যিশাইয় 63 - Chakma Bible

গোজেনর হেনা সুজিবার দিন

¹ যিবে ইদোমর বস্রাত্তুন্ রাঙা রঙোই রাঙেয়্যে পোজাক্কোই এজের্, তে কন্না? যিবে সয়সাগজ্যে পোজাগে দাঙর্ খেমতালোই উজেই এজের্, তে কন্না? “এইয়্যে মুই, মুই গমেডালে কধা কং, মুই দাঙর্ খেমতালোই উদ্ধোর্ গরং।”

² আংগুর মাড়িবার গাদত্ যে মানুচ্চো আংগুর মাড়ে তা ধোক্ক্যেন তর্ পোজাক্কান রাঙা কিত্তে?

³ “মুই গায় গায় আংগুর মাজ্যং; জাদ্‌তুনো ভিদিরে কনজনে মঅ সমারে ন-এলঅ। মুই অমকদ বেজার্ ওইনে তারা টেঙানিলোই দোল্যং আর রাগে তারা টেঙানিলোই মাজ্যং; তারার লো ফুদোগুন মঅ কাবড়ানিত্ পোজ্যে আর বেক্ কাবড়ানিত্ দাগ্ লাক্যে।‌

⁴ ইক্কিনে উদ্ধোর্ গুরিবার অক্ত এচ্চ্যে; সেনত্তে মুই হেনা সুজিবার যে অক্তবো ঠিগ্ গোজ্যং সিবেয়ো এচ্চ্যে।

⁵ মুই রিনি চেলুং, মাত্তর্ সাহায্যগুরিয়্যে কাররে ন-পেলুং; মুই আমক্ অলুং, কনজনে মরে সাহায্য ন-গুরিলো। সেনত্তে মুই নিজো খেমতালোই উদ্ধোরর্ কামানি গুরিলুং, আর মঅ রাগ্‌কানে মরে উচ্চোমি দিলো। ‌‍

⁶ মুই অমকদ বেজার্ ওইনে জাদ্‌‌‍তুনোরে টেঙোই মারিলুং; মর্ রাগে তারারে মাত্তল মান্‌‌‍জ্য ধোক্ক্যেন গুরিলুং আর মাদিত্ তারার লো-নি ঢালি দিলুং।”

নাঙ্ গিনেনা আর তবনা গরানা

⁷ মুই লগেপ্রভুর্ অমকদ কোচ্‌‌‍পানার কধা কোম্ আর তার বেক্ কামানিত্তে তারে নাঙ্ গিনিম। তার মেয়্যে আর তার অমকদ কোচ্‌পানার কারনে তে ইস্রায়েল জাদত্তে বোউত্ ভালেদির কাম গোজ্যে বিলিনে মুই তারে নাঙ্ গিনিম।‌‍‍‍

⁸ তে কোইয়্যেদে, “ঘেচ্চেকগুরি তারা মঅ মানুচ্, তারা এবাবোত্যে পুয়ো যিগুনে অবিশ্বেজি ন-অবাক্,” আর সেনত্তে তে তারার উদ্ধোর্ গুরিয়্যে অলঅ।

⁹ তারার বেক্ দুঘ্‌‌খানিত্ তেয়ো দুঘ্ পেলঅ আর তার্ হবর্ কোইয়্যেবো তারারে উদ্ধোর্ গুরিলো। তার কোচ্‌পানা আর দোয়্যেই তে তারারে উদ্ধোর্ গুরিলো; আগ কালত্ বেক্ দিনুনোত্ তে তারারে তুলিনে বুয়োই নিলো।‌‍‍‍‌‍‍‍

¹⁰ তো তারা উল্লোমী গুরিনে তা পবিত্র আত্মাগানরে দুঘ্ দিদাক্। সেনত্তে তে ফিরিনে তারার শত্রু অলঅ আর তে নিজে তারার্ বিরুদ্ধে যুদ্ধো গরা ধুরিলো।

¹¹ সেক্কে তা মানুচ্চুনে পুরোনা দিনোর কধা, অত্তাৎ মোশি আর তা মানুচ্চুনোর পুরোণি দিনোর কধা ইদোত্ তুলিলাক্। তারা কলাক্, “যিবে তা মানুচ্চুনোরে আর তারার নেতাগুনোরে সাগর ভিদিরেদি আন্যে, যিবে তারা ভিদিরেদি থেবাত্তে তা পবিত্র আত্মাগানরে দিয়্যে তে কুদু?

¹² যিবে মোশিরে সাহায্য গুরিবাত্তে তার বাঈনী গুরিবার খেমতাবলা মানুচ্চোরে দিয়্যে, যিবে নিজোর সুনাঙান্ উমরর্ গুরিবাত্তে তারা মুজুঙোত্ পানিগানরে দ্বিভাগ গোজ্যে,

¹³ যিবে বড়্ সাগর ভিদিরেদি তারারে নেযেয়্যে তে কুদু? সেনত্তে ধূল্যেচরত্ বেড়েয়্যে ঘোড়া ধোক্ক্যেন তারা উজোত্ ন-হান্।

¹⁴ লগেপ্রভুর আত্মাগান কলগত্ লামি যেইয়্যে য়েমান পাল ধোক্ক্যেন তারারে জিরেবাত্তে দিয়্যে। তার বাঈনী গুরিবার নাঙান থিদেবর্ গুরিবাত্তে তে এবাবোত্যেগুরি তা মানুচ্চুনোরে পরিচালনা গোজ্যে।”

¹⁵ ও লগেপ্রভু, স্বর্গত্তুন, তর্ পবিত্র আর বাঈনী গুরিবার জাগানত্তুন্ তুই রিনি চাহ্। তর্ আওজ্‌চান আর তর্ খেমতাবলা কামানি কুদু? তর্ নরমভাব আর মেয়্যেগানি আমাত্তুন্ তুই সোরেই রাগেয়োচ্।‌

¹⁶ ও লগেপ্রভু, তুই দঅ আমা বাপ্। যুনিয়ো অব্রাহামে আমারে হবর্ ন-পায় বা যাকোবে আমারে স্বিগের্ ন-গরে, তো তুয়ই আমা বাপ্; তুই উমরর্ উদ্ধোর্ গুরিয়্যে-ইয়েনই তর্ নাঙান।

¹⁷ ও লগেপ্রভু, তঅ পথ্‌তান ছাড়িনে কিত্তে আমারে ঘুরি ঘুরি বেড়েবাত্তে দুয়োর্? আমি যেন তরে ভোক্তিবলা ন-দোরেই সেনত্তে কিত্তে তুই আমা মনানি দরমর গরর্? তঅ চাগরুনোত্তে, অত্তাৎ যে গুট্টিগুন তর্ অধিকার, তারাত্তে তুই ফিরি আয়।‌

¹⁸ তর্ সুদ্ধো-সাংগ জাগায়ান কয়েক দিনোত্তে তর্ যুদো গোজ্যে মানুচ্চুনোর আঢত্ এলঅ, মাত্তর্ ইক্কিনে আমা শত্রুগুনে সিয়েন টেঙোই উজ্যন্।

¹⁹ তুই যিগুনো উগুরে কনদিন্অ সদ্দারি ন-গরচ্, যিগুনোরে কনদিন্অ তঅ নাঙে ডাগায়ো ন-অয়, ইক্কিনে আমি তারার্ সং সং ওইয়্যেই।