যিশাইয় 42 - Chakma Bibleলগেপ্রভুর চাগর্ 1 লগেপ্রভু কোইয়্যেদে, “চাহ্, মঅ চাগর্বো, যিবেরে মুই সাহায্য গরং, মর্ বেঈ লোইয়্যে মানুচ্চো, যিবে উগুরে মুই হুজি। মুই তা উগুরে মঅ আত্মাগান্ দিম আর তে জাদ্তুনো ইদু ন্যায়বিচের্ আনিবো। 2 তে রঅ ন-ছাড়িবো বা দাঙর্ দাঙর্ গুরি কধা ন-কবঅ; তে পধে পধে তা মুয়ো রবো ন-শুনেব। 3 তে বুদি যেইয়্যে নলুন্ ন-ভাঙিবো আর মরা মরা গুরি জ্বলেদে বাবোত্যে ফিতেগানি ন-মারেব। তে গমেডালে ন্যায়বিচের্ গুরিবো। 4 পিত্থিমীত ন্যায়বিচের থিদেবর্ ন-অনা সং তে বল্পোজ্যে ন-অবঅ বা ভাঙি ন-পুরিবো। দূরো মানুচ্চুনে তা উগুমান বাজ্জেই থেবাক্।” 5 লগেপ্রভু গোজেনে আগাজ্ছান বানেইনে মিলি দিয়্যে; তে পিত্থিমী আর যিয়েনি জোর্মেয়্যে সিয়েনি বেক্কানি বিজেই দিয়্যে; তে সিদুগোর্ মানুচ্চুনোরে নিজেস্ দে আর সিদু আঢাউদো গুরিনে তারারে জিংকানি দে। তে কোইয়্যেদে, 6 মুই লগেপ্রভু তরে গমেডালে ডাক্যং; মুই তঅ আঢ্তান ধুরি রাগেম। মুই তরে রোক্ষ্যে গুরিম আর মঅ মানুচ্চুনোত্তে তরে এক্কান বেবস্থা ধোক্ক্যেন গুরিম আর অন্য জাদ্তুনোত্তে পহ্র ধোক্ক্যেন গুরিম। 7 তুই কান্ মানুচ্চুনো চোগ্কুন খুলি দিবে, জেলখানাত্তুন্ বন্দিগুনোরে উদ্ধোর্ গুরিবে আর সিদুগোর্ আন্ধার গাদত্ রাগেয়্যে মানুচ্চুনোরে নিগিলেই আনিবে। 8 “মুই লগেপ্রভু, ইয়েনই মঅ নাঙান্। মুই অন্যজনরে মর্ বাঈনী বা মূত্তিরে মর্ পাওনা নাঙ্ গিনেনাগান্ পেবাত্তে ন-দিম। 9 চাহ্, পুরোণি ঘটনাগানি ঘুদি যেইয়্যে আর ইক্কিনে মুই নুয়ো ঘটনাগানির্ কধা ফগদাং গুরিম; সিয়েনি ঘুদিবার আগেদি তমাইদু সিয়েনি জানাঙর্।” লগেপ্রভুর নাঙে নাঙ্ গিনেদে গান 10 ও সাগরত্ আঢাউদো গোজ্যেগুন্, সাগর ভিদিরে বেক্ প্রাণিগুন, ও দূরোর্ দেজ্ছানি আর সিয়েন ভিদিরে আদাম্মেগুন্, তুমি বেক্কুনে লগেপ্রভুর্ নাঙে এক্কো নূয়ো গীদ্ গঅ, পিত্থিমীর শেজ্ ধুজিত্তুন্ তার নাঙ্ গিনেদে গীদ্ গঅ। 11 ধূল্যেচর-চাগালা আর শঅরানিয়ে জোরে জোরে নাঙ্ গিনোক্; কেদরীয়গুনোর্ আদামানিয়ে সিয়েনি গোরোক্, শেলার মানুচ্চুনে হুজিয়ে গিদ্ গাদোক্, মুড়োগুনোর্ মাঢাত্তুন্ হুজিয়ে রঅ ছাড়দোক্। 12 তারা লগেপ্রভুর বাঈনী গোরোদোক্; দূরো দেজ্ছানি ভিদিরে তারে নাঙ্ গিনেনাগান্ ফগদাং গোরোদোক্। 13 এক্কো খেমতাবলা মান্জ্য ধোক্ক্যেন গুরি লগেপ্রভু নিগিলি এবঅ, তে যোদ্ধা ধোক্ক্যেন তা আওজ্ছানরে বাড়েই দিবো; তে রঅ ছাড়িনে যুদ্ধোর্ ডাগ্ দিবো আর শত্রুগুনো উগুরে জিদিবো। 14 মুই লগেপ্রভু ভালোক্ দিন জুরো গুরি এলুং; মুই শান্ত থেইনে নিজোরে দোঙেই রাগেয়োং। মাত্তর্ ইক্কিনি পুয়ো পুদেয়্যে মিলে ধোক্ক্যেন মুই রঅ ছাড়ঙর্, নিজেস্ ফেলাঙর্ আর ফবাঙর্। 15 মুই মুড়ো-মুড়িগুন গাজ্-বাজ্ নেইয়্যে গুরিম আর সেই জাগানর বেক্ গাজ্-বাজ্চুন শুগেই ফেলেম; মুই গাঙানিরে দ্বীপ বানেম্ আর পুয়োরুনোরে শুগেই ফেলেম্। 16 মুই কান্ মানুচ্চুনোরে তারার হবর্ ন-পেইয়্যে পধেদি নেযেম্, যে পথ্তান তারা হবর্ ন-পান সে পধেদি তারারে চালেম্। তারার্ আগে আগে মুই আন্ধারানরে পহ্র গুরিম আর সং নেইয়্যে জাগানরে সং গুরি দিম্। ইয়েনি বেক্কানি মুই গুরিম, ঘেচ্চেকগুরি গুরিম। 17 মাত্তর্ যিগুনে বানেয়্যে মূত্তি উগুরে বিশ্বেজ্ গরন, যিগুনে ছাজিনে ঢাল্যে মূত্তিগুনোরে কন্, তুমি আমার দেবেদা, মুই তারারে অমকদ লাজত্ ফেলেইনে ফিরেই দিম্। কান্ আর বহ্রা ইস্রায়েল 18 “ও বহ্রা মানুচ্চুন্, শুনো, আর কান্ মানুচ্চুন, তুমি রিনি চঅ। 19 মঅ চাগরুন বাদে কান্ আর কন্না? মর্ পাদেয়্যে দূত্তুনো ধোক্ক্যেন বহ্রা আর কন্না? মঅ উগুরে বিশ্বেজ্ গুরিয়্যে ধোক্ক্যেন কান্ আর কন্না? লগেপ্রভুর্ চাগরুনো ধোক্ক্যেন কান্ কন্না? 20 তুই ভালোক্কানি দেগিনেয়ো মনান্ ন-দুয়োর; তঅ কানান্ খুলো থেলেয়ো কিচ্চু ন-শুনোর্।” 21 উদ্ধোরর্ পরিকল্পনাত্তে লগেপ্রভু হুজি ওইনে তা উগুমানরে মহৎ আর বাঈনী গরে পারা গুরিলো। 22 মাত্তর্ এ মানুচ্চুনোর্ বেক্কানি নেযা ওইয়্যে আর লুদো ওইয়্যে, তারারে বেক্কুনোরে গাদত্ ফেলা ওইয়্যে আর জেলখানাত্ লুগেই রাগা ওইয়্যে। তারা কাড়ি লোইয়্যে জিনিজো ধোক্ক্যেন ওইয়্যে, তারারে উদ্ধোর্ গুরিয়্যে কনজন নেই। তারা লুদেয়্যে মাল্ ওইয়োন্; কনজনে ন-কন্, “তারারে ফিরেই দুয়ো।” 23 তমা ভিদিরে কন্না আমা কধা শুনিবো? আর যে সময়ান্ এজের্ সেই সময়ানত্তে কন্না মঅ কধানিলোই গমেডালে মনযোগ্ দিবো? 24 যাকোবরে কন্না লুদো হেবাত্তে দিয়্যে? আর ইস্রায়েলরে কন্না লুদেয়্যেগুনো আঢত্ তুলি দিয়্যে? তে কি লগেপ্রভু নয়, যিবের্ বিরুদ্ধে আমি পাপ গোজ্যেই? তারা তা পধেদি চলিবাত্তে ন-চান্, তা উগুমান্ ন-পালান্। 25 সেনত্তে তে তার জোল্জোল্যে রাগ্কান আর যুদ্ধোর দর্গরেপারাগান্ ইস্রায়েল উগুরে ঢালি দিয়্যে। সেক্কে সেই আগুনানে সিয়েনর্ চেরোকিত্তে জ্বুলি উদিলো, তো তে বুঝি ন-পারিলো; আগুনান্ তা কিয়্যেত্ বাঁজিলো, মাত্তর্ সিয়েনত্ তে মনান্ ন-দিলো। |
Copyright © 2021 Bangladesh Bible Society
Bangladesh Bible Society