যিশাইয় 38 - Chakma Bible

হিষ্কিয়র্ অসুগ্ অনা

¹ সে অক্তত্ হিষ্কিয় অসুগ্ ওইনে মরেদে ধোক্ক্যেন্ ওইয়্যে। সেক্কে আমোসর পুয়ো ভাববাদী যিশাইয় তাইদু যেইনে কলঅ, “লগেপ্রভু কোইয়্যেদে, তুই যেন তঅ ঘরানর্ বেবস্থা গুরি রাগাজ্, কিত্তে তুই মুরি যেবে, গম্ ন-অবে।”

² এ কধাগান শুনিনে হিষ্কিয় দেবাল ইন্দি মুয়োন ফিরেইনে লগেপ্রভু ইদু তবনা গুরিনে কলঅ,

³ “ও লগেপ্রভু, তুই ইদোত্ তুলি চাহ্, মুই তঅ মুজুঙোত্ কেধোক্ক্যেন্ গুরি বিশ্বেজি আর বেক্ মনান্ দিইনে আঢাউদো গোজ্যং আর তঅ চোগেদি যিয়েন ঠিগ্ সিয়েন গোজ্যং।” ইয়েন কোইনে হিষ্কিয় অমকদ কানাকুদি গরা ধুরিলো।

⁴ সেক্কে লগেপ্রভুর্ এ কধাগান যিশাইয় ইদু ফগদাং অলঅ,

⁵ তুই যেইনে হিষ্কিয়রে কঅ, তার্ পুরোণি মানুচ্ দায়ূদোর গোজেন লগেপ্রভু কোইয়্যেদে, মুই তর্ তবনাগান্ শুন্যং আর তঅ চোগো পানিগান দেখ্যং; মুই তর্ আয়ুগান আরঅ পনর বজর্ বাড়েই দিলুং।

⁶ আসিরিয়ার্ রাজার আঢত্তুন্ মুই তরে আর এ শঅরানরে উদ্ধোর্ গুরিম আর শঅরানরে রোক্ষ্যে গুরিবার বেবস্থা গুরিম।

⁷ “ ‘মুই যে মঅ কধামজিম্ কাম্ গুরিম সিয়েনর চিহ্নোগান্ অলঅ ইয়েন:

⁸ আহসর সিরিগানত্ ছাবাবো বেলান লগে যেত্তমান্ উজেই যেইয়্যে মুই সে ছাবাবো দশ পোইদ্যে পিজেদি ফিরেই নেজাঙর্।’ ” সেনত্তে বেলান লগে ছাবাবো আরঅ দশ পোইদ্যে পিজেদি ফিরি গেলঅ।

⁹ যিহূদার রাজা হিষ্কিয় তা অসুখ্‌‌‍‌‌কানত্তুন্ গম্ অবার পরেদি যিয়েন লেখ্যে সিয়েন অলঅ:

¹⁰ মুই কোইয়োঙে, “মঅ জিংকানির অদ্দেগত্ কি মত্তুন্ মরণ জাগানর দোরান ইন্দি সমা পুরিবো? আর মর্ বাদবাগি বজরুনোত্তুন্ কি মরে বঞ্চিত গরা অবঅ?”

¹¹ মুই কোইয়োঙে, মুই লগেপ্রভুরে জেদাগুনোর্ দেজত্ আর ন-দেগিম্; এ কয়েকদিন্যে সংসারত্ বজত্তিগুরিয়্যে মানুচ্চুনোরেয়ো আর মুই ন-দেগিম।

¹² ভেড়া গরগর্ তাম্বুলো ধোক্ক্যেন্ গুরি মঅ থেবার জাগায়ান্ তুলি ফেলেইনে মত্তুন্ সিয়েন নেযা অবঅ। মঅ আয়ুগান মুই তাতীগুনো ধোক্ক্যেন্ গুরি তাত্ কলান্দোই মিজেয়োং আর ইক্কিনে সিয়েনত্তুন্ তুই মরে ছাজি ফেলেবে। এক দিনো ভিদিরে তুই মরে শেজ্ গুরি দিবে।

¹³ বেন্যে পহ্‌র ন-অনা সং মুই নিজোরে শান্ত রাগেলুং। সিংহ ধোক্ক্যেন গুরি মঅ আড়ুন তুই ভাঙি দিলে; এক দিনো ভিদিরে তুই মরে শেজ্ গুরি দিবে।‌‍‌‌‌

¹⁴ চাতক, শালিক আর কঅ ধোক্ক্যেন মুই গির্‌‌‍‌‌‌গিজ্যে রলোই ডাগিলুং। উগুরেদি চাদে চাদে মঅ চোগ্‌কুন চুলোদন্। ও প্রভু, মুই দুঘ্ পাঙর্, তুই মঅ ভারান্ নেযা।‌‍‌‌‌

¹⁵ মাত্তর্ মুই কি কোম্? তে মঅ লগে কধা কোইয়্যে আর নিজে ইয়েন গোজ্যে। মঅ পরাণর এ দুঘ্‌কানত্তে মুই জিংকানির বাদবাগি বেক্ বজরুন নম্র ওইনে চুলিম।‌‍‌‌‌‌

¹⁶ ও প্রভু, তঅ কধা আর কাম্‌বোই দঅ মানুচ্ বাঁজি থান্; ইয়েনি ভিদিরে মঅ আত্মাগান জেদা থেবঅ। তুই মঅ কিয়্যেগান ফিরেই দিইনে মরে বাঁজিবাত্তে দিবে।

¹⁷ “ঘেচ্চেকগুরি মর্ ভালেদিত্তে মুই এ অমকদ দুঘ্‌‌কানি ভোগ গোজ্যং, মাত্তর্ ভস্তর্ গাদত্তুন তর্ কোচ্‌পানালোই তুই মরে উদ্ধোর্ গোজ্যস্। মর্ বেক পাপ্‌‌‌পানি তুই পিজেদি ফেলেই দুয়োচ্।

¹⁸ মরণ জাগায়ানে দঅ তরে বাঈনী গুরি ন-পারে, আর মরণানেয়ো তর্ নাঙ্-গিনেদে গান গেই ন-পারে। যিগুনে সে গাঢত্ লামন তারা তর্ এগেমর্ ভর্‌‌পুনঙান আজা গুরি ন-পারন্।

¹⁹ বানা জেদাগুনে, জেদাগুনে তরে নাঙ্ গিনোন্ যেধোক্ক্যেন এচ্চ্যে মুই নাঙ্ গিনোঙর্; বাব্‌পো তা পুয়োগুনোরে তর্ এগেম কধা কোই থায়।‌

²⁰ লগেপ্রভু মরে রোক্ষ্যে গোজ্যে, সেনত্তে আমা জিংকানির বেক্ দিনুনোত্ লগেপ্রভুর ঘরত্ তারর্ বাজনা সমারে আমি গান গেবং।”

²¹ ইয়েনর্ আগে যিশাইয় কোইয়্যেদে, “ডোমোর্‌‌‌লোই এক্কান সেক্ দিবার জিনিস্ বানেইনে তা ফোড়াবো উগুরে বাজেই দিলে তে গম্ অবঅ।”

²² সেক্কে হিষ্কিয় পুজোর্ গোজ্যেদে, “মুই যে লগেপ্রভুর ঘরত্ উদি পারিম্ সিয়েনর চিহ্নোগান কি?”