বিচের গুরিয়্যেগুন 11 - Chakma Bible1 সে অক্তত্ গিলিয়দীয় যিপ্তহ জদবদে বোলী যোদ্ধা এলঅ। তা মাবো অলঅ এক্কো হাঙি মিলে আর তার বাবঅ নাঙান্ এলদে গিলিয়দ। 2 গিলিয়দর নিজো মোক্কোর্ কয়েক্কো পূঅ এলাক্। তারা দাঙর্ ওইনে যিপ্তহরে ইয়েন কোইনে ধাবেই দিলাক্, “তুই আমা গিরির্ সোম্বোত্তির ভাগ্ ন-পেবে, কিয়া তুই অলদে সাদাঙা পূঅ।” 3 সেনত্তেই যিপ্তহ তার ভেইয়ুনোত্তুন ধেই যেইনে টোব দেজত্ বজত্তি গরা ধুরিলো। সিদু কুদুক্কুন বজং মানুচ্ তার্ চেরোকিত্তে এইনে এগত্তর্ অলাক্ আর তা সমারে ঘুরোঘুরি গরা ধুরিলাক্। 4-5 ইয়েনর্ কয়েকদিন পরেন্দি যেক্কে অম্মোনীয়গুনে ইস্রায়েলীয়গুনোর বিরুদ্ধে যুদ্ধো গুরিবাত্তে এলাক্ সেক্কে গিলিয়দর বুড়ো নেতাগুনে টোব দেজত্তুন যিপ্তহরে আনিবাত্তে গেলাক্। 6 তারা কলাক্, “আমি অম্মোনীয়গুনোর লগে যুদ্ধো গুরিবোং, সেনত্তেই তুই এইনে আমা সেনাপতি অগি।” 7 যিপ্তহ তারারে কলঅ, তুমি কি পিজুং গুরিনে মরে মঅ বাবঅ ঘরত্তুন্ ধাবেই ন-দুয়ো? ইক্কিনে দযাত্ পড়িনে কিত্তেই মইদু এচ্ছো? 8 গিলিয়দর বুড়ো নেতাগুনে তারে কলাক্, “মাত্তর্ ইক্কিনে আমি তমা ইদু ফিরি এচ্চ্যেই যেনে তুই আমা লগে যেইনে অম্মোনীয়গুনো লগে যুদ্ধো গরচ্। সেক্কে তুই গিলিয়দত্ বজত্তিগুরিয়্যে আমার বেক্কুনোর নেতা অবে।” 9 জোবত্ যিপ্তহ কলঅ, “আচ্ছা, অম্মোনীয়গুনোর বিরুদ্ধে যুদ্ধো গুরিবাত্তে তুমি মরে ফিরেই নেযেলা আর লগেপ্রভুয়ো মঅ আঢত্ তারারে তুলি দিলো; সালে সেক্কে কি হামাক্কাই মুই তমার্ শাজন্গুরিয়্যে ওম্?” 10 গিলিয়দর বুড়ো নেতাগুনে জোবত্ কলাক্, “লগেপ্রভু আমার সাক্ষী রলঅ্, তুই যিয়েনি কলে আমি সিয়েনি গুরিবোং।” 11 সেক্কে যিপ্তহ গিলিয়দর বুড়ো নেতাগুনোর লগে গেলঅ আহ্ মানুচ্চুনে তারে তারার শাজন্গুরিয়্যে আর সেনাপতি বানেল। তে মিস্পাতদ যেইনে লগেপ্রভুর মুজুঙোত্ সেই বেক্ কধানি কলঅ। 12 ইয়েনর্ পরেন্দি যিপ্তহ মানুচ্ পাদেইনে অম্মোনীয় রাজাবোরে এ কধাগান পুযোর্ গুরিলো, “তল্লোই মর্ এন্ কি ওইয়্যেদে যিয়েনত্তে তুই মর্ দেজ্চানরে আক্রমণ গুরিবাত্তে এচ্ছোস্?” 13 অম্মোনীয় রাজা যিপ্তহর পাদেয়্যে মানুচ্চুনোরে কলঅ, “ইস্রায়েলীয়গুনে মিসর দেজত্তুন্ নিগিলি এইনে যর্দন গাঙর্ পাড়্ ধুরিনে অর্ণোন গাঙত্তুন যব্বোক গাঙ্ সং মর্ বেক্ জাগায়ান গজক্ গুরি নেযেয়োন। ইক্কিনে গমেডালে সিয়েনি ফিরেই দে।” 14-15 অম্মোনীয় রাজাবো ইদু যিপ্তহ আরঅ মানুচ্ পাদেইনে এই কধাগান কলঅ, “যিপ্তহ কোইয়্যেদে, ইস্রায়েলীয়গুনে মোয়াব বা অম্মোনীয়গুনোর দেজ্চান গজক্ ন-গরন্। 16 মিসরত্তুন্ নিগিলি এজানার পরেন্দি ইস্রায়েলীয়গুনে ধূল্যে-চর চাগালার ভিদিরেন্দি লোহিত সাগরান সং যেইয়োন আর সে পরেন্দি কাদেশত্ যেইয়োন। 17 সে পরেন্দি ইস্রায়েলীয়গুনে ইদোমর রাজার ইদু মানুচ্ পাধেইনে কোই পাদেলাক্, ‘তঅ দেজর ভিদিরেন্দি যেবাত্তে আমারে উগুম্ দে।’ মাত্তর্ ইদোমর রাজাবো সে কধালোই কান ন-পাদিলো। তারা মোয়াবর রাজার ইদুয়ো মানুচ্ পাদেয়োন মাত্তর্ তেয়ো রাজী ন-অয়। সেনত্তেই ইস্রায়েলীয়গুনে কাদেশত্ থেলাক্। 18 সে পরেন্দি তারা ধূল্যে-চর চাগালার ভিদিরেন্দি যেইনে ইদোম আর মোয়াব দেজ্চান ঘুরিনে মোয়াব দেজর পূগেন্দি যেইনে অর্ণোন গাঙর্ উই পারন্দি তাম্বুলান ফেলেয়োন। তারা মোয়াব দেজত্ ন-চমন্, কিয়া অর্ণোন গাঙান্ এলদে মোয়াব দেজর ধুজি। 19 সে পরেন্দি ইস্রায়েলীয়গুনে ইমোরীয়গুনোর রাজা সীহোন, যিবে হিষ্বোনত্তুন রাজগিরি গুরিদো, তাইদু মানুচ্ দিইনে কোই পাদেল, ‘আমা দেজত্ যেবাত্তে তঅ দেজর ভিদিরেন্দি আমারে যেবাত্তে দে।’ 20 মাত্তর্ সীহোন ইস্রায়েলীয়গুনোরে বিশ্বেজ্ ন-গুরিনে তা দেজর ভিদিরেন্দি তারারে যেবাত্তে উগুম্ ন-দিলো। তে তার্ বেক্ মানুচ্চুনোরে এগত্তর্ গুরিনে যহসত্ তাম্বুলান্ ফেলেল আর ইস্রায়েলীয়গুনো সমারে যুদ্ধো গুরিলো। 21 সেক্কে ইস্রায়েলীয়গুনোর গোজেন লগেপ্রভু ইস্রায়েলীয়গুনোর আঢত্ সীহোন আর তার বেক মানুচ্চুনোরে তুলি দিলো আর সেক্কে তারা তারারে ওদেই দিলাক্। সে দেজত্ বজত্তি গুরিয়্যে বেক্ ইমোরীয়গুনোর জাগায়ানি ইস্রায়েলীয়গুনে গজক্ গুরি নেযেলাক্। 22 তারা অর্ণোনত্তুন্ যব্বোক সং আর ধূল্যে-চর চাগালাত্তুন যর্দন সং ইমোরীয়গুনোর বেক জাগায়ানি গজক্ গুরি নেযেলাক্। 23 ইস্রায়েলীয়গুনোর গোজেন লগেপ্রভু যেক্কে তার মানুচ্ ইস্রায়েলীয়গুনোর মুজুঙেত্তুন্ ইমোরীয়গুনোরে ধাবেই দিলো সেক্কে কি সিয়েন ফিরেই নেযেবার্ খেমতাগান্ তর্ আঘে? 24 তর্ কমোশ-দেবেদাবো তরে যিয়েন গজক্ গুরিবাত্তে দিয়্যে সিয়েন কি তঅ আন্দারে নেই? ঠিগ্ সেধোক্কেন্গুরি আমার্ গোজেন লগেপ্রভু আমা মুজুঙেত্তুন্ যিগুনোরে ধাবেই দিয়্যে আমি তারার জাগায়ানি গজক্ গুরি আগিই। 25 তুই কি মোয়াবর রাজা সিপ্পোরর পূঅ বালাকত্তুনঅ বেশ্ গম্? তে দঅ কনদিনঅ ইস্রায়েলর লগে কোল্-কোজ্যে বা যুদ্ধো ন-গরে। 26 এচ্চ্যে তিনশত্ বজর ধুরিনে ইস্রায়েলীয়গুনে হিষ্বোনত্ আর অরোয়র শঅ্র আহ্ তারার কায়-কুরে আদামানি আর অর্ণোন গাঙর্ পাড়ত্ বেক্ আদামানিত্ বজত্তি গুরি এত্তন্। সেক্কেনে তুই সিয়েনি কিত্তেই আরঅ গজক্ গুরি ন-নেযাচ্? 27 এ পৌইদ্যেনে মুই তঅ উগুরে কনঅ অন্যেয় ন-গরং, বরং মঅ বিরুদ্ধে যুদ্ধো গুরিনে তুয়ই মঅ উগুরে অন্যেয় গোজ্যচ্। বিচেরর গিরোজ্ লগেপ্রভু ইক্কিনে ইস্রায়েলীয় আর অম্মোনীয়গুনো ভিদিরে বিচের্ গুরিবো।” 28 মাত্তর্ যিপ্তহর পাদেয়্যে এ হবরান্ অম্মোনর রাজা কান ন-পাদিলো। 29 সেক্কে লগেপ্রভুর আত্মাগান যিপ্তহ উগুরে এলঅ। সেক্কে যিপ্তহ গিলিয়দ আর মনঃশি চাগালার ভিদিরেন্দি যেইনে গিলিয়দর মিস্পীতদ্ এলঅ আর সিয়েনত্তুন অম্মোনীয়গুনোর বিরুদ্ধে উজেই গেলঅ। 30-31 যিপ্তহ ইয়েন কোইনে লগেপ্রভুর ইদু এক্কান তবনা গুরিলো, “তুই যুনি মঅ আদত্ অম্মোনীয়গুনোরে তুলি দুয়োচ্ সালে অম্মোনীয়গুনোর লগে যুদ্ধোত্ জিদিনেই ফিরি এবার সময়োত্ যে মরে আগ্বারেই নিবাত্তে ঘরত্তুন্ দোরোর বারেন্দি এবঅ তেয়ই লগেপ্রভুর অবঅ। তারে দিইনে মুই এক্কান পুজ্যে-উৎসর্বর অনুষ্ঠান গুরিম্।” 32 ইয়েনর্ পরেন্দি যিপ্তহ অম্মোনীয়গুনোর লগে যুদ্ধো গুরিবাত্তে গেলঅ আহ্ লগেপ্রভু তা আদত্ অম্মোনীয়গুনোরে তুলি দিলো। 33 তে অরোয়রত্তুন মিন্নীতর কায়-কুরে আবেল-করামীম সং কুড়িগান শঅ্র আর আদামর মানুচ্চুনোরে অমহদ পিদিনেই মারে ফেলেল। ইঙিরিনেই ইস্রায়েলীয়গুনে অম্মোনীয়গুনোরে দোঙেলাক্। 34 যিপ্তহ যেক্কে মিস্পাতদ্ নিজো ঘরত্ ফিরি এলঅ সেক্কে যে তারে আগ্বারেই নিবাত্তে এলঅ তে অলদে তা নিজোর্ ঝিবো। তে ঝোঞ্জনীর্ তালে তালে নাজি নাজি এজের্। তে অলদে যিপ্তহর বানা এক্কো ঝি, আর এ ঝিবো বাদে তার অন্য কনঅ পূঅ বা ঝি ন-এলঅ। 35 যিপ্তহ ঝিবোরে দেগিনেই তা কাবড়ান ফাদি ফেলেল, “ হায় হায়, মঅ ঝিবো, তুই ইয়েন কি অবস্থা গুরিলে! তুই মরে অমহদ দযাত্ ফেলেলে, কিত্তেই মুই লগেপ্রভুর ইদু এন্ এক্কান তবনা গোজ্যং যিয়েন মর্ পক্ষে ভাঙানা সম্ভব নয়।” 36 জোবত্ ঝিবো কলঅ, “বাবা, তুই লগেপ্রভুরে কধা দুয়োচ্। সেনত্তেই তঅ কধা মজিম্ মঅ উগুরে যিয়েন গুরিবার সিয়েনই গর্, কিত্যে লগেপ্রভু তরে তর্ শত্রু অম্মোনীয়গুনো উগুরে হেনা সুঝিবাত্তে কোইয়্যে।” 37 সে পরেন্দি তে কলঅ, “সালে মর্ এক্কান কোজোলী রাগেচ্। মুই দঅ পূঅ ফুদেই ন-পারিম; সেনত্তেই মুড়োই-মুড়োই ঘুরিনে সমাজ্যেগুনো সমারে আবিলেচ্ খেই খেই বেড়েবাত্তে মরে দ্বিমাস সময় দে।” 38 যিপ্তহ কলঅ, “যাগোই, মা।” ইয়েন কোইনে তে তারে দ্বিমাজত্তে বিদেয় দিলো। সেক্কে তে আর অন্য মিলেগুনে মুড়োই-মুড়োই ঘুরিনে আবিলেচ্ গরা ধুরিলাক্, কিত্যে তে কনদিনঅ পূঅ ফুদেই ন-পারিবো। 39 দ্বিমাস বিদি যানার পরেন্দি তে তার বাবঅ ইদু ফিরি এলঅ। যিপ্তহ লগেপ্রভুর ইদু যিয়েনি তবনা গোজ্যে তে তার ঝিবো উগুরে সিয়েনই গুরিলো। ঝিবো গাবুজ্যে অক্তত্ মুরি গেলঅ। এ ঘটনাগানত্তুন্ ইস্রায়েলীয়গুনো ভিদিরে এক্কান্ সুধোম্ চালু ওই গেলঅ। 40 গিলিয়দীয় যিপ্তহর ঝিবোর কধা ইধোত্ তুলিনেই আবিলেচ্ গুরিবাত্তে ইস্রায়েলীয় গাবুজ্যে মিলেগুনে পত্তি বজর চের্ দিনোত্তে ঘরত্তুন্ নিগিলিনে বারে যেদাক্। |
Copyright © 2021 Bangladesh Bible Society
Bangladesh Bible Society