বিচের গুরিয়্যেগুন 2 - Chakma Bibleবোখীমোত্ লগেপ্রভুর দূত 1 লগেপ্রভুর দূত্তো গিল্গলত্তুন বোখীমোত্ এইনে ইস্রায়েলীয়গুনোরে কলঅ, “মুই মিশর দেজত্তুন্ তমারে নিগিলেই আন্যং আর যে দেজ্চান দিবার শমক্ মুই তমার্ পূরোণি বুড়োবুড়িগুনো ইদু গোজ্যং সে দেজত্ তমারে আন্যং। মুই কোইয়োং, ‘তমাত্তেই মর্ থিদেবর্ গোজ্যে সুদোমান্ মুই কনদিনঅ ন-ভাঙিম্। 2 তুমি এ দেজর মানুচ্চুনো সমারে কনঅ চুক্তি ন-গুরিবা বরং তারার্ ডালিপূজোগুন ভাঙি ফেলেবা।’ মাত্তর্ তুমি মঅ কধার অবাধ্য ওইয়ো। তুমি কেধোক্কেন্ গুরিনে এ বাবোত্যে কাম্ গুরিলা। 3 সেনত্তেই ইক্কিনে মুই তমারে কঙত্তে, মুই তমাত্তুন এ মানুচ্চুনোরে ধাবেই ন-দিম্; তারা তমাত্যেই ফাল্ ধোক্ক্যেন অবাক্, কিত্যে তুমি তারার দেব-দেবেদাগুনোর ফালদ্ পুরিবা।” 4 লগেপ্রভুর দূত্তো যেক্কে ইস্রায়েলীয়গুনো ইদু এ কধানি কলঅ সেক্কে তারা দাঙর্ দাঙর্ গুরি কাঁনা ধুরিলাক্। 5 তারা সে জাগানর নাঙান্ দিলাক্ বোখীম (যিয়েনর্ ভেদ্তান্ “আবিলেচ্গুরিয়্যে”)। লগেপ্রভুর নাঙে সিয়েনত্ তারা এ্যমান-উৎসর্বর পরব্ গুরিলাক্। কধা ন-শুনোনা আর উদি যানা 6 যিহোশূয় ইস্রায়েলীয়গুনোরে বিদেই দেনার পরেন্দি তারা যার্ যার্ ভাগর্ জাগায়ানি গজক্ গুরিবাত্তে গেলাক্। 7 যিহোশূয় যেদকদিন বাঁজি এলঅ আর সে পরেন্দি বুড়ো নেতাগুনে যেদকদিন বাঁজি এলাক্ সেদকদিন ইস্রায়েলীয়গুনে লগেপ্রভুরে সেবা গোজ্যন্। ইস্রায়েলীয়গুনোত্তে লগেপ্রভু যেদক্কানি মহৎ কাম্ গোজ্যে সেই বুড়ো নেতাগুনে সিয়েনি দেক্কোন্। 8 লগেপ্রভুর চাগর্ নূনোর পূঅ যিহোশূয় একশঅ দশ বজর বয়জত্ মুরি গেলঅ। 9 মানুচ্চুনে তারে তার্ নিজোর্ সোম্বোত্তি ভিদিরে তিম্নৎ-হেরস নাঙে এক্কান জাগাত্ গারেয়োন্। জাগায়ান অলদে ইফ্রয়িম-গুট্টির মুড়ো-মুড়ি চাগালার্ গাশ মুড়োবোর উত্তোরেন্দি। 10 যিহোশূয়র সময়োত্ ইস্রায়েলীয়গুনে মারা যেইনে তারার্ পূরোণি বুড়ো-বুড়িগুনো ইদু যানার পরেন্দি তারার্ জাগায়ানিত এলাক্ তারার্ গুট্টিগুনে। ইগুনে লগেপ্রভুরে ন-চিনিদাক্ আর লগেপ্রভু ইস্রায়েলীয়গুনোত্তে যিয়েনি গোজ্যে সিয়েনিয়ো হবর্ ন-পেদাক্। 11 লগেপ্রভুর চোগোত্ যিয়েনি ভাজ্ন্যেই তারা সিয়েনিই গুরিদাক্। তারা বাল দেবেদাগুনোরে পূজো গুরিদাক্। 12 তারার্ পূরোণি বুড়ো-বুড়িগুনোর্ গোজেন লগেপ্রভু, যিবে তারারে মিসর দেজত্তুন্ নিগিলেই আন্যে তারে তারা বার বার ছাড়ি যেদাক্। তারা তারার্ চেরোকিত্তে জাদ্তুনো ইদু নানান্ বাবোত্যে দেব-দেবেদার ইন্দি মন দিদাক্ আর সিগুনোরে পূজো গুরিদাক্, আর সেক্কে তারা লগেপ্রভুরে রাগ্ তুলি দিদাক্। 13 এধোক্কেন্ গুরিনে তারা লগেপ্রভুরে বাদ দিইনে বাল দেবেদার আর অষ্টারোৎ দেবীর পূজো গুরিদাক্। 14 সেনত্তেই লগেপ্রভু রাগে লুটগুরিয়্যেগুনোর আঢত্ ইস্রায়েলীয়গুনোরে তুলি দিদো। তারা তারার্ পযাপিরানি লুদেই নিদাক্। তারার্ চেরোকিত্তে শত্রুগুনোর আঢত্ তে তারারে তুলি দিদো, সেনত্তেই তারা শত্রুগুনোর বিরুদ্ধে আর ঠিয়্যেই ন-পারিদাক্। 15 ইস্রায়েলীয়গুনে যেক্কে যুদ্ধোত্ যেদাক্ সেক্কে লগেপ্রভু শমক্ খেইনে যে এগেমান গোজ্যে সে মজিম্ তা আঢ্তান তারার্ ভালেদিত্তেই তারার্ ইন্দি থেদঅ, সেনত্তেই তারা দাঙর্ দযা ভিদিরে এলাক্। 16 সেক্কে লগেপ্রভু তারার্ ইদু শাজন্ গুরিয়্যে তুলি দিদো। তারা লুট্ গুরিয়্যেগুনোর আঢত্তুন্ ইস্রায়েলীয়গুনোরে রোক্ষ্যে গুরিদাক্, 17 মাত্তর্ তো ইস্রায়েলীয়গুনে এ শাজন্ গুরিয়্যেগুনোর কধালোই কান ন-পাদিদাক্। লগেপ্রভু উগুরে বিশ্বেজ্ আরেইনে তারা দেব-দেবেদাগুনো ইদু নিজোরে মিজেই দিদাক্ আর তারারে পূজো গুরিদাক্। তারার্ পূরোণি মানুচ্চুনে লগেপ্রভুর উগুম পালন গুরিনে যে বাধ্যতার পদেন্দি চলিদাক্ তারা সেই পথ্তানন্দি ন-আদিনে কয়েকদিনো ভিদিরেই সে পথ্তানত্তুন্ সুরি যেদাক্। 18 লগেপ্রভু যেক্কে তারাত্তেই কনঅ শাজন্ গুরিয়্যে থিক্ গুরিদো সেক্কে তে তা সমারে থেদঅ। সে শাজন্ গুরিয়্যেবো যেদকদিন বাঁজি থেদঅ সেদকদিন সং লগেপ্রভু শত্রুগুনোর আঢত্তুন্ ইস্রায়েলীয়গুনোরে রোক্ষ্যে গুরিদো। অত্যেচারীগুনোর আঢত্ যন্ত্রণা আর দুখ্ পেইনে তারা যেক্কে কানাকুদি গুরিদাক্ সেক্কে তারা উগুরে লগেপ্রভুর মেইয়্যে অদঅ। 19 মাত্তর্ সেই শাজন্ গুরিয়েবো মুরি গেলে মানুচ্চুনে আর দেব-দেবেদাগুনোর্ ইন্দি মনান্ দিদাক্ আর তারারে সেবা আহ্ পূজো গুরিনে তারার্ পূরোণি মানুচ্চুনোত্তুন্ বেশ্ আরঅ বজং পদেন্দি ফিরি যেদাক্। তারা কনবাবদে তারার্ ভাজ্ন্যেই হাচ্যত্ আর একগঙ্যা পথ্তান্ ন-ছাড়িদাক্। 20 সেনত্তেই লগেপ্রভু ইস্রায়েলীয়গুনো উগুরে রাগে ফুলি উদিনে কলঅ, “এ জাদর্ পূরোণি মানুচ্চুনোর্ সময়োত্ মুই যে সুদোমান্ থিদে গোজ্যং সিয়েন ইগুনে ন-পালান্ আর মঅ কধানিয়ো ন-শুনোন্। 21 সেনত্তে যিহোশূয় মুরি যেবার সময়ানত্ যিদুক্কুন্ জাদ দেজত্ থেইয়োন্ তারারে মুই ইস্রায়েলীয়গুনোর মুজুঙোত্তুন্ ধাবেই ন-দিম্। 22 ইস্রায়েলীয়গুনে তারার্ পূরোণি বুড়ো-বুড়িগুনো ধোক্ক্যেন্ মর্ পথ্তানন্দি আদন্ কিনা মুই এই বেক্ জাদ্তুনোরে দিইনেই তারারে পোরোক্ষ্যে গুরিম্।” 23 লগেপ্রভু সে জাদ্তুনোরে লগে লগে ধাবেইনে নিগিলেই ন-দিইনে দেজত্ রাগেই দিলো। তে যিহোশূয়র আঢত্ তারারে তুলি নঅ-দে। |
Copyright © 2021 Bangladesh Bible Society
Bangladesh Bible Society