যিরমিয় 12 - Chakma Bible

যিরমিয়র আবিত্তি

¹ ও লগেপ্রভু, মুই যেক্কে তঅ বিরুদ্ধে কনঅ আবিত্তি গরং সেক্কে তুই যে নিদ্দুযি সিয়েনি নিত্য ফগদাং অয়। তো মুই তঅ বিচের পৌইদ্যেনে তঅ লগে কিজু কধা কোম্। পাজিগুনোর পথ্‌‍‍‌‌‌‌তান কেনে গম্ অয়? যিগুনে বেঈমানী গরন তারা কেনে আরামে বজত্তি গরন?

² তুয়ই তারারে লাগেয়োচ্ আর তারা শিঙোর্ বোজেয়োন; তারা দাঙর্ অন আর তারার গুলোগুলি ধরন। মুয়োদি তারা আমিঝে তঅ কধা কন্ মাত্তর্ তারার মনান তত্তুন দূরোত্ থায়।

³ ও লগেপ্রভু, তুই মরে হবর্ পাজ; তুই মরে চেই থাচ্ আর তঅ উগুরে মর্ ভোক্তি কত্তমান সিয়েন যগা চাজ্। ভেড়া ধোক্ক্যেন কাবি ফেলেবাত্তে তুই তারারে টানি নেযাচ্; কাবিবার দিন্নোত্তে তারারে যুদো গুরি রাগেজ্।

⁴ আর কয়দিন দেজ্‌‍‍‌‌‌‌‌চানে আবিলেজ্ গুরিবো আর মাদ গাজ্‌‍‍‌‌‌‌‌চানি শুগুনো ওই থেবঅ? যিগুনে সিয়েনত্ বজত্তি গরন তারা ভান্ন্যেই বিলিনে য়েমানে আর পেগ্‌‍‍‌‌‌‌‌কুনে বেক্কুন ভস্ত ওই যেইয়োন। সেই মানুচ্চুনে কদন, “আমার যিয়েন অবঅ সিয়েন তে ন-দেগিবো।”

গোজেনর জোব্ দেনা

⁵ মান্‌‍‍‌‌‌‌‌‌জ্য লগে ধাবা দেনাত্ যুনি তুই বল্‌পোজ্যে ওই পড়চ্ সালে ঘোড়াগুনো লগে ধাবা দেদি তুই কেধোক্ক্যেন গুরি পারিবে? বানা সুগ্ শান্দিবলা দেজত্ যুনি তুই নিজোরে নিরাপদ মনে গরচ্ সালে যর্দনর পার ঝারত্ তুই কেধোক্ক্যেন গুরি থেবে?‍‍‌‌‌‌‌‌

⁶ তঅ ভেইয়ুনে, অত্তাৎ তঅ বংশর নিজো মানুচ্চুনে তল্লোই বেঈমানী গোজ্যন; তারায়ো তঅ পিজেদি লাক্যন্। তঅ পৌইদ্যেনে গম্ কধা কলেয়ো তারারে বিশ্বেজ্ ন-গুরিচ্।

⁷ “মুই মঅ মানুচ্চুনোরে ইরি দুয়োং আর মর্ সোম্বোত্তি ইস্রায়েলরে বাদ দুয়োং; মুই যিবেরে কোচ্‌পাং সিবেরে তা শত্রুগুনো আঢত্ তুলি দুয়োং।‌

⁸ মঅ সোম্বোত্তিগান মইধু ঝার সিংহ ধোক্ক্যেন ওইয়্যে। তে মরে দেগিনে গুজুরি উঠ্যে, সেনত্তে মুই তারে ঈচ্ গরং।

⁹ মঅ সোম্বোত্তিগান মইধু অদ্ভূদ রংয়র শিগেরী পেগো ধোক্ক্যেন ওইয়্যে, যিবেরে অন্য শিগেরী পেগ্‌কুনে ঘিরিনে আক্রমণ গোজ্যন্। তুই যেইনে বেক্ ঝার্‌‌‌‌বো য়েমানুনোরে এগত্তর্ গুরিনে আন যেন তারা হেই পান। ‌

¹⁰ বোউত্ গরগে মর্ আংগুর খেত্‌‌‌তান বর্‌‌‌বাত লাগেয়োন আর সিগুন টেঙোই মাজ্যন্; মর্ দোল্ খেত্‌তানরে তারা মানুচ্ নেইয়্যে আঙ্যা ভূই বানেয়োন। ‌‌

¹¹ সিয়েনে মইধু মানুচ্ নেইয়্যে ওইনে আবিলেচ্ গোজ্যন। পুরো দেজ্‌চান আঙ্যা ভূই ওইনে রোইয়্যে বিলি কনজনে সিয়েন ইন্দি মনযোগ্ ন-দুয়োন।‌‌

¹² ধূল্যেচর-চাগালার গাজ্‌‌‌বাজ নেইয়্যে মুড়ো উগুরে ভস্ত গুরিয়্যেগুনে এচ্চোন্, কিত্তে লগেপ্রভুর তলোয়ারান দেজর্ এক কিত্তেত্তুন ধুরি অন্য কিত্তেদি সং গিলি ফেল্যে; কনজনে সুগে শান্দিয়্যে নেই।

¹³ তারা লাগেয়োন গম মাত্তর্ কাব্‌‌‌পোন্দে কাদা; তারা জদবদে কাম্ গোজ্যন মাত্তর্ কিচ্চু ন-পান। লগেপ্রভুর জ্বোল্‌জোল্যে রাগর কারনে তুমি তমার খেত্‌‌‌‌খেত্তি কাবিবার লাজানাগান পঅর্।‌”

¹⁴ লগেপ্রভু কোইয়্যেদে, “মুই অধিকার ইজেবে যে জাগায়ান মঅ মানুচ্চুনোরে দুয়োং মর্ বেক পাজি পাড়াল্যেগুনে সিয়েনত্ হানা দুয়োন। সেনত্তে মুই তারার দেজত্তুন্ তারারে তুলি দিম্ আর তারাত্তুন যিহূদার মানুচ্চুনোরে তুলি আনিম।

¹⁵ মাত্তর্ তারারে উগুরে ফেলানার পরেদি মুই আরঅ মেয়্যে গুরিনে তারার পত্তিজনরে তার নিজোর অধিকারে আর নিজোর দেজত্ ফিরেই আনিম।

¹⁶ যুনিয়ো তারা একদিন মঅ মানুচ্চুনোরে বাল দেবেদার নাঙে শমক্ গুরিবাত্তে শিগেয়োন তো যুনি তারা মঅ মানুচ্চুনোর পধেদি আঢন্ আর ‘জেদা লগেপ্রভুর নাঙে’ বিলি মঅ নাঙে শমক্ গরন, সালে তারা মঅ মানুচ্চুনো ভিদিরেত্তুন বর্ পেবাক্।

¹⁷ মাত্তর্ যুনি কনঅ জাদে সিয়েন ন-গরন সালে তারে মুই পুরোপুরি গুরি উগুরে ফেলেইনে ভস্ত গুরি দিম। মুই লগেপ্রভু এ কধাগান কঙর্।”