যিশাইয় 33 - Chakma Bible

দুদ্দজা আর সাহায্য

¹ ও ভস্তগুরিয়্যে, তরে অভিশাব্ দুয়োং! তুই ভস্ত ন-ওইনেয়ো ভস্ত গোজ্যস্; তঅ উগুরে বেঈমানি গরা ন-অয় তো তুই বেঈমানি গোজ্যস্। ভস্তর্ কামানি থুম্ গুরিলে তরে ভস্ত গরা অবঅ; বেঈমানি গরানা থুম্ অলে তঅ উগুরে বেঈমানি গরা অবঅ।

² ও লগেপ্রভু, আমা উগুরে দোয়্যে গর্; আমি তত্তে বাজ্জেই আগিই। পত্তিদিন বেন্যে অক্তত্ তুই মঅ মানুচ্চুনোর বল্ অ, আর দুঘো সময়োত্ আমার উদ্ধোরগুরিয়্যে অ।

³ তঅ মুয়ো রবোলোই মানুচ্চুনে ধেই যান্; তুই উদিলে জাদ্‌তুনে ছিদি পড়ন্।‌

⁴ পুগ্-যুগ্‌‌কুনে যেবাবোত্যেগুরি শোজ্যগানি বর্‌‌বাত গরন্, সেবাবোত্যেগুরি ও ভস্ত গুরিয়্যেবো, তমা পযাপিরানিয়ো লুদো অবঅ। মানুচ্চুনে এক ঝাক্ পুগ্-যুগ ধোক্ক্যেন সিগুনো উগুরে এইনে পড়িবাক্।

⁵ লগেপ্রভু কত্তমান্ দাঙর্! তে স্বর্গত্ বজত্তি গরে; তে সিয়োনানরে ন্যায়বিচের আর সততালোই ভর্‌পুনোং গোজ্যে।

⁶ যুগে যুগে তেয়ই তারার্ রোক্ষ্যে গরানা, উদ্ধোর্, জ্ঞান আর বুঝিবার খেমতার ভান্ডাল্ ওই এজের্। লগেপ্রভু উগুরে ভোক্তিবলা দরান্ অলঅ তারার্ ধন।

⁷ চঅ, তারার্ সাহসী মানুচ্চুনে পধে পধে কানদন্; সুগ্-শান্দিত্তে পাদেয়্যে দূত্‌তুনে অমকদ কানাকুদি গরদন্।

⁸ রাজপথ্‌তানি খালি, কনঅ মান্‌জ্যে পথ্‌তান ইন্দি ন-যাদন্। চুক্তিবো ভাঙি যেইয়্যে; শঅরানিরে কনঅ দাম দিয়্যে ন-যার্ আর কাররে সর্মান গরা ন-অর্।

⁹ দেজ্‌চানে আবিলেচ্ গরের্ আর শুগেই যার্, লেবাননে লাজ্ পেইয়্যে আর শুগেই যার্, শারোণানে ধূল্যেচর-চাগালা ধোক্ক্যেন ওইয়্যে আর বাশন আর কর্মিলো বেক্ গাজ পাদানি ঝুরি পড়ের্।

¹⁰ লগেপ্রভু কোইয়্যেদে, “এবেরা মুই উদিম্, এবার্ মুই সর্মানিত্ ওম্, এবেরা মর্ বাঈনীগান ফগদাং অবঅ।

¹¹ তুমি পেদত্ ধুরিবেদে তুজ্ আর জর্ম দিবেদে দার্‌‌বো। তমা নিজেস্‌‌চুনে আগুনো ধোক্ক্যেন গুরি তমারে পুড়ি ফেলেব।

¹² মানুচ্চুন অবাক্ পুড়ি ফেল্যে চিবিদি পাত্তর ধোক্ক্যেন আর কাবি ফেল্যে আগুন দিয়্যে কাদা ঝুবো ধোক্ক্যেন্।”

¹³ তুমি যিগুনে দূরোত্ আগঅ, মুই যিয়েন গোজ্যং সিয়েন শুনো; তুমি যিগুনে কায়-কুরে আগঅ মঅ খেমতাগানরে স্বিগের্ গুরি নেযঅ।

¹⁴ সিয়োনর পাপী মানুচ্চুনে অমকদ দোরেয়োন্; গোজেন উগুরে ভোক্তিনেইয়্যে মানুচ্চুনোর গির্‌গিরেনি ধোজ্যে। তারা কদন্, “আমা ভিদিরেত্তুন্ কন্না পুড়ি ফেলেয়্যে আগুনো সমারে থেই পারে? কন্না জনম্ ভরা জোল্যে আগুনো সমারে বজত্তি গুরি পারে?” ‌‌

¹⁵ তেয়ই বজত্তি গুরি পারে, যে মানুচ্চো গমেডালে আঢাউদো গরে আর যিয়েন ঠিগ্ সিয়েন কয়, যে মানুচ্চো জুলুম গুরিনে লাভ্ পানাগান ঘিনাই আর ঘুষ্ নেযানাত্তুন্ আঢ্‌তান সোরেই রাগায়, যে মানুচ্চো খুনোর্ কুজুরোমির্ কধা শুনোনাত্তুন্ কানানি নাঢি রাগায় আর বজং কাম গরদে দেগানাত্তুন্ চোগ্‌‌‌‌‌কুন নাঢি রাগায়। ‌‌

¹⁶ সে মানুচ্চো গমেডালে বজত্তি গুরিবো আর তার আশ্রয় অবদে মুড়োমুড়ি ঘরান্। তারে হানার্ যগান্ দিয়্যে অবঅ আর তে হামাক্কায় পানি পেবঅ।

¹⁷ তঅ চোগ্‌কুনে রাজারে তার সয়সাগর ভিদিরে দেগিবাক্, আর দেগিবাক্ এমন্ এক্কান দেজ্ যিয়েনর দুযি বোউত্ দাঙর্।‌‌‌

¹⁸ তর্ চিন্তে ভিদিরে থেবঅ আগর্ সেই অমকদ দর্‌গরেপারা কধা। তুই মনে গুরিবে, “কুদু সেই ইজেব-গুরিয়্যেবো? কুদু সেই মানুচ্চো, যে কর্ তুলিদো? কুদু ঘরর কাম্-পেইয়্যে সে কামগুরিয়্যেবো?”

¹⁹ সেই দেমাগ-ভরা মানুচ্চুনোরে তুই আর্ ন-দেগিবে; ন-দেগিবে সেই ন-জান্যে ভাষা কোইয়্যে মানুচ্চুনোরে, যিগুনোর্ কধা অদ্ভুদ আর বুঝো ন-যায়।

²⁰ আমার বেক্ পরব্‌পুন পালেয়্যে শঅর্ সিয়োন ইন্দি রিনি চাহ্। তঅ চোগ্‌‌কুনে দেগিবাক্ যিরূশালেমানরে, এক্কান সুগ্-শান্দিয়্যে ভরা থেবার জাগানরে, এক্কান তাম্বুলোরে যিয়েন্ সরা ন-অবঅ। তার খুদোগুন্ কনদিন্অ তুলো ন-অবঅ আর সিয়েনর কনঅ দুড়িয়ো ন-ছিনিবো।

²¹ সিয়েনত্ খেমতাবলা লগেপ্রভু আমা ভালেদিত্তে থেবঅ। সিয়েনত্ দাঙর্ দাঙর্ গাঙ্ আর বিল থেবঅ। কনঅ পাঙেয় নৌকো সিয়েনিত্ ন-চলিবো; কনঅ দরমর জাহাজ্অ সিয়েনি উগুরেদি ন-যেবঅ।

²² লগেপ্রভুই আমার ন্যায়বিচেরক্ আর আমার সুদোম্ দিয়্যে; লগেপ্রভুই আমার রাজা, তেয়ই আমারে রোক্ষ্যে গুরিবো।

²³ ইক্কিনে তমা পাল হেবাগুন্ শস্ ওই যেইয়োন্; সিয়েনত্ মাত্তুলুন দরমর গুরি আক্‌‌সোয়ে নেই, পালান্অ টাঙা ন-যায়। পরেদি লুদেয়্যে বোউত্ পযাপিরা ভাগ্ গরা অবঅ; এমন্ কি, লেং-আদুড়ুনেয়ো লুদেয়্যে পযাপিরা নেযেবাক্।

²⁴ সিয়োনত্ বজত্তিগুরিয়্যে কনজনে ন-কবাক্, “মুই অসুগ্।” যিগুনে সিয়েনত্ বজত্তি গরন্ তারার পাপ্‌‌পানি খেমা গরা অবঅ।