বিচের গুরিয়্যেগুন 12 - Chakma Bibleযিপ্তহ আর ইফ্রয়িম 1 পরেন্দি ইফ্রয়িম-গুট্টির মানুচ্চুনে তারার সৈন্যগুনোরে ডাগি নেযেইনে গাঙান্ পার্ ওইনে সাফোনোত্ গেলাক্। সিদু তারা যিপ্তহরে কলাক্, “অম্মোনীয়গুনোর লগে যুদ্ধো গুরিবাত্তে তঅ লগে যেবাত্তে কিত্তেই তুই আমারে ন-ডাগচ্? আমি তঅ সমারে তঅ ঘরান পুড়ি ফেলেই দিবোং।” 2 জোবত্ যিপ্তহ কলঅ, “মুই মর্ মানুচ্চুনোরে নিইনে অম্মোনীয়গুনোর লগে অমহদ যুদ্ধো কামত্ এলুং। মুই তমারে ডাক্কোং মাত্তর্ তুমি তারা আঢত্তুন মরে রোক্ষ্যে ন-গরঅ। 3 মুই যেক্কে দেগিলুং তুমি মরে বল্ ন-দিবা সেক্কে মুই মর্ পরাণান আঢত্ লোইনে অম্মোনীয়গুনোর লগে যুদ্ধো গুরিবাত্তে গেলুং আর লগেপ্রভুয়ো মরে তারা উগুরে ঝিদেই দিলো। ইক্কিনে কিত্তেই তুমি মঅ লগে যুদ্ধো গুরিবাত্তে এচ্ছো?” 4 যিপ্তহ সেক্কে গিলিয়দর বেক্ মানুচ্চুনোরে ডাগিনে এগত্তর্ গুরিনে ইফ্রয়িমর মানুচ্চুনোর বিরুদ্ধে যুদ্ধো গুরিলো, কিত্যে ইফ্রয়িম-গুট্টির মানুচ্চুনে কোইয়োন, “ও গিলিয়দীয়গুন, তুমি দঅ ইফ্রয়িম আর মনঃশি-গুট্টির দল ছাড়ি এচ্চ্যে মানুচ্।” সে যুদ্ধোত্ গিলিয়দীয়গুনে তারারে ওদেই দিলাক্। 5 যর্দন গাঙর্ যে জাগায়ানি আদিনে পার্ ওই ইফ্রয়িম চাগালার ইন্দি যাহ্ যায় সে জাগায়ানি গিলিয়দীয়গুনে গজক্ গুরি নিলাক। ইফ্রয়িম-গুট্টির বাঁজি থেইয়্যে কনঅ মানুচ্ যেক্কেনে কদাক্, “মরে পার্ অবাত্তে দে,” সেক্কে গিলিয়দর মানুচ্চুনে তারে পুযোর গুরিদাক্, তুই কি ইফ্রয়িমীয়? জোবত্ তে যুনি কদঅ, “না,” 6 মাত্তর্ তারা কদাক্, “গম্ ওইয়্যে, সালে কদে চাং, ‘শিব্বোলেৎ।’” কধাগান গমেডালে সে ঘেচ্চারা গুরি ন-পারিনে যুনি তে কইদে, “ছিব্বোলেৎ,” সালে তারা তারে ধুরিনে যর্দন গাঙানর সে আদিনেই পার্ ওয়োন্দে জাগানত্ মারে ফেলেদাক্। ইঙিরিনেই সে অক্তত্ বিয়াল্লিশ আজার ইফ্রয়িমরে মারে ফেলা ওইয়্যে। 7 গিলিয়দীয় যিপ্তহ ছঅ বজর সং ইস্রায়েলীয়গুনোর শাজন্গুরিয়্যে এলঅ। তে মুরি যানার পরেন্দি তারে গিলিয়দর এক্কান আদামত্ গোর্ দিয়্যে অলঅ। ইব্সন, এলোন আর অব্দোন 8 যিপ্তহর পরেন্দি ইস্রায়েলীয়গুনোর শাজন্গুরিয়্যে অলঅ বৈৎলেহম আদামর ইব্সন। 9 তার তিরিশশো পূঅ আর তিরিশশো ঝি এলাক্। তে নিজো গুট্টির্ বারেন্দি তা ঝিগুনোরে বৌ দিলো আর অন্য গুট্টিত্তুন্ তা পূঅগুনোর বৌ ইজেবে তিরিশশো গাবুজ্যে মিলে আনিলো। ইব্সনে সাত বজর সং ইস্রায়েলীয়গুনোর শাজন্গুরিয়্যে এলঅ। 10 পরেন্দি ইব্সনে মুরি যানার পরেন্দি তারে বৈৎলেহমত্ গোর্ দিয়্যে অলঅ। 11 ইব্সনর পরেন্দি সবূলূন-গুট্টির এলোনে দশ বজর সং ইস্রায়েলীয়গুনোর শাজন্গুরিয়্যে এলঅ। 12 তে মুরি যানার পরেন্দি সবূলূন চাগালার্ অয়ালোনত্ তারে গোর্ দিয়্যে অলঅ। 13 এলোনর্ পরেন্দি পিরিয়াথোনর হিল্লেলর পূঅ অব্দোনে ইস্রায়েলীয়গুনোর শাজন্গুরিয়্যে ওইয়্যে। 14 তার চোল্লিশশো পূঅ আর তিরিশশো নাদিন্ এলাক্। তারা সত্তুরবো গাধাত্ চড়িনে বেড়েদাক্। অব্দোনে আস্তো বজর সং ইস্রায়েলীয়গুনোর শাজন্গুরিয়্যে এলঅ। 15 অব্দোনে মুরি যানার পরেন্দি অমালেকীয়গুনোর মুড়ো-মুড়ির চাগালার ভিদিরেন্দি ইফ্রয়িম চাগালার পিরিয়াথোনত্ তারে গোর্ দিয়্যে অলঅ। |
Copyright © 2021 Bangladesh Bible Society
Bangladesh Bible Society