যিশাইয় 6 - Chakma Bible

যিশাইয় উগুরে কামর্ ভারান্

¹ যে বজরত্ রাজা উষিয় মুরি গেলঅ সে বজরত্ মুই দেগিলুং প্রভু অমকদ অজল্ এক্কান সিংহাসনত্ বজি আঘে। তা রাজ্-পোজাগর্ তলে কট্টাগান্দোই উবোসনা-ঘরান্ ভর্‌পুনোং এলঅ।

² তা উগুরে এলাক্ কয়েক্কো সরাফ; তারার্ এক এক্কোর্ ছগান্ গুরি ডুয়ো এলঅ-দ্বিয়েন্ ডুয়োলোই তারা মুয়োন আর দ্বিয়েন ডুয়োলোই টেঙানি নাঢি রাগেয়োন আর দ্বিয়েন ডুয়োলোই তারা উড়োদন্।

³ তারা একজন আর একজনরে ডাগিনে কদন্, বেগত্তুন্ খেমতাবলা লগেপ্রভু পবিত্র, পবিত্র, পবিত্র; তা মহিমালোই পুরো পিত্‌থিমীগান্ ভর্‌পুনং।

⁴ তারা রবুয়োলোই উবোসনা-ঘরর্ দোরোর্ কব্‌জানি গির্‌গিরে উদিলো আহ্ ঘরান ধূমোলোই ভরপুনং ওই গেলঅ।‌

⁵ সেক্কে মুই কলুং, “হায়, মুই ভস্ত ওই গেলুং, কিত্তে মঅ মুয়োন্ ফিবলা আর মুই এবাবোত্যে মান্‌জ্য ভিদিরে বজত্তি গরং যিগুনোর্ মুয়োনি ফিবলা। মুই নিজো চোগেদি রাজারে, বেগত্তুন্ খেমতাবলা লগেপ্রভুরে দেখ্যং।”

⁶ সেক্কে এক্কো সরাফ আঢত্ এক্কো জোল্‌জোল্যে আঙারালোই মইদু উড়ি এলঅ; আঙারাবো তে পূজোবো উগুরেত্তুন্ চিম্‌টিলোই নেযেল।‌

⁷ সেই আঙারাবো তে মঅ মুয়োনত্ বাজেইনে কলঅ, “চাহ্, ইবে তঅ মুয়োনত্ বাস্যে; তঅ ভান্ন্যেয়ানি দূর্ গরা ওইয়্যে আর তঅ পাপ্‌পানি ফুজি ফেলা ওইয়্যে।” ‌‌

⁸ সে পরেদি মুই প্রভুর্ কধা শুনিলুং। তে কলদে, “মুই কারে পাদেম্? আমা পক্ক ওইনে কন্না যেবঅ?” মুই কলুং, “এইয়্যেদ মুই, তুই মরে পাদা।”

⁹ তে কলঅ, “তুই যেইনে এ মানুচ্চুনোরে কঅ, ‘তুমি শুনোদে থাগঅ মাত্তর্ ন-বুঝ্‌ছো, রিনি চেই থাগঅ মাত্তর্ হবর্ ন-পেয়ো।’ ” ‌‌‌

¹⁰ সে পরেদি তে মরে আরঅ কলঅ, “তুই এ মানুচ্চুনোর্ মনানি বাজে বাবোত্যে গুরি দে, তারার্ কানানি নাঢি দে, আর তারার চোগ্‌‌‌‌‌কুনো নাঢি দে। সিয়েন ন-গুরিলে তারা চোগেদি দেগিবাক্, কানেদি শুনিবাক্, মনেদি বুঝিবাক্ আর পাপত্তুন্ মনানি ফিরেইনে গম্ অবাক্। ”

¹¹ সেক্কে মুই কলুং, “ও প্রভু, আর কয়দিন?” জোবত্ তে কলঅ, “যেদকদিন্ সং শঅরানি ভস্ত ওইনে মানুচ্ নেইয়্যে ন-অন্, ঘরানি খালি ওই ন-যায় আর খেত্-খামারানি ভস্ত আর ছার্‌খার ন-অয়;

¹² যেদকদিন্ সং লগেপ্রভু বেক্কুনোরে দূর্ গুরি ন-দে আর দেজত্ ভালোক্ জাগাত্ মানুচ্ নেইয়্যে অন্।

¹³ যুনি দেজ ভিদিরে দশভাগর্ একভাগ্ মানুচ্‌‌‌‌‌‌অ থান্, তো তারারে পুড়ি ফেলা অবঅ। মাত্তর্ এলোন গাজ্ কাবি ফেলেলেয়ো যেধোক্ক্যেন্ তা গুড়িগানি থায়, সেধোক্ক্যেন্ গুড়ি ইজেবে দেজত্ পবিত্র বীজ ধোক্ক্যেন্ কয়েক্কো মানুচ্ থেবাক্।”