বিচের গুরিয়্যেগুন 20 - Chakma Bibleবিন্যামীন-গুট্টির লগে ইস্রায়েলীয়গুনোর যুদ্ধো 1 ইয়েনর্ পরেন্দি গিলিয়দর ইস্রায়েলীয়গুনে আর দানত্তুন বের্-শেবা সং পুরো চাগালায়ানর ইস্রায়েলীয়গুনে বেক্কুনে নিগিলি এলাক্ আর মিস্পাত্ লগেপ্রভুর ইদু এগত্তর অলাক্। 2-3 এ কধাগান বিন্যামীন-গুট্টির মানুচ্চুনোর কানত্ গেলঅ। গোজেনর্ যে মানুচ্চুনে এগত্তর্ ওইয়োন সে দলঅ ভিদিরে এলাক্ ইস্রায়েলীয় বেক্ গুট্টির-নেতাগুনে আর চের্ লাখ্ আত্যের্ বলা সৈন্য। তারা জানিবাত্তে চেলাক্, সে জঘন্য কার্বারান্ কিঙিরিনে ঘোট্যে। 4 সেক্কে লেবি-গুট্টির সে মানুচ্চো, অত্তাৎ মারে ফেলেয়্যে মিলেবোর নেক্কো কলঅ, “মুই আর মঅ দ্বিতীয় ঘরঅ মোক্কো রেত্তো কাদেবাত্তে বিন্যামীন চাগালার গিবিয়াদত্ যেইয়্যেই। 5 রেদোত্ গিবিয়ার মানুচ্চুনে মরে তোগেবাত্তে এইনে ঘরান্ ঘিরিলাক্। তারা মরে মারে ফেলেবাত্তে চেইয়োন, মাত্তর্ মঅ বদলে তারা মঅ দ্বিতীয় ঘরঅ মোক্কোরে নেযেইনে জোর গুরিনে তা লগে সিনেলী গুরিলাক্, সেক্কে তে মুরি গেলঅ। 6 ইস্রায়েলর্ ভিদিরে এন্ গুন্দোমি আর বজং কাম গোজ্যন্ বিলিনে মুই মঅ দ্বিতীয় ঘরঅ মোক্কোরে কাবিনে কট্টা কট্টা গুরি ইস্রায়েলীয়গুনোর ভাগত্ পোজ্যে পত্তি জাগাত্ এক কট্টা গুরিনে পাধেই দুয়োং। 7 ইক্কিনে ও ইস্রায়েলীয়গুন, তুমি বেক্কুনে এ পৌইদ্যেনে কধা কোইনে তমার্ রায়য়ান দুয়ো।” 8 সেক্কে বেক্ মানুচ্চুনে একসমারে ঠিয়্যেই উদিনে কলাক্, “আমি কনজনে ঘরত্ ন-যেবং; আমা ভিদিরে একজনেয়ো ফিরি ন-যেবা। 9 আমি চাম্বা চেইনে গিবিয়ার মানুচ্চুনোর বিরুদ্ধে যেবং। 10 ইস্রায়েলর বেক্ গুট্টিগুনোর পত্তি একশত জনত্তুন দশজন, আজারত্তুন একশত জন আর দশ আজারত্তুন এক আজার জন মানুচ্ বেঈ নেযেবং। তারা যেইনে সৈন্যগুনোত্তে হানা-দানা লোই এবাক্; আর আমি বিন্যামীন চাগালাত্ গিবিয়াদত্ যেইনে ইস্রায়েল জাদঅ ভিদিরেত্তুন তারা যেদক্কানি গুন্দোমী কাম্ গোজ্যন্ সিয়েনির যগাজ্যে সাজা দিবোং।” 11 সেনত্তেই ইস্রায়েলীয়গুনোর নানান্ গুট্টির মানুচ্চুনে বেক্কুনে একসমারে এগত্তর্ ওইনে গিবিয়ার বিরুদ্ধে এক ওইনে ঠিয়্যেলাক্। 12 তারা বিন্যামীন চাগালাত্ বেক্ জাগানিত মানুচ্ দিইনে পুজোর্ গুরিবাত্তে পাদেলাক্, তমা ভিদিরে ইয়েন কি গুন্দোমী কাম্ গরা ওইয়্যে? 13 গিবিয়ার সে বেক্ পাজি মানুচ্চুনোরে তুমি আমা আঢত্ তুলি দুয়ো যেনে আমি তারারে মারে ফেলেইনে ইস্রায়েলীয়গুনো ভিদিরেত্তুন এ গুনোমিগানি দূর্ গুরি দি পারিই। মাত্তর্ বিন্যামীনীয়গুনে তারার্ ইস্রায়েলীয় ভেইয়ুনোর কধালোই কান ন-পাদিলাক্। 14 তারা সেই বেক্ ইস্রায়েলীয়গুনোর লগে যুদ্ধো গুরিবাত্তে তারার্ শঅ্র আর আদামত্তুন নিগিলিনে গিবিয়াদত্ যেইনে এগত্তর্ অলাক্। 15 সেদিন্যে তারা তারার শঅর্ আর আদামানিত্তুন ছাব্বিশ আজার সৈন্য এগত্তর্ গুরিলাক্। ইগুনবাদেয়ো তারার লগে এলাক্ গিবিয়ার সাতশঅ বেঈ লোইয়্যে সৈন্য। 16 বেক্ সৈন্যগুনো ভিদিরে সাতশত বাঙ্ আত্যে কাবিদ্যাং সৈন্য এলাক্ যিগুনে চুলান্ তাগিনে ফিংগালোই ঠিগ্ চুলান উগুরে পাত্তর্ মারি পারিদাক্। 17 বাদবাগি ইস্রায়েলীয় সৈন্যগুনে জনেন্দি এলাক্ চের্ লাখ্। তারা বেক্কুনেই এলাক্ যুদ্ধোত্ কাবিল্। 18 তারা বৈথেলত যেইনে গোজেনর্ ইত্তুন্ জানিবাত্তে চেলাক্ বিন্যামীনীয়গুনো লগে যুদ্ধো গুরিবাত্তে তারা ভিদিরেত্তুন কন্না আগে যেবঅ। জোবত্ লগেপ্রভু জানেলদে, যিহূদা-গুট্টিবো আগে যেবঅ। 19 তার্কেল্যে বেন্যে উদিনে ইস্রায়েলীয়গুনে গিবিয়ার ইদু তাম্বুলান ফেলেলাক্। 20 সে পরেন্দি তারা বিন্যামীনীয়গুনো লগে যুদ্ধো গুরিবাত্তে নিগিলিনে সিয়েনত্ তারার বিরুদ্ধে সৈন্য সাজেলাক্। 21 বিন্যামীনীয়গুনে গিবিয়াত্তুন নিগিলি এলাক্ আর সেদিন্যে বেইশ আজার ইস্রায়েলীয়রে মারে ফেলেলাক্। 22-23 সেক্কে ইস্রায়েলীয়গুনে যেইনে সাজোন্যে সং লগেপ্রভুর ইদু কানাকুদি গুরিনে কলাক্, “আমি কি আমা ভেই বিন্যামীনীয়গুনোর বিরুদ্ধে আরঅ যুদ্ধো গুরিবাত্তে যেবং।” জোবত্ লগেপ্রভু কলদে, “যঅ।” সেক্কে ইস্রায়েলীয় সৈন্যগুনে মনত্ বুক বানিনে পৌইল্যা দিনোত্ যে জাগানত্ যুদ্ধো গোজ্যন্ আরঅ সিয়েনত যুদ্ধো গুরিবাত্তে যুক্কোল্ অলাক্। 24 দ্বিদিনোত্ তারা বিন্যামীন-গুট্টির মানুচ্চুনোর বিরুদ্ধে উজেই গেলাক্। 25 এবারত্ বিন্যামীনীয়গুনে তারারে মানা গুরিবাত্তে গিবিয়াত্তুন নিগিলি এইনে আরঅ আদার আজার ইস্রায়েলীয়রে মারে ফেলেলাক্। তারা বেক্কুনেই এলাক্ তলোয়ারবলা সৈন্য। 26 সেক্কে ইস্রায়েলীয়গুনোর বেক্ মানুচ্চুনে বৈথেলত যেইনে লগেপ্রভুর ইদু বুঝিনে কানাকুদি গরা ধুরিলাক্। তারা সেদিন্যে সাজোন্যে সং উবোস্ থেলাক্ আর লগেপ্রভুর নাঙে পুজ্যে আর উদোলোলির্-উৎসর্বর পরব্ গুরিলাক্। 27-28 সে সময়োত গোজেনর্ সুদোমর্-সুন্দুক্কো বৈথেলত এলঅ, আর হারোণর নাদিন্, অত্তাৎ ইলিয়াসরর পূঅ পীনহসে সিবে মুুজুঙোত্ ঠিয়েইনে সেবা কাম্ গুরিদো। সেনত্তেই ইস্রায়েলীয়গুনে সিয়েনত্ লগেপ্রভুর আওজ্সান জানিবাত্তে পুজোর্ গুরিলাক্, “আমি আমা ভেই বিন্যামীন-গুট্টিগুনোর বিরুদ্ধে আরঅ যুদ্ধো গুরিবাত্তে যেবং না-কি ন-যেবং?” লগেপ্রভু জোব্ দিলোদে, “যঅ, কিত্তেই কেল্যে মুই তমা আঢত্ তারারে তুলি দিবাত্তে যাঙর্।” 29 সেক্কে ইস্রায়েলীয়গুনে গিবিয়ার চেরোকিত্তেন্দি সৈন্যগুনোরে লুগেই রাগেলাক্। 30 তিন দিনোত্ বাদবাগি সৈন্যগুনে বিন্যামীনীয়গুনোর লগে যুদ্ধো গুরিবাত্তে আগঅ ধোক্কেন্ গুরিই গিবিয়ার ইদু সৈন্য সাজেলাক্। 31 ইস্রায়েলীয়গুনোরে মানা গুরিবাত্তে বিন্যামীনীয়গুনে নিগিলি এইনে শঅ্রত্তুন্ বালোদ্দুরোত্ গেলাক্। তারা আগঅ ধোক্কেন্ ইস্রায়েলীয়গুনোরে মারে ফেলা ধুরিলাক্। সেক্কে মাদঅ উগুরে আর যে পথ দ্বিয়েনর এক্কান বৈথেলর ইন্দি যেইয়্যে আর এক্কান গিবিয়ার ইন্দি যেইয়্যে সিয়েন উগুরে পেরায় ত্রিজজন মানুচ্ মুরি গেলাক্। 32 সেক্কে বিন্যামীনীয়গুনে কুয়ো ধুরিলাক্, “আমি তারারে আগঅ ধোক্ক্যেন্ অদেই দির্,” আর ইস্রায়েলীয়গুনে কলাক্, “শুনো, আমি পিজেন্দি উদি যেইনে শঅরর্ কায়-কুরেত্তুন তারারে সোরেনেই পথ্তান উগুরে নেযেই।” 33 সে পরেন্দি ইস্রায়েলীয় সৈন্যগুনে তারার জাগানত্তুন্ সুরি যেইনে বাল্-তামরত্ যুদ্ধোত্তে যুক্কোল অলাক্। ইন্দি ইস্রায়েলীয়গুনোর পৌল্যেই থেইয়্যে সৈন্যগুনে তারার জাগায়ান, অত্তাৎ মারে-গেবা ছাড়িনে নিগিলি এলাক্। 34 সেক্কে ইস্রায়েলীয়গুনোর দশ আজার বেঈ লোইয়্যে সৈন্য গিবিয়ার মুজুঙেন্দি আক্রমণ চালেলাক্, আর সেক্কে জদবদে যুদ্ধো চলা ধুরিলো; মাত্তর্ বিন্যামীনীয়গুনে বুজিই ন-পারিলাক্, তারা পেরায় শেজ্ অবার পদথ্ এই পোজ্যন। 35 লগেপ্রভু সেদিন্যে ইস্রায়েলীয়গুনো ইদু বিন্যামীন-গুট্টিবোরে ওদেই দিলো আর তারা পোজোশ আজার একশত বিন্যামীনীয় মান্জ্যরে মারে ফেলেলাক্। তারা বেক্কুনে এলাক্ তলোয়ারবলা সৈন্য। 36 ইয়েনর্ পরেন্দি বিন্যামীনীয়গুনে বুঝিলাক্, তারা উদিই যেইয়োন। গিবিয়ার ইদু যে সৈন্যগুনোরে লুগেই রাগা ওইয়্যে তারা আজাই ইস্রায়েলীয়গুনে বিন্যামীনীয়গুনোর মুজুঙেত্তুন পিজেন্দি যেইয়োন। 37 সে পৌল্যেই থেইয়্যে সৈন্যগুনে গিবিয়ার উগুরে আদিক্কেন্ গুরি ঝাবেই পড়িলাক্ আর শঅরর্ ভিদিরে ছিদি পড়িনে সিদুগোর্ বেক্ মানুচ্চুনোরে মারে ফেলেলাক্। 38-39 সে পৌল্যেই থেইয়্যে সৈন্যগুনোর লগে অন্য ইস্রায়েলীয় সৈন্যগুনে এ চিহ্নাগান ঠিগ্ গুরিলাক্, তারা শঅ্রত্তুন মেঘঅ ধোক্ক্যেন্ গুরিনে ধূমো উগুরেন্দি উদোদে দেগিলে যুদ্ধোত্তে ঘুরিনে ঠিয়্যেবাক্। যেক্কে বিন্যামীনীয়গুনে ইস্রায়েলীয়গুনোর ত্রিশজন মান্জ্যরে মারে ফেলেলাক্ সেক্কে তারা কলাক্, “আমি পৌইল্যা বারঅ যুদ্ধোত্ যেধোক্ক্যেন্ তারারে ওদেই দিলোং এবারত্ অ সেধোক্ক্যেন্ গুরির্।” 40 মাত্তর্ তারার শঅরত্তুন যেক্কে মেঘচাগঅ ধোক্ক্যেন্ ধূমো উদো ধুরিলো সেক্কে তারা ঘুরিনে দেগিলাক্, গোদা শঅরত্তুন ধূমো আকাজত্ উদি যার্। 41 সে সময়োত্ ইস্রায়েলীয়গুনে মুয়োন্ ফিরেলাক্ আর সেক্কে বিন্যামীনীয়গুনে অমকদ দোরেলাক্। তারা বুঝি পারিলাক্, তারা উগুরে মরণ দজা এচ্চ্যে। 42 সেনত্তেই তারা ইস্রায়েলীয়গুনো মুজুঙোত্তুন ধূল্যেচরর্ চাগালার্ ইন্দি ধেই যাহ্ ধুরিলাক্, মাত্তর্ যুদ্ধোত্তুন ন-বাঁজিলাক। অন্য ইস্রায়েলীয়গুনে শঅর্ আর আদামত্তুন নিগিলি এইনে সিয়োদোই তারারে মারে ফেলেলাক্। 43 তারা বিন্যামীনীয়গুনোরে লোড়েইনে ঘিরি ফেলেলাক্ আর গিবিয়ার পূগেন্দি তারার ঝিরেবার জাগানত্ তারারে মারে ফেলেলাক্। 44 ইয়েনত্ আদার আজার বিন্যামীনীয় মুরি গেলাক্; তারা বেক্কুনে এলাক্ বোলীবন্দ যোদ্ধা। 45 যেক্কে বাদবাগি বিন্যামীনীয়গুনে ঘুরিনে ধূল্যেচরর্-চাগালাত্ রিম্মোণ মুড়োবোর ইন্দি ধেই যাদন্ সেক্কে ইস্রায়েলীয়গুনে পথ্তানত্ তারার পাঁচ আজার সৈন্যরে মারে ফেলেলাক্। সে পরেন্দিয়ো তারা গিদোম সং বিন্যামীনীয়গুনোরে লোড়েই নেযেলাক্ আর দ্বিআজার মান্জ্যরে মারে ফেলেলাক্। 46 সেদিন্যে বেক্কুনে পোজোশ আজার বিন্যামীনীয় সৈন্য মারা গেলাক্। তারা বেক্কুনে এলাক্ যুদ্ধোত্ কাবিল্। 47 মাত্তর্ বিন্যামীনীয়গুনোর ছয়শত মানুচ্ ঘুরিনে ধূল্যেচরর্-চাগালাত্ রিম্মোণ মুড়োবোত ধেই যেইনে চের্ মাস সং সিয়োত্ রলাক্। 48 এ ভিদিরে ইস্রায়েলীয়গুনে ফিরিনে বিন্যামীনীয়গুনোর বাদবাগি মানুচ্চুনোরে বেক্কুনোরে মারে ফেলেলাক্ আর শঅ্র আর আদাম ভিদিরে এ্যমান আর অন্য যিগুনোরে পেইয়োন্ বেক্কুনোরে শেজ্ গুরি দিলাক্। তারা যেদক্কানি শঅ্র আর আদামত্ গেলাক্ বেক্কানিত্ আগুন বাজেই দিলাক্। |
Copyright © 2021 Bangladesh Bible Society
Bangladesh Bible Society