যিশাইয় 66 - Chakma Bible

বিচের্ আর আশা

¹ লগেপ্রভু কত্তে, “স্বর্গগান মর্ সিংহাসন আর পিত্‌থিমীগান মর্ টেঙ্ থবার জাগা। তুমি মত্তে কুদু ঘর বানেবা? মর্ জিরেবার জাগায়ান কুদু অবঅ?‌

² ইয়েনি বেক্কানি মুই নিজো আঢে বানেয়োং আর সেনত্তে ইয়েনি ওইয়্যে। যে মানুচ্চো নম্র, যিবের্ মনান্ ভাঙিনে চুর্‌‌মার্ ওইয়্যে আর যে মঅ কধালোই গির্‌‌‌গিরেই তারে মুই গম্ চোগেদি চেম্।

³ মাত্তর্ যে এক্কো গোরু উৎসর্ব গোজ্যে তে যেন মানুচ্ খুন গোজ্যে, যে এক্কো ভেড়া ছঅ উৎসর্ব গোজ্যে তে যেন কুগুরো গত্তনাবো ভাঙি দের্, যে শোজ্য উৎসর্ব গোজ্যে তে যেন শূগোর লো দের্, আর যে মঅ নাঙে আগর্‌বাট্টি জালার্ তে যেন মূত্তি পূজো গরের্। তারা তারার্ নিজো নিজো পথ বেঈ লোইয়োন; তারার ঈচ্ গরেদে পযাপিরানিলোই তারা হুজি অন্।

⁴ সেনত্তে মুইয়ো তারা উগুরে সাজার্ বেবস্থাগান্ বেঈ নেযেম্ আর তারা যিয়েনি দরান্ সিয়েনি তারা উগুরে আনিম, কিত্তে মুই ডাগিলে কনজনে জোব্ ন-দুয়োন, মুই কধা কলে কনজনে ন-শুনোন্। মঅ চোগেদি যিয়েনি ভান্ন্যেই সিয়েনি তারা গোজ্যন্, আর মরে যিগুনে অহুজি গরন সেনত্তে তারা বেঈ লোইয়োন।”

⁵ তুমি যিগুনে লগেপ্রভুর কধালোই গির্‌‌‌‌গিরো তুমি তা কধা শুনো। তে কত্তে, তমা ভেইয়ুনে তমারে ঈচ্ গরন আর মত্তে তমারে বাদ্ দুয়োন। তারা ঠাট্টা গুরিনে কন্, লগেপ্রভুর বাঈনী ওক্, আমি যেন তমার হুজিগান দেগিই। মাত্তর্ তারা নিজে লাজত্ পড়িবাক্।

⁶ শুন, শঅরত্ গন্ডগুল অর্; শুন, উবোসনা-ঘরত্ হৈ চৈ অর্; এইয়্যেদঅ লগেপ্রভুর্ রঅ-তা শত্রুগুনোর যিয়েনি পাওনা তে সিয়েনি দের্।

⁷ “পুয়ো ফুদোনা-পিড়েগান্ উদিবার আগেদি সিয়োনে পুয়োবোর জর্ম দিয়্যে; তার পিড়ে উদিবার আগেদি তে এক্কো পুয়োর জর্ম দিয়্যে।

⁸ কন্না এবাবোত্যে কধা শুন্যে? কন্না এবাবোত্যে ঘটনা দেখ্যে? এক্কান দেশে কি এক দিনে জর্ম নেযেই পারে? বা এক্কো জাদর্ কি এক মুহুর্তে জর্ম নেযেই পারে? মাত্তর্ সিয়োনর পিড়েগান্ উঠ্‌তে ন-উঠ্‌তে তে তা পুয়োবোর জর্ম দিয়্যে।

⁹ মুই তর্ গোজেন লগেপ্রভু কঙর্, ‘জর্মর মুহূর্ত সং উজেই নেযেইনে মুই কি জর্ম দিবাত্তে ন-দিম? মুই যেক্কে জর্ম দিবাত্তে বেবস্থা গোজ্যং সেক্কে কি মুই জর্ম দিবাত্তে ন-দিম?’ ”

¹⁰ তুমি যিগুনে যিরূশালেমানরে কোচ্‌পঅ তুমি তা সমারে ফুত্তি গরঅ, তাত্তে হুজি অ; তুমি যিগুনে তাত্তে দুঘ্ গোজ্য তুমি তা সমারে হুজি অ।‌

¹¹ তুমি বুগো দুধ হেইনে বুঝ্ পেইয়্যে চিগোন গুরো ধোক্ক্যেন যিরূশালেমর্ ভালেদি ভোগ গুরিনে ঈল্ অবঅ।

¹² লগেপ্রভু কত্তে, “মুই তা ইন্দি গাঙ ধোক্ক্যেন গুরি ভালেদি বুয়োই দিম, আর জাদ্‌তুনোর ধন-সোম্বোত্তিগানি তা ইদু বান পানি ধোক্ক্যেন এবঅ। তুমি এবাবোত্যে চিগোন গুরো ধোক্ক্যেন অবা যিবেরে দুধ হেই হেই করত্ গুরি নেযা অয় আর আঢু উগুরে নাজা অয়। ‌‌

¹³ মাবো যেবাবোত্যেগুরি তা পুয়ো-ছাগুনোরে বুঝোয় সেবাবোত্যেগুরি মুই তমারে বুঝেম্; আর তুমি যিরূশালেমত্ বুঝ্ পেবা।”

¹⁴ ইয়েনি দেগিনে তমা মনানি হুজি অবঅ আর তুমি ঘাস ধোক্ক্যেন উদিবে। লগেপ্রভুর চাগরুনে তা খেমতাগান দেগিবাক্, আর তা শত্রুগুনে তা রাগ্‌‌‌‌কান দেগিবাক্।

¹⁵ চঅ, লগেপ্রভু আগুনো ভিদিরেদি এবঅ আর তা রথ্‌‌তানি টুত্যেবোইয়্যের ধোক্ক্যেন এবঅ। তা রাগ্‌কান তে দর্‌‌‌‌‌গরেপারা ফগদাং গুরিবো, আর তা গেইল্ দেনাগান আগুনো জিল্‌‌‌‌‌লোই ফগদাং অবঅ।‌

¹⁶ লগেপ্রভু আগুন আর তলোয়ারলোই বেক্ মানুচ্চুনো উগুরে তা বিচেরর্ কামান চালেব; তে যিগুনোরে মারে ফেলেব তারার্ জনেদি ভালোক্কুন্।

¹⁷ লগেপ্রভু কত্তে, “যিগুনে শূগোর আর উন্দুরো য়েরা আর অন্য জঘন্য জিনিস হান্ আর অনুষ্ঠান-চালেয়্যেবোর্ পিজে পিজে পূজোর বাগানত্ যেবাত্তে দেবেদাগুনো নাঙে যুদো গুরি রাগান আর সিজি গরন্, তারা এক সমারে শেজ্ ওই যেবাক্।

¹⁸ মুই তারার বেক্ কামানি আর কল্পনার কধাগানি হবর্ পাং। বেক্ জাদ ভাষার মানুচ্চুনোরে এগত্তর্ গুরিবার সময় এচ্চ্যে। তারা এইনে মর্ মহিমাগান দেগিবাক্।”

¹⁹ লগেপ্রভু আরঅ কত্তে, “মুই তারা ইদু এক্কান চিহ্নো থিদেবর্ গুরিম আর যিগুনে বাঁজি থেবাক্ তারা ভিদিরেত্তুন্ কয়েকজনরে মুই জাদ্‌তুনো ইদু পাদেম্-তর্শীশ, পূল আর নাঙ্-গোজ্যে ধনুবলা লূদ, তূবল আর গ্রীস ইদু আর যেদক্কানি দূরো দেজ্ মর্ সুনাঙান ন-শুনে আর মর্ মহিমায়ো ন-দেগন্ তারা ইদু পাদেম্। তারা জাদ্‌তুনো ভিদিরে মর্ মহিমার কধাগান ফগদাং গুরিবাক্।‌‌‌‍‌‌‌‍

²⁰ লগেপ্রভুর নাঙে উৎসর্ব ইজেবে তারা বেক্ জাদ ভিদিরেত্তুন্ তমা ভেইয়ুনোর রথ আর গাড়িত্ গুরিনে আর ঘোড়া, গাধা আর উট্‌টোই মর্ সুদ্ধো-সাংগ মুড়ো যিরূশালেমত্ এবাক্। ইস্রায়েলীয়গুনে যেবাবোত্যে সিজি গোজ্যে পিলে ভিদিরে শোজ্য-উৎসর্বর জিনিস আনন্ সেবাবোত্যেগুরি তারা লগেপ্রভুর ঘরত্ তারারে আনিবাক্।

²¹ মুই তারা ভিদিরেত্তুন্ কয়েক জন লেবীয়রে ধর্মগুরু আর সেবাগুরিয়্যে অবাত্তে বেঈ নেযেম।”

²² লগেপ্রভু কত্তে, “যে নূয়ো স্বর্গগান আর নূয়ো পিত্‌‌থিমীগান মুই বানেম্ সিয়েন যেবাবোত্যে মঅ মুজুঙোত্ টিগি থেবঅ সেবাবোত্যে তমা নাঙানি আর তমা বংশধরুনেয়ো টিগি থেবাক্।

²³ পত্তি আঙোচ্চ্যেত্ আর পত্তি জিরেবার দিনোত্ বেক মানুচ্চুনে মঅ মুজুঙোত্ এইনে মরে তবনা গুরিবাক্।

²⁴ তারা নিগিলিনে সেই বেক্ মানুচ্চুনোর মরা কিয়্যেগানি দেগিবাক্ যিগুনে মঅ বিরুদ্ধে উল্লোমী গোজ্যন। যিদুক্কুন পুগে তারার্ মরা কিয়্যেনি হান্ সিগুনে ন-মুরিবাক্ আর যে আগুনানে তারারে পুড়ে সিয়েন ন-মুরিবো, আর তারা বেক্ মানুচ্চুনোর ঈচ্ গরেদে মানুচ্ অবাক্।”