যিরমিয় 10 - Chakma Bibleগোজেন আর মূত্তি 1 ও ইস্রায়েল জাদ্, লগেপ্রভু তমারে যে কধাগান কোইয়্যে সিয়েন শুনো। 2 লগেপ্রভু কোইয়্যেদে, “তুমি নানান্ জাদর্ আচার-বেবহার ন-শিখ্য, বা আগাজর্ নানান চিহ্নো দেগিনে ভাঙি ন-পোজ্য, যুনিয়ো নানান্ জাদে সিয়েনি দেগিনে ভাঙি পড়ন্। 3 ইয়েনর কারনান্ সেই মানুচ্চুনোর ধর্মীয় আচার-বেবহারানি বাজে। তারা ঝারত্তুন্ এক্কো গাজ্ কাবন্ আর কালিগর্বো বাদালিলোই সিয়েনর সাইজ্চান দে। 4 তারা সোনা আর রূবোলোই সিয়েন সাজান আর যেনে সিয়েন ন-পড়ে সেনত্তে সিয়েনরে আদুরো আর জোলোইলোই দরমর গরন্। 5 ফল খেদর্ চোড়োইয়ো ধোক্ক্যেন তারার মূত্তিগুনে কধা কোই ন-পারন; তারারে বুয়োই নেযা পরে, কিত্তে তারা আঢি ন-পারন। তুমি তারারে ন-দোরেয়ো; তারা খেতিয়ো গুরি ন-পারন, ভালেদিয়ো গুরি ন-পারন্।” 6 ও লগেপ্রভু, তঅ ধোক্ক্যেন আর কনজন নেই; তুই মহান, তুই খেমতালোই বোলী। 7 ও জাদ্তুনোর রাজাবো, তরে কন্না ভোক্তি গুরিনে ন-দোরেব? ইয়েন দঅ তর্ পাওনা। জাদ্তুনোর বেক্ জ্ঞানী মানুচ্চুনো ভিদিরে আর তারার বেক্ রেজ্যগানি ভিদিরে কনজনে তঅ ধোক্ক্যেন নয়। 8 তারা বেক্কুনে জ্ঞাননেইয়্যে আর ভুল্। তারার মূত্তিগুন দঅ তক্তালোই বানেয়্যে, সিগুনে কেধোক্ক্যেন গুরি শিক্ষ্যে দিবাক্? 9 তর্শীশত্তুন্ পিদেয়্যে রূবো আর ঊফসত্তুন সোনা আনা অয়। কালিগর আর বান্যেগুনে সিয়েনিলোই মূত্তিগুন বেড়েই থন্ । সিগুনোরে য়েল্ আর বিগুনি রঙ কাবড় উরো অয়; সিয়েন কাবিল্ কালিগর আঢ্তোই বানেয়্যে। 10 মাত্তর্ লগেপ্রভু সত্য সত্য গোজেন; তে জেদা গোজেন আর উমরর্ রাজা। তার রাগে পিত্থিমীগান গির্গিরেই; জাদ্তুনে তার রাগ্কান সোজ্য গুরি ন-পারন্। 11 তুমি মানুচ্চুনোরে কঅ, এই দেব-দেবেদাগুনে আগাজ্চান আর পিত্থিমীগান ন-বানান; তারা আগাজ্চানত্তুন আর পিত্থিমীর বেক্ জাগানত্তুন্ ভস্ত ওই যেবাক্। 12 লগেপ্রভু নিজোর খেমতালোই পিত্থিমীগান বানেয়্যে, তারা জ্ঞানান্দোই সংসারান থিদেবর্ গোজ্যে আর বুদ্ধিলোই আগাজ্চান বিজেই দিয়্যে। 13 তা উগুমে আগাজর্ পানিগান গুজুরি উদে; তে পিত্থিমীর শেজ্ ধুজিত্তুন্ মেঘরে তুলি আনে। তে ঝড়ত্তে কারেন্ বানায় আর তা ভান্ডালত্তুন বোইয়্যের্ নিগিলে আনে। 14 বেক্ মানুচ্চুন জ্ঞান নেইয়্যে আর ভুল্; পত্তি সনাবান্যে তা মূত্তিগুনোত্তে লাজ্ পায়। তার ছাজনিলোই ঢাল্যে মূত্তিগুন মিজে, সিগুনো ভিদিরে নিজেস্ নেই। 15 সিগুন অপদাত্ত, ঠাট্টা-ইংসের্ জিনিস; বিচেরর অক্ত এলে সিগুন ভস্ত ওই যেবাক্। 16 যিবে যাকোবর্ পাওনার ভাগ্ তে ইগুনো ধোক্ক্যেন নয়, কিত্তে তে বেক্ জিনিস্চানি বানেয়্যে আর ইস্রায়েলে তার বিশেষ সোম্বোত্তি। তা নাঙান বেগত্তুন খেমতাবলা লগেপ্রভু। যিহূদার ভস্ত অনা 17 তুমি যিগুনে ঘিজ্যে আঘ, তুমি দেজ্ ছাড়ি যেবাত্তে নিজোর নিজোর পযাপিরানি গুচ্ছেই নেযঅ, 18 কিত্তে লগেপ্রভু কোইয়্যেদে, “এ অক্তত্ যিগুনে দেজত্ থেবাক মুই তারারে ছিদি ফেলেই দিম; মুই তারা উগুরে এন্ দুঘ্ আনি দিম যেনে তারা ধরা পড়ন্।” 19 হায়, মঅ আঘাত্তান গম্ অবার নয়! তো মুই নিজোরে কোইয়োংগে, “ইয়েন মর্ পীড়ে, মত্তুন সিয়েন সোজ্য গরা পুরিবো।” 20 মঅ তাম্বুলান ভস্ত ওইয়্যে; সিয়েনর বেক্ দুড়িগানি ছিনি যেইয়্যে। মঅ পুয়োগুনে মত্তুন্ যেয়োন্দোই, তারা আর নেই; মঅ তাম্বুলান আরঅ টাঙেবার বা তা পর্দানি টাঙেবাত্তে ইক্কিনে আর কনজন নেই। 21 গরগ্কুনে জ্ঞাননেইয়্যে, তারা লগেপ্রভুর আওজ্চান জানিবাত্তে ন-চান; সেনত্তে তারা ফোলেই ন-পারন আর তারার বেক্ য়েমান পালুন ছিদিনে ইন্দি-উন্দি যেয়োন। 22 শুন, হবর্ এচ্চ্যে! যিহূদার শঅরানি মানুচ্ নেইয়্যে আর শিয়েলুনোর থেবার ঘর বানেবাত্তে উত্তোর দেজ্চানিত্তুন অমকদ গন্ডগুলোর রঅ এজের্। যিরমিয়র তবনা গরানা 23 ও লগেপ্রভু, মুই হবর্ পাং মান্জ্যর জিংকানির-পথ্তান তার নিজোর্ নয়; তার টেঙ পোইদ্যেগুন উগুম দেনায়ো তার কাম নয়। 24 ও লগেপ্রভু, বানা ন্যায়বিচেরলোই তুই মরে সংশোধন গর্, মাত্তর্ তর্ রাগে সিয়েন ন-গুরিচ্, গুরিলে তুই মরে এক্কুবারে শূন্য গুরি দিবে। 25 যিদুক্কুন জাদে তরে স্বিগের্ ন-গরন, যিগুনে তরে ন-ডাগন, তারা উগুরে তঅ রাগ্কান ঢালি দে। তারা যাকোবরে পুরোপুরি ভস্ত গোজ্যন, তারা দেজ্চানরে ভস্ত গুরি দুয়োন। |
Copyright © 2021 Bangladesh Bible Society
Bangladesh Bible Society