যিশাইয় 39 - Chakma Bible

বাবিলোর রাজদূত্

¹ এ অক্তত্ বাবিলোর রাজা বলদনর পুয়ো মরোদক-বলদনে হিষ্কিয়র অসুগ্ আর গম্ অবার্ হবরান শুনিনে তাইদু চিদি আর বক্‌‌‌‍শিজ্ পাধেই দিলো।

² হিষ্কিয় হুজি ওইনে সেই দূত্‌‌তুনোরে গুজি ললঅ আর তার বেক্ ভান্ডালুনোত্ যিয়েনি এলঅ, অত্তাৎ সনা, রূবো, তুম্বাজ্ মজলা, মংগা মংগা তেল্ আর তার আত্যেরানি আর ধনভান্ডালর্ বেক্কানি তারে দেগেল। হিষ্কিয়র রাজঘরত্ বা তার পুরো রেজ্যগানত্ এবাবোত্যে কিজু ন-এলঅ যিয়েনি তে তারারে ন-দেগায়।

³ পরেদি ভাববাদী যিশাইয় রাজা হিষ্কিয় ইদু যেইনে পুযোর্ গুরিলো, “সেই মানুচ্চুনে কি কলাক্, আর কুত্তুন্ বা তারা এচ্চ্যন্?” হিষ্কিয় কলঅ, “তারা দূরো দেজত্তুন্, বাবিল দেজত্তুন্ এচ্চ্যন্।”

⁴ ভাববাদীবো পুযোর্ গুরিলো, “তারা তর্ রাজঘর ভিদিরে কি কি দেখ্যন্?” হিষ্কিয় কলঅ, “মর্ রাজঘরর্ বেক্কানি তারা দেখ্যন্। মঅ ধনভান্ডালর্ এবাবোত্যে কিজু নেইদ্যে যে যিয়েনি মুই তারারে ন-দেগাং।”

⁵ সেক্কে যিশাইয় হিষ্কিয়রে কলঅ, “বেগত্তুন্ খেমতাবলা লগেপ্রভু যিয়েনি কোইয়্যে সিয়েনি তুই শুন্।

⁶ লগেপ্রভু কোইয়্যেদে, এবাবোত্যে দিন এবঅ যেক্কেনে তর্ রাজঘরর্ বেক্কানি আর তর্ পুরোণি মানুচ্চুনোর্ জোমেয়্যে যিয়েনি এচ্চ্যে সং আঘে বেক্কানি বাবিলোত্ নেযা অবঅ, কনকিজু পোজ্যে ন-থেবঅ।

⁷ তর্ কয়েক্কো বংশধর, তর্ নিজো পুয়োবো, যিগুনোরে তুই জর্ম দুয়োচ্, তারা বাবিলো রাজঘরত্ আঢুর্ ওইনে সেবা-কাম গুরিবাক্।”

⁸ জোবত্ হিষ্কিয় কলঅ, “লগেপ্রভুর যে কধাগান্ তুই কলে সিয়েন গম্।” তে এ কধাগান কলঅ, কিত্তে তে মনে গোজ্যদে তা জিংকানিগানত্ তে সুগে শান্দিয়্যে আর গমেডালে থেই পারিবো।