যিশাইয় 52 - Chakma Bible

¹ ও সিয়োনান্, উঠ্, উঠ্, তঅ খেমতাগান ফগদাং গর্। ও সুদ্ধো-সাংগ শঅর্ যিরূশালেম, তর্ জোগ্‌জোগ্যে কাবড়ানি উর্। সুন্নত ন-গোজ্যে আর অসিজি মান্‌জ্যে তঅ ভিদিরে আর্ সোমেই ন-পারিবাক্।‍‍

² ও যিরূশালেম, উঠ্, তুই কিয়্যের্ ধূল্যেগানি ঝাড়ি ফেলেইনে সিংহাসনত্ বজ্। ও বন্দী সিয়োন-ঝি, তঅ গত্তনাবোর বেক্ শিগোলানি খুলি ফেলা।

³ প্রভু লগেপ্রভু কত্তে, “তরে এনেবাদে বেজা ওইয়্যে আরঅ এনেবাদে উদ্ধোর্ গরা অবঅ।

⁴ মঅ মানুচ্চুনে আগে মিসরত্ বজত্তি গুরিবাত্তে যেয়োন্; পরেদি আসিরিয়া এনেবাদে তারা উগুরে অত্যেচার্ গোজ্যে।

⁵ আর ইক্কিনে ইয়েনত্ মর্ কি আঘে? মঅ মানুচ্চুনোরে দঅ এনেবাদে নেযা ওইয়্যে, আর তারার্ শাজন্‌গুরিয়্যেগুনে তারারে গেইল্ দুয়োন্; নিত্য মঅ নাঙানরে ইংসে গরা অয়।

⁶ সেনত্তে মঅ মানুচ্চুনে হবর্ পেবাক্ মুই কন্না; সেদিন্যে তারা হবর্ পেবাক্, মুয়ই কধা কোইয়োং; অয়, মুয়ই কোইয়োং।”

⁷ যে মানুচ্চো গম্ হবর্ দিবাত্তে এজে, সুগ্-শান্দি ফগদাং গরে, ভালেদির হবর্ আনে, উদ্ধোরান্ ফগদাং গরে আর সিয়োনানরে কয়, তঅ গোজেনে রাজাগিরি গরে, মুড়োমুড়ি উগুরেদি এবার্ অক্তত্ সেই মানুচ্চোর টেঙান কেধোক্ক্যেন দেগায়।

⁸ শুন্, তঅ চুগিদারুনে রঅ ছাড়দন্, তারা হুজিয়ে একসমারে কিজিক্ কাজাক্ গরদন্, কিত্তে লগেপ্রভু যেক্কে সিয়োনত্ ফিরি এবঅ সেক্কে তারা নিজো চোগেদি সিয়েনি দেগিবাক্।

⁹ ও যিরূশালেমর ভস্তর্ জাগায়ানি, তুমি একসমারে রঅ ছাড়ি ছাড়ি হুজির্-গীদ্ গঅ, কিত্তে লগেপ্রভু তা মানুচ্চুনোরে বুঝেয়্যে আর যিরূশালেমানরে উদ্ধোর্ গোজ্যে।

¹⁰ লগেপ্রভু বেক্ জাদ্‌তুনোর চোগো মুজুঙোত্ তার পবিত্র খেমতাবলা আঢ্‌‌তান ফগদাং গুরিবো, আর পিত্‌থিমীর বেক মানুচ্চুনে আমা গোজেনর্ উদ্ধোর কামানি দেগিবাক্।

¹¹ তুমি নিগিলি এজঅ, সে জাগানত্তুন্ নিগিলি এজঅ। তুমি কনঅ অসিজি পযাপিরা ন-ধোজ্য। তুমি যিগুনে লগেপ্রভুর পিলেবো বুয়োই নেযর্ তুমি সেই জাগানত্তুন্ নিগিলি এজঅ আর সিজি অ।

¹² মাত্তর্ তুমি যাদিমাদি গুরি নিগিলি ন-এচ্চ্য বা ধেইয়ো ন-এবা, কিত্তে লগেপ্রভু তমা আগে আগে যেবঅ; ইস্রায়েলর গোজেনে তমারে পিজেন্দিত্তুন্ রোক্ষ্যে গুরিবো।

লগেপ্রভুর চাগর্‌বোর দুঘ্ পানা আর বাঈনী গরানা

¹³ লগেপ্রভু কত্তে, “চাহ্, মঅ চাগর্‌বো সফল অবঅ। তারে অজলত্ তুলো অবঅ আর তে বাঈনী আর সন্মান পেবঅ। ‌‌

¹⁴ তা চেঙারাগান আর কিয়্যেগান এদক্ বিশ্রী গুরি দিয়্যে অবঅ, সিয়েন আর কনঅ মান্‌জ্য ধোক্ক্যেন ন-থেবঅ; সেনত্তে ভালোকজনে তারে দেগিলে আমক্ অবাক্।

¹⁵ মাত্তর্ পরেদি তে ভালোক্ জাদর মান্‌জ্যরে শুজি গুরিবো, আর সেনত্তে রাজাগুনে মুয়োনি নাঢি রাগেবাক্, কিত্তে যিয়েনি তারারে কুয়ো ন-অয় সিয়েনি তারা দেগিবাক্, আর যিয়েনি তারা ন-শুনোন্ সিয়েনি তারা বুঝিবাক্।”