বিচের গুরিয়্যেগুন 9 - Chakma Bibleঅবীমেলক 1 যিরুব্বালর পূঅ অবীমেলকে শিখিমোত্ তার মোল্যেগুনো ইদু যেইনে তারারে আর তা মাবোর গুট্টির বেক্কুনোরে কলঅ, 2 “শিখিমোর বেক্ আদাম্মেগুনোরে পুযোর গরঅ কুবোন তারার্ পক্ষে গম্-যিরুব্বালর সত্তুরজন পূঅ তারার শাজন্গুরিয়্যে অবাক্, নাহি এক্কো মান্জ্যে অবঅ? পুরি ন-ফেলেইয়ো মুই তমার এক্কু লো-য়েরা ধোক্ক্যেন্ ছদর্।” 3 অবীমেলকর মোল্যেগুনে শিখিমোর মানুচ্চুনোরে এ কধানি কনার পরেন্দি তারা ভিদিরে অবীমেলকর পক্ষেন্দি থেবাত্তে এক্কান্ আওজ্ দেগা গেলঅ। তারা কলাক্কে, অবীমেলকে তারার্ কুদুম্মো। 4 তারা বাল্বরীতর মন্দিরত্তুন্ তারে সত্তুর কট্টা রূবো দিলো। অবীমেলকে সিগুন্দোই কুদুক্কুন বাজে ন-দোরেইয়্যে মানুচ্ ভাড়া গুরিলো। ইগুনে তার সমাজ্যে অলাক্। 5 অফ্রাতদ্ তে তার বাবঅ ঘরত্ যেইনে তার সত্তুরজন ভেইয়োর পত্তিজনরে, অত্তাৎ যিরুব্বালর পূঅগুনোরে পত্তিজনরে এক্কো পাত্তর উগুরে মারে ফেলেল। মাত্তর্ যিরুব্বালর বেগত্তুন চিগোন পূঅবো যোথমত্ পৌল্যেই থেইনে বাঁজিলো। 6 সে পরেন্দি শিখিম আর বৈৎ-মিল্লোর বেক মানুচ্চুনে এগত্তর্ ওইনে শিখিমোর থামর ইদু এলোন গাচ্ছো ইদু যেইনে অবীমেলকরে রাজা বানেলাক্। 7 যোথমরে এ কধাগান কুয়ো অলঅ। তে সেক্কে গরিষীম মুড়োবোর মাদাথ্ উদিনে রঅ ছারিনেই মানুচ্চুনোরে কলঅ, শিখিমোর মানুচ্চুন, মঅ কধাগান্ শুনো, সেক্কে গোজেনেয়ো তমা কধানি শুনিবো। 8 গাছচুনে বেক্কুন একদিন্যে নিজোত্তে এক্কো রাজারে অভিষেক্ গুরিবার আজাই নিগিলিলাক্। তারা জলপাই গাছ্সোরে কলাক্, তুই আমার রাজা অ। 9 মাত্তর্ জলপাই গাচ্ছো জোবত্ কলঅ, মর্ যে তেলান্দোই গোজেনে আর মানুচ্চুনে সর্মানিত অদাক্ সিয়েন বাদ দিইনে কি মুই বেক্ গাছ্চুনো উগুরে দুলিবাত্যে যেইম্? 10 ইয়েনর্ পরেন্দি গাছ্চুনে ডোমোর্ গাছ্সোরে কলাক্, তুই আমার রাজা অ। 11 মাত্তর্ ডোমোর গাছ্সো জোবত্ কলঅ, মুই মর্ এই গম্ মিদে গুলোগুন দেনা বাদ দিইনে কি গাছ্চুনোর উগুরে দুলিবাত্যে যেইম্? 12 ইয়েনর্ পরেন্দি গাছ্চুনে আংগুরোর্ লুদিগানরে কলাক্, তুই আমার রাজা অ। 13 মাত্তর্ জোবত্ আংগুরোর্ লুদিগানে কলঅ, মর্ গুলোগুনোর যে রসছান্দোই গোজেনে আর মানুচ্চুনে হুজি অন্ সিয়েন বাদ দিইনে কি মুই গাছচুনো উগুরে দুলিবাত্যে যেইম্? 14 যেরেন্দি বেক গাছ্চুনে কাদা ঝুপ্পোরে কলাক্, তুই আমার রাজা অ। 15 সেক্কে কাদাঝুপ্পো তারারে কলঅ, যুনি হামাক্কাই তুমি মরে তমার্ রাজা ইজেবে অভিষেক্ গুরিবাত্তে চঅ সালে তুমি এইনে মঅ ছাবাত্ আশ্রয় নেযগি। সিয়েন যুনি ন-গরঅ সালে যেনে কাদাঝুবোত্তুন আগুন নিগিলি এইনে লেবাননর এরস গাছ্চুন পুড়ি দুয়ো। 16 “মাত্তর্ শুনো, অবীমেলকরে রাজা বানেইনে তুমি কি বিশ্বেজ্ গরেদে ধোক্কেন্ বা গম্ কাম্ গোজ্য? তুমি কি যিরুব্বাল আর তার গিরির্ উগুরে গম্ আর দোল্ কারবার গোজ্য? 17 মঅ বাপ্পো দঅ তার্ জীংকানিরে বাঁজি রাগেইনে তমাত্তে যুদ্ধো গুরিনে মিদিয়নীয়গুনোর আঢত্তুন্ তমারে রোক্ষ্যে গোজ্যে। 18 মাত্তর্ এচ্চ্যে তুমি তার গিরির্ বিরুদ্ধে উল্লোমি গরর্। এক্কো পাত্তর উগুরে তার্ সত্তুরজন পূঅর পত্তিজনরে খুন গোজ্য আর তার চাগরানীবোর পূঅ অবীমেলকরে শিখিমোর মানুচ্চুনো উগুরে রাজা বানেয়ো, কিত্যে তে তমার্ কুদুম্মো। 19 মাত্তর্ এচ্চ্যে যুনি যিরুব্বালে আর তার গিরির্ উগুরে তুমি বিশ্বেজ্ আর দোল্ কারবার্ গুরি থাগঅ সালে অবীমেলকে যেনে তমার্ হুজি অবার্ কারণ অয় আর তুমিয়ো যেনে তার হুজির্ কারণ অ! 20 মাত্তর্ সিয়েন যুনি তুমি ন-গুরিনে থাগঅ সালে অবীমেলক ভিদিরেত্তুন যেনে আগুন নিগিলি এইনে তমার, অত্তাৎ শিখিমোর আর বৈৎ-মিল্লোর মানুচ্চুনোরে পুড়ি ফেলায়; আর তমার্, অত্তাৎ শিখিমোর আর বৈৎ-মিল্লোর মানুচ্চুনো ভিদিরেত্তুনঅ যেনে আগুন নিগিলি এইনে অবীমেলকরে পুড়ি ফেলায়।” 21 ইয়েনর্ পরেন্দি যোথমে ধেই যেইনে বের্ নাঙে এক্কান জাগাত্ গেলঅ। তে তার্ ভেই অবিমেলকর দরে সিদু বজত্তি গরা ধুরিলো। 22 অবীমেলগে তিন বজর সং ইস্রায়েলীয়গুনোরে শাজন্ গুরিলো। 23 সে পরেন্দি গোজেন অবীমেলকরে আর শিখিমোর মানুচ্চুনো ভিদিরে এক্কান ভাজ্ন্যেই আত্মা পাধেই দিলো। সেক্কে শিখিমোর মানুচ্চুনে অবীমেলকর লগে ফাগারা গুরিলাক্। 24 গোজেনে নিজেই ইয়েন গুরিলো যেনে যিরুব্বালর সত্তুরজন পূঅর্ উগুরে লো ফেলানার যে অন্যেয়ানি গরা ওইয়্যে সিয়েনত্তেই তারার ভেই অবীমেলক উগুরে আর তারারে মারে ফেলানার কামত্ তার আর তারে বল্ দিয়্যেগুনোরে শিখিমোর মানুচ্চুনো উগুরে হেনা সুজো অয়। 25 শিখিমোর মানুচ্চুনে অবীমেলকর বিরুদ্ধে মুড়ো উগুরে কিজু মানুচ্ রাগেলাক্, আর তারা পোইল্যে থেইনে সেই পদেন্দি যিগুনে যেদাক্ তারারে লুদেদাক্। কধাগান অবীমেলকরে কুয়া অলঅ। 26 সে অক্তত্ এবদর পূঅ গাল তার ভেইয়ুনোরে লগে নেযেইনে শিখিমোত্ এলঅ আহ্ শিখিমোর মানুচ্চুনে তা উগুরে বিশ্বেজ্ গুরিলাক্। 27 তারা নিজোর্ ক্ষেদত্ যেইনে আংগুর তুলিনে মাড়িলাক্ আর মেইত্বান গুরিলাক্। তারা তারার্ দেবেদার কিয়ঙত্ যেইনে খানা-দানা গুরি অবীমেলকরে অভিশাব্ দিলাক্। 28 এবদর পূঅ গালে কলদে, “অবীমেলগে কন্না ওয়্যেদে, আমি শিখিমোর মানুচ্চুনে তা তলে ওইনে থেবং? তে কি যিরুব্বালর পূঅবো নয়? সবূলে কি তার সেনাপতি নয়? তুমি বরং শিখিমোর বাপ্পো হমোরর গুট্টিগুনোর তলেন্দি থাগঅ। কিত্তেই আমি অবীমেলকর তলেন্দি থেবং? 29 যুনি মানুচ্চুনে বানা মর্ উগুমানি মানিদাক্ সালে মুই অবীমেলকরে ধাবেই দিদুং। তারে কুয়ো যেদঅ, ‘তর সৈন্য-সামন্ত বেক্কুন ডাগি নেযেইনে নিগিলি আয়।’” 30 এবদর পূঅ গালর সে কধাগান শিখিমোর শাজন্গুরিয়্যে সবূলোর কানত্ পড়িলে তে অমহদ রাগ তুলিলো। 31 তে ভিদিরে ভিদিরে অবীমেলকরে এ কধাগান কোই পাদেল, “এবদর পূঅ গাল আর তার ভেইয়ুনে শিখিমোত্ এইনে তঅ বিরুদ্ধে সে জাগার মানুচ্চুনোরে কাত্যে দেদন্। 32 সেনত্তেই তুই আর তর মানুচ্চুনে রেদোত্ এইনে মাদত্ হাপ্ দি থাগগোই। 33 বেইন্যে বেলান্ উদিবার অক্তত্ তুই শঅ্রানর মোখ্যে উজেই যেবে। গাল আর তার মানুচ্চুনে যেক্কে তঅ বিরুদ্ধে নিগিলি এবাক্ সেক্কে তুই যিয়েন মনে অয় সিয়েনই গুরিবে।” 34 সেনত্তেই অবীমেলকে আর তার বেক সৈন্যগুনে রেদোত্ নিগিলি এইনে চের্বো দল ওইনে শিখিমো ইদু পোইল্যে থেলাক্। 35 শঅ্রত্তুন্ নিগিলি এইনে এবদর পূঅ গাল গেট্টোর কায়-কুরে থিয়্যেই এলঅ। এন্ সময়োত্ অবীমেলকে আর তার সৈন্যগুনে তারার্ পোইল্যে থেইয়্যে জাগানত্তুন্ নিগিলি এলাক্। 36 গাল তারারে দেগিনে সবূলরে কলঅ, “চাদে, মুড়োবো উগুরেত্তুন কুদুক্কুন মানুচ্ লামি এত্তন্।” সবূলে কলদে, “তুই মুড়োবোর ছাবাগানরে মানুচ্ বিলিনে মনে গরর্।” 37 মাত্তর্ গালে আরঅ কলদে, “চাদে, মানুচ্চুনে এত্তন্ বেগত্তুন অজল্ মোন-মুড়োত্তুন, আর গোণেইয়্যেগুনোর গাচ্ছোর ইন্দিত্তুন্ আরঅ একদল মানুচ্ এত্তন্।” 38 সেক্কে সবূলে তারে কলঅ্, “ইক্কিনে কুদু গেলঅ তর্ সেই দাঙর দাঙর কধানি? তুই কোইয়োছ্, ‘অবীমেলকে কন্না, আমি তা তলেন্দি থেবং?’ এই বেক মানুচ্চুনোরে দঅ তুই অলেগন্ গোজ্যচ্। ইক্কিনে নিগিলি এইনে তারার লগে যুদ্ধো গর্।” 39 সেক্কে গালে শিখিমোর মানুচ্চুনোরে পরিচালনা গুরি নেযেইনে অবীমেলকর লগে যুদ্ধো গুরিলো। 40 অবীমেলক গালরে লোড়েল, সেক্কে তে ধেই গেলঅ। ধেই যেবার পদথ্ তার দলর কয়েকজনে ঘা ওইনে শঅ্রর গেট্টো সং গোদা পধ্তানত্ গোজ্যে-পোজ্যে ওই পড়ি রলাক্। 41 অবীমেলকে অরূমাতদ থেলঅ আর সবূলে শিখিমোত্তুন গাল আর তার ভেইয়ুনোরে লোড়েইনে নিগিলেই দিলো। 42 তার্ কেল্যে শিখিমোর মানুচ্চুনে নিগিলি এইনে মাদত্ যাদন্, আর সে হবরান অবীমেলকরে জানেয়োন্। 43 সেক্কে অবীমেলকে তা মানুচ্চুনোরে তিন্নো দলত্ ভাগ গুরিলো আর তারা মাদত্ হাপ্ দি থেলাক্। শঅ্রত্তুন মানুচ্চুনোরে নিগিলি এত্তে দেগিনে তে তারারে আক্রমণ গুরিলো। 44 অবীমেলক আর তা দলর মানুচ্চুনে মুজুঙেন্দি উজেই যেইনে শঅ্রত্ সুমিবার পদথ্ থিয়েলাক্। মাদত্ যিগুনে এলাক্ অন্য দ্বিদল্ সৈন্য তারা উগুরে ঝাবেই পড়িনে তারারে মারে ফেলেলাক্। 45 পুরো দিন্নো আক্রমণ চালেইনে অবীমেলকে শঅ্রান গজক্ গুরি নেযেনেই সে জাগার মানুচ্চুনোরে মারে ফেলেল। সে পরেন্দি শঅ্রান ভস্ত গুরিনে সিয়েন উগুরে তে নুন ছিদি দিলো। 46 এ হবরান্ শুনিনে শিখিমোর তাম্বুলোর্ মানুচ্চুনে এল-বরীৎ দেবেদাবোর মন্দিরো ভিদিরে ঘর গুদি ভিদিরে যেইনে সুমিলাক্। 47-48 অবীমেলকে যেক্কে শুনিলো, মানুচ্চুনে সিদু যেইনে এগত্তর্ ওইয়োন সেক্কে তা মানুচ্চুনোরে নেযেইনে তে সল্মোন মুড়োবোত্ যেইনে উদিলো। তে কুড়োল নেযেল আর গাজ্চোত্তুন্ এক্কো ঢেলা কাবিনে কানা উগুরে তুলিলো। সে পরেন্দি তে তা মানুচ্চুনোরে উগুম দিলো, “তুমি মরে যিয়েন গত্তে দেগিলা তুমিয়ো যাদিমাদি সিয়েন গরঅ।” 49 সেনত্তেই বেক্কুনে গাজত্তুন্ ঢেলা কাবিনে অবীমেলকর পিজে পিজে গেলাক্। সে পরেন্দি তারা সে ভিদিরে ঘরান উগুরে সিগুন এগত্তর্ গুরিনে সিয়েনত আগুন বাজেই দিলাক্। সেক্কে শিখিমোর তাম্বুলানর্ বেক মানুচ্চুন পুড়ি যেইনে মুরিলাক্। সিয়েনত্ পেরায় এক আজার মিলে-মরদ এলাক্। 50 ইয়েনর্ পরেন্দি অবীমেলকে তেবেসত যেইনে সিয়েন ঘিরিনে গজক্ গুরি নেযেল। 51 শঅ্রর ভিদিরে এলদে এক্কান্ দরমর তাম্বুল; শঅ্রর বেক মিলে-মরত্তুন্ সিয়েনত্ ধেই গেলাক্। তারা তাম্বুলোত্ সোমেইনে সে তাম্বুলানর্ দোরান বানিনে ছালঅ উগুরে যেইনে উদিলাক্। 52 অবীমেলকে সেই তাম্বুলানর্ কায়-কুরে যেইনে সিয়েন আক্রমণ গুরিলো; মাত্তর্ তাম্বুলানত্ আগুন বাজেই দিবাত্তে যেক্কে তে তাম্বুলানর্ দোরান ইন্দি উজেই যার্, 53 সেক্কে এক্কো মিলে চড়্গা কল উগুরে শিল্লো অবীমেলকর মাদা উগুরে ফেলে দিইনে তা মাদাবো ফাদি দিলো। 54 অবীমেলকে যাদিমাদি তার আত্যার্-বোইয়্যে গাবুজ্যেবোরে কলঅ, “তঅ তলোয়ারান নিগিলেনেই মরে মারে ফেলা যেনে তারা কোই ন-পারন্, ‘এক্কো মিলে আঢত্ তে মারা পোজ্যে।’” সেনত্তেই সে গাবুজ্যেবো তারে তলোয়ারান্দোই এফুড়-উফুড় গুরি দিলো আর সেক্কে তে মুরি গেলঅ। 55 অবীমেলকে মুরি যেইয়্যে দেগিনে ইস্রায়েলীয়গুনে ঘরত্ ফিরি গেলাক্। 56 সত্তুরজন ভেইয়োরে মারে ফেলেনেই অবীমেলকে তা বাবঅ উগুরে যে অন্যেয়ানি গোজ্যে গোজেনে ইঙিরিনেই তার পাওনা সাজা দিলো। 57 শিখিমোর মানুচ্চুনে যেদক্কানি অন্যেয় গোজ্যন্ তার পাওনা সাজা গোজেনে তারারেয়ো দিলো। ইঙিরিনে যিরুব্বালর পূঅ যোথমর ব-নিঝেচ্সো তারা উগুরে পড়িলো। |
Copyright © 2021 Bangladesh Bible Society
Bangladesh Bible Society