যাকোব 4 - Chakma Bible

গোজেন অধীনোত্ থাগঅ

¹ তমা ভিদিরে কোল্-কোজ্যে আর মারামারি কুত্তুন্ এজে? যেদক্কানি কামনা-বাসনা তমা কিয়্যে ভিদিরে যুদ্ধো গরে সে ভিদিরেত্তুন্ কি সিয়েনি নিগিলি ন-এজে?

² তুমি আশা গরঅ মাত্তর্ ন-পঅ, তুমি খুন্ গরঅ আর লুভ্ গরঅ, মাত্তর্ যিয়েনি চঅ সিয়েনি ন-পঅ। তুমি কোল্-কোজ্যে আর মারামারি গরঅ তো তমার কিচ্চু ন-থায়, কিয়া তুমি গোজেনত্তুন্ ন-মাগঅ।

³ তুমি মাগিনেয়ো ন-পঅ, কিয়া তুমি ভান্ন্যেই উদ্দেশ্যে মাগি থাগঅ, যেন তমার কামনা-বাসনা ঈল্ অয়।

⁴ অবিশ্বেজি-মানুচ্চুন্! তুমি কি কোই ন-পারঅ, জগদর্ দাংগু অনা মানে গোজেনর্ শত্রু অনা? সেনত্যে যে কেঅ জগদর্ দাংগু অবার্ আওজ্ গরে তে নিজোরে গোজেনর্ শত্রু বানায়।

⁵ তুমি কি মনে গরঅ যে, পবিত্র বোইবো মিজে মিজে এ কধাগান কয় যে, পবিত্র আত্মা, যিয়েনরে গোজেনে আমা মন ভিদিরে দিয়্যে, তে আমাত্তুন্ ভোক্তি পেবাত্যে আওজ্ গুরিনে বাজ্জেই আঘে?

⁶ মাত্তর্ গোজেনর্ দোয়্যেগান আরঅ বেশ্। সেনত্যে বোইবোত্ লেগা আঘে, “গোজেনে বার্‌বো গুনোর্ বিরুদ্ধে থিয়্যেই, মাত্তর্ নম্রগুনোরে দোয়্যে গরে।”

⁷ ইয়েনত্যে গোজেনর্ অধীনোত্ থাগঅ। শদান বিরুদ্ধে দরমর গুরি থাগঅ, সালে তে তমাত্তুন্ ধেই যেবঅ।

⁸ গোজেন ইধু উজেই যঅ, সালে তেয়ো তমা ইন্দি উজেই এবঅ। পাপীগুন্, তুমি নিজোরে সাব্ গরঅ। দ্বিমনা মানুচ্চুন, তমা মনানি খাটি গরঅ।

⁹ দুঘে ভাঙি পরঅ আর আবিলেচ্ গুরিনে কানঅ। তমা আজানার্ বদলে আবিলেচ্ গরঅ আর হুজীর বদলে দুঘ্ গরঅ।

¹⁰ প্রভুর মুজুঙোত্ নিজোরে তলে গরঅ, সালে তেয়ই তমারে তুলি ধুরিবো।

¹¹ ভেইলগ্, তুমি একজন আরেকজনরে নিন্দে ন-গোজ্জ্য। যে কেঅ ভেইয়ো বিরুদ্ধে কধা কয় বা ভেইয়ো দুষ্ তগায় তে রীদি-সুদোম বিরুদ্ধে কধা কয় আর রীদি-সুদোমর্ দুষ্ তোগেইনে বেড়ায়। যুনি তুই রীদি-সুদোমর্ দুষ্ তোগেইনে বেড়াচ্ সালে দঅ তুই সিয়েন ন-পালর্ বরং সিয়েনর বিচের গরর্।

¹² বানা এক্কো আঘে যিবে রীদি-সুদোম দে আর বিচের্ গরে। তেয়ই বাজেই পারে আর ভস্ত গুরি পারে। তুই কন্না যে তর্ পাড়াল্ল্যেগুনোর্ দুষ্‌চানি তোগেইনে বেড়র্?

¹³ তমাত্তুন্ কেঅ কেঅ কোই থান্, “এচ্চ্যে বা কেল্ল্যে আমি অমুক্ শঅরত্ যেইনে এক বজর্ কাদেবং আর সিধু বেবসা গুরিনে লাভ্ গুরিবোং।”

¹⁴ মাত্তর্ এজেত্তে কেল্ল্যে কি অবঅ সিয়েন তুমি কোই ন-পারঅ। তমা জিংকানিগানি বা কি? তুমি দঅ ভাব(ধূমো) ধোক্ক্যেন, যিয়েন খানক্‌কনত্যে থায় আর সে পরেদি মিলেই যায়।

¹⁵ তাত্তুন্ বরং তমার এ কধাগান্ কনা উজিত্, “প্রভু যুনি আওজ্ গরে সালে আমি বাঁজি থেবং আর ইয়েন বা উবোন্ গুরিবোং।”

¹⁶ সিয়েনর্ বদলে দেগা যাত্তে, তুমি ভারী দেমাগী আর বার্‌বোলোই ভরা। এবাবোত্যে বেক্‌ দেমাগ্‌কানি ভান্ন্যেই।

¹⁷ সালে দেগা যায়, গম কাম গুরিবার্ কধা কোই পারিনেয়ো যে সিয়েন ন-গরে তে পাপ গরে।