বিচের গুরিয়্যেগুন 14 - Chakma Bibleশিম্শোনর মোগ্লনা 1 পরেন্দি শিম্শোনে তিম্নায়ত্ গেলঅ, আর সিদু এক্কো পলেষ্টীয় গাবুজ্যে মিলে তা চোগোত্ পড়িলো। 2 সিয়োত্তুন্ ফিরি এইনে তে তা বাপ-মারে কলঅ, “মুই তিম্নায়ত্ এক্কো পলেষ্টীয় মিলে চেই এচ্ছোং; তুমি তা লগে মল্লোই মেলা গুরি দুয়ো।” 3 জোবত্ তা মা-বাবে কলাক্কে, “তঅ কুদুম্মোগুনো ভিদিরেত্তুন্ বা আমা বেক্ জাদ্তুনোর ভিদিরেত্তুন্ কি কনঅ মিলে নেই, মোগ্ লবাত্তে তত্তুন্ সুন্নত ন-গোজ্যে পলেষ্টীয়গুনো ইদু যাহ্ পুরিবো?” মাত্তর্ শিম্শোনে তা বাবরে কলঅ, “না, মত্তেই তারে তুমি দুয়ো। তারে মুই বেই লোইয়োং।” 4 তা মা-বাবে বুঝি ন-পারন্, এ ঘটনাগান্ লগেপ্রভুরত্তুন্ ওইয়্যে, কিত্যে তে পলেষ্টীয়গুনোর বিরুদ্ধে যুদ্ধো গুরিবাত্তে এক্কান সুযোগ তগার্। সে সময়োত্ পলেষ্টীয়গুনে ইস্রায়েলীয়গুনোরে শাজন্ গুরিদাক্। 5 সে পরেন্দি শিম্শোনে তা মা-বাবঅ লগে তিম্নায়ত্ গেলঅ। তিম্নায়ত্ আংগুর খেত্তানির কায়-কুরে যাদে ন-যাদে আদিক্ক্যেগুরি এক্কো দামারা সিংহ গুজুরি গুজুরি শিম্শোনর ইন্দি উজেই এলঅ। 6 সেক্কে লগেপ্রভুর আত্মাগানে তা উগুরে ভর্পুণোং বলান্দোই এলঅ, সেনত্তেই তে সে সিংহবোরে সুদো আঢ্তোই ছাগল ছঅ ধোক্ক্যেন্ গুরি ছিনি ফেলেল। মাত্তর্ তে কি গোজ্যে সিয়েন তা মা-বাবরে ন-জানেল। 7 সে পরেন্দি তে সে মিলেবো ইদু যেইনে তা লগে কধা কলঅ আহ্ মিলেবোরে তাত্তুন্ গম্ লাগিলো। 8 ইয়েনর্ কয়েকদিন পরেন্দি তে সে মিলেবোরে লবাত্তে তিম্নায়ত্ গেলঅ। যেবার্ পদথ্ তে সে সিংহবোর্ মরাকিয়্যেগানরে চেবাত্তে এক্কেনা গুরিনেই গেলঅ। তে সিংহবোর্ কিয়্যেগান ভিদিরে এক ঝাগ্ মুয়ো পুক্ আর কিজু মধু দেগিলো। 9 তে দ্বিআঢন্দি সে মধুগান তুলিনে খাদে খাদে গেলঅ। সে পরেন্দি তে মা-বাবঅ ইদু যেইনে তারারেয়ো সে মধুগান দিলো আর তারায়ো সিয়েন খেলাক্। মাত্তর্ সে মধুগান যে সিংহবোর্ মরাকিয়্যেগান ভিদিরেত্তুন্ নেযেয়্যে সিয়েন তারারে ন-কলঅ। 10 পরেন্দি শিম্শোনর বাপ্পো মিলেবোরে চেবাত্তে গেলঅ। সেক্কে শিম্শোনে সিয়েনত্ এক্কো খানার যুক্কোল্ গুরিলো যিবে নূয়ো জামেয়ুনে সচরাসর্ গুরিদাক্। 11 শিম্শোনে সিয়েনত্ লুমোনার পরেন্দি পলেষ্টীয়গুনে তারে তিরিশজন সমাজ্যে দিলাক্। 12 শিম্শোনে সেই সমাজ্যেগুনোরে কলদে, “মুই তমারে এক্কান ভানা ধরং। তুমি পরবর্ এ সাত দিনো ভিদিরে যুনি ইয়েনর জোব্পান দি পারঅ সালে মুই তমারে ত্রিশ্চান মসীনার আত্কাবড় আর তিরিশ জড়া কাবড় দিম্। 13 মাত্তর্ তুমি যুনি সিয়েন ন-পারঅ সালে তুমি মরে ত্রিশ্চান মসীনার আত্কাবড় আর ত্রিশ জড়া কাবড় দিবে।” 14 শিম্শোনে কলঅ্, “পেদুগত্তুন্ এলঅ আজল্ খানা, বোলীত্তুন্ এলঅ মিদে।” তিন দিন সং তার্ এ ভানাগানর জোব্পান তারা দি ন-পারিলাক্। 15 সাত দিনোত্ তারা যেইনে শিম্শোন মোক্কোরে কলাক্, “তঅ নেক্কোরে বুজেনে কঅ যেনে তে এ ভানাগানর জোব্পান আমারে কোই দে। সিয়েন ন-অলে আমি তমারে আহ্ তঅ বাবঅ গিরির্ মানুচ্চুনোরে পড়িনে মারে ফেলেবং। আমারে নাধা গুরিবাত্তেই তুই আমারে ইয়েনত্ বাত্যেয়োজ্, নয় নি?” 16 শিম্শোনর মোক্কো সেক্কে শিম্শোন ইদু কানি কানি কলদে, “তুই মরে বানা ঘিনেচ্স্যে, কোচ্ ন-পাচ্। তুই মঅ মানুচ্চুনোরে এক্কান ভানা দুয়োচ্ অদচ সিয়েনর জোব্পান মরে কোই ন-দুয়োচ্।” জোবত্ শিম্শোনে কলঅ, “মঅ মা-বাবরেয়ো মুই সিয়েনর জোব্ ন-দুয়োং, সালে তরে কিত্তেই মুই সিয়েন কবাত্তে যেম্?” 17 পরবর্ সাপ্তাবোর শেজ্ দিন্নো সং তা মোক্কো তাইদু কানাকুদি গুরিলো। যেরেন্দি সাত দিনোত্ শিম্শোনে তা মোক্কোরে সিয়েন কলঅ, কিত্তেই ইয়েনত্তে তে তারে অমহদ তোস্যে লাগেইয়্যে। তা মোক্কো সেক্কে সে ভানাগানর জোব্পান তা মানুচ্চুনোরে কোই দিলো। 18 সাত দিনোর দিন্নোত্ বেলান্ ডুবিবার আগেন্দি আদামর সে মানুচ্চুনে শিম্শোনরে কলাক্, “মধুত্তুন বেশ্ মিদে কি? আর সিংহত্তুন বেশ্ বোলী কন্না?” শিম্শোনে তারারে কলঅ, “মঅ ছর্মাগোরুগুন্দোই যুনি তুমি চাজ্ ন-গুরিবা সালে তুমি এ ভানাগানর জোব্পান দি ন-পারিদা।” 19 ইয়েনর্ পরেন্দি লগেপ্রভুর আত্মাগান পুরো বলান্দোই শিম্শোনর উগুরে এলঅ। তে অস্কিলোনত্ যেইনে সে জাগার তিরিশজন মান্জ্যরে মারে ফেলেনে তারার্ বেক্কানি লুদেই নেযেল আর তারার কাবড়-চুগোড়ানি লোইনে যিগুনে তা ভানাগানর জোব্পান দুয়োন তারারে দিলো। সে পরেন্দি তে রাগে ফুলি উদিনে তা বাবঅ্ ঘরত্ গেলঅ। 20 সেক্কে তা সমাজ্যেগুনো ভিদিরেত্তুন্ তা দাংগুবো আঢত্ তা মোক্কোরে তুলি দিয়্যে অলঅ। |
Copyright © 2021 Bangladesh Bible Society
Bangladesh Bible Society