যাকোব 1 - Chakma Bible

¹ মুই গোজেন আর প্রভু যীশু খ্রীষ্টর চাগর্ যাকোব পিত্‌থিমীর বেক্‌ জাগানি ইধু ছিদি পোজ্যে যিহূদী জাদর্ বারবো গুট্টির মানুচ্চুনোরে ভালেদি জানাঙর্।

বিশ্বেজিগুনোর্ পোরোক্ষ্যে

² মঅ ভেইয়ুন্, তুমি যেক্কে নানান্ বাবোত্ত্যে পোরোক্ষ্যেত্ পড় সেক্কে সিয়েন ভারী হুজীর বেপার বিলি মনে গোজ্জ্য,

³ কিয়া তুমি কোই পারঅ তমা বিশ্বেজর্ পোরোক্ষ্যেগানে তমারে ধৈয্যগুণ বাড়েই দে।

⁴ সেই ধৈয্যগুণানরে তমা জিংকানিত্ পুরোপুরি গুরিনে কাম গুরিবাত্যে দুয়ো, যেনে তুমি পাগানা আর থুদো নেইয়্যে ওইনে উদি পারঅ, অত্তাৎ তমা খাচ্চ্যদ ভিদিরে যেন কনঅ বাবোত্যে অভাব ন-থায়।

⁵ তমা ভিদিরে যুনি কারঅ জ্ঞানর্ অভাব থায় সালে তে যেন গোজেন ইধু সিয়েন মাগে, আর গোজেনে তারে সিয়েন দিবো, কিয়া তে তোচ্চ্যে ন-পেইনে পত্তিজনরে জদবদে দান গরে।

⁶ সালে কনঅ সন্দেহ ন-গুরিনে তারে বিশ্বেজ্ গুরিনে মাগা পরিবো কিয়া যে সন্দেহ গরে তে বৈয়্যেরত্ ফুলি উঠ্যে সাগর তুবোল ধোক্ক্যেন; বৈয়্যেরানে তারে থেলি নেযায়।

⁷ এবাবোত্যে মানুচ্‌ যে প্রভুত্তুন্ কিজু পেবঅ সিয়েন যেন তে আজা ন-গরে।

⁸ তে দ্বি-মনা মানুচ্‌ আর তার বেক্‌ কামানিত্ থির্ নেইয়্যে।

⁹ যে বিশ্বেজি ভেইবো নাঢা মানুচ্, গোজেনে তারে উগুরে তুল্ল্যে বিলিনে তে নিজোরে ভাগ্যত্যে মনে গোরোক্।

¹⁰ আর যে তাগোয়্যে, গোজেনে তারে চিদে বানেয়্যে বিলিনে তেয়ো নিজোরে ভাগ্যত্যে মনে গোরোক্, কিয়া তে ঘাস ফুলো ধোক্ক্যেন ঝুরি পড়ি যেবঅ।

¹¹ বেলানে যেক্কে জ্বোল্‌‌জোল্ল্যে গরমে উদে সেক্কে সেই ঘাস্‌‌চানি শুগেই যায়, ফুলুন্ ঝুরি যান্ আর সিগুনোর্ দোলান্ বর্‌‌বাদ্ ওই যায়। তাগোয়্যে মানুচ্চোয়ো ঠিগ্ সেবাবোত্যে গুরি তা জিংকানিগান কাম্ গত্তে গত্তে থুম্ ওই যেবঅ।

¹² পোরোক্ষ্যের্ সময়োত্ যে ধৈয্য ধরে তে বর্ পেইয়্যে, কিয়া যগাজ্জ্যে প্রমাণ অলে পরেদি জিদেনার্ মালা ইজেবে তে জিংকানি পেবঅ। গোজেনরে যিগুনে কোচ্‌পান তারারে তে এ জিংকানিগান দিবার এগেম্ গোজ্জ্যে।

¹³ মন ভিদিরে পাপর টানান্ বুঝি পারিলে কেঅ যেন ন-কয়, “গোজেনে মরে পাপ ইন্দি টানের্।” কনঅ ভান্ন্যেইয়ানে গোজেনরে পাপ ইন্দি টানি ন-পারে, আর গোজেনেয়ো কাররে পাপ ইন্দি ন-টানে।

¹⁴ মান্‌জ্যর্ মন ভিদিরে কামনাগানে মান্‌জ্যরে পাপ ইন্দি টানি নেযায় আর ফালত্ ফেলায়।

¹⁵ সে পরেদি কামনা পুরেলে পরেদি পাপর জর্ম অয়, আর পাপ বেশ্ অলে পরেদি মরণর্ জর্ম অয়।

¹⁶ মর্ কোচ্‌‌পেইয়্যে ভেইয়ুন্, ভুল ন-গোজ্জ্য।

¹⁷ জিংকানির্ পত্তি দোল্ জিনিস আর থুদো নেইয়্যে দান স্বর্গত্তুন্ লামি এজে, আর সিয়েন এজে গোজেনত্তুন্, যিবে বেক্‌ পহ্‌রানর্ বাপ্। থির্ নেইয়্যে ছাবা ধোক্ক্যেন গুরি তে বুদুলি ন-যায়।

¹⁸ তা নিজোর্ আওজে সত্য কধানিলোই তে আমারে তার্ পুয়ো বানেয়্যে, যেন তার্ সৃট্টি জিনিজো ভিদিরে আমি এক বাবোত্যে পত্তম ফল ধোক্ক্যেন ওই।

শুনিনে সেবাবোত্যে গুরি কাম গরঅ

¹⁹ মর্ কোচ্‌‌পেইয়্যে ভেইয়ুন্, মর্ এ কধাগান খিয়েল্ গরঅ-তুমি বেক্কুনে শুনিবাত্যে আওজি অ, মাত্তর্ যাদিমাদি গুরি কধা কবাত্যে ন-যেয়ো বা রাগ ন-গোজ্জ্য;

²⁰ কিয়া গোজেনে আমাত্তুন্ যে গম্ জিংকানি আজা গরে সিয়েন রাগর্ পৌইদ্যেনে ন-এজে।

²¹ ইয়েনত্যে বেক্ ফি-বলাগানি আর যেদক্কানি বজং জিনিস এজঅ তমা জিংকানিত্ আঘে সিয়েনি দূর্ গরঅ। গোজেন কধানির্ বীজ্ যিয়েনি তমা মন ভিদিরে লাগা ওইয়্যে সিয়েনি চিদে ওইনে মানি লঅ। পাপত্তুন্ তমারে উদ্ধোর্ গুরিবার্ খেমতা এ কধানির্ আঘে।

²² বানা গোজেন কধানি শুনিলে ন-চলিবো, সেবাবোত্যে গুরি কাম্‌অ গরা পরিবো। যুনি তুমি বানা গোজেনর্ কধানি শুনো মাত্তর্ সে ধগে কাম্ ন-গরঅ সালে তুমি নিজোরে থগর্।

^23-24 যে বানা সেই কধানি শুনে মাত্তর্ সে ধগে কাম্ ন-গরে তে এমন্‌ মান্‌জ্য ধোক্ক্যেন, যে আনাত্ নিজো চেঙেরাগান্ চেইনে যায়ই আর সেক্কেনে সিয়েন ভুলি যায়।

²⁵ মাত্তর্ যে পুরো সুদোমানে মান্‌জ্যরে স্বাধীনতা দান গরে তা ইন্দি যে গমেডালে রিনি চায় আর মনযোগ দে, তে সেই সুদোমর্ কধা শুনিনে পুরি ন-ফেলায় বরং সে ধগে কাম্‌অ গরে। ফলে তে তার বেক্‌ কামানিত্ বর্ পায়।

²⁶ কেঅ যুনি নিজোরে ধার্মিক মনে গরে অদচ নিজোর্ জিলানরে ন-সামালায় তে নিজোরে থগায়। তার্ ধর্মর্ কামানি মিজে।

²⁷ রানী মিলে আর বাপ্-মা নেইয়্যেগুনোর্ দুঘোত্ তারার্ দেগাশুনো গরানা আর জগদর্ বেক্‌ কাজরানিত্তুন্ নিজোরে সাব্ রাগানা অলঅ বাবা গোজেনর্ চোগেদি খাটি আর সত্য ধর্ম।