যিশাইয় 34 - Chakma Bible

জাদ্‌তুনো বিরুদ্ধে রায়‌

¹ ও জাতিগুন্, তুমি কায়-কুরে এজঅ, শুনো; ও মানুচ্চুন্, তুমি কান্ পাদঅ। পিত্‌থিমী আর সিয়েন ভিদিরে বেক্ মানুচ্চুনে শুনোদোক্; সংসার আর তা মাদিত্তুন্ বানেয়্যে মানুচ্চুনে শুনোদোক্।‌

² বেক্ জাদ্‌‌তুনো উগুরে লগেপ্রভু অমকদ বেজার্ ওইয়্যে; তারার বেক্ সৈন্যদলুনো উগুরে তার রাগ্‌কান রোইয়্যে। তে তারারে এক্কুবারে শেজ্ গুরি ফেলেব, ভস্তর্ আঢত্ তারারে তুলি দিবো।‌

³ তারার্ মুরি যেইয়্যে মানুচ্চুনোরে বারেদি ফেলেই দিয়্যে অবঅ। তারার্ মরা কিয়্যেনিত্তুন্ পজাবাজ্ নিগিলিবো আর তারার্ লোগানিলোই মুড়ো-মুড়ি ধোই যেবঅ।

⁴ আগাজর্ বেলান-চানান্-তারাগুন্ ভস্ত ওই যেবাক্ আর আগাজ্‌ছান বুদি থোইয়্যে কাবোজ্ ধোক্ক্যেন বুদি যেবঅ। যেবাবোত্যেগুরি আংগুর লুদি আর ডোমোর্ গাজত্তুন্ শুগুনো পাদানি পড়ি যায় সেধোক্ক্যেন্ গুরি বেক্ তারাগুন্ পড়িবাক্।

⁵ মঅ তলোয়ারান্ স্বর্গত্ পুরোপুরি গুরি যুক্কোল্; চঅ; বিচেরত্তে সিয়েন ইদোম উগুরে, অত্তাৎ যে মানুচ্চুনোরে মুই ভস্তর্ অভিশাব তলেদি রাগেয়োং তারা উগুরে লামি এজের্।

⁶ লগেপ্রভুর তলোয়ারানে লো-লোই গাট্যে; সিয়েন তেল্‌‌লোই নাঢা যেইয়্যে। সেই লো-নি ভেড়া ছাগল ছঅ আর ছাগল লো ধোক্ক্যেন আর তেলানি ভেড়া ছাগল বুগো তেল ধোক্ক্যেন্, কিত্তে লগেপ্রভু বস্রাত এক্কো উৎসর্বর অনুষ্ঠান গুরিবো আর ইদোমত্ ভালোক্কুনোরে কাবি ফেলা অবঅ।

⁷ সিগুনো লগে ঝার গোরু, বলদ গোরু আর দাঙর্ দাঙর্ গোরু কাবা অবঅ। তারা দেজ্‌ছান লো-লোই ভিজি যেবঅ, আর তেলানি ধূল্যেলোই নাঢা যেবঅ।‌

⁸ ইয়েনি অবঅ, কিত্তে হেনা সুজিবার্ লগেপ্রভুর এক্কো দিন আঘে, সিয়োনর্ পক্ক ওইনে সাজা দিবার্ এক্কো সময় আঘে।

⁹ ইদোমর্ পানি গঙারুন্ মাত্যে তেল্‌লোই ভুরি যেবঅ, সিয়েনর্ ধূল্যেগানি অবঅ গন্ধক্‌‌‌কোই ভরা, সেনত্তে দেজর্ মাদিগান অবঅ জোল্‌জোল্যে মাত্যেতেল্।‌

¹⁰ দিনে রেদে কনদিন্অ সিয়েন ন-মুড়িবো; জিংকানিবর্ সিয়েনত্তুন্ ধূমো উদিবো। বংশর পর বংশ ধুরিনে সিয়েন খালি ওই পড়ি থেবঅ; কনজনে সিয়েন ভিদিরেদি আর্ কনদিন্অ ন-যেবাক্।

¹¹ ধূল্যেচর-পেজা, কুদুক্-কাদাক্, হুতুম পেজা আর গাঙ্ কবাগুনে সেই দেজ্‌‌চান গজক্ গুরিবাক্ আর সিয়েনত্ বজত্তি গুরিবাক্। লগেপ্রভু ভেজাল্যে মাবর্ দুড়ি আর শূন্যতার্ ওলনদুড়ি ইদোম উগুরে বিজেই দিবো।

¹² রেজ্য চালেবাত্তে কনঅ দাঙর্ পোজিশন মানুচ্ বা কনঅ শাজন্‌গুরিয়্যে ন-থেবাক্।

¹³ কাদাগাজে সিয়েনর্ দাঙর্ দাঙর্ ঘরানি নাঢা যেবঅ, আর তাম্বুলানি নাঢা যেবঅ বিছুটি আর কাদাঝুব্‌পোই। সে দেজ্‌‌চান অবঅ শিয়েল আর উটপেখ্‌কুনোর থেবারজাগা।

¹⁴ ধূল্যেচর-প্রাণীগুনে শিয়েলুনো লগে থেবাক্ আর ঝার ছাগলুনে এক্কো আর এক্কোরে ডাগিবাক্। রেদোত্ ঘুরি বেড়েয়্যে পেত্নী সিদু বজত্তি গুরিবো; সিদু তার জিরেবার জাগায়ান্ তে তোগেইনে পেবঅ।

¹⁵ পেজাবো বাহ্ বানিনে সিয়েনত্ বদা পাড়িবো, সে পরেদি বদা ফাদিনে তা ডুয়োগান্ ছাবালোই তা ছঅগুনোরে এক জাগাত্ গুরিবো। সিয়েনত্ চিলুনে যার্ যার্ সমাজ্যেলোই এগত্তর্ অবাক্।

¹⁶ তুমি লগেপ্রভুর বোইবোত্ তোগেই চঅ আর পড়। সিয়োত্ লেগা আগেদে-ইগুনোত্তুন্ এক্কোয়ো আজিই ন-যেবঅ, এক্কোর্‌অ সমাজ্যের্ অভাব ন-অবঅ; কিত্তে মঅ মুয়োদি লগেপ্রভু সেই উগুমান্ দিয়্যে, আর তা আত্মাগানে তারারে একলগে এগত্তর্ গুরিবো।

¹⁷ তে পোরোক্ক্যে গুরিনে আর মাবেদে দুড়িলোই মাবিনে সে জাগায়ান তারারে ভাগ্ গুরি দিবো। সিয়েনি জিংকানিবর্ তারার্ থেবঅ; বংশর্ পর বংশ ধুরি তারা সিয়েনত্ বজত্তি গুরিবাক্।