বিচের গুরিয়্যেগুন 3 - Chakma Bible1 যিদুক্কুন্ ইস্রায়েলীয়র কনান দেজর্ কনঅ যুদ্ধোর্ অভিজ্ঞতা ন-এলঅ তারারে পোরোক্ষেত্ ফেলেইনে শিক্ষ্যে দিবাত্তে লগেপ্রভু কয়েক্কো জাদরে দেজ ভিদিরে রাগেল। 2 ইস্রায়েলীয়গুনোর গুট্টিগুনে যিগুনে আগেন্দি কনঅ দিনঅ যুদ্ধো ন-গরন্ তারারে যুদ্ধোর্ পৌইদ্যেনে শিক্ষিত গুরি তুলিবাত্তে তে সেধোক্কেন্ গুরিলো। 3 সে জাদ্তুন্ অলাক্, পলেষ্টীয়গুনে আর তারার্ পাচজন শাজন্গুরিয়্যে, বেক্ কনানীয়গুনে আর সীদোনীয়গুনে আহ্ হিব্বীয়গুনে। বাল্-হর্মোণ মুড়োত্তুন হমাৎ আদামান সং লেবাননর যে মুড়ো-মুড়ি চাগালাগান আঘে এ হিব্বীয়গুনে সিদু থেদাক্। 4 লগেপ্রভু মোশিরে দিইনে তারার্ পূরোণিমানুচ্চুনোরে যে উগুমানি দিয়্যে সিয়েনি এ ইস্রায়েলীয়গুনে মানিনে চলন্ নি-ন-চলন্ সিয়েন যগা চেবাত্তেই এ জাদ্তুনোরে ফেলেই যা ওইয়্যে। 5 সেনত্তেই ইস্রায়েলীয়গুনে কনানীয়, হিত্তীয়, ইমোরীয়, পরিষীয়, হিব্বীয় আর যিবূষীয়গুনোর সমারে বজত্তি গরা ধোজ্যন্। 6 তারা তারার্ মিলেগুনোরে লদাক্ আর নিজো ঝিগুনোরে তারার্ পূঅগুনো সমারে বৌ-দিদাক্ আহ্ তারার্ দেব-দেবেদাগুনোরে পূজো গুরিদাক্। অৎনীয়েল 7 ইস্রায়েলীয়গুনে লগেপ্রভুর চোগোত্ যিয়েনি ভাজ্ন্যেই সিয়েনি গত্তাক্। তারা তারার্ গোজেন লগেপ্রভুরে ভুলি যেইনে বাল দেবেদাগুনোরে আর আশেরা দেবীগুনোরে পূজো ধুরিলাক্। 8 সেনত্তেই ইস্রায়েল উগুরে লগেপ্রভুর রাগ্কান জুলি উদিলো আর তে অরাম-নহরয়িমর রাজা কূশন-রিশিয়াথয়িমর আঢত্ তারারে তুলি দিলো। তারা আস্টো বছর সং তার্ অধীনোত্ তলে এলাক্। 9 মাত্তর্ তারা লগেপ্রভু ইদু কানাকুদি গরানার পরেন্দি তে তারারে উদ্ধোর গুরিবাত্তে এক্কো উদ্ধোরগুরিয়্যে দিলো। তে অলদে কনষর গুট্টি কালেবর চিগোন্ ভেইবো অৎনীয়েল। 10 লগেপ্রভুর আত্মাগান্ তা উগুরে এজানার পরেন্দি তে ইস্রায়েলীয়গুনোর শাজন্গুরিয়্যে অলঅ। তে যেক্কে যুদ্ধো গুরিবাত্তে গেলঅ সেক্কে লগেপ্রভু অরামর রাজা কূশন-রিশিয়াথয়িমরে তা আঢত্ তুলি দিলো, আর্ তে তারে ওদেই দিলো। 11 কনষর গুট্টি অৎনীয়েলর মরণ সং দেজত্ চোল্লিশ বজর সুখ-শান্দি এলঅ। এহূদ 12 পরেদি লগেপ্রভুর চোগোত্ যিয়েনি ভাজ্ন্যেই ইস্রায়েলীয়গুনে আরঅ সিয়েনিই গরা ধুরিলাক্। সেনত্তেই লগেপ্রভু মোয়াবর রাজা ইগ্লোনরে ইস্রায়েলর বিরুদ্ধে বোলী গুরি তুলিলো। 13 অম্মোনীয় আর অমালেকীয়গুনোরে লগে নেযেইনে ইগ্লোনে ইস্রায়েলীয়গুনোরে আক্রমণ গুরিলো আর খাজোর্-শঅ্রান গজক্ গুরি নেযেল। 14 ইস্রায়েলীয়গুনে আদার বজর মোয়াবর রাজা ইগ্লোনর অধীনোত্ রলাক্। 15 ইয়েনর্ পরেন্দি ইস্রায়েলীয়গুনে আর লগেপ্রভু ইদু কানাকুদি গরা ধুরিলাক্, আর তে তারাত্তেই এহূদ নাঙে এক্কো উদ্ধোরগুরিয়্যে জর্মেই দিলো। তে অলদে বিন্যামীন-গুট্টির গেরার পূঅ। তে বাঁঙ্ আদেন্দি কাম্ গুরিদো। মোয়াবর রাজা ইগ্লোনরে খাজানা দিবাত্তে ইস্রায়েলীয়গুনে তারে পাধেই দিলাক্। 16 তে এক আঢ্ লাম্বা দ্বিকিত্তেন্দি ধারেয়্যে এক্কান্ ছুড়ি বানেইনে তা কাবড়ানর্ তলে ডেন্ টেঙর্ নলাপেদত্ বানি নিলো। 17 তে যেইনে মোয়াবর রাজা ইগ্লোনরে সেই খাজানাগুন্ দিলো। রাজা ইগ্লোনে অলদে অমকদ পক্তা। 18 খাজানা দেনার পরেন্দি যিগুনে খাজানাগুন্ বুয়োই আন্যন্ এহূদে তারারে বিদেই দিলো, 19 মাত্তর্ তে নিজে গিল্গলর কায় সাজি-সাজাই লেখ্যে শিলুনো সঙ্ যেইনে ফিরি এইনে কলদে, “মহারাজ, তরে মত্তুন্ এক্কান্ গুমুরো হবর্ দিবার্ আঘে।” রাজা তা মানুচ্চুনোরে কলঅ্, “তুমি জুরো গুরি থাগঅ”; সেক্কে তা মানুচ্চুনে তার কায়-কুরেত্তুন্ গেলাক্। 20 সেক্কে রাজা তা ছাট্তানর্ ঠান্ডা-গুদিবোত্ গায় গায় বোয় এলঅ, আর এহূদে তাইদু যেইনে কলঅ্, “তরে মত্তুন্ এক্কান্ হবর্ দিবার্ আঘে; হবরান্ গোজেনত্তুন্ এচ্চ্যে।” এই কধাগান্ শুনিনে রাজা উদিনে ঠিয়েল, 21 আহ্ এহূদে বাঁঙ্ আঢ্তান্দোই তার্ ডেন্ ডাগেন্দি নলাপেদত্তুন্ ছুড়িগান টানি নিগিলেনেই রাজার পেদত্ সিয়েন্ ভোরেই দিলো। 22 ছুড়ি দাত্তো সহ ছুড়িগান পেদত্ চুমিনে তেল্লোই নাদা গেলঅ্, কিত্যে এহূদে ছুড়িগান টানিনে ন-নিগিলেই। ছুড়িগান পিজেন্দি এক্কেনা নিগিল্ল্যে এলঅ। 23 সে পরেন্দি এহূদে বারান্দাত্ নিগিলি এইনে ঘরর দোরান টানিনে তালা মারিনে বন্ধ গুরি দিলো। 24 এহূদে যানার পরেন্দি চাগরুনে এইনে দেগিলাক্ উগুরে ঘরর্ দোরান্ তালা মারা। তারা কলাক্, “হামাক্কাই তে ঘরঅ ভিদিরে আঘাছালত্ যেইয়্যে।” 25 তারা ভালক্কন্ সং বাজ্জেই থেলাক্, মাত্তর্ তো তে দোরান্ ন-খুলোদে দেগিনেই তারা লাজ্ধর ভাঙিনে চাবি আনিনে দোরান্ খুলি ফেলেলাক্। তারা দেগিলাক্ তারার্ গিরোজ্সো মরা অবস্থায় মাদিত্ পড়ি আঘে। 26 চাগরুনে বাজ্জেই থেবার সময়োত্ এহূদে ধেই যেইনে সাজিসাজাই লেখ্যে শিলুন্ পিজেন্দি ফেলেইনে সিয়ীরোত্ যেইনে লুমিলো। 27 সিদু ইফ্রয়িমর মুড়োমুড়ি চাগালাত্ তে শিংগা বাজানার পরেন্দি ইস্রায়েলীয়গুনে তা সমারে মুড়োত্তুন্ তলেদি লামি এইনে তা পিজে পিজে আঢিলাক্, 28 কিত্যে তে তারারে উগুম দিয়্যে, “মঅ পিজে পিজে এজঅ; লগেপ্রভু তমা শত্রু মোয়াবীয়গুনোরে তমা আঢত্ তুলি দিয়্যে।” সেনত্তেই তারা তার্ পিজে পিজে লামি যেইনে মোয়াবর কায়কুরে যর্দন গাঙর্ যে জাগানত্ আঢিনে পার্ ওয়া যায় সিয়েনি গজক্ গুরি নিলাক্। তারা কাররে সেই জাগায়ান ইন্দি পার্ অবাত্তে ন-দিলাক্। 29 সে অক্তত্ তারা দশ আজার মোয়াবীয়রে মারে ফেলেলাক্। এ মোয়াবীয়গুনে বেক্কুনে পক্তা আর বোলী এলাক্, মাত্তর্ তারাত্তুন্ এক্কো মানুচ্অ ধেই যেই ন-পারিলাক্। 30 সে দিনোত্ মোয়াব দেজ্চান ইস্রায়েলীয়গুনোর অধীনোত্ আনা অলঅ, আর আশি বজর সং দেজত্ সুখ-শান্দি এলঅ। শম্গর 31 এহূদর পরেন্দি অনাতর পূঅ শম্গরে শাজন্গুরিয়্যে অলঅ। তে গোরু চোরেইয়্যে লুদিক্কোই পলেষ্টীয়গুনোরে ছয়শঅ মান্জ্যরে মারে ফেলেয়োন্। তেইয়ো ইস্রায়েলীয়গুনোরে রোক্ষ্যে গুরিলো। |
Copyright © 2021 Bangladesh Bible Society
Bangladesh Bible Society