যিরমিয় 16 - Chakma Bible

সর্বনাজর্ দিন

¹ সে পরেদি লগেপ্রভু মরে কলঅ,

² তুই এ জাগানত্ মেলা ন-গুরিচ্ আর পুয়ো-ছার্‌অ জর্ম ন-দিচ্, ‍

^3-4 কিত্তে মুই লগেপ্রভু কঙর্, এ জাগানত্ জর্ম ওইয়্যে পুয়ো-ছাগুন, তারার মাগুনে আর তারার বাব্‌পুনে জদবদে পীড়েই মুরি যেবাক্। কনজনে তারাত্তে আবিলেচ্‌‌অ ন-গুরিবাক্ আর কনজনে তারারে গোর্‌অ ন-দিবাক মাত্তর্ তারা গবর ধোক্ক্যেন মাদিত্ পড়ি থেবাক্। তারা যুদ্ধো আর ভাদরাদে ভস্ত অবাক্ আর তারার মরাকিয়্যেনি আগাজ পেগ্‌কুনে আর ঝার য়েমানুনোর হানা অবঅ।

⁵ যে ঘরত্ মান্‌জ্যে আবিলেচ্ গরন সেই ঘরানত্ ন-চোমেস্; আবিলেচ্ গুরিবাত্তে বা তারার দুঘে দুঘি অবাত্তে সিদু ন-যেস্, কিত্তে এ মানুচ্চুনোত্তুন মুই মর্ সুগ্-শান্দি, অমকদ কোচ্‌‌‌পানা আর মেয়্যে তুলি নেযেয়োং।

⁶ এ দেজত্ চিগোন-দাঙর্ বেক্কুনে মুরি যেবাক্। কনজনে তারারে গোর্‌অ ন-দিবাক্, তারাত্তে আবিলেচ্অ ন-গুরিবাক্ আর কনজনে তারাত্তে নিজো কিয়্যেগান কাবাকাবিয়ো ন-গুরিবাক্, নিজোর মাঢাবোয়ো ন-মুড়েবাক্।

⁷ যিগুনে সেই মরাগুনোত্তে আবিলেচ্ গরন, এন্ কি, বাবা বা মাবোত্তে আবিলেচ্ গরন তারারে বুঝেবাত্তে কনজনে হানায়ো ন-দিবা বা পানিয়োও ন-দিবা।

⁸ মেইত্‌‌বান ঘরত্ যেইনে হানা-দানা গুরিবাত্তে ন-বুজিস্,

⁹ কিত্তে মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, মুই এ জাগানর্ মানুচ্চুনোর চোগো মুজুঙোত্ আর তারার জিংকানিত্ ফুত্তি আর হুজির রঅ আর নূয়ো বৌ-নূয়ো জামের্ মুয়োর্ কধানি বন্ধ গুরি দিম।

¹⁰ “এ মানুচ্চুনো ইধু এ কধানি কনার্ পরেদি তারা যেক্কে তরে পুযোর্ গুরিবাক্, ‘লগেপ্রভু আমা বিরুদ্ধে এবাবোত্যে দযার্ কধা কোইয়্যে কিত্তে? আমি কি গোজ্যেই? আমা গোজেন লগেপ্রভুর বিরুদ্ধে আমি কি পাপ গোজ্যেই?’

¹¹ সেক্কে তুই তারারে কবে, লগেপ্রভু কোইয়্যেদে, ‘ইয়েনর কারনান্ অলঅ তমা পুরোণি মানুচ্চুনে মরে ছাড়ি যেইয়োন আর দেব-দেবেদাগুনোর পিজেদি যেইনে তারারে সেবা আর পূজো গোজ্যন্। তারা মরে ছাড়ি যেইয়োন আর মর্ সুদোমানি অমান্য গোজ্যন্।

¹² মাত্তর্ তুমি তমা পুরোণি মানুচ্চুনোত্তুন বেশ্ ভান্ন্যেই গুরি চোল্য। চঅ, তুমি পত্তিজনে মর্ কধামজিম ন-চলিনে কিবাবোত্যে গুরিনে তমা ভান্ন্যেই মনর্ এক কুপ্পে গুরি চলর্।

¹³ সেনত্তে মুই এ দেজত্তুন্ তমারে এমন এক্কান দেজত্ ছিদি ফেলেই দিম্ যে দেজ্‌‌চানর কধা তুমিয়ো হবর্ ন-পঅ, তমা পুরোণি মানুচ্চুনেয়ো হবর্ ন-পেদাক্। সিয়েনত্ তুমি দিন-রেদ দেব-দেবেদাগুনোরে সেবা গুরিবা, কিত্তে মুই তমারে কনঅ দোয়্যে ন-দেগেম।’ ”

¹⁴ লগেপ্রভু কোইয়্যেদে, এমন দিন এজের্ যেক্কে মানুচ্চুনে আর্ ন-কবাক্, যিবে ইস্রায়েলীয়গুনোরে মিসর দেজত্তুন্ নিগিলেই আন্যে সেই জেদা লগেপ্রভুর নাঙে,

¹⁵ বরং তারা কবাক্, যিবে উত্তর দেজত্ আর অন্য দেজত্ ইস্রায়েলীয়গুনোরে দূর্ গুরি দিয়্যে আর সিয়েনত্তুন নিগিলেই আন্যে সেই জেদা লগেপ্রভুর নাঙে। তারা এ কধাগান কবাক্, কিত্তে যে দেজ্‌চান মুই তারার পুরোণি মানুচ্চুনোরে দুয়োং সেই দেজত্ তারারে ফিরেই আনিম।‍‌‍

¹⁶ “মাত্তর্ ইক্কিনে মুই বোউত্ জাল্যেরে ডাগিনে পাদেম্ আর তারা তারার মাছ ধোক্ক্যেন ধুরিবাক্। সে পরেদি মুই বোউত্ শিগেরিরে ডাগিনে পাদেম্ আর তারা পত্তিজনে দাঙর্ আর চিগোন মুড়ো আর পাত্তর ফাদাত্তুন্ তারা শিগের্ গুরি আনিবাক্।

¹⁷ তারার বেক আঢাউদোগানি উগুরে মঅ চোগ্‌কুন রোইয়্যে; তারা মঅ চোগ্‌কুনোত্তুন লুগেয়্যে নয় আর তারার পাব্‌‍‍‍পানিয়ো মত্তুন্ গুমরত্ নয়। ‍‍‍

¹⁸ তারার পাজিগানিত্তে আর পাপ্পানিত্তে মুই তারারে দ্বিগুন ফল দিম, কিত্তে তারা মঅ দেজ্‌‍‍‍চানরে অসিজি গোজ্যন আর তারাত্তে জঘন্য মূত্তি আর পুজোলোই মর্ সেই অধিকারানরে পুরোন গোজ্যন‍।”

¹⁹ ও লগেপ্রভু, মর্ খেমতা, মর্ ঘর, মর্ দুঘো সময়োর আশ্রয়, পিথ্‌তিমীর শেজ্ দুযিত্তুন অন্য জাদ্‌‌তুনে তইধু এইনে কবাক্, “আমা পুরোণি মানুচ্চুনে এমন মিজে দেব-দেবেদা আর অপদাত্ত মূত্তির্ গিরোজ্ এলাক্ যিয়েনিলোই তারার কনঅ লাভ ন-অয়।‍‍‍

²⁰ মান্‌‍‍‍জ্যে কি নিজোত্তে দেব-দেবেদা বানেই পারন? যুনিয়ো বা সিয়েনি গরন সিগুন দঅ গোজেন নয়‍।”

²¹ লগেপ্রভু কোইয়্যেদে, “সেনত্তে এবার্ মুই ইস্রায়েলীয়গুনোরে মর্ খেমতা আর বল্ দেগেইনে শিক্ষ্যে দিম্। সেক্কে তারা হবর্ পেবাক্, মঅ নাঙান লগেপ্রভু।”