যিশাইয় 44 - Chakma Bible

বেঈ লোইয়্যে ইস্রায়েল

¹ লগেপ্রভু কত্তে, “ও মঅ চাগর্ যাকোব, মর্ বেঈ লোইয়্যে ইস্রায়েল, তুই ইক্কিনে শুন্।

² লগেপ্রভু, যিবে তরে বানেয়্যে, মা পেদত্ দাঙর্ গোজ্যে আর তরে সাহায্য গুরিবো, তে এ কধাগান কোইয়্যে, ‘ও মর্ চাগর্ যাকোব, মর্ বেঈ লোইয়্যে যিশুরূণ, তুই ন-দোরেস্;

³ কিত্তে মুই মাদি ফাদি যেইয়্যে ভূইয়ো উগুরে পানি ঢালিম আর শুগুনো জাগা উগুরেদি পানি গঙার্ বুয়োই দিম। মুই তঅ পুয়ো-ছাগুনো উগুরে মঅ আত্মাগান ঢালি দিম আর তঅ বংশর মানুচ্চুনোরে বর্ দিম।

⁴ তারা ঘাস উগুরেদি বেঈ যেইয়্যে গঙার পারত্ উইলো গাজ ধোক্ক্যেন ঘাস ভিদিরে গেজেই উদিবাক্।

⁵ একজনে কবঅ, তে লগেপ্রভুর্; আর একজনে যাকোব নাঙে নিজোর্ পরিচয়ান্ দিবো; অন্য আর একজনে নিজো আঢ উগুরে লিগিবো, তে লগেপ্রভুর্, আর তে ইস্রায়েল নাঙান্ মানি লবঅ।’ ”

লগেপ্রভু বানা এক্কো গোজেন

⁶ লগেপ্রভু, যিবে ইস্রায়েলর রাজা আর উদ্ধোরগুরিয়্যে, যিবে বেগত্তুন্ খেমতাবলা লগেপ্রভু, তে এ কধাগান কোইয়্যেদে, “মুয়ই পত্তম আর মুয়ই শেজ্; মুই বাদে আর কনঅ গোজেন নেই।

⁷ সালে মঅ ধোক্ক্যেন আর কন্না আঘে? তে সিয়েন ফগদাং গোরোক্। তে ফগদাং গোরোক আর মরে হোক্, মুই আগ দিনো মানুচ্চুনোরে থিদেবর্ গরানার্ পরেদি কি ঘোট্যে আর কি এজঅ সং ন-ঘদে; অয়, যিয়েন ঘুদিবো তে সিয়েন আগে হোক্।

⁸ তুমি গির্‌‌‌নগিরেয়ো বা ন-দোরেয়ো। মুই কি ভালোক্ দিন আগে ইয়েনি ফগদাং ন-গরং আর ন-জানাং? তুমি মর্ সাক্ষী; মুই বাদে আর কি কনঅ গোজেন আঘে? না, আর কনঅ আশ্রয়-মুড়ো নেই; মুই আর কনজনরে হবর্ ন-পাং‌।”

⁹ যিগুনে খোদাই গোজ্যে মূত্তি বানান্ তারা অপদাত্ত; তারার্ এই দামী জিনিস্‌ছানি উপকারী নয়। সেই মূত্তিগুনোর্ তপ্পে ওইনে যিগুনে কধা কন্ তারা চোগ্ কান্‌, কিচ্চু হবর্ ন-পান্; সেনত্তে তারা লাজত্ পড়িবাক্।‌

¹⁰ কন্না দেবেদা বানেয়্যে আর অপদাত্ত মূত্তি ছাজিনে ঢাল্যে?

¹¹ যিগুনে মূত্তি লগে থান্ তারারে লাজত্ ফেলা অবঅ; তারার কালিগরুনে মানুচ্ বাদে আর্ কিচ্চু নয়। তারা বেক্কুনে এইনে একসমারে থিয়্যেদোক্; তারা দরে গির্‌গিরেবাক্ আর একসমারে অসর্মান অবাক্।‌‌‌

¹² কামার্‌বো এক্কান মিশিন্ নেযায় আর সিয়েন্দোই জোল্ জোল্যে আঙারা ভিদিরে কাম গরে। তে মাত্তুল্লোই মূত্তিবোর সাইজ্‌চান বানায়, আর আঢ বল্লোই সিবে বানায়। সেক্কে তার পেট্ পুরে আর বল্ কুমি যায়; পানি ন-হেইনে তে বল্‌‌পোজ্যে ওই পড়ে।

¹³ গাজ মিস্ত্রী সুদোলোই মাবে আর কলম্বোই নক্‌শা বানাই; তে মিশিন্দোই কাবিনে বানায় আর কমপাস্‌ছোই সিয়েন সাইজ্‌চান ঠিগ্ গরে। তে সিয়েনত্ এক্কো দোল্ মান্‌জ্য সাইজ দে যেন সিবে ঘর ভিদিরে রাগেই পারে।

¹⁴ কনজনে এরস গাজ্ কাবন্, বা অয়ত তর্সা বা এলোন গাজ বেঈ নেযান্। তে ঝার গাজপালা ভিদিরে সিবেরে বাড়িবাত্তে দুয়োন, বা তে ঝাউ গাজ লাগায় আর ঝড়ানে সিবেরে বাড়েই তুলে।

¹⁵ পরেদি সিবে মান্‌জ্যর্ জ্বালাইদ্যে গাজ্ অয়। তে সিবেত্তুন্ কিজু নিইনে আগুন পুয়োই, আরঅ আগুন্ জ্বালেইনে রুটি সেগে, আর এক্কো দেবেদা বানেইনে সিবেরে পুজোয়ো গরে, আরঅ মূত্তি বানেইনে মাদিত্ পড়িনে সিবেরে জু জু জানায়।

¹⁶ তে তক্তার্ এক ভাগ্‌কোই আগুন জ্বালায়, সে পরেদি তে সিয়েন উগুরে তা হানা বানায় আর য়েরা অদ্দেক্ পুড়িনে পেট্ ভুরি হায়; আর আগুন পুয়োইনে তে কয়, “আহা! মুই আগুন পুয়োলুং, আগুনো গরম্ নিলুং।” ‌

¹⁷ বাদবাগি ভাগ্‌কান্দোই তে এক্কো দেবেদা, অত্তাৎ এক্কো মূত্তি বানেইনে আর মাদিত্ মাঢা নিগিড়িনে তারে জু জু গরে আর পূজো গরে। তে তাইদু তবনা গুরিনে কয়, “মরে উদ্ধোর্ গর্; তুয়ই মর্ দেবেদা।”

¹⁸ সেই মানুচ্চুনে কিচ্চু হবর্‌অ ন-পান্, নয়ো বুঝোন্। তারার্ চোগ্‌কুন বন্ধ বিলিনে তারা ন-দেগন্ আর মনানি বন্ধ বিলিনে তারা নয়ো-বুঝোন্।‍

¹⁹ কনজনে এক্কানা চিদেয়ো ন-গরন্; কারর্ জ্ঞান বা বুদ্ধি নেই যে কয়, “মুই ইয়েনর্ এক কট্টালোই আগুন জ্বালেয়োং, সিয়েনর্ আঙারাগুনো উগুরে রুটি সেক্কোং আর য়েরা অদ্দেক্ পুড়ি হেইয়োং। সালে কি ইয়েনর্ বাদ্‌বাগি কট্টাগান্‌দোই মুই ঈচ্ গরেদে জিনিস বানেম? গাজ তক্তাগানরে কি মুই মাদিত্ পড়িনে জু জু জানেম?” ‍‌‍

²⁰ তে ছেই হাইদ্যে ধোক্ক্যেন গুরি কাম্ গরে আর তার ঠগাইদ্যে মনানে তারে দজাত্ ফেলায়। তে নিজোরে উদ্ধোর্ গুরি ন-পারে বা নয়ো কয়, “মঅ ডেন্ আঢর্ এ জিনিস্‌‍‍ছান কি মিজে নয়?”

²¹ “ও যাকোব, ও ইস্রায়েল, তুই ইয়েনি বেক্কানি মনত্ রাগা, কিত্তে তুই মর্ চাগর। মুই তরে বানেয়োং, তুই মর্ চাগর; ও ইস্রায়েল, মুই তরে ভুলি ন-যেম্।

²² মেঘ ধোক্ক্যেন গুরি তর্ বেক অন্যেয়ানি আর বেন্যে মাঢান্ কুয়ো ধোক্ক্যেন গুরি তর্ বেক পাব্‌‍পানি মুই দূর্ গুরি দুয়োং। তুই মইদু ফিরি আয়, কিত্তে মুয়ই তরে উদ্ধোর্ গোজ্যং।” ‍‍

²³ ও আগাজ্‌চান, হুজিয়ে গিদ্ গাহ্, ‍‍ কিত্তে লগেপ্রভু ইয়েন গোজ্যে। ও পিত্‌থিমীর গভিন্ জাগায়ানি, জয় ধুনি দে।‍‍‍ ও মুড়ো-মুড়িগুন্, ও ঝার্ আর সিয়েনর গাজ্-বাজ্‌চুন্, তুমি হুজিয়ে-গানে ফুত্তি গরঅ, কিত্তে লগেপ্রভু যাকোবরে উদ্ধোর্ গোজ্যে আর ইস্রায়েলর্ মাধ্যমে তার বাঈনী গরানা ফগদাং গুরিবো।

কোরসরে নিইনে লগেপ্রভুর্ পরিকল্পনা

²⁴ লগেপ্রভু, যিবে তর্ উদ্ধোরগুরিয়্যে, যিবে তরে পেদত্ দাঙর্ গোজ্যে তে কোইয়্যেদে, “মুই লগেপ্রভু; মুয়ই বেক্কানি বানেয়োং। মুই গায় গায় আগাজ্‌‌চানরে বিজেই দুয়োং আর নিজেই পিত্‌থিমীগানরে মেলি দুয়োং।‌

²⁵ ভন্ড ভাবভাদীগুনোর্ চিহ্নোগানি মুই বিফল গুরি দুয়োং আর গণক্ক্যেগুনোরে ভুল-বেদমা বানাং। মুই জ্ঞানীগুনোর শিক্ষ্যেগানি বিফল গুরিনে সিয়েনি ভুল-বেদমাগুনোর্ শিক্ষ্যে বানাং।‌

²⁶ মাত্তর্ মুই মঅ চাগরুনোর কধানি সফল্ অবাত্তে দুয়োং আর মঅ দূত্‌তুনোর কধা পূরোণ গরং। মুই যিরূশালেম পৌইদ্যেনে কঙর্, ‘সিয়েনত্ মানুচ্চুনে বজত্তি গুরিবাক্,’ আর যিহূদার্ শঅরানি পৌইদ্যেনে কঙর্, ‘সিয়েনি আরঅ বানা অবঅ।’ মুই দেজর্ ভস্তর্ জাগায়ানি আরঅ বানেম্।

²⁷ মুই গভিন্ পানিগানরে কঙর্, ‘তুই শুগেই যাহ্; মুই তর্ গঙারানরে শুগেই ফেলেম।’

²⁸ মুই কোরস পৌইদ্যেনে কঙর্, তে মর্ গরক্; মুই যেনে হুজি অং তে সিয়েনি বেক্কানি গুরিবো। তে যিরূশালেম পৌইদ্যেনে কবঅ, ‘সিয়েন আরঅ বানা ওক্,’ আর উবোসনা-ঘরান পৌইদ্যেনে কবঅ, ‘সিয়েনর্ গড়াগান্ থিদেবর্ গরা ওক্।’ ”