যাকোব 3 - Chakma Bible

জিলান পৌইদ্যেনে উজিয়ার অ

¹ মর্ ভেইয়ুন্, তমাত্তুন্ বেক্কুনে মাষ্টর অবাত্যে ন-যেয়ো, কিয়া তুমি দঅ কোই পারঅ, আমি মাষ্টর্ বিলিনে অন্যগুনোত্তুন্ আমারে আরঅ দরমর গুরি বিচের্ গরা অবঅ।

² আমি বেক্কুনে নানান্ ধগে অন্যেয় গুরি থেই। যুনি কেঅ কধালোই অন্যেয় ন-গরে সালে তে নিদ্দুজি; তার্ পুরো কিয়্যেগানরে তে সামেলেই পারে।

³ ঘোড়াবোরে কামত্ লাগেবাত্যে আমি তা মুয়োনত্ দুড়ি বানি দিই, আর সেক্কে তারে যিধু মনে কয় সিধু চালেই নি পারিই।

⁴ আরঅ চঅ, জাহাজ্‌চান যুনিয়ো বোউত্ দাঙর্ আর জোরে বৈয়্যেরানে সিয়েন ঠিলিনে নেযায় তো বানা চিগোন্ এক্কান পাঙেইলোই নাবিক্কো সিয়েনরে যিন্দি মনে কয় সিন্দি নেযেই পারে।

⁵ জিলান সেধোক্ক্যেন্; কিয়্যেগানর্ এক্কান চিগোন জিনিস্ অলেয়ো সিয়েনে বোউত্ দাঙর্ দাঙর্ কধা কয়। আরঅ সামান্য এক্কেনা গুরি আগুনে কেধোক্ক্যেন গুরি এক্কান দাঙর্ ঝাররে পুড়ি ফেলেই পারে!

⁶ সেধোক্ক্যেন জিলান্অ ঠিগ্ আগুনো ধোক্ক্যেন। আমা কিয়্যেগানিত্ যেদক্কানি জিনিস্ আঘে সিয়েনি ভিদিরে জিলান্ যেন এক্কান ভান্ন্যেয়র্ দুনিয়া। নরগর্ আগুনোত্ জুলি উদিনে তে গোদা কিয়্যেগানরে বর্‌বাদ্ গরে আর জিংকানি-পধত্ আগুন ধোরেই দে।

⁷ মানুচ্ নানান্ বাবোত্যে য়েমান, পেক্, বুগেদি-আঢি বেড়েয়্যে প্রাণি আর সাগর প্রাণিরে দোঙেই রাগেই পারন্ আর রাগেয়োন্,

⁸ মাত্তর্ কনঅ মানুচ্‌ জিলানরে দোঙেই রাগেই ন-পারন্। সিয়েন থির্ নেইয়্যে আর ভান্ন্যেই আহ্ দর্‌গরেপারা বিষে ভরা।

⁹ এ জিলান্‌দোই আমি আমার প্রভুর্, অত্তাৎ বাবা গোজেনর্ বাঈনী গুরিই, আরঅ এ জিলান্দোই তা ধোক্ক্যেন গুরি বানেয়্যে মানুচ্চুনোরে অভিশাব্ দিই।

¹⁰ আমা একই মুয়োদি বাঈনী গরানা আর অভিশাব্ নিগিলি এজে। মর্ ভেইয়ুন্, এবাবোত্যে অনা উচিত্ নয়।

¹¹ একই জাগাত্তুন্ নিগিলি এচ্চ্যে গঙার ভিদিরে কি একই সময়োত্ মিধে আর তিদে পানি থায়?

¹² মর্ ভেইয়ুন্, ডোমোর্ গাজত্ কি জলপাই ধরে? বা আংগুর লুদিত্ কি ডোমোর্ ধরে? সেবাবোত্যে গুরি নুন্‌যো পানিত্ মিধে পানি পাহ্ ন-যায়।

দ্বিবাবোত্যে জ্ঞান পৌইদ্যেনে

¹³ তমা ভিদিরে জ্ঞানী আর বুদ্ধিবলা কন্না? তে তার্ সৎ জিংকানিলোই জ্ঞানত্তুন্ নিগিলি এচ্চ্যে নম্রতাগান্দোই কাম দেগোক্।

¹⁴ মাত্তর্ তমা রিবেঙানি যুুদি ইংসেলোই ভুরি উদে আর নিজো লুভে ভরা থায় সালে জ্ঞানর্ দেমাগ্ ন-দেগেয়ো, সত্যগানরে মিজে ন-বানেয়ো।

¹⁵ এবাবোত্যে জ্ঞান স্বর্গত্তুন্ লামি ন-এজে, বরং পিত্‌থিমীর্, ভান্ন্যেই আওজর্ আর ভান্ন্যেই আত্মাগুনো সমারে তার্ উদোন্ বজন্;

¹⁶ কিয়া যিয়েনত্ ইংসে আর নিজোর্ লুভ থায় সিয়েনত্ কাঙেলেত্যে আর নানান্ বাবোত্যে অন্যেয় থায়।

¹⁷ মাত্তর্ যে জ্ঞানান্ স্বর্গত্তুন্ এজে সিয়েন পত্তমে খাটি, সে পরেদি শান্তিলোই ভরা; সিয়েনত্ থায় সোজ্জ্যগুণ্ আর নম্রতা; সিয়েন দোয়্যে আর গম কামত্ ভরা, থির্ আর ভন্ডামী-নেইয়্যে।

¹⁸ যিগুনে শান্তির্ চেষ্টা গরন্ তারা শান্তিয়ে বীজি ফেলান আর সিয়েনর্ ফল অলঅ সৎ জিংকানি।