যিশাইয় 32 - Chakma Bible

ন্যায়র্ রেজ্য

¹ চঅ, এক্কো রাজা গমেডালে রাজাগিরি গুরিবো আর শাজন্‌গুরিয়্যেগুনে ন্যায়বিচের্ গুরিবাক্।

² তারাত্তুন্ পত্তি জনে অবাক্কে যেন বোইয়্যেরত্তুন্ পোল্যেয়্যে জাগা আর ঝড়ত্তুন্ আশ্রয়জাগা, যেন ধূল্যেচরত্ গঙার পানি আর রোদ্ পোজ্যে ভূইয়োত্ দাঙর্ পাত্তর ছাবা।

³ সেক্কে যিগুনোর চোগ্‌কুনে দেগিবাক্ তারা চোগ্‌কুন নাঢা ন-যেবাক্, আর যিগুনোর কানানিয়ে শুনে তারা শুনিবাক্।

⁴ যিগুনে চিদে-চজ্জা ন-গুরিনে কাম্ গরন্ তারা জ্ঞান লাভ গুরিবাক্, আর কনত্ বাস্যেগুনে গমেডালে কধা কবাক্।

⁵ চিগোন মন মানুচ্চনোরে আর কুয়ো ন-অবঅ গম্ মানুচ্, বা সতানুনোরেয়ো আর কুয়ো ন-অবঅ সর্মানি মানুচ্,

⁶ কিত্তে চিগোন মন মানুচ্চো ভান্ন্যেই কধা কয় আর তা মনান্ ভান্ন্যেয় পৌইদ্যেনে লুদুপুদু গুরি থায়। তে জঘন্য জঘন্য কাম গরে আর লগেপ্রভু পৌইদ্যেনে অগমানর্ কধা ছড়ায়। তে এমন্ বেবস্থা গরে যেনে পেট্ পুজ্যে মানুচ্চুনে হানা ন-পান্ আর পানি তিরেস্ পেইয়্যে মানুচ্চুনে পানি ন-পান্।

⁷ বদ্‌মাইশচুনোর কামর ধারাবো বজং; এমন্ কি, অভাবীগুনোর্ কোজোলীগানি যগাজ্যে অলেয়ো তে মিজে কধালোই তারারে ভস্ত গুরিবাত্তে বজং ফন্দি গরে।

⁸ মাত্তর্ গম্ মান্‌জ্যে গম্ পরিকল্পনা গরন্ আর তার গম্ কামানিলোই তে থির্ থায়।

যিরূশালেমর্ মিলেগুন

⁹ ও আরামত্-থেইয়্যে মিলেগুন্, তুমি মঅ কধানির্ বাধ্য অ। ও চিদে-চজ্জা নেইয়্যে মিলেগুন্, তুমি মঅ কধানি শুনো।

¹⁰ ও চিদে-চজ্জা নেইয়্যে মিলেগুন্, এক বজরত্তুন্ কিজু বেশ্ সময় অলে পরেদি তুমি দরে গির্‌‌গিরেবা, কিত্তে আংগুরুন বর্‌বাত ওই যেবাক্, ফল পাড়িবার সময় ন-এবঅ।

¹¹ ও আরাম গুরি-থেইয়্যে মিলেগুন আর চিদে-চজ্জা নেইয়্যে মিলেগুন, তুমি দরে গির্‌‌গিরো; তমা কাবড়-চুগোড়ানি খুলিনে কমরত্ বস্তা পাদা পিনো।

¹² চোগ্ জুড়োইদ্যে খেত্ আর গুলো-গুলিলোই ভরা আংগুর লুদিগানিত্তে তমা বুগ্‌কুন্ চাবেড়েয়ো।

¹³ কাদাগাজে আর কাদাঝুব্‌পোই ভরা মঅ মানুচ্চুনোর্ দেজ্‌ছানত্তে বুগ্ চাবড়। অয়, রঙ্গ-ফুত্তিলোই ভরা ঘরানি আর কিজিক্-কাজাগে ভরা শঅরত্তে বুগ্ চাবড়।

^14-15 যেদক্কন্ সং উগুরেত্তুন্ পবিত্র আত্মাগানরে আমা উগুরে ঢালি দিয়্যে ন-অয় আর ধূল্যেচর-চাগালাগান বোল্‌‌বোল্যে জাগা ন-য় আর বোল্‌‌বোল্যে জাগায়ান ঝার ধোক্ক্যেন মনে ন-অয়, সেদক্ দিন সং ঘরত্ আর যাগুলুগে ভরা শঅরত্ কনজনে ন-থেবাক্, আর মুড়োগুন, চুগিদার ঘরানি ফেলা যেইয়্যে জাগা অবঅ। সিয়েনি ঝার্‌বো গাধাগুনোর হুজির্ জাগা আর য়েমান পালুনোর্ চড়িবার্ জাগা অবঅ।‌

¹⁶ সে পরেদি ধূল্যেচর চাগালাত্ বজত্তি গুরিবো ন্যায়বিচের্ আর বোল্‌‌বোল্যে জাগানত্ বজত্তি গুরিবাক্ সততাগান্।

¹⁷ সততাগানর্ ফল অবঅ শান্তি, আর সিয়েনর্ কারনে জনমত্তে থিদেবর্ আর নিশ্চয়তাগান এবঅ।

¹⁸ মঅ মানুচ্চুনে সুগে-শান্দিয়্যে থেবার জাগানত্, গমেডালে ঘর-বাড়ি আর যাগুলুক্ নেইয়্যে জিরেবার্ জাগানত্ বজত্তি গুরিবাক্।

¹⁹ শিলোঝড়ে ঝারর্ গাজ্‌‌চুনোরে মাদিত্ ফেলেই দিবো আর শঅরানি পুরোপুরি মাদি লগে মিজেইনে সং সং ওই যেবঅ।

²⁰ মাত্তর্ পত্তি গঙার পারত্ বীজ্ লাগেইনে আর তমা গোরু আর গাধাগুনোরে গমেডালে চড়িবাত্তে দিইনে তুমি সুগি অবা।