বিচের গুরিয়্যেগুন 1 - Chakma Bibleবাদ্বাগী কনানীয়গুনো সমারে যুদ্ধো 1 যিহোশূয়র মরাণার পরেন্দি ইস্রায়েলীয়গুনে লগেপ্রভুরে পূযোর্ গুরিলাক্, “আমা পক্ষেন্দি কনানীয়গুনো সমার যুদ্ধো গুরিবাত্তে পত্তমে কন্না যেবঅ।” 2 জোবত্ লগেপ্রভু কলদে, “পত্তমে যেবাক্ যিহূদা-গুট্টির্ মানুচ্চুনে; মুই তারার্ আঢত্ দেজ্চান তুলি দুয়োং।” 3 এ কধাগান শুনিনে যিহূদা-গুট্টির মানুচ্চুনে তারার্ ভেই শিমিয়োন-গুট্টির মানুচ্চুনোরে কলাক্, “যে জাগায়ান আমা ভাগত্ পোজ্যে সিদুগোর্ কনানীয়গুনোর বিরুদ্ধে যুদ্ধো গুরিবাত্তে তুমি আমা লগে এজঅ, আরঅ আমিয়ো তমা জাগায়ানি কারি লবাত্তে তমা সমারে যেবং।” সেক্কে শিমিয়োন-গুট্টির মানুচ্চুনে তারা সমারে গেলাক্। 4 যিহূদা-গুট্টির্ মানুচ্চুনে আক্রমণ গুরিলে লগেপ্রভু তারার্ আঢত্ কনানীয় আরঅ পরিষীয়গুনোরে তুলি দিলো। তারার্ দশ আজার জনরে তারা বেষক শঅরত্ মারেই ফেলেলাক্। 5 সিয়েনত তারা অদোনী-বেষকরে দেগিনেই তা সমারে যুদ্ধো গুরিলাক্ আরঅ কনানীয় আর পরিষীয়গুনোরে ওদেই দিলাক্। 6 অদোনী-বেষকে যেক্কে ধেই যার্ সেক্কে তারা তারে লোড়েইনে ধুরিধারাই তার আঢ্ আর টেঙর্ বুজ্যে আঙুল্লো কাবি ফেলেলাক্। 7 সেক্কে অদোনী-বেষকে কলঅ, “মুই সত্তুরজন রাজার আঢ্ আর টেঙর্ বুজ্যে আঙুলুন্ কাবি দুয়োং। তারা মঅ টেবিলোর তলেত্তুন ফেলাসেলানি তোগেনেই খেদাক্। মুই তারা উগুরে যিয়েনি গোজ্যং গোজেনেয়ো মঅ উগুরে সেধোক্কেন্ গুরিলো।” পরেন্দি তারা অদোনী-বেষকরে যিরূশালেমত্ নেযানার পরেন্দি তে সিদু মুরি গেলঅ। 8 যিহূদা-গুট্টির মানুচ্চুনে যিরূশালেমান্ আক্রমণ গুরিনে সিয়েন কারি নেযেলাক্। তারা শঅরর্ মানুচ্চুনোরে মারে ফেলেইনে শঅরানত্ আগুন বাজেই দিলাক্। 9 ইয়েনর্ পরেন্দি তারা অজল্ মুড়ো-মুড়ির চাগালাত্, নেগেভ আর তলে মুড়ো-মুড়ির্ চাগালার্ আদাম্মে কনানীয়গুনো সমারে যুদ্ধো গুরিবাত্তে গেলাক্।। 10 হিব্রোণর আদাম্মে কনানীয়গুনোর বিরুদ্ধে উজেই যেইনে তারা শেশয়, অহীমান আরঅ তল্ময়রে ওদেই দিলাক্। হিব্রোণর আগর্ নাঙান্ এলদে কিরিয়ৎ-অর্ব। 11 সিয়েনত্তুন তারা দবীর শঅরর্ মানুচ্চুনোর বিরুদ্ধে উজেই গেলাক্।। দবীরর পুরোণ নাঙান্ এলদে কিরিয়ৎ-সেফর। 12 কালেবে কলদে, “যে মানুচ্চো কিরিয়ৎ-সেফরান্ আক্রমণ গুরিনে কারি নেযেই পারিবো তা সমারে মুই মঅ ঝিবো অক্ষাররে বৌ দিম্।” 13 এই কধাগান্ শুনিনে কনষর বংশধর কালেবর চিগোন্ ভেইবো অৎনীয়েলে সিয়েন কারি নেযেল। সেনত্তেই কালেবে তার ঝি অক্ষাররে অৎনীয়েল সমারে বৌ দিলো। 14 অৎনীয়েলর ইদু যানার পরেন্দি অক্ষা তারে হাত্যেই দিয়্যে ধুরিলো যেনে তে তা বাবত্তুন্ এক্কান্ ভূই ভাগত্ পায়। পরেন্দি অক্ষা গাধার্ পিদিত্তুন্ লামানার পরেন্দি কালেবে তারে পুযোর্ গুরিলো, “মা, তুই কি চাজ্।” 15 অক্ষা কলঅ, “বাবা, তুই মর্ এক্কান্ কধা রাগেচ্। তুই মরে যেক্কে নেগেভত্ জাগা দুয়োচ্ সালে পয়নালাগুন্অ মরে দে।” এ কধাগান শুনিনে কালেবে তারে সিদুগোর্ অজল্ আর তলে জাগানর পয়নালাগুন্অ দিলো। 16 মোশি শোরোর্ গুট্টিগুনে, যিগুনে জাদে কেনীয় এলাক্, তারা খাজোর্-শঅরত্তুন্ নিগিলিনে অরাদ চাগালার দোগিণে যিহূদা-গুট্টির কোরোল্যে-ভূইয়োর্ চাগালাত্ গেলাক্। আর সিদুগোর্ মানুচ্চুনো সমারে থেই গেলাক্। 17 যিহূদা-গুট্টির মানুচ্চুনে তারার্ ভেই শিমিয়োন-গুট্টির মানুচ্চুনো সমারে যেইনে সফাৎ শঅরর্ আদাম্মে কনানীয়গুনোরে আক্রমণ গুরিলাক্ আর তারার্ শঅর্রান এক্কুবারে চোইদেল্ গুরি দিলাক্। সেনত্তেই শঅরানর নাঙান্ দিয়্যে অলঅ হর্মা (যিয়েনর্ ভেদ্তান্ চোইদেল্)। 18 যিহূদা-গুট্টির মানুচ্চুনে গাজা, অস্কিলোন আর ইক্রোণ শঅর আর সিয়েনির কায়-কুরে জাগানি গজক্ গুরি নেযেলাক্। 19 লগেপ্রভু যিহূদা-গুট্টির মানুচ্চুনো সমারে এলঅ। তারা মুড়ো-মুড়ি চাগালাগানি গজক্ গুরি নেযেয়োন ঠিগ্, মাত্তর্ সংজাগাত্তুন মানুচ্চুনোরে ধাবেই দি ন-পারন্, কিত্যে তারার্ লুয়োর্ রথ এলঅ। 20 মোশির এগেম্ মজিম্ কালেবরে হিব্রোণ শঅরান দিয়্যে অলঅ। অনাকর তিন্নো পূঅরে কালেবে হিব্রোণত্তুন্ ধাবেই দিয়্যে। 21 মাত্তর্ বিন্যামীন-গুট্টির মানুচ্চুনে যিরূশালেমত্ বজত্তিগুরিয়্যে যিবূষীয়গুনোর জাগানি গজক্ ন-গরন্। বিন্যামীন-গুট্টি সমারে যিবূষীয়গুনে এজঅ সং আদাম বানি আগন্। 22 যোষেফর গুট্টিগুনে বৈথেল শঅরান্ আক্রমণ গুরিবাত্তে গেলাক্। লগেপ্রভু তারা সমারে এলঅ। 23 তারা শঅরান গমেডালে চেই এবাত্তেই সিদু কয়েক্কো মানুচ্ পাধেই দিলাক্। বৈথেলর পুরোণ নাঙান্ এলদে লূস। 24 সেই মানুচ্চুনে শঅরত্তুন এক্কো মান্জ্যরে নিগিলি এত্তে দেগিনে তারে কলাক্, “শঅরত্ চোমেবার পথ্তান্ তুই আমারে দেগেই দে, সালে আমি তর্ কনঅ ক্ষেতি ন-গুরিবোং।” 25 তে তারারে পথ্তান্ দেগেই দেনার পরেন্দি তারা যেইনে শঅরর্ মানুচ্চুনোরে মারে ফেলেলাক্, মাত্তর্ সে মানুচ্চো আর তার বংশর মানুচ্চুনোরে মাব্ দিলাক্। 26 ইয়েনর্ পরেন্দি সে মানুচ্চো হিত্তীয়গুনোর দেজত্ যেইনে এক্কান শঅর বানেল আর সিয়েনর নাঙান্ দিলো লূস। এজঅ শঅরানর সেই নাঙান্ আঘে। 27 মনঃশি-গুট্টির মানুচ্চুনে বৈৎ-শান, তানক, দোর, যিব্লিয়ম আর মগিদ্দো শঅরর আর সিয়েনর চেরোকিত্তে আদাম্মেগুনোরে ধাবেই দি ন-পারন্, কিত্যে এ জাগায়ানর কনানীয়গুনে ঠিগ্ গোজ্যন্দে, তারা সে দেজ্চান ছাড়িনে ন-যেবাক্। 28 ইস্রায়েলীয়গুনে যেক্কেনে খেমতাবলা ওই উদিলাক সেক্কে তারা সেই বেক্ মানুচ্চুনোরে তারার্ চাগর্ অবাত্তে বাধ্য গুরিলাক্ মাত্তর্ তারারে এক্কুবারে ধাবেই ন-দিলাক্। 29 ইফ্রয়িম-গুট্টির মানুচ্চুনেয়ো গেষরত্তুন্ কনানীয়গুনোরে নিগিলেই ন-দুয়োন্। তারা সিদু তারা ভিদিরে থেই গেলাক্। 30 সবূলূন-গুট্টির মানুচ্চুনেয়ো কিট্রোণ আর নহলোলত্তুন্ কনানীয়গুনোরে নিগিলেই ন-দুয়োন্। তারা সিদু তারার্ ভিদিরে থেই গেলাক্, মাত্তর্ সবূলূন-গুট্টির মানুচ্চুনে তারার্ চাগর্ বানেবাত্তে বাধ্য গুরিলাক্। 31 আশের-গুট্টির মানুচ্চুনেয়ো অক্কো, সীদোন, অহলব, অক্ষীব, হেল্বা, অফীক আর রহোবর মানুচ্চুনোরে ধাবেই ন-দুয়োন্। 32 তারা সে দেজর্ আদাম্মে কনানীয়গুনো সমারে বজত্তি গরা ধুরিলাক্, কিত্যে তারা তারারে নিগিলেই ন-দুয়োন্। 33 নপ্তালি-গুট্টির মানুচ্চুনেয়ো বৈৎ-শেমশ আর বৈৎ-অনাতর মানুচ্চুনোরে ধাবেই ন-দুয়োন; তারা সে জাগার কনানীয় মানুচ্চুনো সমারে বজত্তি গরা ধোজ্যন্ আর তারার চাগর্ অবাত্তে বাধ্য গুরিলাক্। 34 ইমোরীয়গুনে দান-গুট্টির মানুচ্চুনোরে মুড়ো-মুড়ি চাগালাত্ আক্সোই রাগেলাক্; সংজাগাত্ তারারে লামিবাত্তেই ন-দিলাক্। 35 ইমোরীয়গুনে হেরস মুড়ো, অয়ালোন আর শাল্বীমোত্ থেবাক্ বিলিনেই ঠিগ্ গুরিলাক্; মাত্তর্ যোষেফর বংশর মানুচ্চুনোর বল্ যেক্কে বাড়িলো সেক্কে তারা ইমোরীয়গুনোরে চাগর অবাত্তে বাধ্য গুরিলাক্। 36 অক্রব্বীম নাঙে উদি যেইয়্যে পথ্তানত্তুন্ ধুরি সেলা অবলান্দি সং এলঅ ইমোরীয়গুনোর চাগালা। |
Copyright © 2021 Bangladesh Bible Society
Bangladesh Bible Society