যিরমিয় 11 - Chakma Bible

অবাধ্য অনার সাজা

^1-3 লগেপ্রভু মরে কলঅ যেন মুই এ সুদমর্ কধানি শুনোং আর সিয়েনি যিহূদার আর যিরূশালেমর মানুচ্চুনোরে কঙ্, ইস্রায়েলর গোজেন লগেপ্রভু কোইয়্যেদে, “যে কনজনে এ সুদোমর কধানি ন-পালায় তে অভিশাপ্‌‍‍‍পেইয়্যে।‍

⁴ যেক্কেনে মুই তমা পুরোণি মানুচ্চুনোরে মিসরত্তুন, লুয়ো গোলেয়্যে চুলোত্তুন্ নিগিলেই আন্যং সেক্কেনে মুই ইয়েন কোইনে তারারে উগুম দুয়োং, ‘তুমি মঅ কধাগান শুনো আর মুই যিয়েনি গুরিবাত্যে উগুম গোজ্জ্যং সিয়েনি গর, সালে তুমি মঅ মানুচ্ অবা আর মুই তমার গোজেন ওম্।

⁵ মুই তমা পুরোণী মানুচ্চুনো ইধু এমন দেজ্ দিবার শমক্ গোজ্যং যিয়েনত্ দুধ, মধু আর কনঅ কিজুর অভাব নেই, আর সে শমক্তান্ মুই পুরেই দিম।’ সে দেজ্‌চানই এচ্চ্যে তুমি গজক্ গুরি আগঅ।” ‍ জোবত্ মুই কলুং, “আমেন, লগেপ্রভু।”

⁶ লগেপ্রভু মরে যিহূদার শঅরানিত্ আর যিরূশালেমর পধে পধে এ কধাগান ফগদাং গুরিবাত্তে কলঅ, “এ বেবস্থার কধানি শুনিনে সিয়েনি পালঅ।

⁷ তমা পুরোণি মানুচ্চুনোরে যেক্কে মুই মিসরত্তুন নিগিলেই আন্যং সেক্কেত্তুন ধুরি এচ্চ্যে সং বার্ বার্ তারার উজিয়ার গুরি দিইনে কোইয়োং, ‘তুমি মঅ কধা মজিম আঢঅ।’

⁸ মাত্তর্ তারা সিয়েন ন-শুনোন্ বা সিয়েনত্ মনযোগ্‌অ ন-দুয়োন; সিয়েনর বদলে তারা তারার একবুস্যে ভান্ন্যেই মনর্ আওজ্ মজিম চলদন। সেনত্তে যে সুদোমান মুই তারারে পালেবাত্তে কোইয়োং তারা সিয়েন ন-পালান বিলিনে সে সুদোমর কধা মজিম্ মুই তারারে সাজা দুয়োং।”

⁹ সে পরেদি লগেপ্রভু মরে কলদে, যিহূদার আর যিরূশালেম মানুচ্চুনো ভিদিরে এক্কান কুজুরোমী চলের্।

¹⁰ তারা তারার সেই পুরোণী মানুচ্চুনোর পাপ ইন্দি ফিরি যেইয়োন যিগুনে মঅ কধানি শুনোদে অস্বিগের্ গোজ্যন। তারা দেব-দেবেদাগুনোরে সেবা গুরিবাত্তে তারা পিজেদি যেইয়োন। তারার্ পুরোণি মানুচ্চুনোত্তে মুই যে সুদোমান থিদেবর্ গোজ্যং সিয়েনি ইস্রায়েল আর যিহূদার মানুচ্চুনে ন-পালান।

¹¹ সেনত্তে মুই লগেপ্রভু কঙর্, মুই তারা উগুরে এন্ দজা আনিম যিয়েনত্তুন্ তারা ধেই ন-পারিবাক্। যুনিয়ো তারা মঅ মুজুঙোত্ কানিবাক্ তো মুই তারা কধানি ন-শুনিম।

¹² যেক্কে দজা এবঅ সেক্কে যিহূদার শঅরানিত্ আর যিরূশালেমর মানুচ্চুনে যেইনে সেই দেব-দেবেদাগুনো ইধু কানাকুদি গুরিবাক্ যিগুনো মুজুঙোত্ তারা আগর্‌বাট্টি জ্বালেয়োন, মাত্তর্ সিগুনে তারারে ন-বাজেবাক্।

¹³ যিহূদার যেদক্কানি শঅর্ আর আদাম আঘে সিদুক্কুন দেব-দেবেদায়ো আঘে, আর যিরূশালেমর যেদক্কানি পথ আঘে সেই লাজ্‌গরেপারা বাল দেবেদার নাঙে আগর্‌বাট্টি জ্বালেবাত্তে সিদুক্কুন পূজোয়ো বানা ওইয়্যে।‍‍

¹⁴ এ মানুচ্চুনোত্তে তুই কনঅ তবনা ন-গুরিচ্ বা তারাত্তে কনঅ কোজোলী ন-গুরিচ্, কিত্তে তারার দুঘোর্ সময় তারা মরে ডাগিলে মুই ন-শুনিম।

¹⁵ “মঅ ঘরত্ মর্ কোচ্‌‍‍‌পেইয়্যে মানুচ্চুনোর কি অধিকার আঘে? তারা দঅ বোউত্ ভান্ন্যেই কাম্ গোজ্যন, এন্ কি, তারা মঅ নাঙে উৎসর্ব গোজ্যে য়েরানি তারাত্তুন সোরেই ফেলান। ও অন্যেয়গুরিয়্যেগুন, যেক্কে দজা তমা উগুরে এবঅ সেক্কেয়ো কি তুমি ফুত্তি গুরিবা?”

¹⁶ লগেপ্রভু এ জাদ্‌‍‍‌‌তোরে গুলোগুলিয়ে ভরা দোল্ এক্কো জলপাই গাজ বিলি ডাক্যে। মাত্তর্ জদবদে ঝড়র গুজুরোনিয়ে তে সিয়েনত্ আগুন ধোরেই দিবো আর সিয়েনত্ তা ডেলাগুন ভাঙি পড়িবাক্।

¹⁷ বেগত্তুন্ খেমতাবলা লগেপ্রভু, যে তারে লাগেয়্যে তেয়ই তার সর্বনাজর্ রায়য়ান দিয়্যে, কিত্তে যিহূদা আর ইস্রায়েলর মানুচ্চুনে ভান্ন্যেই কাম্ গোজ্যন আর বাল দেবেদার নাঙে আগর্‌বাট্টি জ্বালেইনে তার রাগ্‌কান জাগেই তুল্যন্।

যিরমিয়র বিরুদ্ধে কুজুরোমি

¹⁸ অনাথোত মানুচ্চুনোর কুজুরোমীর কধা লগেপ্রভু মইধু ফগদাং গোজ্যে বিলি মুই সিয়েন হবর্ পেইয়োং।

¹⁹ মুই অলুংগে গঙাত্ দিবাত্তে নেযেয়্যে লক্ষী ভেড়া ছঅ ধোক্ক্যেন; মুই বুঝি ন-পারং, তারা ইয়েন কোইনে মঅ বিরুদ্ধে কুজুরোমী গোজ্যন, “এজঅ, আমি গাজ্ আর তার গুলোগুন বর্‌‍‍‌‌‌বাত লাগেই; এজঅ, আমি তারে জেদাগুনো দেজত্তুন্ কাবি ফেলেই দিই যেনে তা নাঙান আর মনত্ রাগা ন-অয়।”

²⁰ ও বেগত্তুন খেমতাবলা লগেপ্রভু, তুই গমেডালে বিচের গুরি থাচ্ আর রিবেঙত্তুন্ আর মনর্ পোরোক্কে গুরি থাচ্, সেনত্তে তারা উগুরে তর্ হেনা সুজোনা মরে চেবাত্তে দুয়ো, কিত্তে মুই মঅ আবিত্তিগান তরে জানেয়োং।

²¹ সেনত্তে অনাথোত মানুচ্চুনো পৌইদ্যেনে লগেপ্রভু কোইয়্যেদে, “যিগুনে তঅ পরাণান নিবাত্তে চাদন আর কদন, ‘লগেপ্রভুর নাঙে ভাববাদী ইজেবে কধা ন-কোয়ো, কলে তুমি আমা আঢত্ মারা পুরিবে,’

²² মুই বেগত্তুন্ খেমতাবলা লগেপ্রভু কঙর্, মুই তারারে সাজা দিম। তারার গাবুজ্যেগুনে যুদ্ধোত্ আর তারার ঝি-পুয়োগুনে ভাদ রাদে মুরি যেবাক্।

²³ তারার বাদবাগি কদে কনজন ন-থেবাক্, কিত্তে অনাথোত মানুচ্চুনোরে সাজা দিবার অক্তত্ মুই তারা উগুরে দজা আনিম।”