যিশাইয় 5 - Chakma Bible

আংগুর খেদর্ গান

¹ মুই যিবেরে কোচ্‌পাং তা নাঙে মুই এক্কো গান গেম্, গান গেম্ তা আংগুর খেদ পৌইদ্যেনে। মুড়োবোত্ এক্কান বোল্-বোল্যে জাগাত্ এলদে মর্ পরাণ্যের্ এক্কান আংগুর খেত।

² তে জাগায়ান্ খুড়িনে বেক্ পাত্তরুন্ তুলি ফেলেল আর সিয়েনত্ লাগেল বেগত্তুন্ গম্ আংগুর লুদি। সিয়েন ভিদিরে বানেল এক্কান অজল্ চুগিদার-ঘর আর আংগুর মাড়িবাত্তে পাত্তর্ কাবিনে ঠিগ্ গুরি নেযেল। সে পরেদি তে সিয়েনত্ গম গম আংগুর ফলত্তে বাজ্জেই থেলঅ, মাত্তর্ সিয়েনত্ ধুরিলাক্ বানা ঝার্ আংগুর।

³ “ও যিরূশালেমর আদাম্মেগুন আর যিহূদার মানুচ্চুন্, ইক্কিনে তুমিই কঅ, ইগুন কি মর্, না মঅ আংগুর খেদ্‌তানর দুষ্?

⁴ মঅ আংগুর খেদ্‌‌তানত্তে মুই যিয়েনি গোজ্যং সিয়েনত্তুন্ বেশ্ আর্ কি গরা যেদঅ? যেক্কে মুই গম্ গম্ আংগুরত্তে বাজ্জেই থেলুং সেক্কে কিত্তে সিয়েনত্ বানা ঝার আংগুর ধুরিলাক্?

⁵ মঅ আংগুর খেদ্‌‌তান উগুরে যিয়েনি গুরিম সিয়েন ইক্কিনে মুই তমারে কোম্: মুই সিয়েনর্ বেড়াগান্ তুলি ফেলেম্ আর সেক্কে ভূইয়ান শেজ্ ওই যেবঅ; মুই সিয়েনর্ দেবালান্ ভাঙি ফেলেম্ আর সেক্কে সিয়েন টেঙোই মাড়া অবঅ।

⁶ মুই সিয়েন এক্কান ভস্তর্ জাগা বানেম্; সিয়েনর্ লুদিগান কাবায়ো ন-অবঅ আর তার ভূইয়ান্‌অ চাজ্ গরা ন-অবঅ, আর সিয়েনত্ জোর্মেব বানা কাদাঝুপ্ আর কাদাগাজ্। মুই মেঘ্‌কানরে উগুম দিম্ যেন তে ঝড়্ ন-পেলায়।”

⁷ বেগত্তুন্ খেমতাবলা লগেপ্রভুর আংগুর খেদ্‌তান অলঅ ইস্রায়েল-বংশর মানুচ্চুন্; আর যিহূদার মানুচ্চুন্ অলাক্ তার হুজি অইদ্যে আংগুর-চারা। তে দোল্ বিচের্ তোগেল মাত্তর্ দেগিলোদে লো ঝড়ানা; তে গমান্ তোগেল মাত্তর্ শুনিলোদে দুঘোর্ কানানি।

মানুচ্চুনোর্ দুঘ্ আর বিচের্

⁸ অভিশাব্ পোরোক্ তমার্, যিগুনে ঘর লগে ঘর আর খেদ লগে খেত্ এগত্তর্ গরর্; যেরেদি অন্যগুনোত্তে কনঅ জাগা ন-থেবঅ, আর তুমি গায় গায় দেজত্ বজত্তি গুরিবা।

⁹ বেগত্তুন্ খেমতাবলা লগেপ্রভু মুই নিজো কানেদি এ কধাগান্ শুন্যং, “ঘেচ্চেকগুরি দাঙর্ দাঙর্ ঘরানি ভস্ত ওই যেবঅ, দোল্ দোল্ বিল্ডিঙানিত্ কনঅ মানুচ্ ন-থেবাক্।

¹⁰ ত্রিশ বিঘা আংগুর খেদত্তুন্ বানা বেইশ্ লিটার আংগুর-রস পাহ্ যেবঅ, আর এজশঅ আশি কেজি বিজ্ ফেলেইনে বানা আদার কেজি শোজ্য জর্মেব।”

¹¹ অভিশাব্ পোড়োক্ সে মানুচ্চুনোর্, যিগুনে মদ হেবাত্তে বেন্যে পোত্যে উদোন্ আর বোউত্ রেত্‌সম্বাগ সং বোইনে আংগুর-রস হান্, যেদক্কন্ সং সিয়েন হেইনে তারা গরম ওই ন-উদোন্।

¹² তারার হানা অক্তত্ থেবদে সুরবাহার আর বীণা, আহ্ থেবদে ঝোন্‌ঝোনি, বাশি আর আংগুর-রস; মাত্তর্ লগেপ্রভুর কাম উগুরে তারার্ কনঅ মনযোগ নেই, তা আঢ কাম উগুরে কনঅ খিয়েল্ নেই।

¹³ সেনত্তে বুদ্ধির্ অভাবে মঅ মানুচ্চুনে অন্য দেজত্ বন্দি ওই থেবাক্। তারার্ মুরুব্বিগুনে পেট্ পরায় মুরিবাক্, আর তারার্ অন্য মানুচ্চুনোর্ বুগ্‌কুন্ পানি তিরেজে শুগেবাক্।‌

¹⁴ সেনত্তে মরন জাগায়ানে তা গত্তনার্ নালীবো পাদাজ্যে গোজ্যে, তা মুয়োন্ অমকদ দাঙর্ গুরিনে আ গোজ্যে। সর্মানি আর সাধারন মান্‌‌জ্যে, কোজ্যে বাজেয়্যে আর রঅ ছাড়িয়্যেগুনে বেক্কুনে সিয়েনত্ লামিবাক্।

¹⁵ অজল্-নিযো বেক্কুনোরে লোঙেই দিয়্যে অবঅ, আর বাড়্‌বো গুরিয়্যেগুনোর্ চোগ্‌কুন তলে লামেই দিয়্যে অবঅ।‌

¹⁶ মাত্তর্ বেগত্তুন্ খেমতাবলা লগেপ্রভু দোল্ বিচের গুরিনে দাঙর্ থেবঅ; পবিত্র গোজেনে তা গমানত্তে পবিত্র বিলিনে ফগদাং অবঅ।

¹⁷ সেক্কে ভেড়াগুনে নিজো খেদত্ যেধোক্ক্যেন্ গুরি চরন্ সেধোক্ক্যেন্ গুরি তাগোয়্যেগুনোর বেক্ ভস্ত ওইয়্যে জাগায়ানিত্ চড়িবাক্, আর বিদেশীগুনে সেই ভস্ত ওইয়্যে জাগায়ানি ভোগ্ গুরিবাক্।

¹⁸ অভিশাব্ পোড়োক্ সেই মানুচ্চুনোর্, যিগুনে ছলনার্ দুড়িলোই ভান্ন্যেয়ানরে টানি আনন্, আর পাপ জিনিস্‌ছানরে টানি আনন্ যেন গোরু গাড়ি দুড়িলোই।

¹⁹ তারা কন্দে, “গোজেন যাদিমাদি গর্; তে যাদিমাদি গুরি তা কামানি গোরোক্ যেন আমি সিয়েনি দেগিই, ইস্রায়েলর সেই পবিত্র মানুচ্চোর্ সল্লাগান্ পুরোণ্ ওক্ যেন আমি সিয়েন হবর্ পেই।”

²⁰ অভিশাব্ পোড়োক্ সেই মানুচ্চুনোর্, যিগুনে ভান্ন্যেয়ানরে গম্ কন্ আর গমানরে কন্ ভান্ন্যেই, যিগুনে পহ্‌রানরে আন্ধার্ আর আন্ধারানরে পহ্‌‌‌‌‌র বিলি মনে গরন্, যিগুনে মিদেগানরে তিদে আর তিদেগানরে মিদে বিলি মনে গরন্।‌‌

²¹ অভিশাব্ পোড়োক্ সেই মানুচ্চুনোর্, যিগুনে নিজো চোগেদি জ্ঞানবলা আর নিজোরে বুদ্ধিবলা বিলিনে মনে গরন্।

²² অভিশাব্ পোড়োক্ সেই মানুচ্চুনোর্, যিগুনে আংগুর-রস হেবার্ অক্তত্ কাবিদ্যং আর মদ মিজেইদ্যে কামত্ কাবিল্,

²³ যিগুনে ঘুষ্ হেইনে দুষিবোরে ইরি দুয়োন্ আর নিদ্দুজোত্তে গম্ বিচের গুরিবাত্তে অস্বিগের্ গরন্।

²⁴ সেনত্তে আগুনো জিলানে যেধোক্ক্যেন্ দার্‌‌‌বো পুড়ি ফেলায় আর আগুনো ভিদিরে শুগুনো ঘাস পুড়ি যায়, সেধোক্ক্যেন্ গুরি তারার্ গড়াগান্ পুযি যেবঅ আর ধূল্যে ধোক্ক্যেন্ তারার্ ফুলুন্ উড়ি যেবাক্; কিত্তে তারা বেগত্তুন্ খেমতাবলা লগেপ্রভুর্ উগুম এলাফেলা গোজ্যন্ আর ইস্রায়েলর সেই পবিত্র মানুচ্চোর্ কধাগানরে টেঙোই ঠেল্যন্।

²⁵ সেনত্তে লগেপ্রভুর রাগ্‌‌কান তা মানুচ্চুনো বিরুদ্ধে জুলি উঠ্যে; তে আঢ্ তুলিনে তারারে আঘাত্ গোজ্যে। মুড়ো-মুড়ি গির্‌‌গিরাদন্ আর মরাকিয়্যেনি পধত্ পেজা কুড়ো ধোক্ক্যেন্ পোজ্যে আঘে। ইয়েনর্ পরেদিয়ো তা রাগ্‌‌কান্ ন-থামায়, তে আঢ্ তুলি রাগেয়্যে।

²⁶ তে দূরো জাদ্‌তুনোত্তে এক্কান বাবতা উড়েব আর পিত্‌থিমীর শেজ্ দুযিত্ সেই মানুচ্চুনোরে ডাগিবো। দেগিবা, তারা যাদিমাদি গুরি দাবা দাবা এবাক্।‌

²⁷ তারা কনজনে বল্‌পোজ্যে ন-অবাক্, উজোত্‌অ ন-হেবাক্; কনজনে ন-ঝুরিবাক্ বা ন-ঘুমেবাক্; তারার্ কমর্-বিজোনিগান খুলি ন-যেবঅ, জদার্ ফিতেনিয়ো ন-ছিনিবো;‌

²⁸ তারার্ সেলুন্ ধারেয়্যে, তারার্ বেক্ ধনুগানিত্ সেল্ লাগেয়্যে আঘে; তারার্ ঘোড়াগুনোর্ টেঙ মুরিগুন্ চোক্‌চোক্যে পাত্তর্ ধোক্ক্যেন্ দরমর, আর তারার্ রথ্‌তানির চাক্কাগুন্ থুঠ্যে বোইয়্যের ধোক্ক্যেন্।‌

²⁹ পাড়ি সিংহ ধোক্ক্যেন্ তারার্ গুজুরোনিগান্; তারা দামাড়া সিংহ ধোক্ক্যেন্ গুজুরিবাক্ আর শিগের্ গুরিবার অক্তত্ গো গো রঅ গুরিবাক্। সে শিগেরুন্ তারা বুয়োই নেযেবাক্; তারা আঢত্তুন্ কনজনে সিগুন রোক্ক্যে গুরি ন-পারিবাক্।

³⁰ সেদিন্যে তারা সাগর গুজুরোনি ধোক্ক্যেন্ গুরি লগেপ্রভু মানুচ্চুনো উগুরে গুজুরি উদিবাক্। কনজনে যুনি সেক্কে দেজ ইন্দি রিনি চায় সালে তে দেগিবোদে আন্ধার আর দুঘ্; এমন কি, পহ্‌রান্অ মেঘে ঢাগিনে আন্ধার্ ওই যেবঅ।