বিচের গুরিয়্যেগুন 21 - Chakma Bibleবিন্যামীনীয়গুনোর বৌর্ সুদোমান্ 1 ইস্রায়েলীয়গুনে আগেন্দি মিস্পাদত্ শমক্ হেইনে কোইয়োন, তারা ভিদিরে কনঅ জনে বিন্যামীন-গুট্টির কনঅ মান্জ্যর লগে ঝি-গুনোরে বৌ ন-দিবাক্। 2-3 সেনত্তেই এবারত্ তারা বৈথেলত যেইনে লগেপ্রভুর ইদু বোইনে সাজোন্যে সং রঅ ছাড়ি ছাড়ি কানিনে তাইদু কুয়ো ধুরিলাক্, “ও লগেপ্রভু, ইস্রায়েলীয়গুনোর গোজেন, ইস্রায়েলীয়গুনো ভিদিরে কিত্তেই ইয়েনি ঘুদিলো? কিত্তেই এচ্ছে ইস্রায়েলীয়গুনো ভিদিরেত্তুন এক্কো গুট্টি আঝি গেলঅ?” 4 তারকেল্যে বেন্যে মানুচ্চুনে এক্কো পূজো বানেইনে পুজ্যে আর উদোলোলি-উৎসর্বর পরব্ গুরিলাক্। 5 মিস্পাত তারা ইয়েন কোইনে এক্কান দরমর শমক্ গুরিলাক্, কনঅ জনে যুনি মিস্পাত্ যেইনে লগেপ্রভুর ইদু ন-যান্ সালে হামাক্কাই তারে মারে ফেলা অবঅ। সেনত্তেই তারা একজন আরেকজনরে পুজোর্ গরা ধুরিলাক্, “ইস্রায়েলীয়গুনোর বেক্ গুট্টিত্তুন কন্না মিস্পাত্ লগেপ্রভুর ইদু ন-যায়?” 6 তারা তারার ভেই বিন্যামীনীয়গুনোত্তে আবিলেচ্ খেইনে কলাক্, “ইস্রায়েলীয়গুনো ভিদিরেত্তুন এচ্চ্যে এক্কো গুট্টিরে তুলি ফেলা ওইয়্যে। 7 মাত্তর্ যিগুন রোইয়োন কিঙিরিনে আমি তারারে বৌর্ বেবস্থা গুরিবোং? আমি দঅ লগেপ্রভুর নাঙে শমক্ গোজ্যেই, আমার কনঅ মিলেরে তারার লগে বৌ ন-দিবোং।” 8 তারা একজন আরেকজনরে পুজোর্ গুরিলাক্, “ইস্রায়েলীয় গুট্টি ভিদিরে এধোক্ক্যেন্ কি কনঅ মানুচ্ আগন্, যে মিস্পাত্ লগেপ্রভুর ইদু আঝিল্ ন-অয়?” সেক্কে তারা হবর্ পেলাক্, যাবেশ-গিলিয়দত্তুন কনজনে সিদু ন-যান, 9 কিত্যে মানুচ্ গুনিবার সময়োত তারা দেক্কোন্, যাবেশ-গিলিয়দর কনঅ মানুচ্ সিয়েনত্ ন-এলাক্। 10 সেনত্তেই তারা তারার বোলীবন্দ যোদ্ধাগুনোর ভিদিরেত্তুন বার আজার মান্জ্যরে পাধেই দিলাক্ যেনে তারা যাবেশ-গিলিয়দত্ যেইনে চিগোন চিঝিগুনোরে আর মিলেগুনোরে সহ সিদুগোর্ বেক মানুচ্চুনোরে মারে ফেলান্। 11 তারা কলাক্, “তুমি পত্তি মরদরে আর গাবুজ্যে নয় এধোক্ক্যেন্ পত্তি মিলেরে মারে ফেলেবা।” 12 সে সৈন্যগুনে যাবেশ-গিলিয়দর আদাম্মেগুনোর ভিদিরে চেরশত্ গাবুজ্যে মিলে পেলাক্; তারা সে মিলেগুনোরে কনান্ দেজর শীলোর তাম্বুলোত নেযেলাক্। 13 ইয়েনর্ পরেন্দি সে এগত্তর ওইয়্যে ইস্রায়েলীয়গুনে রিম্মোণ মুড়োবোত মানুচ্ পাদেইনে বিন্যামীনীয়গুনোর লগে কধা কলাক্ আর শান্তি ফগদাং গুরিলাক্। 14 সেক্কে বিন্যামীনীয়গুনে ফিরি এলাক্। যাবেশ-গিলিয়দর জেদা রাগেয়্যে মিলেগুনোর লগে তারারে বৌ দি দিলাক্, মাত্তর্ মিলেগুনে জনেন্দি কম্ পড়িলাক্। 15 মানুচ্চুনে বিন্যামীন-গুট্টিত্তে আবিলেচ্ গরা ধুরিলাক্, কিত্যে লগেপ্রভু ইস্রায়েলীয় গুট্টিগুনো ভিদিরে এক্কান যাগুলুগ্ গুরি দিয়্যে। 16 তারার্ বুড়ো নেতাগুনে কলাক্, “বিন্যামীনীয় মিলেগুনোরে শেজ্ গরা ওইয়্যে। ইক্কিনে যে মরত্তুনে বাঁজি আগন্ তারা বৌ লবাত্তে আমি কুদু মিলে পেবং? 17 ইস্রায়েলীয়গুনো ভিদিরেত্তুন যেনে এক্কো গুট্টি বাদ ন-যায় সেনত্তেই বাঁজি থেইয়্যে বিন্যামীনীয়গুনোর বংশগুন রোক্ষ্যে গরা পুরিবো। 18 আমা মিলেগুনোরে দঅ তারার্ লগে বৌ-দি ন-পারিই, কিত্যে আমি শমক্ খেইনে কোইয়্যেদে, কনঅ জনে যুনি কনঅ বিন্যামীনীয়রে মিলে দে সালে তে অভিশাব্ পেবঅ।” 19 সে পরেন্দি তারা কলাক্, “পত্তি বজর শীলোত্ লগেপ্রভুর নাঙে এক্কো পরব্ অয়।” শীলো শঅ্রান এলদে বৈথেলর উত্তোরেন্দি যে পথ্তান বৈথেলত্তুন শিখিমোর ইন্দি যেইয়্যে সিয়েনর পূগেন্দি আর লবোনার দোগিণেন্দি। 20 তারা বিন্যামীনীয়গুনোরে এ সল্লাগান্ দিলাক্, “তুমি যেইনে শীলোর আংগুর ক্ষেদতানত্ পোল্লেই থাগঅ্ আর চোগ্ রাগেয়ো। 21 যেক্কে সিদুগোর্ মিলেগুনে নাজত্ মিজেবাত্তে নিগিলি এবাক্ সেক্কে তুমি পত্তিজনে আংগুর্ ক্ষেদত্তুন নিগিলি এইনে যিবেরে গম্ লাগে তারে ধুরি নেযেইনে বিন্যামীন চাগালাত্ যেবা। 22 যেক্কে তারার বাপ্পুনে বা ভেইয়ুনে আমা ইদু বিচের্ দিবাত্তে এবাক্ সেক্কে আমি তারারে কবং, ‘তুমি এ মিলেগুনোরে দান গুরিনে আমা পক্ষেন্দি তারা উগুরে দোয়্যে দেগঅ। যুদ্ধোত্ আমি তারাত্তে সিদুক্কুন্ মিলে ন-পেই। ইয়েন পৌইদ্যেনে তমার্ কনঅ্ দুষ নেই, কিত্যে তুমি নিজে দঅ তমার্ মিলেগুনোরে তারারে ন-দুয়ো।’” 23 সেনত্তেই বিন্যামীনীয়গুনে সিয়েনই গুরিলাক্। মিলেগুনে যেক্কে নাজদন্ সেক্কে তারা পত্তিজনে বৌ লবাত্তে এক্কোত্ ধরে মিলে ধুরি নেযেলাক্। সে পরেন্দি তারা তারার নিজো জাগাত ফিরি যেইনে শঅ্র আর আদামানিত্ ঘর আরঅ বানেই নেযেইনে সিদু বজত্তি গরা ধুরিলাক্। 24 ইয়েনর্ পরেন্দি ইস্রায়েলীয়গুনে সেই জাগায়ানি ছাড়িনে যে যার গুট্টি আর বংশর জাগানিত নিজোর সোম্বোত্তিত্ গেলাক্। 25 সেক্কেয়ো ইস্রায়েলীয়গুনো ভিদিরে কনঅ রাজা ন-এলাক। যে যিয়েন গম মনে গুরিদো তে সিয়েনই গুরিদো। |
Copyright © 2021 Bangladesh Bible Society
Bangladesh Bible Society