বিচের গুরিয়্যেগুন 8 - Chakma Bibleসেবহ আর সল্মুন্ন 1 ইফ্রয়িমর মানুচ্চুনে গিদিয়োনরে পুযোর্ গুরিলাক, তুই আমা লগে এধোক্কেন্ কারবার্ কিত্যে গুরিলে। মিদিয়নীয়গুনোর বিরুদ্ধে যুদ্ধো গুরিবাত্তে যেবার সময়োত্ তুই কিত্যে আমারে ন-ডাগচ্। এধোক্কেন্ গুরিনে তারা গিদিয়োনরে অমহদ দরমড় কধা কলাক্। 2 জোবত্ তে তারারে কলঅ, “তমা তুলনায় মুই আর সেধোক্কেন্ কি গোজ্যং। ইফ্রয়িমে যে পোজ্যন্দে আংগুরুন কুড়েইনে আন্যে সিগুন কি অবিয়েষরর তুল্যে বেগ্ আংগুরুনোত্তুন বোউত্ গম্ নয়। 3 গোজেনে তমা আঢত মিদিয়নীয়গুনোর নেতা ওয়েব আর সেবকরে তুলি দিলো। তমা তুলনায় মুই কি আর বেশ্ গুরি পাজ্যং।” সেক্কে গিদিয়োনর বিরুদ্ধে তারার রাগকান্ কুমিলো। 4 গিদিয়োন আর তার তিনশত্ মানুচ্ মিদিয়নীয়গুনোরে লোড়াদে লোড়াদে যর্দনর কায়-কুরে এইনে গাঙান্ পার অলাক্। সেক্কে তারা অমহদ বল্পোজ্যে ওইয়োন, 5 সেনত্তে গিদিয়োনে সুক্কোতর মানুচ্চুনোরে কলদে, “মর্ সৈন্যগুনোরে কিজু রুটি হেবাত্তে দুয়ো; তারা বল্পোজ্যে ওইয়োন। মুই এজঅ সং মিদিয়নীয়গুনোর রাজা সেবহ আর সল্মুন্নোর পিজেদি লোড়াঙর্।” 6 মাত্তর্ সুক্কোতর নেতাগুনে কলাক্, “কিত্তেই আমি তঅ সৈন্যগুনোরে রুটি হেবাত্তে দিবোং। সেবহ আর সল্মুন্নোর কাবি ফেলেয়্যে আঢ্থান কি তর্ আদঅ মুদোত্ এচ্ছ্যে।” 7 জোবত্ গিদিয়োনে কলঅ, “যেক্কে লগেপ্রভু সেবহ আর সল্মুন্নররে মঅ আঢত্ তুলি দিবো সেক্কে তমার্ এই কধাগানত্তে মুই ধূল্যেচর চাগালাত্ কাদা আর কাদাগাজর আঘাদে তমার্ কিয়্যের য়েরানি নিগিলেই দিম্।” 8 গিদিয়োনে সিয়োত্তুন্ পনূয়েলত্ উদিলোগোই আর সে জাগার মানুচ্চুনোর ইদুয়ো রুটি চেলঅ। মাত্তর্ সুক্কোতর মানুচ্চুনে যিয়েন কোইয়োন তারায়ো জোবত্ সিয়েন্ কলাক্। 9 সেক্কে গিদিয়োনে পনূয়েলর মানুচ্চুনোরে কলঅ, “মুই যেক্কে যিদিনেই ফিরি এইম্ সেক্কে এই তাম্বুলান্ ভাঙি ফেলেই দিম্।” 10 সেবহ আর সল্মুন্ন প্রায় পন্দর আজার সৈন্যর এক্কো দল লোইনে কর্কোরত্ এলঅ। পূগঅ দেজর সৈন্যগুনো ভিদিরে বানা ইগুনেই সেক্কে বাগি এলাক্ আর এক লাখ্ কুড়ি আজার সৈন্য মুরি গেলাক্। 11 নোবহ আর যগ্বিহেরর পূগেন্দি তাম্বুলত থেইয়্যে মানুচ্চুনোর পথ্তান ধুরিনে গিদিয়োনে অদাতৎ যেইনে সেই সৈন্যদলুনো উগুরে ঝাবেই পড়িলো। সেক্কে তারা চিদেচজ্জা নেইয়্যে গুরি এলাক্। 12 সেবহ আর সল্মুন্ন নাঙে মিদিয়নীয়গুনোর সেই দ্বিবে রাজা ধেই গেলাক্। মাত্তর্ গিদিয়োনে লোড়েইনে তারারে ধুরি ফেলেল, সেক্কে তারার পুরো সৈন্যদলুনে গিদিয়োনরে অমহদ দোরেলাক্। 13 ইয়েনর্ পরেন্দি যোয়াশর পূঅ গিদিয়োনে হেরস নাঙে উদিবার পথ্তানন্দি যুদ্ধোত্তুন ফিরিলো। 14 তে পদথ্ সুক্কোতর এক্কো গাবুজ্যে পূঅরে ধুরিনে পুজোর্ গরা ধুরিলো। গাবুজ্যেবো সুক্কোতর সাতাত্তোরজন্ মুরুব্বী মান্জ্যর আর বুড়ো নেতাগুনোর নাঙানি লিগি দিলো। 15 পরেন্দি গিদিয়োনে সুক্কোতদ্ যেইনে সে জাগার মানুচ্চুনোরে কলঅ, এইয়্যে চঅ সেবহ আর সল্মুন্নরে। ইগুনোত্তেই তুমি মরে ঠাট্টা গুরিনে কোইয়্যদে, কিত্তেই আমি তমার্ বল্পোজ্যে সৈন্যগুনোরে রুটি হেবাত্তে দিবোং। সেবহ আর সল্মুন্নোর কাবি ফেলেয়্যে আঢ্থানি কি তমা আদর্ মুদোত্ এচ্চ্যে। 16 গিদিয়োনে সুক্কোতর বুড়ো নেতাগুনোরে ধুরিলো আর ধূল্যে-চরর্ চাগালাত্ কাদা আর কাদাগাজ্চোই পিদিনে তারারে সাজা দিলো। 17 তে পনূয়েলর তাম্বুলান্ ভাঙি দিলো আর সে জাগার মানুচ্চুনোরে মারে ফেলেল। 18 সে পরেন্দি তে সেবহ আর সল্মুন্নরে পুজোর গুরিলো, “তাবোরত্ কি বাবোত্যা মানুচ্ তঅ আঢত্ মোজ্যন্।” তারা জোব্ দিলাক্, “তঅ ধোক্কেন্ মানুচ্, বেক্কুন্ রাজার পূঅ ধোক্কেন্।” 19 গিদিয়োনে কলঅ, “তারা অলাক্ মঅ ভেই, মঅ মাবোর্ পেদর ভেই। জেদা লগেপ্রভুর এগেম্, তুমি যুনি তারারে বাজেই রাগেদা সালে মুই তমারে মারে ন-ফেলেদুং।” 20 ইয়েনর্ পরেন্দি তে তার দাঙর্ পূঅবো যেথররে কলঅ্, “তারারে মারে ফেলঅ।” মাত্তর্ যেথরর বয়সছান্ কম এলঅ বিলিনেই তে দোরেইনে তলোয়ারান ন-নিগিলেল। 21 সেক্কে সেবহ আর সল্মুন্ন কলাক্, “তুই নিজে এইনে আমারে মারে ফেলা, কিত্যে যেধোক্কেন্ মানুচ্ সেধোক্কেন্ তার কাম।” সেনত্তেই গিদিয়োনে নিজেই উজে যেইনে তারারে মারে ফেলেল আর তারার উট্তুনোর গত্তনাগুনোত্তুন্ অলংকারানি খুলি নেযেল। গিদিয়োনর সিলুম্ 22 পরেন্দি ইস্রায়েলীয়গুনে গিদিয়োনরে কলাক্, “তুই মিদিয়নীয়গুনোর আঢত্তুন্ আমারে উদ্ধোর গোজ্যস্, সেনত্তেই তুই আর তর্ বংশধরুনে আমার শাজন্গুরিয়্যে অ।” 23 গিদিয়োনে তারারে কলঅ, “আমি কনজনে তমার্ শাজন্গুরিয়্যে ন-অবং-মুইয়ো ন-ওম্, মঅ পূঅগুনেয়ো ন-অবাক্; লগেপ্রভু অবঅ তমার্ শাজন্গুরিয়্যে।” 24 তে আর কলঅ, “মাত্তর্ মর্ এক্কান কোজোলী আঘে। তমার্ লুদেয়্যে ভাগত্তুন্ তুমি পত্তিজনে মরে এক্কানত্ ধরে কানফুল দুয়ো।” তে এ কধাগান কলঅ, কিত্যে মিদিয়নীয়গুনে অলাক্ ইশ্মায়েলর বংশর মানুচ্ আর সেক্কে দিনোত্ ইশ্মায়েলীয়গুনোর কানত্ সোনার কানফুল পিনিবার আওজ্ এলঅ। 25 জোবত্ তারা কলাক্, “আমি হুজি ওইনে সিয়েনি দিবোং।” সেনত্তেই তারা এক্কান কাবড় পাদিলাক্ আর পত্তিজনে তার লুদেয়্যে পযাপিরাত্তুন্ সিয়েন উগুরে এক্কানত্ ধরে কানফুল ফেলেলাক্। 26 সেক্কে যেত্তমান্ সোনা তে পেলঅ সিয়েনি মাবিনে অলঅ প্রায় কুড়ি কেজি পাঁচশত্ গ্রাম। ইয়েনিবাদে তার পেইয়্যে চান ধোক্কেন্ নেগেলেচ্, ঝুঙো, মিদিয়নীয় রাজাগুনোর উরোন্দে বিগুনো রঙর্ পোজাক্ আর উদোর্ গত্তনার নেগেলেচ্ছো ইয়েনি ভিদিরে ধরা ন-অয়। 27 গিদিয়োনে সে বেক্ সোনানিলোই এক্কো এফোদ বানেইনে তা নিজোর আদামত্ অফ্রাদত্ রাগেল। ইস্রায়েলীয়গুনে বেক্কুনে সিদু লগেপ্রভু উগুরে বিশ্বেজ্ ন- গুরিনে এফোদর পূজোবোত্ নিজোরে লোঙেলাক্। সিয়েনই অলঅ গিদিয়োন আর তার গিরিত্তে এক্কো ফাল্। 28 ইঙিরিনেই ইস্রায়েলীয়গুনে মিদিয়নীয়গুনোরে দোঙেনে রাগেলাক্; তারা আর মাদা তুলি ন-পারিলাক্। গিদিয়োনর জীংকানির বাগি চোল্লিশ বজর দেজত্ সুখ-শান্দি এলঅ। গিদিয়োনর মরাণা 29 সে যুদ্ধোগানর পরেন্দি যোয়াশর পূঅ যিরুব্বালে ঘরত্ ফিরি গেলঅ। 30 তার ভালোক্কুন্ মোক্ এলাক্ বিলিনেই তার নিজোর সত্তুরজন পূঅ এলাক্। 31 শিখিমোত তার এক্কো সাদাঙা মোক্ এলঅ। তার্ ঘরত্অ এক্কো পূঅ ওইয়্যে। গিদিয়োনে সিবের নাঙান্ দিলো অবীমেলক। 32 যোয়াশর পূঅ গিদিয়োনে বুড়ো বয়জত্ মুরি গেলঅ। অবীয়েষ্রীয়গুনোর অফ্রাতদ্ তা বাপ্পো যোয়াশর গোর্বোত্ তারে গারেয়োন্। 33 গিদিয়োনর মরাণার পরেন্দি ইস্রায়েলীয়গুনে আরঅ লগেপ্রভু উগুরে পুরি ফেলেইনে বাল দেবেদাগুনো ইদু নিজোরে বিজি দিলাক্। তারা বাল্বরীৎরে নিজোর দেবেদা বিলিনে বেই নিলাক্। 34 যিবে তারারে চেরোকিত্তে বেক্ শত্রুগুনোর আঢত্তুন্ রোক্ষ্যে গোজ্যে তারার সেই গোজেন লগেপ্রভুরে তারা পুরি ফেলেলাক্। 35 যিরুব্বাল, অত্তাৎ গিদিয়োনে তারারে যেদক্কানি গম কাম্ গোজ্যে সে অনুসারে তার্ পরিবারর উগুরে তারা বিশ্বেজ্ গরেদে ধোক্কেন্ ন-দেগান্। |
Copyright © 2021 Bangladesh Bible Society
Bangladesh Bible Society