যিরমিয় 14 - Chakma Bibleখরান্, ভাদড়াত্ আর যুদ্ধো 1 খরান পৌইদ্যেনে লগেপ্রভু যিরমিয়রে কলঅ, 2 “যিহূদা আবিলেচ্ গরের্, কিত্তে তা শঅরানি বল্পোজ্যে ওই পোজ্যে; সিদুগোর মানুচ্চুনে মাদিত্ পড়িনে আবিলেচ্ গত্তন্, আর যিরূশালেমত্তুন এক্কো কানানা রঅ উগুরে উদের্। 3 মুরুব্বীগুনে পানিত্তে তারার চাগরুনোরে পাদান; তারা পানি জাগাত্ এইনে পানি ন-পেইনে সুদো কুম্বোই ফিরি যান; তারা লাজে আর আশা আরেইনে ওইনে মাঢাগুন নাঢি রাগান্। 4 মাদি ফাদি যেইয়্যে, কিত্তে দেজত্ কনঅ ঝড় ন-অয়; চাষ গুরিয়্যেগুনে মন-ভাঙালা ওইনে মাঢাত্ আত্ দুয়োন। 5 এন্ কি, মাদত্ ঘাস নেই বিলিনে ভুলী উরিঙো ছঅ ফুদেইনে তা ছঅবোরে ফেলেই যায়। 6 ঝার্বো গাধাগুনে গাজ্-বাজ্ নেইয়্যে মুড়োমুড়ি উগুরে থিয়্যেইনে শিয়েল ধোক্ক্যেন ফবান্; ঘাসর অভাবে তারার চোগ্কুনোর তেজ্ কুমি যায়।” 7 ও লগেপ্রভু, আমা পাপ্পানিয়ে যুনিয়ো আমা বিরুদ্ধে সাক্ষি দে তো তঅ সুনাঙত্তে কিজু গর্। আমি ভালোক্বার ভান্ন্যেই পধেদি যেইয়্যেই; আমি তঅ বিরুদ্ধে পাপ গোজ্যেই। 8 ও ইস্রায়েলর আজা, দুঘো সময়োর উদ্ধোরগুরিয়্যে, কিত্তে তুই দেজ ভিদিরে অচেনা ধোক্ক্যেন, এক রেত্ থেইয়্যে বেড়ান্যে ধোক্ক্যেন ওইয়োচ্? 9 কিত্তে তুই দিগ্কাবুলো ওইয়্যে মান্জ্য ধোক্ক্যেন, রোক্ষ্যে গুরি ন-পাজ্যে এমন যোদ্ধা ধোক্ক্যেন ওইয়োচ্? ও লগেপ্রভু, তুই আমা ভিদিরে আগচ্ আর আমি দঅ তরই; তুই আমারে ছাড়ি ন-যেচ্। 10 এ মানুচ্চুনে পৌইদ্যেনে লগেপ্রভু কোইয়্যেদে, “তারা ঘুরি বেড়াদে গম্পান; তারা তারার টেঙানি ন-থামান্। সেনত্তে মুই তারারে গুজি ন-লং; মুই এবেরা তারার পাজিগানির পৌইদ্যেনে ইদোত্ তুলিম আর পাপত্তে সাজা দিম্।” 11 সে পরেদি লগেপ্রভু মরে কলঅ, “তুই এ মানুচ্চুনোর ভালেদিত্তে তবনা ন-গুরিচ্। 12 তারা যুনিয়ো বা উবোস থান্ তো তারার কানানিগানি মুই ন-শুনিম; পুজ্যে- উৎসর্ব আর শোজ্য-উৎসর্বর অনুষ্ঠান গুরিলেয়ো মুই সিয়েনি গুজি ন-লোম। সিয়েনর বদলে যুদ্ধো, ভাদরাত্ আর পীড়ে ভানালোই মুই তারারে ভস্ত গুরিম।” 13 ইয়েন্দোই মুই কলুং, “হায়, প্রভু লগেপ্রভু! ভাববাদীগুনে তারারে কদন্, ‘তুমি যুদ্ধো ন-দেগিবা বা ভাদরাদত্অ দুঘ্ ন-পেবা। লগেপ্রভু ঘেচ্চেকগুরি এ জাগানত্ তমারে জনমর্ সুগ্-শান্দি দান গুরিবো।’ ” 14 সেক্কে লগেপ্রভু মরে কলঅ, ভাববাদীগুনে মঅ নাঙে মিজে আগাম্ কধা কদন্। মুই তারারে ন-পাদাং, তারারে উগুম ন-দুয়োং বা তারা ইধু কনঅ কধায়ো ন-কং। তারা তমা ইধু মিজে দর্শন, মিজে গোণেই দেনা আর নিজোর্ মনেমন্জক্কাগুরি মিজে কধা কন্। 15 সেনত্তে যিদুক্কুন ভাববাদী মঅ নাঙে কধা কদন্ তারা পৌইদ্যেনে মুই লগেপ্রভু এ কধাগান কঙর্, মুই তারারে ন-পাদাং, তো তারা কদন্, কিত্তে যুদ্ধো বা ভাদরাত্ এ দেজত্ ন-এবঅ। সেই বেক্ ভাববাদীগুনে যুদ্ধোত্ বা ভাদরাদত্ ভস্ত ওই যেবাক্। 16 যিদুক্কুন মান্জ্য ইধু তারা ভাববাদী ইজেবে কধা কদন্ তারার মরা কিয়্যেনি ভাদরাত্ আর যুদ্ধোত্তে যিরূশালেমর পধে পধে ছিদি ফেলেই দিয়্যে অবঅ। তারার বা তারার মোগ্কুনোরে আর ঝি-পুয়োগুনোরে গোরত্ দিবাত্তে কনজন ন-থেবাক্। তারার পাওনা দুর্দশা মুই তারা উগুরে ঢালি দিম। 17 “তুই মানুচ্চুনো ইধু এ কধাগান কঅ, ‘মঅ চোগো পানি ন-থামেইনে দিন-রেদ মঅ চোগ্কুনোত্তুন উগুরি পোড়োক্, কিত্তে মঅ জাদর্ মানুচ্চুনে অমকদ আঘাত্, চুরমার-গোজ্যে আঘাত্ পেইয়োন। 18 মুই নিগিলিনে মাদত্ গেলে মরা মানুচ্চুনোরে দেগং; আর শঅরত্ গেলে দেগং ভাদরাদর্ কারনে ভস্ত। ভাববাদী আর ধর্মগুরুগুনে এমন দেজত্ ঘুরি বেড়াদন যিগুনো পৌইদ্যেনে তারা কিচ্চু হবর্ ন-পান।’ ” 19 ও লগেপ্রভু, তুই কি যিহূদারে এক্কুবারে এলাফেলা গোজ্যস্? তুই কি সিয়োনরে ঈচ্ গোজ্যস্? তুই আমারে কিত্তে এদক্ ঘিনেয়োচ্? আমি গম্ ওই ন-পারির? আমি সুগ্-শান্দির আশা গোজ্যেই মাত্তর্ অমকদ দর্বুক এলঅ। 20 ও লগেপ্রভু, আমি আমার পাজিগানি আর আমা পুরোণি মানুচ্চুনোর দুষোর্ কধানি স্বিগের্ গুরির্; আমি ঘেচ্চেকগুরি তঅ বিরুদ্ধে পাপ গোজ্যেই। 21 তঅ সুনাঙান রোক্ষ্যে গুরিবাত্তে তুই আমান্দিত্তুন মুয়োন ফিরেই ন-নেযেচ্; তর্ বাঈনী গুরিবার সিংহাসনর জাগায়ানরে অসন্মান অবাত্তে ন-দিচ্। আমাত্তে তর্ থিদেবর্ গোজ্যে সুদোমর কধানি ইদোত্ তুল্; তুই সিয়েনি বাদ ন-দিচ্। 22 জাদ্তুনোর বাজে মূত্তিগুনে কি ঝড় আনি পারন? আগাজ্চানে নিজে নিজে কি এক লেজা ঝড় দি পারে? ও আমার গোজেন লগেপ্রভু, বানা তুয়ই সিয়েন পারচ্। সেনত্তে তঅ উগুরে আমি আজা রাগেই, কিত্তে তুয়ই ইয়েনি গুরি থাচ্। |
Copyright © 2021 Bangladesh Bible Society
Bangladesh Bible Society