বিচের গুরিয়্যেগুন 17 - Chakma Bible

মীখার মূত্তি

¹ ইফ্রয়িমর মুড়ো-মুড়ি চাগালাত্‌ মীখা নাঙে এক্কো মানুচ্‌ এলঅ।

² তে তা মাবোরে কলঅ, “তর্‌ যে তের কেজি দ্বিশত গ্রাম রূবো চুর্‌ ওইয়্যে আর যিয়েনত্তে তরে মুই গেইল্‌ দেদে শুন্যং সিয়েন মইদু আঘে, মুই সিয়েন নেযেয়োং।” সেক্কে তা মা তারে কলঅ, “বাবা, লগেপ্রভু তরে বর্‌ দোক্‌!”

³ সে তের কেজি দ্বিশত গ্রাম রুবো তে তা মাবোরে ফিরেই দিলো। সেক্কে তা মাবো তারে কলঅ, “এ রূবোগান মুই লগেপ্রভুর নাঙে উৎসর্ব গরঙর্‌ যেনে মঅ পূঅবো সিয়েন্দোই শীল্‌ মাজ্যে এক্কো মূত্তি আর ছাজি গোলেনেই আর এক্কো মূত্তি বানাই। সেনত্তেই মুই এ রূবোগান তরে ফিরে দিম্‌।”

⁴ মীখা সে রূবোগান তা মা আঢত্‌ ফিরেই দেনার পরেন্দি তা মাবো পেরায়্‌ আড়ি কেজি রূবো নেযেনে সোনা বান্যেবোরে দিলো, আর সিয়েন্দোই এক্কো মূত্তি আর এক্কো আরুক্‌ বানেই দিলো, আর সিগুন্‌ মীখার ঘরত্‌ রাগা অলঅ।

⁵ মীখার এক্কান্‌ মন্দির এলঅ। তে এক্কো এফোদ আর কয়েক্কো দেবেদামূত্তি বানেইনে তার এক্কো পূঅরে ধর্মগুরু-ইজেবে বোজেল।

⁶ ইস্রায়েলীয়গুনো ভিদিরে সেক্কেয়ো কনঅ রাজা ন-এলঅ। যে যিয়েন গম্‌ মনে গুরিদো সিয়েনোই গুরিদাক্‌।

⁷ সে সময়োত্‌ যিহূদা চাগালাত্‌ বৈৎলেহমর এক্কো লেবীয় গাবুজ্যে যিহূদা-গুট্টির মানুচ্চুনো সমারে বজত্তি গুরিদো।

⁸ তে অন্য কিত্তেন্দি থেবার জাগা তোগেবাত্তে বৈৎলেহমান ছাড়িনে নিগিলি এলঅ। যেবার পদথ্‌ তে ইফ্রয়িমর মুড়ো-মুড়ি চাগালাত্‌ মীখার ঘরত্‌ গেলঅ।

⁹ মীখা তারে পুজোর্‌ গুরিলো, “তুই কুত্তুন্‌ এচ্ছোচ্‌?” তে কলঅ, “মুই যিহূদা চাগালার বৈৎলেহমর এক্কো লেবীয়। মুই যিয়েনত্‌ থেবার জাগা পেইম্‌ সিয়োদোই থেইম্‌।”

^10-11 মীখা তারে কলঅ, “তুই সালে মঅ লগে থাক্‌ আর মঅ ধর্মগুরু ওইনে বাবঅ ধোক্কেন্‌ অ। মুই তরে বজরে একশঅ কুড়ি গ্রাম ইজেবে রূবো আর হাবানা-উরোন-পিনোন্‌ দিম্‌।” এ কধাগান শুনিনে সে লেবীয়বো ভিদিরে গেলঅ আর তার লগে থেবাত্তে রাজী অলঅ। মীখা সে গাবুজ্যেবোরে তার এক্কো পূঅ ধোক্ক্যেন দেগিলো।

¹² মীখা সে লেবীয়বোরে তা কামত্‌ বজানার পরেন্দি তে তার ধর্মগুরু ওইনে তা ঘরত্‌ থেলঅ।

¹³ মীখা কলদে, “এক্কো লেবীয় যেক্কে মর্‌ ধর্মগুরু ওইয়্যে সেক্কে মুই হবর্‌ পাংগে, লগেপ্রভু মরে ভালেদি গুরিবো।”