যিশাইয় 45 - Chakma Bible1 লগেপ্রভু তার অভিষেগ্ গোজ্যে মানুচ্ কোরস পৌইদ্যেনে কত্তে, “তা মুজুঙোত্ জাদ্তুনোরে দোঙেবাত্তে আর রাজাগুনোরে বল্পোজ্যে গুরিবাত্তে মুই তার ডেন্ আঢ্তান ধোজ্যং। মুই তা মুজুঙোত্ দোরানি খুলি দিম্ যেনে গেট্তুন বন্ধ ন-থান্।” 2 তে কোরসরে কত্তে, মুই তঅ আগে আগে যেইনে অজল্-নিজো জাগায়ানি সং গুরি দিম; মুই পিদলর্ বেক্ গেট্তুন্ ভাঙি দিম আর লুয়োর্ হেবাগুন্ কাবি ফেলেম। 3 মুই তরে আন্ধার জাগাত্ থোইয়্যে ধন-সোম্বোত্তি আর লুগেয়্যে জাগাত থুবেই থোইয়্যে ধন দিম, যেনে তুই হবর্ পাজ্, মুয়ই লগেপ্রভু, ইস্রায়েলর গোজেন, যিবে তঅ নাঙান্ ধুরিনে ডাগে। 4 মর্ চাগর যাকোবত্তে, মর্ বেঈ থোইয়্যে ইস্রায়েলত্তে মুই তঅ নাঙান্ ধুরি ডাক্ক্যং। মরে তুই ন-চিনিলেয়ো মুই তরে সর্মানর্ উপাধি দুয়োং। 5 মুয়ই লগেপ্রভু, অন্য আর কনজন নেই; মুই বাদে অন্য গোজেন নেই। তুই মরে ন-চিনিলেয়ো মুই তরে বল্ দুয়োং, 6 যেন পূগেত্তুন্ ধুরি পোজিমেদি সং মানুচ্চুনে হবর্ পান্, মুই বাদে আর কনজন নেই। মুয়ই লগেপ্রভু, অন্য আর কনজন নেই। 7 মুয়ই পহ্র আর আন্ধারানরে বানেয়োং; মুয়ই ভালেদি আনং আর সর্বনাশ সৃট্টি গরং। মুই লগেপ্রভু ইয়েনি গুরি থাং। 8 ও আগাজ্ছান, তুই ভালেদি গুরিবাত্তে ঝড় ফেলাচ্; মেঘ্কানে ভালেদি ঢালি দোক্। পিত্থিমীর বুগ্কান খুলি যেইনে উদ্ধোরান ভাজি উদোক্ আর সিয়েন সমারে বাড়ি উদোক্ গম্ জিনিস্চান। মুই লগেপ্রভু ইয়েনর্ বেবস্থা গোজ্যং। 9 অভিশাব্ পোড়োক্ সেই মানুচ্চোর, যে তার গোজেন লগে কোল্-কোজ্যে গরে। তে দঅ মাত্যে পিলেগুনো ভিদিরে এক্কো পিলে বাদে আর কিচ্চু নয়। মাদিগানে কি কুমোর্বো কবঅ, তুই কি বানেয়োচ্? তর্ বানেয়্যে জিনিস্চানে কি কবঅ, তঅ আঢ্তান কাবিল্ নয়? 10 অভিশাব্ পোড়োক সেই মানুচ্চোর্, যে তা বাবরে কয়, তুই কি জর্ম দুয়োচ্? বা তা মাবোরে কয় তুই কি পুদেয়োচ্? 11 “লগেপ্রভু, যিবে ইস্রায়েলর সেই সুদ্ধো-সাংগ মানুচ্, যিবে তারে বানেয়্যে, তে এ কধাগান কোইয়্যে, ‘তুমি কি আগাম্ ঘটনা পৌইদ্যেনে মরে পুযোর্ গরর্? মঅ পুয়ো-ছাগুনো পৌইদ্যেনে বা মঅ আঢ কামানি পৌইদ্যেনে কি মরে উগুম্ দুয়োর্? 12 মুয়ই পিত্থিমীগানরে বানেইনে তা উগুরে মানুচ্চুনোরে বানেয়োং; মুই নিজো আঢে আগাজ্চানরে বিজেই দুয়োং আর আগাজর বেলান্, চানান্ আর তারাগুনোরে বোজেই দুয়োং। 13 মর্ ন্যায্যতালোই মুই কোরসরে উত্তেজিত গুরিম; মুই তার বেক্ পথ্তান উজু গুরিম। তে মর্ শঅরান আরঅ বানেই দিবো, মর্ যে মানুচ্চুনে বন্দী এলাক্ তে তারারে ইরি দিবো মাত্তর্ তে কনঅ দাম বা বক্শিজত্তে সিয়েন ন-গুরিবো।’ বেগত্তুন্ খেমতাবলা লগেপ্রভু এ কধাগান কত্তে।” 14 লগেপ্রভু ইস্রায়েল জাদরে কত্তে, “মিসরর পেইয়্যে সোম্বোত্তিগানি আর কূশর বেবসার পযাপিরানি তইদু এবঅ। লাম্বা লাম্বা সবায়ীয়গুনে নিজে তইদু এবাক্; তারা তর্ অবাক্ আর তঅ পিজে পিজে আঢিবাক্। তারা শিগোল্লোই বান্যে অবস্থায় তইদু এবাক্। তারা তঅ মুজুঙোত্ মাদিত্ মাঢা নিগিরিনে কোজোলি গুরিনে কবাক্, ‘গোজেনে ঘেচ্চেকগুরি তমা সমারে আঘে। বানা এক্কো তেয়ই গোজেন, আর কনঅ গোজেন নেই।’ ” 15 ও ইস্রায়েলর গোজেন আর উদ্ধোরগুরিয়্যেবো, সত্যিই তুই এমন গোজেন যিবে নিজোরে লুগেই থয়। 16 যিগুনে মূত্তি বানান্ তারা বেক্কুনে লাজত্ পড়িবাক্ আর অসর্মান অবাক্; তারা এক সমারে অগমান পেইনে যেবাক্কোই। 17 মাত্তর্ গোজেনে ইস্রায়েলরে উমরত্তে উদ্ধোর্ গুরিবো; তুমি কনঅ কালত্ লাজত্ ন-পুরিবা বা অগমান ন-পেবা। 18 লগেপ্রভু, যিবে দাঙর্ আগাজ্চান বানেয়্যে, তেয়ই গোজেন; যিবে পিত্থিমীগানর আরুগ্ দিয়্যে আর বানেয়্যে, তেয়ই সিয়েন থিদেবর্ গোজ্যে। তে বজত্তি গুরিবার অযোগ্য গুরি পিত্থিমীগান ন-বানায়, বরং মানুচ্চুনে যেনে বজত্তি গুরি পারন্ সেবাবোত্যেগুরি সিয়েন বানেয়্যে। তে কোইয়্যেদে, মুয়ই লগেপ্রভু, আর কনজন নয়। 19 কনঅ আন্ধার দেজর্ কনঅ জাগাত্তুন্ মুই গুমরত্ কধা ন-কং। যাকোবর বংশবোরে মুই ন-কং, তুমি মিজে মিজে মরে ডাগঅ। মুই লগেপ্রভু ন্যায্য কধা কং; যিয়েন ঠিগ্ সিয়েনই ফগদাং গরং। 20 ও অন্য জাদর্ বাঁজি থেইয়্যে মানুচ্চুন্, তুমি এক সমারে এগত্তর্ ওইনে এজঅ। যিগুনে গাজ মূত্তি বুয়োইনে বেড়ান্ আর এবাবোত্যে দেবেদা ইদু তবনা গরন্ যে উদ্ধোর গুরি ন-পারে তারা কিচ্চু হবর্ ন-পান। 21 এজঅ, তমা তপ্পে যিয়েনি কবার্ আঘে সিয়েনি কঅ; তুমি এক সমারে সল্লা গরঅ। এ ঘটনাগানি যে ঘুদিবো সিয়েনি কন্না আগে কোইয়্যে? সেই বোউত্ আগেদি কন্না সিয়েনি ফগদাং গোজ্যে? মুই লগেপ্রভু কি সিয়েনি ন-গরং? মুই বাদে আর কনঅ গোজেন নেই; মুই ন্যায়বলা গোজেন, মুই উদ্ধোরগুরিয়্যে। মুই বাদে আর কনঅ গোজেন নেই। 22 “ও পিত্থিমীর বেক্ শেজ্ দুযিগানি, মইন্দি ফিরো আর উদ্ধোর পহ্, কিত্তে মুয়ই গোজেন, আর কনঅ গোজেন নয়। 23 মুই নিজো নাঙে শমক্ গোজ্যং, মর্ ন্যায্যতালোই মুই এ কধাগান কোইয়োং, আর সিয়েন বাদ্ ন-যেবঅ। সে কধাগান অলঅ, মঅ মুজুঙোত্ বেক্কুনে আঢু পাদিবাক্ আর মর্ অধীনতাগান স্বিগের্ গুরিবাক্। 24 তারা মঅ পৌইদ্যেনে কবাক্, ‘বানা লগেপ্রভু ভিদিরে সততা আর খেমতাগান আঘে।’ মানুচ্চুনে মঅ মুজুঙোত্ এবাক্ আর যিগুনে মঅ উগুরে রাগ্ গুরি আগন তারা লাজত্ পড়িবাক্। 25 মঅ ভিদিরে ইস্রায়েলর বেক বংশগুন নিদ্দুযি বিলি প্রমান অবাক্ আর তারা মরে বাঈনী গুরিবাক্।” |
Copyright © 2021 Bangladesh Bible Society
Bangladesh Bible Society