বিচের গুরিয়্যেগুন 7 - Chakma Bibleগিদিয়োনে মিদিয়নীয়গুনোরে ওদেই দিলো 1 যিরুব্বাল, অত্তাৎ গিদিয়োন আর তার্ বেক মানুচ্চুনে বেন্যেপোত্যে উদিনে হারোদ চাগালার পয়নালার্ ইদু তাম্বুলান্ ফেলেলাক্। তারার্ উত্তোরেন্দি মোরি মুড়োবোর ইদু কিঝিঙো ভিদিরে মিদিয়নীয়গুনোর তাম্বুলান্ এলঅ। 2 লগেপ্রভু গিদিয়োনরে কলঅ, “তঅ মানুচ্চুন্ এদক্ বেশ্ ওইয়োন্দে, মুই তারার্ আঢত্ মিদিয়নীয়গুনোরে তুলি দিই ন-পারং। সিয়েন গুরিলে মরে বাদ দিইনে ইস্রায়েলীয়গুনে বার্বো গুরিনে কবাক্, তারার্ নিজোর বল্লোই তারা উদ্ধোর্ পেইয়োন। 3 সেনত্তেই তুই মানুচ্চুনো ইদু ফগদাং গর্, যিগুনে দরে গির্গিরাদন্ তারা গিলিয়দ মুড়োবো ছাড়িনে ঘরত্ ফিরি যেই পারন্।” সেক্কে বেইশ্ আজার মানুচ্ গেলাক্। আর দশ আজার মানুচ্ থেলাক্। 4 সেক্কে লগেপ্রভু গিদিয়োনরে কলঅ, “এজঅ বোউত্ মানুচ্ রোইয়োন্। তারারে নেযেইনে তুই পানির কায়-কুরে যাহ্। সিয়োদোই মুই তর ওইনে তারারে বেঈ লোম্। মুই যুনি কং, ‘এ মানুচ্চো তঅ লগে যেবঅ,’ সেক্কে তে যেবঅ; মাত্তর্ যুনি কং, ‘এ মানুচ্চো তঅ লগে ন-যেবঅ,’ সেক্কে তে ন-যেবঅ।” 5 সেনত্তেই গিদিয়োনে মানুচ্চুনোরে পানির কায়-কুরে নেযেল। সিদু লগেপ্রভু তারে কলঅ, “যিগুনে কুগুরো ধোক্কেন্ ঝিল্লোই পানি লেই লেই হেবাক্ তারাত্তুন্ যিগুনে পানি হেবাত্তে আদু পাড়িনে ববাক্ তারারে যুদো গর্।” 6 তিনশত্ মান্জ্যে আঢত্ পানি লোইনে লেই লেই হেলাক্ আর বাদ্বাগি বেক্কুনে পানি হেবাত্তে আদু পাদিলাক্। 7 সেক্কে লগেপ্রভু গিদিয়োনরে কলঅ, “যে তিনশত মানুচ্ পানি লেই লেই খেইয়োন তারারে লোইনেই মুই তমারে উদ্ধোর গুরিম্ আর মিদিয়নীয়গুনোরে তমা আঢত তুলি দিম্। অন্য বেক মানুচ্চুনে যে যার ঘরত্ যাদোক্।” 8 সেনত্তেই গিদিয়োনে তিনশঅ মানুচ্ রাগেইনে বাদ্বাগি ইস্রায়েলীয়গুনোরে তারার ঘরত্ পাধেই দিলো। বেক্ খানার জিনিসছানি আর শিংগা সেই তিনশত্ মান্জ্যর ইদু থেলঅ। মিদিয়নীয়গুনোর তাম্বুলান্ এলদে গিদিয়োনর তাম্বুলানর তলে কিজিঙো ভিদিরে। 9 সে রেদোত্ লগেপ্রভু গিদিয়োনরে কলদে, “উঠ্, তুই লামিনে তারার্ তাম্বুলান আক্রমণ গর্। মুই সিয়েন তঅ আঢত্ তুলি দুয়োঙ্। 10 তুই যুনি আক্রমণ গুরিবাত্তে দরাচ্ সালে তঅ চাগর্ ফুরারে সমারে লোইনে লামিনে তারার্ তাম্বুলানর ইদু যাহ্, 11 আর শুনি থেচ্ তারা কি কন্। সেক্কে তুই তাম্বুলান আক্রমণ গুরিবাত্তে বল্ পেবে।” সেনত্তেই গিদিয়োনে তা চাগর্ ফুরারে সমারে নেযেইনে তাম্বুলোর দুযিত্ সৈন্যগুনোর কায়কুরে লামিলাক্। 12 মিদিয়নীয়, অমালেকীয় আর পূগঅ দেজর মানুচ্চুনে সেই কিজিঙো ভিদিরে পুগ্-যুগঅ ঝাঁগঅ ধোক্কেন্ এলাক্। তারার উট্তুন্ সাগর পার ধূল্যেচর ধোক্কেন্ গুণি ন-ফুরেইয়্যে। 13 গিদিয়োনে যেক্কে সিদু যেইনে লুমিলো সেক্কে এক্কো মান্জ্যে তার এক্কো সমাজ্যেরে স্ববনর্ কধা কর্। তে কত্তে, “মুই এক্কান স্ববন্ দেখ্যং। মুই দেগিলুং মোক্কে বিজিলোই বানেয়্যে এক্কান পিদে গোজ্যে গোজ্যেই যেইনে মিদিয়নীয়গুনোর তাম্বুলো ভিদিরে পড়িলো। সিয়েনে মিদিয়নীয়গুনোর তাম্বুলোত্ এদক জোরে যেইনে আঘাত গুরিলোদে, তাম্বুলান উল্লেনে বুয়োই গেলঅ।” 14 ইয়েনর জোবত্ তা সমাজ্যেবো কলঅ, “ইয়েন্ ইস্রায়েলীয় যোয়াশর পূঅ গিদিয়োনর তলোয়ারান বাদে আর কিচ্ছু নয়। গোজেনে মিদিয়নীয়গুনোরে আর তারার পুরো তাম্বুলান্ গিদিয়োনর আঢত্ তুলি দিলো।” 15 গিদিয়োনে সেই স্ববনর্ কধাগান্ আর তার ভেদ্তান শুনিনে আদু পাড়ি পড়িনে গোজেনরে তার্ মনর্ ভোক্তি জানেল। তে ইস্রায়েলীয়গুনোর তাম্বুলোত্ ফিরি এইনে জোরে ডাগিনে কলঅ, “তুমি উদো, গোজেনে মিদিয়নীয়গুনোর তাম্বুলান তমা আঢত্ তুলি দিয়্যে।” 16 সে তিনশত মান্জ্যরে তে তিন্নো দলত্ ভাগ গুরিলো আর পত্তিজনর আঢত্ এক্কো গুরি শিংগা, এক্কো গুরিনে সুদো কুম্ আর সে সংমোধ্যে এক্কো বম্বা দিলো। 17 সে পরেন্দি তে তারারে কলঅ্, “তুমি মরে চেই থেবা আর মুই যিয়েন গুরিম তুমিয়ো সিয়েন গুরিবা। তাম্বুলোর ইদু লুমিনে মুই যিয়েন গুরিম তুমিয়ো ঠিগ্ সিয়েন গুরিবা। 18 মুই আর মর্ লগে বেক্কুনে যেক্কে শিংগা বাজেবং সেক্কে তাম্বুলোর চেরোকিত্যাত্তুন্ তুমিয়ো তমার্ শিংগাগুন বাজেবা আর রঅ ছাড়িনে কবা, ‘লগেপ্রভুত্তে আর গিদিয়োনত্তে।’” 19 রেত্সম্বাগত্ চুগি দিবার আরাম্ভত্ যেক্কে মিদিয়নীয়গুনে চুগিদার বদলাদন্ ঠিগ্ সিয়েনর পরেন্দি গিদিয়োন আর তা লগে একশঅ জন মানুচ্ তাম্বুলানর ইদু যেইনে লুমিলাক্। তারা তারার শিংগাগুন বাজেইনে আঢত্ রাগেইয়্যে কুমুন্ ভাঙি ফেলেলাক্। 20 তিন্নো দলে একসমারে সিয়েন গুরিলাক্। বাঙ্ আঢত্ বোম্বা আর ডেন্ আঢত্ বাজেবাত্তে শিংগাগুন্ নেযেইনে তারা রঅ ছাড়িনেই কলাক্, “লগেপ্রভু আর গিদিয়োনর তলোয়ার।” 21 তাম্বুলোর চেরোকিত্তে গিদিয়োনর মানুচ্চুনে যেক্কে তারার জাগায়ানিত্ দরমড় গুরি থিয়্যেলাক্ সেক্কে বেক মিদিয়নীয়গুনে ধাবাদিইনে রঅ ছাড়িনেই ধেই যাহ্ ধুরিলাক্। 22 তিনশত্ শিংগা বাজেবার অক্তত্ লগেপ্রভু এন্ গুরিলো যার্ ফলে তাম্বুলো ভিদিরে বেক মানুচ্চুনে একজনে আরেকজনরে তলোয়ারলোই আক্রমণ গরা ধুরিলাক্। সেক্কে মিদিয়নীয় সৈন্যগুনে টব্বতর কায়-কুরে আবেল-মহোলার দুযিবো সং আর সরোরার ইন্দি বৈৎ-শিট্টা সং ধেই গেলাক্। 23 সেক্কে ইস্রায়েলীয়গুনো ভিদিরে নপ্তালি, আশের আর মনঃশি-গুট্টির বেক মানুচ্চুনোরে ডাগা অলঅ আর তারা মিদিয়নীয়গুনোরে লোড়েলাক্। 24 সে পরেন্দি গিদিয়োনে ইফ্রয়িমর মুড়ো-মুড়ি চাগালাত্ বেক জাগায়ানিত মানুচ্ পাদেইনে কলঅ, “তুমি মিদিয়নীয়গুনোর বিরুদ্ধে লামি এজঅ আর তারা লুমিবার আগেন্দি বৈৎ-বারা সং বেক চিগোন গাঙানিত্ আর যর্দন গাঙানিত্ আদিনে পার্ অবার্ জাগায়ানি গজক্ গুরি নেযঅ।” সেক্কে ইফ্রয়িমর বেক মানুচ্চুনে এগত্তর্ ওইনে বৈৎ-বারা সং বেক চিগোন গাঙানি আর যর্দন গাঙান আদিনে পার অবার জাগায়ানি গজক্ গুরি নেযেলাক্। 25 তারা ওরেব আর সেব নাঙে দ্বিজন মিদিয়নীয় নেতারে ধুরিলাক্ আর ওরেবরে শিলুনোর ইদু আর সেবকরে সেবর আংগুর মারিবার জাগায়ানত্ মারে ফেলেলাক্। তারা মিদিয়নীয়গুনোরে লোড়েই নেযেলাক্ আর ওরেব আর সেবর মাধাবো যর্দনর উইকুলোত্ গিদিয়োনর ইদু নেযেলাক্। |
Copyright © 2021 Bangladesh Bible Society
Bangladesh Bible Society