি যিহূদার রাজাগুনে এদাক্-যেদাক্ লগেপ্রভু মরে সে গেট্তোদি আর যিরূশালেমর অন্য বেক্ গেট্তুনোত্অ যেইনে থিয়্যেবাত্তে কলঅ। 20 তে মরে এ কধাগান কবাত্তে কলঅ, “ও যিহূদার রাজাগুন আর বেক্ মানুচ্চুন আর যিরূশালেমত্ বজত্তি গুরিয়্যে বেক্কুনে, তুমি যিগুনে এ গেট্তুনোদি ভিদিরে এযানা-যানা গুরি থাগঅ, তুমি লগেপ্রভুর কধানি শুনো। 21 লগেপ্রভু কোইয়্যেদে, ‘তুমি উজিয়ার অ; জিরেবার দিনোত্ কনঅ বুদি ন-বুয়োবা বা যিরূশালেমর গেট্তোদি সিগুন ভিদিরে ন-আনিবা। 22 মুই যেবাবোত্যেগুরি তমা পুরোণি মানুচ্চুনোরে উগুম দুয়োং সেবাবোত্যে জিরেবার দিনোত্ তুমি তমা ঘরত্তুন্ কনঅ বুদি নিগিলেই ন-আনিবা বা কনঅ কাম ন-গুরিবা, বরং জিরেবার দিন্নো মঅ নাঙে যুদো গুরি রাগেবা। 23 তমা পুরোণি মানুচ্চুনে সে কধা নয়ো শুনোন্, সিয়েনত্ মনযোগ্অ ন-দুয়োন। তারা তারার গত্তনাবো দরমর গোজ্যন; তারা মঅ কধানি শুনিবাত্তে আর মঅ শাজনান্ মানিবাত্তে অস্বিগের গোজ্যন। 24 মাত্তর্ যুনি তুমি উজিয়ার ওইনে মর্ কধামজিম আঢঅ আর জিরেবার দিনোত্ শঅরর্ গেদো ইন্দি কনঅ বুধি ন-আন বরং জিরেবার দিন্নোত্ কনঅ কাম্ ন-গুরিনে দিন্নোরে মঅ নাঙে যুদো গুরি রাগঅ, 25 সালে তমা রাজাগুনে দায়ূদোর সিংহাসনত্ বুজিনে রাজাগিরি গুরিবাক্। তারা, তারার কামগুরিয়্যেগুনে আর যিহূদার মানুচ্চুনে আর যিরূশালেমর আদাম্মেগুনে রথত্ আর ঘোড়াত্ চড়িনে শঅর গেট্তোদি এযানা-যানা গুরিবাক্; এ শঅরান কনদিন্অ মানুচ্ নেইয়্যে ন-অবঅ। 26 যিহূদার শঅরানি আর যিরূশালেমর কায়-কুরে আদামানিত্তুন বিন্যামীন চাগালা আর অজল্ নিজো মুড়োমুড়ি চাগালাত্তুন আর নেগেভত্তুন মানুচ্চুনে এবাক্ আর লগেপ্রভুর ঘরত্ পুজ্যে-উৎসর্ব, এ্যামান- উৎসর্ব, শোস্য-উৎসর্ব, আগর্বাট্টি আর ভালেদি উৎসর্বর জিনিস আনিবাক্। 27 মাত্তর্ যুনি তুমি মঅ কধা ন-শুনো আর জিরেবার দিন্নোরে মঅ নাঙে যুদো গুরি ন-রাগঅ আর সে দিনোত্ বুধিলোই যিরূশালেমর গেদো ভিদিরেদি চমঅ, মাত্তর্ যিরূশালেমর বেক্ গেট্তুনোদি মুই আগুন জ্বালেম আর সিয়েনে তার ঘরানি পুড়ি ফেলেব। সে আগুনান কনজনে মারেই ন-পারিবো।’ ” |
Copyright © 2021 Bangladesh Bible Society
Bangladesh Bible Society