যাকোব 5 - Chakma Bible

তাগোয়্যে মানুচ্চুনোত্যে উজিয়ার কধা

¹ তাগোয়্যে মানুচ্চুন্, তুমি শুনো। তমা উগুরে যে দুঘ্‌কানি এজের্ সিয়েনিত্যে কানঅ আর আবিলেচ্ গরঅ।

² তমা ধনানি বর্‌বাদ্ ওই যেয়্যে আর তমা কাবড়-চুগোড়ানি পুগে কাপ্প্যন্।

³ তমা সনা আর রূবোনিত্ জাঙারে ধোজ্জ্যে, আর সেই জাঙারানিয়ে তমা বিরুদ্ধে সাক্ষি দিবো আর আগুনো ধোক্ক্যেন গুরি তমা য়েরানি হেই ফেলেব। এই শেজ্ দিনুনোত্ তুমি ধন-সোম্বোত্তি থুবেইয়ো।

⁴ তমা খেদত্ যে কাম গুরিয়্যেগুনে ফসল কাপ্প্যন্ তুমি তারারে বেতন ন-দুয়ো; আর চঅ, সেই বেতনুনে ইক্কিনে রঅ ছাড়িনে তমারে দুষি বানাদন্। বেগত্তুন্ খেমতাবলা প্রভুর কানত্ সেই কাম গুরিয়্যেগুনোর রঅ ছাড়ানাগানি লুম্মেগোই।

⁵ এই পিত্‌থিমীত্ তুমি ভারী আরামে দিন কাদেয়ো আর বে-ইজেবি গুরি চলর্। মুরিবার দিন্নোত্যে তুমি নিজোরে বানা তাজা গোজ্জ্য।

⁶ তুমি নিদ্দুজিগুনোরে দুযি গোজ্জ্য আর মারে ফেল্ল্য, আর তারা তমারে মানা ন-গরন্।

দুঘোত্ ধৈর্য্য ধরঅ

⁷ ইয়েনত্যে ভেইলগ্, যেদ্ক বিলোন সং প্রভু ন-এজে সেদ্ক বিলোন সং ধৈর্য্য ধুরিনে বেক্কানি সোজ্জ্য গরঅ। খেদর্ মংগা ফসলত্যে চাজ্ গুরিয়্যেবো কেধোক্ক্যেন গুরিনে বাজ্জেই থায় আর পত্তম আর শেজ্ বারিজেবোত্যে ধৈয্য ধরে, সিয়েন দেক্ক্য?

⁸ তুমিয়ো সেধোক্ক্যেন গুরিনে ধৈয্য ধরঅ আর মনানি থির্ রাগঅ, কিয়া প্রভু যাদিমাদি এজের্।

⁹ ভেইলগ্, গোজেনে যেন তমারে দুষ্ ন-ধরে ইয়েনত্যে তুমি একজন আরেকজনরে দুষ ন-দুয়ো। চঅ, বিচের গুরিয়্যেবো দোরান কায়কুরে লুম্মেগি।

¹⁰ ভেইলগ্, যে ভাববাদীগুনে প্রভুর পক্ষ ওইনে কধা কোইয়োন, দুঘোত্ তারা কেধোক্ক্যেন গুরিনে ধৈয্য ধুরিদাক্ সেই কধাগান চিন্তে গুরি চঅ।

¹¹ যিগুনে ধৈয্য ধুরিনে সোজ্জ্য গোজ্জ্যন তারারে আমি বর্ পেইয়্যে কোই। তুমি ইয়োবর্ ধৈয্যর্ কধা শুন্ন্য আর প্রভুর কামর শেজ্ ফল যে গম সিয়েন্‌অ দেক্ক্য। প্রভুর দোয়্যে আর মেয়্যের্ শেজ্ নেই।

¹² মর্ ভেইয়ুন্, মুই বিশেজ্ গুরিনে এ কধাগান কং, তুমি স্বর্গ, পিত্‌থিমী বা অন্য কনঅ জিনিজো নাঙে শমক্ ন-হেয়ো। সিয়েনত্তুন্ বরং তমার “অয়,” “অয়” ওক্ আর “নয়,” “নয়”ওক্, যেন তুমি বিচেরর্ দায়ত্ ন-পড়।

বিশ্বেজর্ তবনা

¹³ তমাত্তুন্ কি কেঅ দুঘোত্ ভুগোর্? তে তবনা গোরোক্। কেঅ কি সুগী?

¹⁴ তে নাঙ্ গিনেদে গীদ্ গোক্। কেঅ কি অসুগ্? তে মন্ডলীর আজল্ নেতাগুনোরে দাগোক্। তারা প্রভুর নাঙে তা মাঢাবোত্ তেল্ দিইনে তাত্যেই তবনা গোত্তোক্।

¹⁵ বিশ্বেজ্‌‌বলা তবনাগানে সেই অসুখ্যে মানুচ্চোরে গম গুরিবো; প্রভুই তারে গম গুরিবো। তে যুনি পাপ গুরি থায় সালে গোজেনে তারে ক্ষেমা গুরিবো।

¹⁶ ইয়েনত্যে তুমি একজন আরেকজন ইধু পাপ স্বীগের্ গরঅ আর একজন আরেক জনত্যে তবনা গরঅ, যেন তুমি গম ওই পারঅ। গোজেনর্ আওজ্ মজিম যে চলে তার তবনাগানির্ জোর্ আঘে বিলিনে সিয়েনে ফল দে।

¹⁷ এলিয় আমা ধোক্ক্যেন এক্কো মানুচ্‌ এলঅ। তে কোজোলী গুরিনে তবনা গুরিলো যেন ঝর্ ন-অয়, আর সাড়ে তিন বজর্ দেজত্ ঝর্ ন-অয়।

¹⁸ যেরেদি তে আরঅ তবনা গুরিলো; সেক্কে আগাজত্তুন্ ঝর্ পড়িলো আর মাদিত্ ফসল অলঅ।

¹⁹ মর্ ভেইয়ুন্, তমা ভিদিরে যুনি কেঅ সত্যত্তুন্ দূরোত্ সুরি যায় আর তমাত্তুন্ কেঅ তারে ফিরেই আনঅ,

²⁰ মাত্তর্ এ কধাগান ইদোত্ রাগেয়ো-যুনি কেঅ এক্কো পাপীরে ভুল্ পধত্তুন্ ফিরেই আনে সালে তে তারে মরণত্তুন্ বাজেল আর বোউত্ পাপ নাঢি রাগায়।