যিরমিয় 1 - Chakma Bible

¹ এই বেক্ কধানি হিল্কিয়র পুয়ো যিরমিয় কোইয়্যেদে। তে অলদে বিন্যামীন চাগালার অনাথোৎ আদামর্ ধর্মগুরুগুনো ভিদিরে একজন।

² যিহূদার রাজা আমোনর পুয়ো যোশিয়র রাজাগিরির তের বজরত্ লগেপ্রভুর কধানি যিরমিয় ইধু ফগদাং ওইয়্যে।

³ যোশিয়র পুয়ো যিহূদার রাজা যিহোয়াকীমোর রাজাগিরিত্তুন ধুরি যিহূদার রাজা যোশিয়র পুয়ো সিদিকিয়র রাজাগিরির এগার বজরর পাচ্ মাস সং লগেপ্রভুর কধানি আরঅ ফগদাং ওইয়্যে। সে মাসত্ যিরূশালেমর মানুচ্চুনোরে বন্দি গুরি নেযা ওইয়্যে।

লগেপ্রভু যিরমিয়রে ডাগিলো

⁴ লগেপ্রভু মরে কলদে,

⁵ “তরে মা পেদত্ বানেবার্ আগেদি মুই তরে বেঈ থোইয়োং। তর্ জর্মর্ আগেদি মুই তরে যুদো গুরি থোইনে জাদ্‌‌তুনো ইধু ধর্মগুরু ইজেবে বেঈ লোইয়োং।”

⁶ সেক্কে মুই কলুং, “বেগত্তুন্ খেমতাবলা গোজেন, মুই কধা কোই ন-জানং; মুই দঅ চিগোন গুরো ধোক্ক্যেন্।”

⁷ মাত্তর্ লগেপ্রভু মরে কলদে, “তুই চিগোন গুরো ধোক্ক্যেন এ কধাগান ন-কোচ্। মুই যিগুনো ইধু তরে পাদেম্ তারার পত্তি জন ইধু তুই যেবে আর মুই যিয়েন কবাত্তে উগুম্ গুরিম সিয়েনই কবে।

⁸ তুই তারারে ন-দোরেচ্, কিত্তে মুই লগেপ্রভু তরে রোক্ষ্যে গুরিবাত্তে তঅ লগে লগে আগং।”

⁹ সে পরেদি লগেপ্রভু মঅ মুয়োনত্ আঢ্‌‍তান বাবেইনে বাজেই দিলো আর মরে কলঅ, “ইক্কিনে মুই তঅ মুয়োনত্ মঅ কধানি দিলুং।

¹⁰ চাহ্, উগুরি ফেলেবাত্যে আর ভাঙি ফেলেবাত্তে, ভস্ত আর সর্বনাশ গুরিবাত্তে আর বানেবাত্তে আহ্ থিদেবর্ গুরিবাত্তে এচ্চ্যে মুই তরে জাদ উগুরে আর রেজ্যগানি উগুরে নেযেলুং।”

¹¹ সে পরেদি লগেপ্রভু মরে কলদে, “যিরমিয়, তুই কি দেগর্?” জোবত্ মুই কলুং, “মুই বাদাম গাজর্ এক্কো ডেলা দেগঙর্।”

¹² লগেপ্রভু মরে কলদে, “তুই ঠিগই দেখ্যচ্, কিত্তে মঅ কধানি যেনে ফলে সিয়েনি মুই খিয়েল রাগেয়োং।”

¹³ আরঅ লগেপ্রভু কলদে, “তুই কি দেগর্?” মুই কলুং, “মুই উত্তোরেত্তুন্ দোগিনেদি পড়ি থেইয়্যে এক্কো পিলে দেগঙর্ যিবে ভিদিরে কিজু ফুট্যে।”

¹⁴ লগেপ্রভু মরে কলদে, “এ দেজত্ যিগুনে বজত্তি গরন তারার বেক্কুনো উগুরে উত্তোরেত্তুন দজার্ বান পানি ধোক্ক্যেন উজেই এবঅ।

¹⁵ মুই উত্তোরেদি রেজ্যগানির বেক্ জাদ্‌তুনোরে ডাগঙর্।” যিরূশালেমর গেট্‌‌‌‌তুনোত্ সোমেবার পধত্ রাজাগুনে এইনে তারার সিংহাসনান বোজেবাক্। তারা সিয়েনর চেরোকিত্তে দেবালানি আর যিহূদার বেক্ শঅরানি ঘিরিবাক্।

¹⁶ মঅ মানুচ্চুনে মরে ফেলেই যেইয়োন, তারা দেব-দেবেদাগুনোর নাঙে আগর্‌বাট্টি জ্বালেয়োন আর নিজো আঢে বানেয়্যে জিনিজোরে পূজো গোজ্যন্। তারার এই বেক্ পাজি কামানিত্তে মুই তারা বিরুদ্বে মর্ বিচেরর্ রায়য়ান দিম্।

¹⁷ “তুই কমরত্ বানিনে থিয়্যে আর মুই তরে যিয়েনি কবাত্তে উগুম গুরিম্ সিয়েনি তুই তারারে কঅ। তারারে দেগিনে তুই ভাঙি ন-পড়িচ্, যুনি পড়চ্ সালে মুই এমন্ গুরিম যেনে তারা মুজুঙোত্ তুই এক্কুবারে ভাঙি পড়চ্।

¹⁸ এচ্চ্যে মুই তরে এক্কান দরমর শঅর ধোক্ক্যেন, এক্কান লুয়ো খুদো ধোক্ক্যেন আর এক্কান পিদল দেবাল ধোক্ক্যেন গুরিলুং যেনে তুই গোদা দেজ্‌‌‌‌ছানর বিরুদ্ধে, অত্তাৎ যিহূদার রাজাগুনোর, দাঙর্ পোজিশনত্ কামগুরিয়্যেগুনোর, ধর্মগুরুগুনোর আর দেজ মানুচ্চুনোর বিরুদ্ধে থিয়্যেই পারচ্।

¹⁹ তারা তঅ বিরুদ্ধে যুদ্ধো গুরিবাক্ মাত্তর্ তরে ওদেই দি ন-পারিবাক্, কিত্তে তরে রোক্ষ্যে গুরিবাত্তে মুই তঅ লগে লগে আগং। মুই লগেপ্রভু এ কধাগান কঙর্।”